Ezekɩasə bon Yɩzərayɛlə dwíə́ tə mama, ʋ pa ba də́ Pakə* cànà
30
1 Ezekɩasə tʋn tʋntʋna Yɩzərayɛlə də Zwida lʋʋ níə́ tə mama wa. Ʋ tə pʋ́pʋ́nɩ́ saga ʋ pa Efərayimə də Manase dwíə́ tə nə, sə ba bà Ba-Yígúrə́-Jə-Tiu dìə̀ tə wa, Zwerizalɛmə nə, ba də́ Pakə cànà tə, ba ma pa dun Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 2 Pɩ̀ʋ́ tə, də ʋ lʋʋ nii yáá tɩ̀án tə, də lalʋʋ tə mama kun duən nə, ba vʋrɩ Zwerizalɛmə nə, ba ga kə sírí, sə ba də́ Pakə cànà tə, bɩnɩ tə bələ nii cànà tə wa. 3 Cɩ́gá, ba yà wà wànɩ́ ba də́ cànà tə ka máŋá wa, Yɩɩ joŋwana nə ba dáá, ba nə kwɛn ba tɩ̀àn, ba lɩ durən yìə̀n wa yɩrɩ. Kʋ tə nə súrí lá, lalʋʋ tə yà wà twi ba kun duən nə Zwerizalɛmə nə. 4 Yoo tə yɩn ywánɩ́ kʋ pa pɩ̀ʋ́ tə də lalʋʋ tə mama nə. 5 Ba pɩn ba bòrì kʋ yoo təntə Yɩzərayɛlə lʋʋ nii tə mama wa, kʋ nə zɩgɩ Bɛrəsweba, kʋ va kʋ yí Dan. Ba bon lɩ̀à tə sə ba bà Zwerizalɛmə ba də́ Pakə cànà tə, ba ma pa dun Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. Cɩ́gá, lalʋʋ tə yà kʋ́ʋ̀ ba Pakə cànà tə də́, ndə kʋ nə pʋ́pʋ́nɩ́ nətʋ.6 Tʋntʋna tə dàń ja saga tə, pɩ̀ʋ́ tə də ʋ lʋʋ nii yáá tɩ̀án tə nə pɩn, ba ja va Yɩzərayɛlə, də Zwida lʋʋ níə́ tə mama wa. Ba twá nii tə nə pɩ̀ʋ́ tə nə pɩn, ba swɩ̀n, ba wʋ́: «Yɩzərayɛlə lɩ̀à ba, á mʋ̀ lɩ̀à tə á nə wànɩ́ á jon á tɩ̀àn Asiiri pɛ̀gá tə jɩɩn wa, á pìrə́ á bà Ba-Yígúrə́-Jə-Tiu con, ʋ nə yɩ Abərahamə, də Yɩzakə, də Zwakɔbə Yɩɩ, yá ʋ də wá pìí ʋ bà á con. 7 Á dànà ká ya ndə á nyɩna-ba, də á nubɩa tə nə, ba nə vɩga Ba-Yígúrə́-Jə-Tiu nii, ʋ nə yɩ ba nɩbara-ba Yɩɩ. Kʋ pɩn Yɩɩ yá ba ʋ pa ba cʋ̀gʋ̀, ndə á nə yə̀ə́ kʋ nətʋ. 8 Sɩ́ʋ́n nə, á kʋ́ʋ̀ dàn ká fwa zɩbaniu, ndə á nɩbara-ba nə. Á sɩa Ba-Yígúrə́-Jə-Tiu nii, á ga pìí á bà ʋ wúlú bwálɩ́ tə wa, ʋ nə tún ʋ pa ʋ tɩ̀àn nə máŋá mama. Á tʋŋa á pa Ba-Yígúrə́-Jə-Tiu nə, ʋ nə yɩ á Yɩɩ, sə kʋ pa ʋ lɩŋa tə nə zàn á yuu wa zənzən, pìí tə tʋ. 9 Á nə pìí á bà Ba-Yígúrə́-Jə-Tiu con, á nubɩa tə də á bɩ̀á tə wá na yuywaŋʋ lɩ̀à tə con, ba nə ja ba ba va yongaʋ tə, yá á nubɩa tə də á bɩ̀á tə wá pìí ba bà lʋʋ nii kʋ tə wa. Cɩ́gá, Ba-Yígúrə́-Jə-Tiu, ʋ nə yɩ á Yɩɩ yɩ wʋywanyiən, ʋ ga dəri yinəgə. Á nə pìí á bà ʋ con, ʋ bá ja ʋ kwa ʋ ma sà aba.
