Ezekɩasə bwe Yɩɩ nii sʋ̀sʋ̀nʋ̀ Ezayi
37
1 Máŋá tə pɩ̀ʋ́ Ezekɩasə nə nì sʋ̀ràn təntə, ʋ kàrɩ́ ʋ gànàn, ʋ tì ganlɔɔ ʋ piri, ʋ ga va Ba-Yígúrə́-Jə-Tiu dìə̀ tə wa. 2 Ʋ tʋn Eliyakimə, ʋ nə ywàŋá padiə tə yuu, də Swebəna, ʋ nə pʋ́pʋ́nɩ́ saga tə, də Yɩɩ joŋwana nəkwɩna tə, Yɩɩ nii sʋ̀sʋ̀nʋ̀ Ezayi con, ʋ nə yɩ Amɔsə bìú. Bara təntə də yà piri ganlwaran. 3 Ba swɩ̀n Ezayi con, ba wʋ́: «Ezekɩasə swɩ̀n də zə̀n dɩɩn tə yɩ pucʋnɩ dɩɩn, kʋ yɩ càn dɩɩn, kʋ yɩ cavɩra dɩɩn. Kʋ yɩ ndə kapuə lɩrʋ máŋá nə yí, yá ʋ ga ba dɩ̀àn jə sə ʋ lɩra. 4 Kʋ wàá də Ba-Yígúrə́-Jə-Tiu, ʋ nə yɩ n tíú Yɩɩ nì lìù tə nə daa Asiiri pɩ̀ʋ́ nə sʋ̀ràn tə, ʋ yuu-tiu Asiiri pɩ̀ʋ́ nə tʋn wá, ʋ pa ʋ bà ʋ twɩn Yɩɩ tə, ʋ nə nəŋə. Yá kʋ wàá də Ba-Yígúrə́-Jə-Tiu, ʋ nə yɩ n Yɩɩ tə wá kə wá càn wa, sʋ̀ràn təntə yɩrɩ ʋ nə nì. N dàń lòrí Yɩɩ n pa ʋ lalʋʋ tə gɩganɩ tə nə.»5 Pɩ̀ʋ́ Ezekɩasə tʋ̀tʋ̀nà tə vəli ba yí Ezayi. 6 Yá Ezayi swɩ̀n ba con, ʋ wʋ́: «Nəŋə kʋ tə á nə wá swɩ̀n á yuu tíú tə con: Ba-Yígúrə́-Jə-Tiu swɩ̀n, ʋ wʋ́: “Dàn ká pa fən ja mʋ́, Asiiri pɩ̀ʋ́ tʋ̀tʋ̀nà tə sʋ̀ràn tə yɩrɩ ba nə swɩ̀n ba ma twɩn nə. 7 À wá pa ʋ nì ŋwɛn, tə nə wá pa ʋ pìí ʋ va ʋ lʋʋ nii wa, yá à wá pa ba gʋ wá lá nə də kwatara sɩ̀ʋ́.”»
Senakeribə nɛɛ bələ nii nipɛrɩ
8 Lìù tə nə daa Asiiri pɩ̀ʋ́ nə nì də, ʋ yuu-tiu tə nan Lakiswə, ʋ va ʋ wulə ʋ tɛ Libəna tɩ̀án. Ʋ ma va ʋ yí wá Libəna nə. 9 Asiiri pɩ̀ʋ́ tə dàń nì ŋwɛn, də Kuswə pɩ̀ʋ́ Tiraka bɩ̀àn sə ʋ ta kʋ̀ʋ̀ də wá. Asiiri pɩ̀ʋ́ tə ma kʋ́ʋ̀ tʋn tʋntʋna nɛɛ bələ nii nə, 10 sə ba swɩ̀n sʋ̀ràn tə tə Zwida payuu pɩ̀ʋ́ Ezekɩasə con, ʋ wʋ́: «Dàn ká pa n Yɩɩ tə, n nə jələ ʋ yuu wa gɩgarɩ mʋ́, ʋ pa n bʋ́n də, ʋ wá cɩ̀ à mʋ̀ Asiiri pɩ̀ʋ́ yáá nə, sə à dàn ká də́ dɩ̀àn Zwerizalɛmə yuu wa. 11 N tətə nì kʋ tə, Asiiri pɛ̀gá tə nə ma tʋn lʋʋ níə́ tə mama: Ba cʋ̀gʋ̀ lʋʋ níə́ tə mama mɩ́ámɩ́án. N mʋ̀ dàń bʋŋa də, á mʋ̀ wá wànɩ́ á jon á tɩ̀àn naaa? 12 Máŋá tə à nɩbara-ba nə cʋ̀gʋ̀ Gozan tɩ̀án, də Haran tɩ̀án, də Resɛfə tɩ̀án, də Edɛnə dwíí tə nə wulə Telasarə nə, dwíə́ təntə woŋwanan tə wànɩ́ tə jon ba naaa? 13 Hamatə tɩ̀án, də Arəpadə tɩ̀án, də Sefarəvayimə tɩ̀án, də Hena tɩ̀án, də Yɩva tɩ̀án pɛ̀gá tə wulə yə̀n?
