Ezekɩasə pàrɩ̀ tə yoo
29
1 Ezekɩasə jìgə̀ pɩ̀ʋ́ də ʋ jə bɩna sapʋa də bonu, yá ʋ dí pàrɩ̀ bɩna sapʋa də nʋgʋ Zwerizalɛmə nə. Ʋ nuu yɩrɩ nə yɩ Abɩya, ʋ ga yɩ Zakari bʋ̀á. 2 Ezekɩasə tʋn kʋ tə nə yɩ mənəmənə Ba-Yígúrə́-Jə-Tiu yáá con yoo mama wa, ndə ʋ nɩbɛɛ Davidə nə tʋn nətʋ.3 Mə ʋ mʋ̀ nə súrí Ba-Yígúrə́-Jə-Tiu dìə̀ tə mimien tə, ʋ kwɛn, ʋ pàrɩ̀ tə təntən bɩnɩ tə, təntən cànà tə wa. 4 Ʋ bon Yɩɩ joŋwana tə, də Levi dwíí tə ʋ kə duən yáá nə, ʋ pa ba kun duən nə, yɩɩ yipɩan con bwálɩ́ tə wa, 5 ʋ ga swɩ̀n ba con, ʋ wʋ́: «Levi dwíí tɩ̀án ba, á cʋga à con. Sɩ́ʋ́n nə, á kwɩan á tɩ̀àn, á lɩ durən yìə̀n wa, á ga kwɛn Ba-Yígúrə́-Jə-Tiu, ʋ nə yɩ á nɩbara-ba Yɩɩ dìə̀ tə, á lɩ durən wa, á ga lɩ durən wiən tə mama ka wa. 6 Cɩ́gá, nə nɩbara-ba tʋn cʋna, ba tʋn kʋ tə nə lwara Ba-Yígúrə́-Jə-Tiu, ʋ nə yɩ nə tíú Yɩɩ yáá con. Ba vɩga wá ba dʋgʋ. Ba viviri ba kwa ba ma sà ʋ wúlú bwálɩ́ tə. Ba viviri ba kwa ba ma sà ʋ tətə. 7 Ba sun ʋ dìə̀ tə mimien tətə, ba yá tʋntʋnɩ tə, ba pa tə dəŋə, ba wà wusinə sʋ̀rɩ́, ba wà jwəŋə tə ba nə sʋ̀rɩ́* fwa ba pa Yɩzərayɛlə lɩ̀à Yɩɩ tə nə, ʋ wúlú bwálɩ́ tə wa. 8 Kʋ pɩn Ba-Yígúrə́-Jə-Tiu lɩŋa zàn Zwida dwíí tə, də Zwerizalɛmə tɩ̀án yuu wa. Ʋ yá ʋ lalʋʋ tə, ʋ pa pucʋnɩ yí ba. Ʋ pɩn ba jì lɩ̀à tə, ba fən də ba cavɩra nə jə lɩ̀à, ndə á nə na kʋ də á yɩ́á nətʋ. 9 Kʋ mʋ̀ nə pɩn, ba gʋ nə nyɩna-ba də kwatara sɩ̀ʋ́, ba ga ja nə bɩ̀á, də nə bwɩ̀ɩ́, də nə kana ba ma fwa ywə́ŋə́. 10 Sɩ́ʋ́n nə, à mʋ̀ ken sírí, sə à tún nimarʋ də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, sə kʋ pa ʋ lɩŋa tə nə zàn nə yuu wa zənzən pìí tə tʋ. 11 À bɩ̀á ba, sɩ́ʋ́n nə, á kʋ́ʋ̀ dànà ká ja Yɩɩ tʋtʋŋɩ tə, á ma bwan bwana. Cɩ́gá, á mʋ̀ nə Ba-Yígúrə́-Jə-Tiu kúrí, sə á ya ʋ yáá con, á tʋn á pa wá, sə á sʋ̀rɩ́ wusinə, á ma pa wá dun.»
12 Levi dwíí tə dàń twi ba yí lá. Kehatə dwíí tə wa, kʋ yɩn Amasayi bìú Mahatə, də Azarɩya bìú Zʋwɛlə. Merari dwíí tə wa, kʋ yɩn Abədi bìú Kiswə, də Yehalelɛlə bìú Azarɩya. Gɛrəswon dwíí tə wa, kʋ yɩn Zima bìú Yʋa, də Yʋa bìú Edɛn. 13 Eliswafan dwíí tə wa, kʋ yɩn Swiməri, də Yeyɛlə. Asafə dwíí tə wa, kʋ yɩn Zakari, də Matanɩa. 14 Eman dwíí tə wa, kʋ yɩn Yehiyɛlə, də Swimeyi. Yedutunə dwíí tə wa, kʋ yɩn Swemaya, də Uziyɛlə.
