Manase pàrɩ̀ tə yoo
33
1 Manase yà jə bɩna fugə də bələ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna finu də bonu Zwerizalɛmə nə. 2 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tʋn dwíə́ nəkaran* tə tʋtʋnkʋkwɩnan tə ba yà nə tʋŋa, kʋ pa Ba-Yígúrə́-Jə-Tiu dɩŋa ba, ʋ yá lʋʋ nii tə nə, ʋ pa Yɩzərayɛlə lɩ̀à nə. 3 Ʋ pìí ʋ lwà jwəŋə dədwələn tə, ʋ nyɩna Ezekɩasə yà nə pɩn tə nyʋn lá. Ʋ lwà jwəŋə bwálá ʋ pa woŋwanan Baalə* nə, ʋ fwa woŋwanʋ Aswera* daceli, yá ʋ tʋa ʋ nadwana yuu, ʋ pa dun lanworu tə wa wiəna tə mama nə. 4 Ʋ lwə̀ joŋi bwálá Ba-Yígúrə́-Jə-Tiu dìə̀ tə wa, Ba-Yígúrə́-Jə-Tiu yà nə swɩ̀n ka yoo, ʋ wʋ́: «Kʋ yɩ Zwerizalɛmə wa nə, à wá pa à yɩrɩ ya, máŋá mama wuuu.» 5 Ʋ lwə̀ joŋi bwálá ʋ pa lanworu tə wa wiən tə mama nə, Ba-Yígúrə́-Jə-Tiu dìə̀ tə dəwee bələ tə wa. 6 Ʋ tətə pɩn ba dɩ ʋ bɩ̀á mən wa, ʋ ma fwa jwəŋə Hinomə vara tə wa. Ʋ yà twarɩ mɩmɩnan, ʋ ma lwarɩ yìə̀n, ʋ tʋŋa zoni də cɩrɩ yìə̀n. Ʋ tún lɩ̀à, ʋ pa ba boŋə tɩga nii, ba ga swɩ̀n jwɩan yìə̀n. Ʋ tʋn kʋ tə nə lwara Ba-Yígúrə́-Jə-Tiu yáá con, máŋá mama, ʋ ma zɩ̀n Ba-Yígúrə́-Jə-Tiu lɩŋa. 7 Ʋ tə pɩn ba sà woŋwanʋ, ʋ tún Yɩɩ dìə̀ tə wa, Yɩɩ nə swɩ̀n ka yoo Davidə də ʋ bìú Salʋmʋn con, ʋ wʋ́: «Mə dìə̀ ka tə nə à kúrí Zwerizalɛmə nə, Yɩzərayɛlə dwíə́ tə mama wa, sə à yɩrɩ tə ya lá máŋá mama wuuu. 8 Yɩzərayɛlə lɩ̀à nə zìlí à nii yìə̀n tə mama, à nə pɩn à tʋtʋnʋ Moyizə nə, də yìə̀n tə à nə pɩn ʋ pʋ́pʋ́nɩ́ ʋ tún sə ba tʋn, də yìə̀n tə à nə bɩrɩ sə tə tʋn, à kʋ́ʋ̀ bá pa ba va yiŋʋnɩ, ba yá lʋʋ nii tə nə, à nə pɩn ba nɩbara-ba nə.» 9 Yá pɩ̀ʋ́ Manase pɩn Zwida dwíí tə də Zwerizalɛmə tɩ̀án jɛ́n, kʋ pa ba tʋn yolwana ba doni dwíə́ nəkaran tə, Ba-Yígúrə́-Jə-Tiu nə cʋ̀gʋ̀, Yɩzərayɛlə lɩ̀à yáá con. 10 Ba-Yígúrə́-Jə-Tiu swɩ̀n pɩ̀ʋ́ Manase də ʋ lalʋʋ tə con, yá ba wà ʋ con tan.11 Ba-Yígúrə́-Jə-Tiu dàń pɩn Asiiri pɩ̀ʋ́ kwatara yáá tɩ̀án tə bà, ba ta kʋ̀ʋ̀ də ba. Ba jɩn pɩ̀ʋ́ Manase, ba kə gwalɩ ʋ nipaa wa, ba ga vwa wá də cɩnɩan banzala, ba ja va Babɩlɔnə. 12 Manase càn tə máŋá wa, ʋ bon ʋ kə Ba-Yígúrə́-Jə-Tiu nə, ʋ nə yɩ ʋ Yɩɩ, ʋ ga mun ʋ tɩ̀àn zənzən Yɩɩ yáá con, ʋ nə yɩ ʋ nyɩna-ba Yɩɩ. 13 Ʋ lòrì sə Yɩɩ dəri ʋ yinəgə, yá Yɩɩ sɛ̀ ʋ le wá, ʋ ga pa ʋ pìí ʋ bà Zwerizalɛmə, ʋ payuu tə wa. Kʋ nə zɩgɩ kʋ máŋá tə wa, Manase lwarɩ də Ba-Yígúrə́-Jə-Tiu cɩcɩ nə yɩ Yɩɩ.