10 Tʋntʋna tə twá tɩan də tɩan wa ba lɛ, Efərayimə lʋʋ nii tə wa, də Manase lʋʋ nii tə wa, ba va ba yí Zabulon nagwanaa tə wa. Yá lɩ̀à yà mʋŋa ba, də ba də́ bɩyɩrɩ ba yɩra. 11 Də kʋ nətʋ mɛ, Aswɛrə dwíí tə lɩ̀à duən, də Manase dwíí tə lɩ̀à duən, də Zabulon dwíí tə lɩ̀à duən mun ba tɩ̀àn, ba ga bà Zwerizalɛmə. 12 Yɩɩ tʋn Zwida payuu tə də lɩ̀à bɩcanɩ wa, sə ba tʋn kʋ tə pɩ̀ʋ́ tə də lʋʋ nii yáá tɩ̀án tə nə pɩn nii sə ba tʋn, ndə Ba-Yígúrə́-Jə-Tiu nə bɩrɩ nətʋ.
Ezekɩasə də lalʋʋ tə dí Pakə cànà tə
13 Lalʋʋ nəfarʋ twi ba kun Zwerizalɛmə wa, bɩnɩ tə bələ nii cànà tə wa, sə ba də́ cànà tə ba nə də́, də dipɛn tə kʋ nə ba sabwarɩ kəni. Kʋ yɩn jə́rə́ nəfarʋ cɩ́gá cɩ́gá. 14 Ba sinti ba lɩ woŋwanan jwəŋə bwálá tə, tə yà nə wulə Zwerizalɛmə wa, ba ga lɩ wusinə jwəŋə bwálá tə mama, ba dɩlɩ Sedəron nacoru tə wa. 15 Ba gʋa Pakə cànà pee tə bələ nii cànà tə dɩan fugə də banɩa dɩɩn nə. Cavɩra zʋa Yɩɩ joŋwana tə də Levi dwíí tə, yá ba kwɛn ba tɩ̀àn, ba lɩ durən yìə̀n wa, sə ba wànɩ́ ba fwa jwəŋə tə ba nə sʋ̀rɩ́, Ba-Yígúrə́-Jə-Tiu dìə̀ tə wa. 16 Ba pìí ba zʋ ba tʋ̀tʋ̀nán tə wa, ndə Yɩɩ tʋtʋnʋ Moyizə nə pɩn nii sə ba tʋn nətʋ. Levi dwíí tə yà pɩn jwəŋə vàná tə jana Yɩɩ joŋwana tə nə, ba də ga joŋə tə ba lwɛ́ Yɩɩ joŋi bwálɩ́ tə yuu wa. 17 Cɩ́gá, lɩ̀à yà dáá lalʋʋ tə wa, ba nə wà ba tɩ̀àn kwɛn, ba lɩ durən yìə̀n wa. Levi dwíí tə dàń gʋa vàná lɩ̀à tə mama yɩrɩ, ba nə tà parɩ, sə ba lɩ ba ba tún vàn nə, ba pa Yɩɩ cɩcɩ nə. 18 Lɩ̀à zənzən yà wà ba tɩ̀àn kwɛn, ba lɩ durən yìə̀n wa. Kʋ nə dwə mama yɩ Efərayimə dwíí tə, də Manase dwíí tə, də Yɩsakarə dwíí tə, də Zabulon dwíí tə. Yá ba tə dí Pakə cànà wodiu tə, ba ga wà kʋ tə nə pʋ́pʋ́nɩ́ tə nii