Ezekɩasə kwɛn ʋ tún Yɩɩ dìə̀ tʋ̀tʋ̀nán tə
31
1 Máŋá tə cànà tə nə zwɛ̀, Yɩzərayɛlə lɩ̀à tə mama yà nə wulə lá, vəli Zwida lʋʋ nii tɩan tə wa, ba lwa culu kapana* tə, ba yà nə zɩ̀n ba zɩgɩ yɩɩ nə. Ba goŋi woŋwanʋ Aswera daceli* tə, ba gwɛrɩ jwəŋə dədwələn tə mama, Zwida də Bɛnzwamɛn payuu tə mama wa, də Efərayimə də Manase nagwanɛɛ tə wa. Kʋ kwa nə, Yɩzərayɛlə lɩ̀à tə lìù mama pìí ʋ va ʋ sàń.2 Ezekɩasə pìí ʋ tún Yɩɩ joŋwana púlə́ tə, də Levi dwíí púlə́ tə, ba lìù mama ʋ tʋtʋŋɩ wa. Yɩɩ joŋwana tə tʋ̀tʋ̀nán nə yɩ jwəŋə tə ba nə sʋ̀rɩ́, də nimarʋ jwəŋə tə. Levi dwíí tə də mɛ sə ba tʋn ba pa Ba-Yígúrə́-Jə-Tiu nə, də ba nuŋə gwaran ba ma bwɩ ʋ nə, ʋ dìə̀ tə mimien nə. 3 Pɩ̀ʋ́ tə pɩn ʋ jɩjə tə vàn don, sə ba ma yə̀ jwəŋə vàná tə, ba nə sʋ̀rɩ́ jɩjʋ də didəni nə, də sìə́ dɩɩn tə nə, də candʋan dɩan tə nə, də cànà diŋə dɩɩn nə, ndə kʋ nə pʋ́pʋ́nɩ́, Ba-Yígúrə́-Jə-Tiu nii* sagɩ tə wa nətʋ. 4 Ʋ swɩ̀n Zwerizalɛmə lalʋʋ tə con, sə ba pa Yɩɩ joŋwana tə də Levi dwíí tə tori, sə kʋ pa ba zìlí Ba-Yígúrə́-Jə-Tiu nii tə zəni. 5 Máŋá tə sʋgʋ təntə nə zə́n kʋ yí bwálɩ́ mama, Yɩzərayɛlə lɩ̀à tə pɩn kárɩ́ wiən təntən bɩ̀á zənzən. Tə mʋ̀ nə yɩ mɩna, də divɛn, də nʋga, də tʋran, də ba kárɩ́ wiən duən mama. Ba tə ja ba won mama fugə nii nyiən də ba bà zənzən. 6 Yɩzərayɛlə lɩ̀à tə də Zwida dwíí tə ba nə wulə Zwida lʋʋ nii tɩan tə wa, pɩn ba vanfaran də vanmɩnɩ fugə nii nyiən, də wiən tə ba nə tún ba pa Ba-Yígúrə́-Jə-Tiu cɩcɩ nə, ʋ nə yɩ ba Yɩɩ, fugə nii nyiən. Ba jon tə ba tún púlə́ púlə́. 7 Ba sinti ba túŋə́ púlə́ tə bɩnɩ tə batwa nii cànà tə wa, yá ba tún púlə́ tə ba zwɛ̀ bɩnɩ tə barpɛ nii cànà tə wa. 8 Ezekɩasə də lʋʋ nii yáá tɩ̀án tə twi ba ywàń púlə́ tə, ba ga kə Ba-Yígúrə́-Jə-Tiu lɛ̀ɛ̀, də Yɩzərayɛlə lɩ̀à tə lɛ̀ɛ̀, ba nə yɩ ʋ mʋ̀ Ba-Yígúrə́-Jə-Tiu lɩ̀à. 9 Ezekɩasə bwe Yɩɩ joŋwana tə, də Levi dwíí tə zìlə́ wiən təntə yuu wa. 10 Yɩɩ joŋwana yun tɩ̀án nəkwɩa Azarɩya, ʋ nə yɩ Sadɔkə dwíí tə wa lìù le wá, ʋ wʋ́: «Kʋ nə zɩgɩ máŋá tə wa, lɩ̀à tə nə sinti ba ja ba kárɩ́ wiən ba twi Ba-Yígúrə́-Jə-Tiu dìə̀ tə wa, nə wànɩ́ nə də́ nə sú nə ga lá. Cɩ́gá, Ba-Yígúrə́-Jə-Tiu fwa zəni ʋ lalʋʋ tə yɩra. Púlə́ tə tə yɩ wiən təntə gɩganɩ.»
