Pɩ̀ʋ́ Zʋasə jìgə̀ Zwida payuu tə pɩ̀ʋ́
12
1 Zʋasə yà jə bɩna barpɛ, máŋá tə wa ʋ nə jìgə̀ pɩ̀ʋ́. 2 Pɩ̀ʋ́ Zwehu pàrɩ̀ tə bɩna barpɛ nii bɩnɩ tə wa nə Zʋasə jìgə̀ pɩ̀ʋ́, yá ʋ dí pàrɩ̀ bɩna sapwɩlə Zwerizalɛmə nə. Ʋ nuu yɩ Bɛrəsweba tíú, ʋ yɩrɩ yà nə yɩ Sibiya. 3 Zʋasə tʋn kʋ tə nə yɩ mənəmənə Ba-Yígúrə́-Jə-Tiu yáá con, ʋ lʋʋ wúlú mama wa. Cɩ́gá, Yɩɩ joŋwanʋ Yehoyada yà kʋ̀nɩ̀ wá zəni. 4 Də kʋ nətʋ mɛ, jwəŋə dədwələn* tə mʋ̀ wà lá nywɩn. Lalʋʋ tə yà tə fwa jwəŋə, də ba sʋ̀rɩ́ wusinə jwəŋə dədwələn təntə yuu wa.Pɩ̀ʋ́ Zʋasə pɩn ba kwɛn Yɩɩ dìə̀ tə
5 Zʋasə swɩ̀n Yɩɩ joŋwana tə con, ʋ wʋ́: «Á joŋə səbiu tə mama ba nə tún vàn nə, ba pa Yɩɩ nə, ba nə ja twi Ba-Yígúrə́-Jə-Tiu dìə̀ tə wa, kʋ nə yɩ mɩɩ mama kwənə, kʋ twá kʋ tə nə lìù mama nə jə, də səbiu tə mama ba nə pɩn də pupwən, Ba-Yígúrə́-Jə-Tiu dìə̀ tə wa. 6 Yɩɩ joŋwana tə mɛ sə ba jon kʋ lɩ̀à tə con ba nə yə̀ə́, sə ba ma kwɛn Yɩɩ dìə̀ tə bwálá tə nə cʋ̀gʋ̀.»
7 Yá Zʋasə fwa bɩna sapʋa də batwa ʋ pàrɩ̀ tə yuu wa, də Yɩɩ joŋwana tə tə wà Yɩɩ dìə̀ tə bwálá tə nə cʋ̀gʋ̀ tə kwɛn. 8 Pɩ̀ʋ́ Zʋasə ma bon Yɩɩ joŋwanʋ Yehoyada də Yɩɩ joŋwana tə duən tə, ʋ bwe ba, ʋ wʋ́: «Bɛ̀ɛ̀ nə pɩn á tə wà Yɩɩ dìə̀ tə bwálá tə nə cʋ̀gʋ̀ tə kwɛn? Sɩ́ʋ́n nə, á kʋ́ʋ̀ dànà ká ja səbiu tə á nə joŋə lɩ̀à tə con, á nə yə̀ə́. Á pɩan kʋ sə ba ma kwɛn Yɩɩ dìə̀ tə bwálá tə nə cʋ̀gʋ̀.» 9 Yɩɩ joŋwana tə sɛ̀ sə ba kʋ́ʋ̀ dàn ká jon səbiu lalʋʋ tə con, sə ba ga lɩ ba jɩɩn Yɩɩ dìə̀ tə bwálá tə nə cʋ̀gʋ̀ kwɩʋn yoo wa. 10 Yɩɩ joŋwanʋ Yehoyada dàń tì səbiu daka, ʋ pórí bʋʋ ka nipuə tə yuu wa, ʋ tún Yɩɩ joŋi bwálɩ́ tə jɩzən vàn nə, bwálɩ́ tə nə, ba nə twá ba ma zwɩ Ba-Yígúrə́-Jə-Tiu dìə̀ tə wa. Yɩɩ joŋwana tə nə cɩ̀ Yɩɩ dìə̀ tə mimii tə nə yà kəni səbiu tə mama, lɩ̀à tə nə ja twi Ba-Yígúrə́-Jə-Tiu dìə̀ wa, səbiu daka təntə wa. 11 Máŋá tə ba nə nɩ də səbiu dáá daka tə wa, lìù tə nə pʋ́pʋ́nɩ́ pɩ̀ʋ́ saga tə, də Yɩɩ joŋwana yun tɩ̀án nəkwɩa tə yàá bà, ba lwá kʋ Ba-Yígúrə́-Jə-Tiu dìə̀ tə wa, ba gàlà, ba kə lwàràn wa. 12 Ba dàń yàá pa səbiu təntə ba nə