zìlí. Kʋ mʋ̀ nə pɩn Ezekɩasə lòrì Yɩɩ ʋ pa ba, ʋ wʋ́: «Ba-Yígúrə́-Jə-Tiu, n nə yɩ nə nɩbara-ba Yɩɩ, n bɩcabwanʋ tə yɩrɩ, 19 kwɛn lɩ̀à tə mama, ba nə pɩ̀à mʋ́ də ba bɩcanɩ mama cʋna, n lɩ n də ba pwə́rə́ wa, də ba nə swə ba tà parɩ, ndə n nə pɩ̀à nətʋ.» 20 Ba-Yígúrə́-Jə-Tiu le Ezekɩasə yɩjʋnɩ tə, ʋ ga yá lalʋʋ tə, ʋ wà ba càn wa ken. 21 Mə kʋ zɩgɩ nətʋ, Yɩzərayɛlə lɩ̀à tə ba nə yɩn Zwerizalɛmə wa, dàń ma də́ cànà tə, də dipɛn tə kʋ nə ba sabwarɩ kəni, dɩan barpɛ, də pupwən nəfarʋ. Dɩɩn mama, Levi dwíí tə də Yɩɩ joŋwana tə yàá ja gwaran zɩla ba ma bʋ Ba-Yígúrə́-Jə-Tiu nə, də ba dɩ̀àn mama. 22 Ezekɩasə dàn Levi dwíí tə mama jɩɩn, ba nə swə Ba-Yígúrə́-Jə-Tiu zəni. Lɩ̀à tə dí Pakə cànà wodiu tə dɩan barpɛ. Ba fwa nimarʋ jwəŋə, də ba nuŋə gwaran ba ma bwɩ Ba-Yígúrə́-Jə-Tiu nə, ʋ nə yɩ ba nɩbara-ba Yɩɩ.
23 Lalʋʋ tə ken nimarʋ, sə ba tə də́ cànà tə dɩan barpɛ, yá ba tə dí ka dɩan barpɛ duən ba súrí lá, də pupwən. 24 Cɩ́gá, Zwida pɩ̀ʋ́ Ezekɩasə yà pɩn nabɩran mʋ̀rʋ̀, də vanmɩnɩ mʋ̀rʋ̀ barpɛ lalʋʋ tə nə. Tɩʋ yáá tɩ̀án tə də pɩn nabɩran mʋ̀rʋ̀, də vanmɩnɩ mʋ̀rʋ̀ fugə lalʋʋ tə nə. Kʋ tə nə súrí lá, Yɩɩ joŋwana kapʋpʋ yà kwɛn ba tɩ̀àn, ba lɩ durən yìə̀n wa. 25 Zwida dwíí tə mama, də Yɩɩ joŋwana tə, də Levi dwíí tə, də lalʋʋ tə mama nə nan Yɩzərayɛlə ba bà, də twajənə tə nə nan Yɩzərayɛlə lʋʋ nii wa, də ba tə nə jə̀ə́ Zwida lʋʋ nii tə wa fwa pupwən. 26 Kʋ yɩn pupwən nəfarʋ Zwerizalɛmə nə. Cɩ́gá, kʋ nə zɩgɩ Davidə bìú Salʋmʋn, ʋ nə yɩn Yɩzərayɛlə pɩ̀ʋ́ máŋá tə wa, yoo nətʋ yiri tə yà wà Zwerizalɛmə wa tʋn. 27 Levi dwíí Yɩɩ joŋwana tə zàn ba lòrì, sə Yɩɩ fwa zəni lalʋʋ tə yɩra. Yá ba lòrí tə dɩ̀gà kʋ yí Yɩɩ con, ʋ sàń tə wa, yá ʋ le ba.