2 Pɛ̀gá 14

Amasɩa jìgə̀ Zwida payuu pɩ̀ʋ́

1 Yʋahazə bìú Zʋasə pàrɩ̀ tə bɩna bələ nii bɩnɩ tə nə, Yɩzərayɛlə payuu tə yuu wa, Zʋasə bìú Amasɩa jìgə̀ Zwida payuu tə pɩ̀ʋ́. 2 Ʋ yà jə bɩna sapʋa də bonu, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna sapʋa də nʋgʋ Zwerizalɛmə nə. Ʋ nuu yɩrɩ nə yɩ Yʋadan, ʋ yɩ Zwerizalɛmə tɩ̀án bʋ̀á. 3 Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con, yá ʋ dàń nə wà kʋ tʋn ndə ʋ nɩbɛɛ Davidə nə. Ʋ yɩ ʋ tʋn kʋ ndə ʋ nyɩna Zʋasə nə. 4 Yá də kʋ nətʋ mɛ, jwəŋə dədwələn* tə mʋ̀ wà lá nywɩn. Lalʋʋ tə yà tə fwa jwəŋə, də ba sʋ̀rɩ́ wusinə jwəŋə dədwələn təntə yuu wa.

5 Amasɩa pàrɩ̀ tə nə twi kʋ jə dɩ̀àn zənzən máŋá tə wa, ʋ gʋa ʋ tʋ̀tʋ̀nà tə nə gʋa ʋ nyɩna, pɩ̀ʋ́ Zʋasə. 6 Yá ʋ wà lagʋra təntə bɩ̀á tə mʋ̀ gwɩ, ndə kʋ nə pʋ́pʋ́nɩ́ Yɩɩ nii sagɩ* tə wa, ʋ nə pɩn Moyizə nə. Ba-Yígúrə́-Jə-Tiu pɩn nii ʋ sʋgʋ tə wa, ʋ wʋ́: «Kʋ wà mɛ sə ba gʋ nyɩna, ba bɩ̀á cʋna yɩrɩ, kʋ ga wà mɛ sə ba gʋ bɩ̀á də, ba nyɩna-ba cʋna yɩrɩ. Yá kʋ dàń nə mɛ sə ba gʋ lìù mama, ʋ tətə cʋna yɩrɩ.»

7 Mə ʋ mʋ̀ Amasɩa nə ta Edomə tɩ̀án mʋ̀rʋ̀ fugə ʋ də́ nəkuən vara tə wa. Yá kʋ̀ʋ̀ tə máŋá wa, ʋ ta Sela tɩ̀án də ʋ də́, ʋ ga dɩ ba tɩʋ tə yɩrɩ Yokətɛlə. Mə kʋ yɩrɩ təntə tə nə wulə də zə̀n mama.

8 Amasɩa dàń tʋn lɩ̀à Yʋahazə bìú Zʋasə con, ʋ nə yɩ Zwehu nàʋ́, ʋ ga yɩ Yɩzərayɛlə pɩ̀ʋ́, ʋ wʋ́: «Bà nə jəri duən, nə ta kʋ̀ʋ̀!» 9 Yɩzərayɛlə pɩ̀ʋ́ Zʋasə ma tʋn ʋ swɩ̀n Zwida pɩ̀ʋ́ Amasɩa con, ʋ wʋ́: «Liban seni nə swɩ̀n Liban sɩsaban tɩ̀ʋ́ con, kʋ wʋ́: “Pa n bʋ̀á tə, sə ʋ ya à bìú kan!” Yá Liban ganaŋʋ twi kʋ nɩŋa seni tə, kʋ laga.» 10 Kʋ yɩ cɩ́gá, n ta Edomə tɩ̀án n də́, kʋ pa n yuu zàn. Fwa pupwən də n dun tə, n ja mɛn n bwálɩ́ nə sənbwen. Bɛ̀ɛ̀ nə pɩn n ma pɩ̀à n ta kʋ̀ʋ̀, kʋ nə wá cʋ̀gʋ̀ mʋ́? N də Zwida dwíí kwatara tə mɛ wá tʋ kʋ̀ʋ̀ tə wa!» 11 Yá Amasɩa wà Zʋasə kwìə̀ tə jon. Yɩzərayɛlə pɩ̀ʋ́ Zʋasə dàń zàn ʋ va ʋ jəri Zwida pɩ̀ʋ́ Amasɩa Bɛtə-Swemɛswə nə, kʋ nə wulə Zwida lʋʋ nii wa, ba wulə ba tɛ duən. 12 Yɩzərayɛlə kwatara tə ta Zwida kwatara tə ba də́, Zwida kwatara tə mama ga dəri ba va ba sànɩ́ wa. 13 Yɩzərayɛlə pɩ̀ʋ́ Zʋasə jɩn Zwida pɩ̀ʋ́ Amasɩa, ʋ nə yɩ Zʋasə bìú, ʋ ga yɩ Ahazɩa nàʋ́, ʋ kə bandiə Bɛtə-Swemɛswə nə. Ʋ twi Zwerizalɛmə, ʋ gwɛrɩ biritaŋʋ tə, kʋ danɩ yí jɩvaŋɩ yiə biənɩa, kʋ nə zɩgɩ Efərayimə mimii tə nə, kʋ va kʋ yí nigwancɩn mimii tə. 14 Ʋ tì sɩ́án tə mama, də wárʋ́ tə mama, də wozəŋə tə mama, tə yà nə wulə Ba-Yígúrə́-Jə-Tiu dìə̀ tə wa, də pɩ̀ʋ́ dìə̀ jɩjə wiən tə wa. Ʋ tə jɩn lɩ̀à də, ʋ súrí lá, ʋ ja pìí ʋ va Samari.