15 Ba ken ba dwíə́ tə duən yáá nə, ba ga kwɛn ba tɩ̀àn, ba lɩ durən yìə̀n wa. Kʋ kwa nə, ba twi ba kwɛn Ba-Yígúrə́-Jə-Tiu dìə̀ tə, ba lɩ durən wa, ndə Ba-Yígúrə́-Jə-Tiu nə twá pɩ̀ʋ́ tə nə, ʋ pa nii sə kʋ tʋn nətʋ. 16 Yɩɩ joŋwana tə zʋa Ba-Yígúrə́-Jə-Tiu dìə̀ tə wa, sə ba lɩ ka wa durən tə. Ba pɛ̀ durən wiən tə mama, ba nə nɩ ka wa, ba ja nan ka dəwoo tə wa. Levi dwíí tə də kʋ́ʋ̀ jon tə, ba ja nan tɩʋ tə wa, ba va ba dʋgʋ Sedəron nacoru tə wa. 17 Ba sinti ba kwɛn Ba-Yígúrə́-Jə-Tiu dìə̀ tə, ba lɩ durən wa, təntən cànà tə təntən dɩɩn nə. Cànà tə nana nii dɩɩn tə nə, ba zʋa Ba-Yígúrə́-Jə-Tiu napakwalʋ tə wa. Ba tə fwa dɩan nana ba ma lɩ durən tə, Ba-Yígúrə́-Jə-Tiu dìə̀ tə wa. Yá təntən cànà tə dɩan fugə də bardʋ dɩɩn nə, ba zwɛ̀.
18 Kʋ kwa nə, Levi dwíí tə zʋa pɩ̀ʋ́ Ezekɩasə con, ba swɩ̀n, ba wʋ́: «Nə lɩ durən tə mama Ba-Yígúrə́-Jə-Tiu dìə̀ tə wa. Nə kwɛn Yɩɩ joŋi bwálɩ́ tə, ba nə sʋ̀rɩ́ vàná jwəŋə kʋ yuu wa, də kʋ tʋtʋnzɩla tə mama, də tabɩlʋ tə, ba nə tuŋə dipɛn kʋ yuu, ba pɩn Yɩɩ nə, də kʋ tʋtʋnzɩla tə mama, nə lɩ durən wa. 19 Nə pìí nə kwɛn zɩla tə mama, pɩ̀ʋ́ Ahazə nə ma tʋn durən yìə̀n ʋ pàrɩ̀ tə máŋá wa, nə lɩ durən wa, nə pa Yɩɩ nə. Nə̀ń tə nə tə tígə́ Ba-Yígúrə́-Jə-Tiu joŋi bwálɩ́ tə yáá con.»
Ezekɩasə pìí ʋ tún Yɩɩ tʋ̀tʋ̀nán tə
20 Pɩ̀ʋ́ Ezekɩasə zàn jɩjʋ fuən fuən, ʋ bon tɩʋ tə yáá tɩ̀án ʋ kə duən yáá, ʋ ga ja ba ʋ va Ba-Yígúrə́-Jə-Tiu dìə̀ tə wa. 21 Ba ja nabɩran barpɛ, də pabɩran barpɛ, də pabii barpɛ, də bʋtɩlan barpɛ ba bà, sə ba ma fwa cʋna kwɩan joŋi*. Ba mɛ sə ba fwa joŋi təntə pàrɩ̀ tə yɩrɩ, də Yɩɩ wúlú bwálɩ́ tə yɩrɩ, də Zwida dwíí tə yɩrɩ. Pɩ̀ʋ́ tə swɩ̀n Aron dwíí Yɩɩ joŋwana tə con, sə ba gʋ vàná tə Ba-Yígúrə́-Jə-Tiu joŋi bwálɩ́ tə yuu wa. 22 Yɩɩ joŋwana tə dàń gʋa nabɩran tə, ba lòní tə jana, ba lwá Yɩɩ joŋi bwálɩ́ tə yuu wa. Ba gʋa pabɩran tə, ba lwá tə jana Yɩɩ joŋi bwálɩ́ tə yuu wa. Ba gʋa pabii tə, ba lwá tə jana Yɩɩ joŋi bwálɩ́ tə yuu wa. 23 Kʋ kwa nə, ba ja bʋtɩlan tə nə wá fwa cʋna kwɩan joŋi tə, ba bólí pɩ̀ʋ́ tə də lalʋʋ tə yáá con. Pɩ̀ʋ́ tə də lɩ̀à tə duən tún ba jɩ̀àn bʋtɩlan tə yuu wa. 24 Yá Yɩɩ joŋwana tə gʋa tə, ba lwá tə jana Yɩɩ joŋi bwálɩ́ tə yuu wa, cʋna tə yɩrɩ, sə ba ma kwɛn Yɩzərayɛlə lɩ̀à tə mama cʋna ba lɩ. Cɩ́gá, pɩ̀ʋ́ tə yà swɩ̀n də joŋi tə ba nə sʋ̀rɩ́, də cʋna kwɩan joŋi tə wá ya, Yɩzərayɛlə lɩ̀à tə mama cʋna yɩrɩ.