Ezekɩasə yɩjʋnɩ
14 Ezekɩasə jon sagɩ tə tʋntʋna tə con ʋ kàrɩ̀, ʋ ga va Ba-Yígúrə́-Jə-Tiu dìə̀ tə wa, ʋ súrí sagɩ tə, ʋ bɩrɩ Ba-Yígúrə́-Jə-Tiu nə. 15 Ezekɩasə lòrì Ba-Yígúrə́-Jə-Tiu, ʋ wʋ́: 16 «Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ, n mʋ̀ Yɩɩ tə nə də́ pàrɩ̀ Yɩɩ sàń wonəŋə yuu wa! N mʋ̀ cɩcɩ nə yɩ tɩa yuu payun tə mama Yɩɩ. N mʋ̀ nə fwa lanworu də tɩa. 17 Ba-Yígúrə́-Jə-Tiu, à lòrì sə n guni n zɩɩn, n cʋgʋ zəni, n ga súrí n yɩ́á, n ywàń zəni. Cʋgʋ Asiiri pɩ̀ʋ́ Senakeribə sʋ̀ràn tə mama, ʋ nə tʋn lìù tə nə daa ʋ nə, ʋ pa ʋ bà ʋ twɩn n mʋ̀ Yɩɩ tə nə nəŋə! 18 Kʋ yɩ cɩ́gá, Ba-Yígúrə́-Jə-Tiu, Asiiri pɛ̀gá tə gʋa dwíə́ nəkaran* tə mama mɩ́ámɩ́án, ba ga cʋ̀gʋ̀ ba lʋʋ níə́ tə. 19 Ba dɩga dwíə́ təntə yɩa tə mən wa. Tə yɩa təntə nədʋ mama yà tà Yɩɩ. Tə yà daran də kapana, ləzoni nə sə̀ də ba jɩ̀àn. Yá Asiiri pɛ̀gá tə cʋ̀gʋ̀ tə mama. 20 Yá sɩ́ʋ́n nə, Ba-Yígúrə́-Jə-Tiu, nə tíú Yɩɩ, nə dàń lòrì mʋ́, sə n jon nəba Senakeribə jɩɩn wa, yá tɩa yuu payun tə mama wa, ba wá lwarɩ də n mʋ̀ Ba-Yígúrə́-Jə-Tiu cɩcɩ nə yɩ Yɩɩ.»
Ba-Yígúrə́-Jə-Tiu le Ezekɩasə
21 Amɔsə bìú Ezayi tʋn lìù, ʋ pa ʋ swɩ̀n Ezekɩasə con, ʋ wʋ́: «Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n də, ʋ nì n lòrì tə n nə lòrì wá, Asiiri pɩ̀ʋ́ Senakeribə yɩrɩ. 22 Nə̀ń sʋgʋ tə ʋ nə swɩ̀n, ʋ ma zɩga Senakeribə nə:
Siyon* tɩʋ tə yɩ ndə kacɩɩn nə,
ʋ nə gònì mʋ́, ʋ ga mʋŋa mʋ́.
Zwerizalɛmə tɩʋ tə yɩ ndə
kacɩɩn nə za ʋ vaparan, n yáá con.
23 Wàà nə n twɩn, n ga fʋfʋlɩ?
Wàà yuu wa nə n zɩ̀n n kori,
n ga fin n yɩ́á n kə ʋ yuu də fwìə́?
Kʋ yɩ à mʋ̀ Yɩzərayɛlə lɩ̀à Yɩɩ tə,
à nə yɩ parɩ* yuu wa!
24 N twá n tʋ̀tʋ̀nà tə nə,
n ma twɩn à mʋ̀ Ba-Yígúrə́-Jə-Tiu.
N swɩ̀n n wʋ́:
“À mʋ̀ Senakeribə səsen kòrə̀n dánɩ́ pɩn
à dɩ̀ à yí pɛɛn yuparɩ wa,
à zʋa à ja Liban lʋʋ nii waa cɩɩn nə,
à goŋi ba sɩsaban tɩ̀án tə nə dara tə doni tə duən,
də ba nyənbori tɩ̀án tə nə dara zənzən.
À dàń wá dɩ̀ à yí ba pɛɛn tə yígúrə́,
ba tɩ̀án kárá tə wa.
25 À kʋa vɩla, à ga nyʋn tə nɩ́á.
À pɩn Ezwipətə Nilə mʋnɛɛ tə mama nɩ́á wʋ,
à napɩra cɩcɩ nə nɩŋɩ lá yɩrɩ.”
