Yʋahazə jìgə̀ Yɩzərayɛlə pɩ̀ʋ́
13
1 Zwida pɩ̀ʋ́ Ahazɩa bìú Zʋasə pàrɩ̀ tə bɩna sapʋa də batwa nii bɩnɩ tə wa, Zwehu bìú Yʋahazə jìgə̀ Yɩzərayɛlə pɩ̀ʋ́ Samari nə. Ʋ dí pàrɩ̀ tə bɩna fugə də barpɛ. 2 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tʋn cʋna tə Nebatə bìú Zwerobʋamə nə pɩn Yɩzərayɛlə lɩ̀à tʋn wuuu, ʋ wà lwàń. 3 Ba-Yígúrə́-Jə-Tiu lɩŋa zàn Yɩzərayɛlə lɩ̀à yuu wa, yá ʋ ken ba Siiri pɩ̀ʋ́ Hazayɛlə jɩɩn wa. Kʋ kwa nə, ʋ tə ken ba, Hazayɛlə bìú Bɛn-Hadadə jɩɩn wa, máŋá tə mama wa, pɛ̀gá təntə nə yɩn lʋʋ wa. 4 Yʋahazə dàń ma lòrì Ba-Yígúrə́-Jə-Tiu, yá ʋ cʋgʋ ʋ yɩjʋnɩ. Cɩ́gá, Ba-Yígúrə́-Jə-Tiu yà nɩ Siiri pɩ̀ʋ́ yà nə fɩfɩn Yɩzərayɛlə lɩ̀à tə nətʋ. 5 Yá Ba-Yígúrə́-Jə-Tiu pɩn jonu Yɩzərayɛlə lɩ̀à tə nə. Ba jon ba tɩ̀àn Siiri tɩ̀án jɩɩn wa, ba wulə ba bwálɩ́ nə, ndə fuən nə. 6 Yá ba dàń nə wà ba tɩ̀àn lɩ, cʋna tə wa, Zwerobʋamə dìə̀ lɩ̀à nə pɩn Yɩzərayɛlə lɩ̀à tʋn. Ba də tʋn cʋna təntə wuuu, ba ga twá tə nə. Yá woŋwanʋ Aswera* dacelə tə yà tə zɩga Samari nə. 7 Ba-Yígúrə́-Jə-Tiu yà pɩn Yʋahazə kwatara tə zwɛ̀ ba ga səsədɩra finu, də səsen kòrə̀n fugə, də kwatara mʋ̀rʋ̀ fugə, ba nə vəli də nɛɛ. Cɩ́gá, Siiri pɩ̀ʋ́ tə yà gʋa ba duən, ʋ pa ba jì ndə tɩa pùrú nə, ba nɩŋɩ də nɛɛ. 8 Ba pʋ́pʋ́nɩ́ Yʋahazə tʋ̀tʋ̀nán tə gɩganɩ, də kʋ tə mama ʋ nə fwa, də ʋ babarɩ nə yɩn nətʋ, ba tún Yɩzərayɛlə pɛ̀gá yìə̀n sagɩ tə wa. 9 Yʋahazə tɩga, yá ba gùrì wá Samari nə, ʋ nyɩna-ba con, ba nə dí yáá ba tɩ. Ʋ bìú Zʋasə nə dí pàrɩ̀ tə ʋ yuu nə.Zʋasə jìgə̀ Yɩzərayɛlə pɩ̀ʋ́
10 Zwida payuu pɩ̀ʋ́ Zʋasə pàrɩ̀ tə bɩna fɩtwa də barpɛ nii bɩnɩ tə nə, Yʋahazə bìú Zʋasə jìgə̀ Yɩzərayɛlə pɩ̀ʋ́ Samari nə. Ʋ dí pàrɩ̀ tə bɩna fugə də bardʋ. 11 Ʋ yà tʋŋa kʋ tə nə lwara Ba-Yígúrə́-Jə-Tiu yáá con. Ʋ tʋn cʋna tə Nebatə bìú Zwerobʋamə nə pɩn Yɩzərayɛlə lɩ̀à tʋn wuuu, ʋ wà tə yá. 12 Ba pʋ́pʋ́nɩ́ Zʋasə tʋ̀tʋ̀nán tə gɩganɩ, də kʋ tə mama ʋ nə fwa, də ʋ babarɩ nə yɩn nətʋ, də kʋ̀ʋ̀ tə ʋ nə ta də Zwida pɩ̀ʋ́ Amasɩa, ba tún Yɩzərayɛlə pɛ̀gá yìə̀n sagɩ tə wa. 13 Zʋasə tɩga, yá ba gùrì wá ʋ nyɩna-ba con, ba nə dí yáá ba tɩ. Yá Zwerobʋamə dàń nə jə̀ń ʋ padaʋ tə yuu wa. Ba gùrì Zʋasə Yɩzərayɛlə pɛ̀gá libəri tə wa, Samari nə.