25 Kʋ kwa nə, ʋ pɩn ba zɩgɩ Levi dwíí tə Ba-Yígúrə́-Jə-Tiu dìə̀ tə wa, də ba gwaran zɩla tə nə yɩ zɩnzɩran, də banan, də kwànán, ndə Davidə, də Gadə, ʋ nə yɩ pɩ̀ʋ́ Yɩɩ yinarʋ, də Yɩɩ nii sʋ̀sʋ̀nʋ̀ Natan nə pɩn nii sə kʋ tʋn nətʋ. Kʋ yɩ nii Yɩɩ nə twá ʋ nii sʋ̀sʋ̀nà tə nə ʋ pa. 26 Levi dwíí tə dàń zɩga də Davidə gwaran zɩla tə, Yɩɩ joŋwana tə də ga zɩga də nabwanan. 27 Ezekɩasə pɩn nii, sə ba sʋ̀rɩ́ jwəŋə tə, Yɩɩ joŋi bwálɩ́ tə yuu wa. Máŋá tə ba nə sinti joŋi tə ba nə sʋ̀rɩ́, ba baa nuŋə tə nə bwɩ Ba-Yígúrə́-Jə-Tiu nə, də nabwanan, də Yɩzərayɛlə pɩ̀ʋ́ Davidə gwaran zɩla tə. 28 Lalʋʋ tə mama tʋa ba nadwana yuu, gwàgá tə ga nuŋə, də ba wúrí nabwanan tə, kʋ va kʋ yí máŋá tə, ba nə sʋ̀rɩ́ joŋi tə ba pa Yɩɩ nə, ba zwɛ̀. 29 Máŋá tə ba nə fwa joŋi tə ba nə sʋ̀rɩ́, ba zwɛ̀, pɩ̀ʋ́ tə də lɩ̀à tə mama ba yà nə wulə də wá, tʋa ba nadwana yuu, ba pa dun Yɩɩ nə. 30 Kʋ kwa nə, pɩ̀ʋ́ Ezekɩasə də tɩʋ tə yáá tɩ̀án tə swɩ̀n Levi dwíí tə con, sə ba bʋ Ba-Yígúrə́-Jə-Tiu nə, də gwaran tə Davidə də Yɩɩ yinarʋ Asafə nə dɩga. Yá ba dàń bʋ̀à Ba-Yígúrə́-Jə-Tiu nə də pupwən, ba ga tʋ ba nadwana yuu, ba pa wá dun.
31 Ezekɩasə kʋ́ʋ̀ swɩ̀n, ʋ wʋ́: «Sɩ́ʋ́n nə, á mʋ̀ lɩ̀à tə á nə ja zìlə́ wiən á bà, sə á pa Ba-Yígúrə́-Jə-Tiu nə, á jana á nimarʋ jwəŋə tə, də á zìlə́ wiən tə á bà Ba-Yígúrə́-Jə-Tiu dìə̀ tə wa.» Lalʋʋ tə ja jwəŋə vàná tə, də zìlə́ wiən tə ba bà. Yá ba tə mama ba bɩcanɩ nə ywán də Yɩɩ, ja jwəŋə tə ba nə sʋ̀rɩ́, ba bà. 32 Jwəŋə tə mama ba nə sʋ̀rɩ́ yɩn vanfaran sapwɩtwa də fugə, də pabɩran bíí, də pabii biələ. Ba sʋ̀rɩ́ tə mama, ba pa Ba-Yígúrə́-Jə-Tiu nə. 33 Ba tə gʋa vanfaran biəyardʋ, də vanmɩnɩ mʋ̀rʋ̀ batwa, ba ma fwa jwəŋə duən. 34 Yá Yɩɩ joŋwana tə yà ba dáá, sə ba pwànà vàná tə mama, ba nə mɛ sə ba sʋ̀rɩ́. Ba nubɩa Levi dwíí tə dàń san ba, ba pwànɩ̀ vàná tə, ba ma dànɩ̀ də Yɩɩ joŋwana tə duən kwɛn ba tɩ̀àn, ba lɩ durən yìə̀n wa. Cɩ́gá, Levi dwíí tə yà bɩbarɩ, sə ba kwɛn ba tɩ̀àn, ba lɩ durən yìə̀n wa, ba doni Yɩɩ joŋwana tə. 35 Cɩ́gá, jwəŋə tə ba nə sʋ̀rɩ́ yà dáá, kʋ dàń súrí tə divɛn jwəŋə tə nə, də nimarʋ jwəŋə tə nanwɩɩ tə nə. Mə kʋ zɩgɩ nətʋ, ba ma pìí ba tún Yɩɩ tʋ̀tʋ̀nán tə Ba-Yígúrə́-Jə-Tiu dìə̀ tə wa. 36 Ezekɩasə də lalʋʋ tə mama fwa pupwən kʋ tə mama yɩrɩ, Yɩɩ nə pɩn ba wànɩ́ ba tʋn. Cɩ́gá, yìə̀n təntə mama tʋn naa nədʋ, tə ga tà ba dí yáá ba tanɩ tə.