26 N mʋ̀ Senakeribə wà nì də
à tʋn tə yìə̀n təntə fuən mama naaa?
À mʋ̀ nə ken sírí sə à tʋn tə fuən mama.
Sɩ́ʋ́n nə, à wá pa tə bà,
yá n wá pa tɩan tə,
ba nə lwə̀ ba kɩkarɩ də biritaŋʋ,
jì dibwərən dədwələn.
27 Tɩan təntə tɩ̀án ba dɩ̀àn jə,
fən jə ba, cavɩra də jə ba.
Ba yɩ ndə kárá gaʋ nə,
ba yɩ ndə gabwalʋ nə,
ba yɩ ndə dəyuu gaʋ nə,
ba yɩ ndə mɩna nə kʋa,
də tə tə wà sɩsɩran fwa.
28 Yá à yə̀ə́ máŋá tə n nə jəni tɩa,
də máŋá tə n nə naŋa,
də máŋá tə n nə zwɩ,
də máŋá tə n nə zaŋa n zɩga à nə.
29 N zàn n zɩgɩ à nə,
à ga nì n nə fwa fwìə́ nətʋ.
Kʋ mʋ̀ nə pɩn, à wá kə à lugu n mɩɩ nə,
à ga kə à kwiən n nii nə.
Yá à dàń wá pa n tì cwəŋə tə,
n nə twá n ma bà, n pìí n vìí.
30 Yoo kʋ tə nə wá ya mɩmɩnʋ, kʋ pa n mʋ̀ Ezekɩasə nə: Də̀də̀n kʋ tə, á wá də́ mɩbɩa tə nə tʋa tɩa, tə pɛ́n tə tɩ̀àn nə bɩ̀á. Bɩnɩ də nə, á wá də́ mɩtaran bɩ̀á. Yá batwa nii bɩnɩ tə nə, á wá dù wiən, á ca, á ga cwɛn divɛn tɩ̀án, á də́ tə lənə. 31 Lɩ̀à tə nə wá ga Zwida dwíí tə wa, wá jì ndə tɩ̀ʋ́ nə, kʋ ŋʋnan nə zʋa tɩa, kʋ ga zɩŋa lənə kʋ yuu wa. 32 Cɩ́gá, lalʋʋ tə gɩganɩ wá ga Zwerizalɛmə wa, yá lɩ̀à tə nə wànɩ́ ba jɛ́n, wá ya Siyon paan tə yuu wa.
Mə kʋ mʋ̀ nə Ba-Yígúrə́-Jə-Tiu, ʋ nə yɩ kwatara Yɩɩ wá tʋn, ʋ sonu nəfarʋ tə yɩrɩ. 33 Kʋ mʋ̀ nə pɩn, Ba-Yígúrə́-Jə-Tiu ma swɩ̀n Asiiri pɩ̀ʋ́ tə yoo, ʋ wʋ́: “Ʋ bá zʋ tɩʋ kʋ tə wa, ʋ bá ta cɩɩn kʋ wa, ʋ bá cɩ̀ kʋ yáá nə də natana, ʋ bá lwà kukurə nacanɩ kʋ biritaŋʋ tə yɩra. 34 Ʋ wá pìí ʋ tì cwəŋə tə ʋ nə twá ʋ ma bà, ʋ pìí ʋ vìí, yá ʋ bá zʋ tɩʋ kʋ tə wa. À mʋ̀ Ba-Yígúrə́-Jə-Tiu nii sʋgʋ nə! 35 À wá cɩ̀ tɩʋ kʋ tə nə, à ma jon kʋ, à tətə yɩrɩ, də à tʋtʋnʋ Davidə yɩrɩ.”»
Senakeribə tɩan yoo
36 Kʋ tɩtɩn tə nə, Ba-Yígúrə́-Jə-Tiu malɩka twi ka mà Asiiri tɩ̀án kwatara tə wa lɩ̀à 185 000 ka gʋ, ba dəkuu bwálɩ́ tə nə. Yá kʋ tɩpʋrɩ jɩjʋ nə, lɩ̀à zàn ba na də tɩga cɩcɩ nə súə́ tɩa. 37 Asiiri pɩ̀ʋ́ Senakeribə dàń zàn, ʋ pìí ʋ va Ninivə, sə ʋ ya lá. 38 Dɩɩn don nə, ʋ zʋa ʋ woŋwanʋ Nisərɔkə dìə̀ tə wa, ʋ tʋ ʋ nadwana yuu, sə ʋ pa kʋ dun. Yá ʋ bɩ̀á Adəramelɛkə də Sarəsɛrə za wá də kwatara sɩ̀ʋ́ ba gʋ, ba ga dəri ba va Araratə lʋʋ nii wa. Ʋ bìú Ezarə-Hadon nə dí pàrɩ̀ tə ʋ yuu nə.