Elize tɩan yoo
14 Máŋá tə Elize nə tʋa yayɩgʋ tə, kʋ nə wá pa ʋ tɩ, Yɩzərayɛlə pɩ̀ʋ́ Zʋasə vəli ʋ kwá ʋ yuu con, ʋ kwi yɩnɩa ʋ lwá Elize yɩra, ʋ ga swɩ̀n, ʋ wʋ́: «À nyɩna! À nyɩna! N yɩ Yɩzərayɛlə səsen kòrə̀n tə mama, də kʋ səsədɩra tə mama!» 15 Elize ma le wá, ʋ wʋ́: «Tì twan də cɩan!» Zʋasə tì twan də cɩan. 16 Elize kʋ́ʋ̀ swɩ̀n Yɩzərayɛlə pɩ̀ʋ́ tə con, ʋ wʋ́: «Van twan tə!» Máŋá tə pɩ̀ʋ́ tə nə van twan tə, Elize tún ʋ jɩɩn pɩ̀ʋ́ tə jɩɩn tə yuu, ʋ ga swɩ̀n, ʋ wʋ́: 17 «Súrí yɩɩ yipɩan con təkurə tə!» Pɩ̀ʋ́ tə ma súrí təkurə tə. Elize kʋ́ʋ̀ swɩ̀n, ʋ wʋ́: «Ta twan tə!» Pɩ̀ʋ́ tə ma ta twan tə. Elize kʋ́ʋ̀ swɩ̀n, ʋ wʋ́: «Kʋ yɩ Ba-Yígúrə́-Jə-Tiu cɩɩn tə, kʋ nə wá pa n də́ dɩ̀àn. Kʋ wá pa n də́ dɩ̀àn Siiri tɩ̀án yuu wa. N wá ta ba n də́ Afɛkə nə, n ga wá cʋ̀gʋ̀ ba mɩ́ámɩ́án.» 18 Elize tə swɩ̀n ʋ súrí lá, ʋ wʋ́: «Tì cɩan tə!» Pɩ̀ʋ́ tə ma tì cɩan tə. Elize kʋ́ʋ̀ swɩ̀n Yɩzərayɛlə pɩ̀ʋ́ tə con, ʋ wʋ́: «Mà tə tɩa!» Pɩ̀ʋ́ tə mà tə tɩa nɛɛ batwa, ʋ ga cən ʋ zɩga. 19 Yɩɩ tʋtʋnʋ Elize lɩŋa zàn pɩ̀ʋ́ tə yuu wa, ʋ ga swɩ̀n, ʋ wʋ́: «N yà mɛ sə n mà nɛɛ bonu, nə à yə̀ə́ nɛɛ bardʋ. Kʋ nətʋ yà wá pa n ta Siiri tɩ̀án n də́, n ga cʋ̀gʋ̀ ba mɩ́ámɩ́án. Sɩ́ʋ́n nə, kʋ dàń yɩ nɛɛ batwa cɩcɩ nə n wá ta ba n də́.»
20 Elize tɩga, ba tì ba gùrì. Bɩnɩ tə kʋ nə dan lá, Mʋabə tɩ̀án kwatara púlə́ zʋa Yɩzərayɛlə lʋʋ nii tə wa. 21 Dɩɩn don nə, lɩ̀à duən vəli sə ba gùrì tɩgɩ, də nə̀ń dʋŋa kwatara púlí don nə. Ba ma dɩlɩ tɩgɩ tə Elize libəri tə wa. Tɩgɩ tə dwen Elize kurən tə yɩra, tɩgɩ tə ga pìí ʋ bwin, ʋ zàn ʋ zɩga ʋ nɛɛ yuu.
Yɩzərayɛlə lɩ̀à dí dɩ̀àn Siiri tɩ̀án yuu wa
22 Siiri pɩ̀ʋ́ Hazayɛlə yà ken càn Yɩzərayɛlə lɩ̀à nə, máŋá tə mama wa, Yʋahazə nə yɩn lʋʋ wa. 23 Yá Ba-Yígúrə́-Jə-Tiu tʋn pubwanʋ ba yɩra. Ʋ dəri ba yinəgə ʋ ga pìí ʋ ywàń ba yuu nə, ʋ də Abərahamə, də Yɩzakə, də Zwakɔbə nimarʋ* tə yɩrɩ. Ʋ yà ba pɩa sə ʋ cʋ̀gʋ̀ ba, ʋ yà tə nə wà ba vɩ ʋ dʋgʋ yiŋʋnɩ də wá yɩrɩ. 24 Siiri pɩ̀ʋ́ Hazayɛlə tɩga, yá ʋ bìú Bɛn-Hadadə dàń nə dí pàrɩ̀ tə ʋ yuu nə. 25 Yʋahazə bìú Zʋasə pìí ʋ jon Yɩzərayɛlə lʋʋ nii tɩan tə, Hazayɛlə bìú Bɛn-Hadadə con. Tɩan təntə yà yɩ Hazayɛlə nə jon tə Zʋasə nyɩna Yʋahazə con, kʋ̀ʋ̀ tə máŋá wa. Zʋasə ta Bɛn-Hadadə ʋ də́ nɛɛ batwa, ʋ ga jon Yɩzərayɛlə lʋʋ nii tɩan tə.