gàlɩ̀, tʋ̀tʋ̀nán yáá tɩ̀án tə nə, sə ba ma ŋwɩ́n tʋ̀tʋ̀nà tə Ba-Yígúrə́-Jə-Tiu dìə̀ tə wa. Ba yàá ja kʋ ba ŋwɩ́n lɩ̀à tə nə sə̀ dɛɛ tə, də dìlwə̀rə́ tə, ba nə tʋŋa Ba-Yígúrə́-Jə-Tiu dìə̀ tə wa. 13 Ba yàá ja kʋ ba ŋwɩ́n dìlwə̀rə́ tə, də ba tə nə sè kapana tə. Kʋ tə nə súrí lá, ba yàá ja kʋ ba yə̀ dɛ̀ɛ̀, də kapana ba nə sə̀, sə ba ma kwɛn Ba-Yígúrə́-Jə-Tiu dìə̀ tə bwálá tə nə cʋ̀gʋ̀. Kʋ tə súrí won tə mama nə, ba nə mɛ sə ba ŋwɩ́n səbiu kʋ yɩrɩ, ba ma kwɛn Yɩɩ dìə̀ tə. 14 Yá ba dàń nə wà səbiu təntə lɩ̀à nə ja twi Ba-Yígúrə́-Jə-Tiu dìə̀ tə wa tì ba ma fwa wárʋ́ kwara, nə à yə̀ə́ sɩ̀án, nə à yə̀ə́ nagwalan, nə à yə̀ə́ nabwanan. Ba wà sɩ́án won nədʋ tətə, nə à yə̀ə́ wárʋ́ won nədʋ tətə fwa. 15 Ba yà pɩn səbiu tə tʋ̀tʋ̀nán yáá tɩ̀án tə nə, sə ba ma kwɛn Ba-Yígúrə́-Jə-Tiu dìə̀ tə. 16 Ba yà ba tʋ̀tʋ̀nán yáá tɩ̀án tə, ba nə kəni səbiu tə ba jɩɩn, sə ba ma ŋwɩ́n tʋ̀tʋ̀nà tə bwe, kʋ tə yuu wa, səbiu tə nə tʋn. Cɩ́gá, tʋ̀tʋ̀nán yáá tɩ̀án tə yà tʋŋa də pùə́ nədʋ. 17 Ba yà ba səbiu tə lɩ̀à nə pɩn cʋna kwɩan joŋi yɩrɩ, nə à yə̀ə́ cʋna yɩrɩ ja twi Ba-Yígúrə́-Jə-Tiu dìə̀ tə wa. Səbiu təntə yà yɩ Yɩɩ joŋwana tə nə tɩ.
Zʋasə pàrɩ̀ tə yígúrə́
18 Kʋ máŋá tə wa, Siiri pɩ̀ʋ́ Hazayɛlə vəli ʋ ta Gatə tɩ̀án ʋ də́. Hazayɛlə yà pɩ̀à sə ʋ va ʋ ta Zwerizalɛmə tɩ̀án də. 19 Zwida pɩ̀ʋ́ Zʋasə dàń ma pɛ̀ ʋ nɩbara Zwida pɛ̀gá Zozafatə, də Yoramə, də Ahazɩa wiən tə mama, ba yà nə tún ba pa Yɩɩ nə, də wiən tə mama ʋ tətə nə tún ʋ pa Yɩɩ nə, də sɩ́án tə mama, tə nə wulə Ba-Yígúrə́-Jə-Tiu dìə̀ tə, də padiə tə wa, ʋ pa ba ja va ba pa Siiri pɩ̀ʋ́ Hazayɛlə nə. Yá Hazayɛlə dàń pìí ʋ vìí, ʋ kʋ́ʋ̀ wà Zwerizalɛmə tɩ̀án tɛ.
20 Ba pʋ́pʋ́nɩ́ Zʋasə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa. 21 Ʋ tʋ̀tʋ̀nà tə tʋn pwìí bələ yoo ʋ yɩra, ba mà wá ba gʋ Bɛtə-Milo nə, də ʋ ma vələ Sila. 22 Kʋ yɩn Swimeyatə bìú Yozabadə, də Swomɛrə bìú Yehozabadə, ba nə yɩ Zʋasə tʋ̀tʋ̀nà nə mà wá ba gʋ. Ba gùrì wá Davidə sadiyuu tə wa, ʋ nyɩna-ba con, ba nə dí yáá ba tɩ. Ʋ bìú Amasɩa nə dí pàrɩ̀ tə ʋ yuu nə.