11 Ezekɩasə pɩn nii, sə ba tanɩ dibɩa Ba-Yígúrə́-Jə-Tiu dìə̀ tə wa, ba ma kə wiən təntə. Máŋá tə ba nə tanɩ dibɩa tə ba zwɛ̀, 12 ba ja kárɩ́ wiən fugə nii nyiən, də zìlə́ wiən tə, ba nə tún vàn nə, ba pa Yɩɩ nə, ba ja twi máŋá mama, ba túŋə́ dibɩa təntə wa. Ba tún Konanɩa, ʋ nə yɩ Levi dwíí, ba ga súrí ʋ nubiu Swimeyi ʋ nə, sə ba ywàń tə yuu nə. 13 Pɩ̀ʋ́ Ezekɩasə, də Yɩɩ joŋwana yun tɩ̀án nəkwɩa Azarɩya, ʋ nə yɩ Yɩɩ dìə̀ tə yáá tíú pɩn nii, sə Konanɩa də Swimeyi ya yun tɩ̀án, ba pa lɩ̀à ywàń wiən tə yuu nə. Lɩ̀à təntə nə yɩ Yehiyɛlə, də Azarɩya, də Nahatə, də Asayɛlə, də Yerimɔtə, də Yozabadə, də Eliyɛlə, də Yisəmakɩa, də Mahatə, də Benaya. 14 Kore, ʋ nə yɩ Levi dwíí, ʋ ga yɩ Yɩməna bìú yà yɩ yɩɩ yipɩan con mimii tə nəcɩrʋ. Ba tún wá sə ʋ ywàń zìlə́ wiən tə yuu, ba nə pɩn Yɩɩ nə, sə ʋ tara wiən tə, ba nə lɩ ba pa Ba-Yígúrə́-Jə-Tiu nə, də tə tə ba nə tún vàn nə, ba pa Yɩɩ cɩcɩ nə. 15 Ʋ yà jə lɩ̀à ʋ nə tʋŋa də ba, Yɩɩ joŋwana tɩan tə wa. Lɩ̀à təntə nə yɩ Edɛn, də Miniamin, də Yeswuwa, də Swemaya, də Amarɩya, də Swekanɩa. Ba mʋ̀ lɩ̀à təntə yà mɛ, sə ba tara wodiu tə də pùə́ nədʋ, ba pa ba nubɩa tə, nəkwɩna də bìsɩ́ná nə, ndə ba púlə́ tə nə yɩ nətʋ. 16 Ba yàá pa tori bara tə mama nə, ba nə gàlɩ̀, kʋ súrí bisɩmabarɩ tə nə, ba nə jə bɩna batwa. Ba tə yàá pa tori lɩ̀à tə də mama nə, ba nə yàá zʋ Ba-Yígúrə́-Jə-Tiu dìə̀ tə wa dɩɩn mama, sə ba tʋn ba tʋ̀tʋ̀nán tə, kʋ twá ba púlə́ tə nə yɩ nətʋ. 17 Yɩɩ joŋwana tə yɩ ba yàá pʋ́pʋ́nɩ́ ba, kʋ twá ba dìì tə nə yɩ nətʋ. Yá Levi dwíí tə mʋ̀ yɩ ba yàá pʋ́pʋ́nɩ́ ba də ba nə jə bɩna sapʋa, nə à yə̀ə́ ba nə dwə nətʋ, kʋ twá ba tʋ̀tʋ̀nán də ba púlə́ tə nə yɩ nətʋ. 18 Ba gàlɩ̀ ba də ba dìə̀ lɩ̀à mama, ba də ba kana də ba bɩ̀á, də ba dwíí tɩ̀án tə mama, ba nə wàá wiən tə nə yɩ Yɩɩ cɩcɩ nyiən ba də́, də ba nə kwɛn ba tɩ̀àn ba lɩ durən yìə̀n wa. 19 Aron bɩ̀á Yɩɩ joŋwana tə mʋ̀ yà yɩ ba wulə Levi dwíí tɩan tə nii nə. Tɩʋ mama wa, ba yà kúrí lɩ̀à, sə ba tara wodiu tə ba pa Yɩɩ joŋwana tə, də Levi dwíí tə mama nə, ba nə pʋ́pʋ́nɩ́ ba yɩra.
20 Mə nətʋ nə Ezekɩasə tʋn ʋ payuu tə mama wa. Ʋ tʋn zəni, ʋ tʋn kʋ tə nə twá cɩ́gá nə, kʋ ga ywán də Ba-Yígúrə́-Jə-Tiu, ʋ nə yɩ ʋ Yɩɩ. 21 Tʋ̀tʋ̀nán tə mama Ezekɩasə nə tʋn, sə ʋ ma kwɛn Yɩɩ dìə̀ tə, sə ʋ pa ba zìlí Yɩɩ nii tə, də yìə̀n tə Yɩɩ nə pɩn nii tə yuu wa, tə yɩ ʋ tʋn tə də ʋ bɩcan mama, ʋ ma pɩ̀à ʋ Yɩɩ tə. Yá Yɩɩ pɩn tə mama jì tə pa wá.