14 Kʋ kwa nə, Manase lwə̀ biritaŋʋ, kʋ yuu nə dara də tɩa, Davidə sadiyuu tə kwa con. Biritaŋʋ tə twá Gihon nabuliyii tə yɩɩ yizwɩa con, kʋ va Sedəron vara tə vàn con, kʋ kɩkarɩ Ofɛlə sanii tə, kʋ va kʋ yí Filə mimii tə. Ʋ ken kwatara yáá tɩ̀án Zwida tɩan tə mama wa, tə nə lwə̀ tə kɩkarɩ də biritaŋʋ.
15 Ʋ lɩ dwíə́ nəkaran yɩa tə mama, də woŋwanʋ tə ba nə sə̀, ʋ yà nə ken Ba-Yígúrə́-Jə-Tiu dìə̀ tə wa. Ʋ tə pɩn ba gwɛrɩ woŋwanan jwəŋə bwálá tə mama, ʋ yà nə lwə̀ Yɩɩ dìə̀ tə paan tə yuu wa, də Zwerizalɛmə wa. Ʋ dɩlɩ tə kɩkaran tə tɩʋ tə kwa con. 16 Ʋ pìí ʋ lwà Ba-Yígúrə́-Jə-Tiu joŋi bwálɩ́ tə, ʋ fwa nimarʋ jwəŋə*, də jwii kənu jwəŋə*, ʋ pa Yɩɩ nə. Ʋ tə pɩn nii Zwida dwíí tə nə, sə ba tʋn ba pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 17 Lalʋʋ tə yà tə fwa jwəŋə, jwəŋə dədwələn tə yuu, yá tə dàń nə yɩ ba fwa ba pɩn Ba-Yígúrə́-Jə-Tiu cɩcɩ nə, ʋ nə yɩ ba Yɩɩ.
18 Ba pʋ́pʋ́nɩ́ Manase tʋ̀tʋ̀nán tə gɩganɩ ba tún Yɩzərayɛlə lɩ̀à pɛ̀gá yìə̀n sagɩ tə wa. Ba pʋ́pʋ́nɩ́ yɩjʋnɩ tə, ʋ nə jʋn ʋ Yɩɩ tə, də sʋ̀ràn tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə pɩn ʋ nii sʋ̀sʋ̀nà swɩ̀n ʋ con, ba tún sagɩ təntə wa. 19 Ba pʋ́pʋ́nɩ́ ʋ yɩjʋnɩ tə, də nətʋ Yɩɩ nə le wá, ʋ cʋna tə, də nətʋ ʋ nə vɩga Yɩɩ nii, də bwálá tə ʋ nə lwə̀ jwəŋə dədwələn, ʋ kə woŋwanʋ Aswera daceli, də woŋwanan ba nə sə̀, tə wa, ba tún Hozayi tʋ̀tʋ̀nán sagɩ tə wa. Ʋ tʋn yìə̀n təntə, máŋá tə wa, ʋ nə wà ʋ tɩ̀àn mun Yɩɩ yáá con. 20 Manase tɩga, yá ba gùrì wá ʋ sàń wá, ʋ nyɩna-ba con, ba nə dí yáá ba tɩ. Ʋ bìú Amon nə dí pàrɩ̀ tə ʋ yuu nə.
Amon pàrɩ̀ tə yoo
21 Amon yà jə bɩna sapʋa də bələ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna bələ Zwerizalɛmə nə. 22 Ʋ tʋn kʋ tə nə lwara Ba-Yígúrə́-Jə-Tiu yáá con, ndə ʋ nyɩna Manase nə. Ʋ fwa jwəŋə ʋ pa woŋwanan tə mama nə, ʋ nyɩna tə nə fwa, ʋ ga pa tə dun. 23 Yá ʋ mʋ̀ wà ʋ tɩ̀àn mun Ba-Yígúrə́-Jə-Tiu yáá con, ndə ʋ nyɩna Manase nə mun ʋ tɩ̀àn nətʋ. Amon mʋ̀ tʋn cʋna, ʋ doni ʋ nyɩna tə. 24 Pɩ̀ʋ́ Amon tʋ̀tʋ̀nà tə tʋn pwìí bələ yoo ʋ yɩra, yá ba gʋa wá ʋ dìə̀ wa. 25 Yá Zwida lʋʋ lɩ̀à tə gʋa lɩ̀à tə mama, ba nə tʋn pwìí bələ yoo tə pɩ̀ʋ́ Amon yɩra. Yá ba dàń tún ʋ bìú Zozɩasə, sə ʋ də́ pàrɩ̀ tə ʋ yuu nə.