Azarɩya jìgə̀ Zwida payuu tə pɩ̀ʋ́
15
1 Yɩzərayɛlə pɩ̀ʋ́ Zwerobʋamə pàrɩ̀ tə bɩna sapʋa də barpɛ nii bɩnɩ tə nə, Amasɩa bìú Azarɩya jìgə̀ Zwida payuu tə pɩ̀ʋ́. 2 Ʋ yà jə bɩna fugə də bardʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna finu də bələ, Zwerizalɛmə nə. Ʋ nuu yɩrɩ nə Yekolɩya, ʋ yɩ Zwerizalɛmə tɩ̀án bʋ̀á. 3 Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con yoo mama wa, ndə ʋ nyɩna Amasɩa nə tʋn nətʋ. 4 Yá də kʋ nətʋ mɛ, jwəŋə dədwələn* tə mʋ̀ wà lá nywɩn. Lalʋʋ tə yà tə fwa jwəŋə, də ba sʋ̀rɩ́ wusinə jwəŋə dədwələn təntə yuu wa. 5 Ba-Yígúrə́-Jə-Tiu mà pɩ̀ʋ́ Azarɩya, yá dayaan tʋa ʋ nə, kʋ va kʋ yí ʋ tɩan dɩɩn. Ʋ dàń yɩn dìə̀ wa, ka nə wulə ka cɩcɩ, kwa con. Yá ʋ bìú Yotamə ʋ yà nə ywàŋá padiə tə yuu, dàń ywàń lʋʋ nii tə yuu nə.6 Ba pʋ́pʋ́nɩ́ Azarɩya tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa. 7 Azarɩya tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Yotamə nə dí pàrɩ̀ tə ʋ yuu nə.
Zakari jìgə̀ Yɩzərayɛlə pɩ̀ʋ́
8 Zwida pɩ̀ʋ́ Azarɩya pàrɩ̀ tə bɩna fɩtwa də nana nii bɩnɩ tə nə, Zwerobʋamə bìú Zakari jìgə̀ Yɩzərayɛlə pɩ̀ʋ́, yá ʋ dí pàrɩ̀ cànɩ̀ bardʋ, Samari nə. 9 Ʋ tʋn kʋ tə nə lwara Ba-Yígúrə́-Jə-Tiu yáá con, ndə ʋ nyɩna-ba nə tʋn nətʋ. Ʋ wà ʋ tɩ̀àn lɩ cʋna tə wa Nebatə bìú Zwerobʋamə nə pɩn Yɩzərayɛlə lɩ̀à tʋn. 10 Yabɛswə bìú Swalumə tʋn pwìí bələ yoo Zakari yɩra, ʋ mà wá lalʋʋ tə yáá con ʋ gʋ, ʋ ga jon pàrɩ̀ tə ʋ con. 11 Ba pʋ́pʋ́nɩ́ Zakari tʋ̀tʋ̀nán tə gɩganɩ, ba tún Yɩzərayɛlə pɛ̀gá yìə̀n sagɩ tə wa.
12 Kʋ yà yɩ ndə Ba-Yígúrə́-Jə-Tiu sʋgʋ tə nə, ʋ nə swɩ̀n Zwehu con, ʋ wʋ́: «N bɩ̀á, də n nɩ̀án, də n nanaga wá də́ Yɩzərayɛlə pàrɩ̀, kʋ va kʋ yí n dwíí tə dəkurən banɩa nii nyiən.» Yá kʋ dàń yɩn nətʋ.