15 Ba pʋ́pʋ́nɩ́ Zʋasə tʋ̀tʋ̀nán tə gɩganɩ, də kʋ tə ʋ nə fwa, də ʋ babarɩ nə yɩn nətʋ, də kʋ̀ʋ̀ tə ʋ nə ta də Zwida pɩ̀ʋ́ Amasɩa, ba tún Yɩzərayɛlə pɛ̀gá yìə̀n sagɩ tə wa. 16 Zʋasə tɩga, yá ba gùrì wá Yɩzərayɛlə lɩ̀à pɛ̀gá libərə bwálɩ́ tə wa, Samari nə, ʋ nyɩna-ba con, ba nə dí yáá ba tɩ. Ʋ bìú Zwerobʋamə nə dí pàrɩ̀ tə ʋ yuu nə.

17 Yʋahazə bìú Zʋasə, ʋ nə yɩ Yɩzərayɛlə pɩ̀ʋ́ tɩan kwa nə, Zʋasə bìú Amasɩa tə fwa bɩna fugə də bonu lʋʋ wa. 18 Ba pʋ́pʋ́nɩ́ Amasɩa tʋ̀tʋ̀nán tə gɩganɩ, ba tún Zwida pɛ̀gá yìə̀n sagɩ tə wa. 19 Ba tʋn pwìí bələ yoo ʋ yɩra Zwerizalɛmə nə, ʋ ma dəri ʋ va Lakiswə. Yá ba dɩŋɩ ʋ kwa, ba va ba gʋ wá lá nə. 20 Ba zɩn ʋ tɩgɩ tə də səsen, ba ja bà ba gùrì Zwerizalɛmə nə, Davidə sadiyuu tə wa, ʋ nyɩna-ba con, ba nə dí yáá ba tɩ. 21 Zwida lalʋʋ tə mama jɩn Azarɩya, ʋ nə jə bɩna fugə bardʋ, ba tún sə ʋ ya pɩ̀ʋ́, ʋ nyɩna Amasɩa yuu nə. 22 Mə ʋ mʋ̀ nə pìí ʋ jon Elatə tɩʋ tə, ʋ kwɛn ʋ lwà, ʋ pa Zwida payuu tə nə, ʋ nyɩna tə tɩan kwa nə.

Bələ nii Zwerobʋamə jìgə̀ Yɩzərayɛlə pɩ̀ʋ́

23 Zʋasə bìú Amasɩa pàrɩ̀ tə bɩna fugə də bonu nii bɩnɩ tə nə, Zwida payuu tə yuu wa, Zʋasə bìú Zwerobʋamə jìgə̀ Yɩzərayɛlə payuu tə pɩ̀ʋ́ Samari nə, yá ʋ dí pàrɩ̀ bɩna sapwɩlə də nədʋ. 24 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tʋn cʋna tə mama, Nebatə bìú Zwerobʋamə nə pɩn Yɩzərayɛlə lɩ̀à tʋn. 25 Ʋ mʋ̀ nə pìí ʋ tún Yɩzərayɛlə lʋʋ nii sɩswɩan tə, kʋ nə zɩgɩ Lebo-Hamatə nə, kʋ va kʋ yí Araba* mʋʋ tə, ndə Ba-Yígúrə́-Jə-Tiu ʋ nə yɩ Yɩzərayɛlə lɩ̀à Yɩɩ nə twá də Amitayi bìú Zʋnasə, ʋ swɩ̀n kʋ nətʋ. Amitayi yɩ Gatə-Efɛrə tíú. 26 Cɩ́gá, Ba-Yígúrə́-Jə-Tiu yà nɩ Yɩzərayɛlə lɩ̀à càn tə nə dáá nətʋ. Ba wa yà kʋ́ʋ̀ ba yoŋu, nə à yə̀ə́ lìù tə ʋ nə tà yoŋu jə. Lìù mama yà ba twi ʋ saŋa Yɩzərayɛlə lɩ̀à nə. 27 Yá Ba-Yígúrə́-Jə-Tiu yà wà swɩ̀n də ʋ wá pa Yɩzərayɛlə lɩ̀à nyʋn tɩa yuu. Ʋ dàń twá də Zʋasə bìú Zwerobʋamə ʋ jon ba.

28 Ba pʋ́pʋ́nɩ́ Zwerobʋamə tʋ̀tʋ̀nán tə gɩganɩ, də kʋ tə mama ʋ nə fwa, də ʋ babarɩ nə yɩn nətʋ kʋ̀ʋ̀ wa, də nətʋ tə ʋ nə pìí ʋ jon Damasə də Hamatə Zwida payuu tə con, ʋ pa Yɩzərayɛlə payuu tə nə, ba tún Yɩzərayɛlə pɛ̀gá yìə̀n sagɩ tə wa. 29 Zwerobʋamə tɩga, yá ba gùrì wá Yɩzərayɛlə lɩ̀à pɛ̀gá libəri tə wa, ʋ nyɩna-ba con, ba nə dí yáá ba tɩ. Ʋ bìú Zakari nə dí pàrɩ̀ tə ʋ yuu nə.