Swalumə jìgə̀ Yɩzərayɛlə payuu tə pɩ̀ʋ́
13 Yabɛswə bìú Swalumə jìgə̀ pɩ̀ʋ́, Zwida pɩ̀ʋ́ Azarɩya, ʋ yɩrɩ don nə yɩ Ozɩasə pàrɩ̀ tə bɩna fɩtwa də nʋgʋ nii bɩnɩ tə nə. Ʋ dí pàrɩ̀ cànà nədʋ Samari nə. 14 Gadi bìú Menahɛmə nan Tirəsa ʋ bà Samari, ʋ mà Yabɛswə bìú Swalumə ʋ gʋ, ʋ ga jon pàrɩ̀ tə ʋ con. 15 Ba pʋ́pʋ́nɩ́ Swalumə tʋ̀tʋ̀nán tə gɩganɩ, də pwìí bələ yìə̀n tə ʋ nə tʋn, ba tún Yɩzərayɛlə pɛ̀gá yìə̀n sagɩ tə wa.
16 Menahɛmə dàń ta Tifəsa tɩʋ tə, ʋ zɩgɩ Tirəsa nə, ʋ gʋ kʋ nagwanaa tə wa lɩ̀à tə mama. Ʋ gʋa ba, ba nə wà tɩʋ tə mimien súrí ba pa wá yɩrɩ. Ʋ kàrɩ́ kapwe tə mama pwìí.
Menahɛmə jìgə̀ Yɩzərayɛlə pɩ̀ʋ́
17 Zwida pɩ̀ʋ́ Azarɩya pàrɩ̀ tə bɩna fɩtwa də nʋgʋ nii bɩnɩ tə nə, Gadi bìú Menahɛmə jìgə̀ Yɩzərayɛlə pɩ̀ʋ́, yá ʋ dí pàrɩ̀ bɩna fugə Samari nə. 18 Ʋ tʋn kʋ tə nə lwara Ba-Yígúrə́-Jə-Tiu yáá con. Máŋá tə mama ʋ nə yɩn lʋʋ wa, ʋ wà ʋ tɩ̀àn lɩ cʋna tə wa, Nebatə bìú Zwerobʋamə nə pɩn Yɩzərayɛlə lɩ̀à tʋn. 19 Asiiri pɩ̀ʋ́ Pulə twi lʋʋ nii tə wa, yá Menahɛmə dàń pɩn wá wárʋ́ tonə fɩtwa, sə ʋ san wá ʋ pa ʋ mʋ̀ Menahɛmə pàrɩ̀ tə ja dɩ̀àn. 20 Menahɛmə jon wárʋ́ təntə Yɩzərayɛlə lɩ̀à tə con, ba nə yɩ jɩjə tɩ̀án, ʋ pa Asiiri pɩ̀ʋ́ tə nə. Jɩjə tɩ̀án tə lìù mama pɩn wárʋ́ səbilurən finu. Asiiri pɩ̀ʋ́ tə dàń pìí ʋ va ʋ lʋʋ nii wa, ʋ kʋ́ʋ̀ wà Yɩzərayɛlə lʋʋ nii tə wa zɩgɩ.
21 Ba pʋ́pʋ́nɩ́ Menahɛmə tʋ̀tʋ̀nán tə gɩganɩ, də kʋ tə mama ʋ nə fwa, ba tún Yɩzərayɛlə pɛ̀gá yìə̀n sagɩ tə wa. 22 Menahɛmə tɩga, yá ba gùrì wá ʋ nyɩna-ba con, ba nə dí yáá ba tɩ. Ʋ bìú Pekaya nə dí pàrɩ̀ tə ʋ yuu nə.
Pekaya jìgə̀ Yɩzərayɛlə pɩ̀ʋ́
23 Zwida pɩ̀ʋ́ Azarɩya pàrɩ̀ tə bɩna finu nii bɩnɩ tə nə, Menahɛmə bìú Pekaya jìgə̀ Yɩzərayɛlə pɩ̀ʋ́ Samari nə, yá ʋ dí pàrɩ̀ bɩna bələ. 24 Ʋ tʋn kʋ tə nə lwara Ba-Yígúrə́-Jə-Tiu yáá con, ʋ wà ʋ tɩ̀àn lɩ cʋna tə wa Nebatə bìú Zwerobʋamə nə pɩn Yɩzərayɛlə lɩ̀à tʋn. 25 Remalɩya bìú Peka, ʋ nə daa pɩ̀ʋ́ Pekaya nə, tʋn pwìí bələ yoo Pekaya yɩra. Ʋ də Galadə tɩ̀án bara finu mà Pekaya, də Arəgɔbə, də Ariye, padiə tə dibiu don wa, ba gʋ Samari nə. Mə nətʋ nə ʋ gʋa Pekaya, ʋ ga jon pàrɩ̀ tə ʋ con. 26 Ba pʋ́pʋ́nɩ́ Pekaya tʋ̀tʋ̀nán tə gɩganɩ, də kʋ tə mama ʋ nə fwa, ba tún Yɩzərayɛlə pɛ̀gá yìə̀n sagɩ tə wa.
Peka jìgə̀ Yɩzərayɛlə pɩ̀ʋ́
27 Zwida pɩ̀ʋ́ Azarɩya pàrɩ̀ tə bɩna finu də bələ nii bɩnɩ tə nə, Remalɩya bìú Peka jìgə̀ Yɩzərayɛlə pɩ̀ʋ́ Samari nə, yá ʋ dí pàrɩ̀ bɩna sapʋa. 28 Ʋ tʋn kʋ tə nə lwara Ba-Yígúrə́-Jə-Tiu yáá con, Ʋ wà ʋ tɩ̀àn lɩ cʋna tə wa Nebatə bìú Zwerobʋamə nə pɩn Yɩzərayɛlə lɩ̀à tʋn. 29 Yɩzərayɛlə pɩ̀ʋ́ Peka pàrɩ̀ tə máŋá wa, Asiiri pɩ̀ʋ́ Tɩgəlatə-Pilezɛrə twi ʋ ja Yion tɩ̀án, də Abɛlə-Bɛtə-Maka tɩ̀án, də Yanʋa tɩ̀án, də Kedɛswə tɩ̀án, də Hasɔrə tɩ̀án, də Galadə nagwanaa lɩ̀à, də Galile nagwanaa lɩ̀à, də Nɛfətali nagwanaa lɩ̀à tə mama, ʋ ja va Asiiri. 30 Ela bìú Oze tʋn pwìí bələ yoo Remalɩya bìú Peka yɩra, ʋ mà wá ʋ gʋ. Oze jon pàrɩ̀ tə Peka con, Ozɩasə bìú Yotamə pàrɩ̀ tə bɩna sapʋa nii bɩnɩ tə nə. 31 Ba pʋ́pʋ́nɩ́ Peka tʋ̀tʋ̀nán tə gɩganɩ, də kʋ tə mama ʋ nə fwa, ba tún Yɩzərayɛlə pɛ̀gá yìə̀n sagɩ tə wa.
Yotamə jìgə̀ Zwida payuu tə pɩ̀ʋ́
32 Remalɩya bìú Peka pàrɩ̀ tə bɩna bələ nii bɩnɩ tə nə, Yɩzərayɛlə payuu tə yuu wa, Ozɩasə bìú Yotamə jìgə̀ Zwida payuu tə pɩ̀ʋ́. 33 Ʋ jìgə̀ pɩ̀ʋ́ də ʋ jə bɩna sapʋa də bonu, yá ʋ dí pàrɩ̀ bɩna fugə də bardʋ Zwerizalɛmə nə. Ʋ nuu yɩrɩ nə Yeruswa, ʋ yɩ Sadɔkə bʋ̀á. 34 Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con yoo mama wa, ndə ʋ nyɩna Ozɩasə nə tʋn nətʋ. 35 Yá də kʋ nətʋ mɛ, jwəŋə dədwələn* tə mʋ̀ wà lá nywɩn. Lalʋʋ tə yà tə fwa jwəŋə, də ba sʋ̀rɩ́ wusinə jwəŋə dədwələn təntə yuu wa. Mə Yotamə nə lwə̀ Ba-Yígúrə́-Jə-Tiu dìə̀ tə mimii nəfarʋ tə. 36 Ba pʋ́pʋ́nɩ́ Yotamə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa.