4
1 Ʋ fwa Yɩɩ joŋi bwálɩ́ də cɩnɩan, kʋ danɩ yɩ jɩvaŋɩ yiə sapʋa, kʋ wanɩ də yɩ jɩvaŋɩ yiə sapʋa, kʋ yuu də tɩa ga yɩ jɩvaŋɩ yiə fugə.Cɩnɩan kwarɩ nəfarʋ, də wùrə́n fugə fwaŋʋ yoo
2 Ʋ fwa cɩnɩan kwarɩ nəfarʋ, kʋ nii wanɩ nə yɩ jɩvaŋɩ yiə fugə, kʋ nii də tɩa yɩ jɩvaŋɩ yiə bonu, kʋ nii kəkəlu tə ga yɩ jɩvaŋɩ yiə fɩtwa. 3 Ba fwa nɩan nyɩnyɩga fugə, ba tún kʋ nii kəru tə də̀ń con. Nɩan nyɩnyɩga təntə yà tɩɩn nɛ̀ɛ̀ bələ tə twá duən fugə fugə jɩvaŋɩ yii mama wa, tə ga yɩ ba nyɩan cɩnɩan tə ba ma lwá tə də kwarɩ nəfarʋ tə mɛ naa nədʋ. 4 Kwarɩ nəfarʋ tə yɩ kʋ tígə́ cɩnɩan nɩan nyɩnyɩga fugə də bələ yuu wa. Tə batwa yáá te jɩzən saparʋ con, tə batwa duən yáá te yɩɩ yizwɩa con, tə batwa duən də yáá te jɩgwiə saparʋ con, tə batwa duən də yáá ga te yɩɩ yipɩan con, tə də̀ŋə́ ga te duən con kwarɩ tə də̀ń nə. 5 Kwarɩ tə ləni yɩ ndə jɩtalɩ wanɩ nə, kʋ nii tə yɩ ndə wùrú zʋŋa nii nə, kʋ ga nyən ndə buu mɩna pùní nə. Kʋ wa nɩ́á yà yí litərə 120 000.
6 Huramə fwa wùrə́n fugə, ʋ tún tə bonu Yɩɩ dìə̀ tə jɩzən vàn yuu, ʋ ga tún tə bonu ka jɩgwiə vàn yuu, sə ba ja tə nɩ́á ba ma swɛ jwəŋə vàná tə nə mɛ sə ba sʋ̀rɩ́*. Yɩɩ joŋwana tə də yà swɛ ba yɩra də nɩ́á təntə.
Yɩɩ dìə̀ tə zɩla duən fwaŋʋ yoo
7 Ʋ fwa sɩ́án canzɩlan fugə, ndə tə nə mɛ sə tə fwa nətʋ, ʋ zɩgɩ kwa con dìə̀ tə wa. Tə bonu zɩga jɩzən vàn nə, tə bonu duən də ga zɩga jɩgwiə vàn nə. 8 Ʋ fwa tabɩlan fugə, ʋ tún kwa con dìə̀ tə wa. Tə bonu wulə jɩzən vàn nə, bonu duən də ga wulə jɩgwiə vàn nə. Ʋ fwa sɩ́án wùrú zwɩɩn bíí. 9 Ʋ lwə̀ dəwoo, ʋ pa Yɩɩ joŋwana tə nə, ʋ ga lwà dəwoo nəfarʋ don də ʋ lɩ kʋ məmiən, ʋ fwa kʋ borən, ʋ ga ja cɩnɩan ʋ ma tùrì tə yɩra.
10 Ʋ tún kwarɩ nəfarʋ tə Yɩɩ dìə̀ tə jɩzən vàn nə, jɩgwiə saparʋ, də yɩɩ yipɩan pwə́rə́ wa.
11 Huramə kʋ́ʋ̀ fwa kwara duən, də pɛlə tə, də wùrú zwɩɩn tə ʋ zwɛ̀. Huramə dàń tʋn pɩ̀ʋ́ Salʋmʋn tʋ̀tʋ̀nán tə mama ʋ zwɛ̀ Yɩɩ dìə̀ tə wa. 12 Tə mʋ̀ nə yɩ ywəŋə bələ, də tə yun zɩlan bələ, də wogɩganʋ tə nə púə́ zɩlan bələ tə nə, ywəŋə tə yuu wa, 13 də bùlə̀ nəmənbii 400, tə nə tɩɩn nɛ̀ɛ̀ bələ bələ wogɩganʋ mama yɩra, kʋ nə púə́ ywəŋə tə yuu nə. 14 Ʋ fwa zɩlan, ʋ ga fwa wùrə́n ʋ zɩgɩ zɩlan tə yuu wa, 15 də kwarɩ nəfarʋ tə nə zɩga nɩan fugə də bələ nyɩnyɩga yuu wa, 16 də tʋntʋnan zwɩɩn tə, də pɛlə tə, də cɩnɩan danyunzɩan tə. Tʋtʋnzɩla təntə mama, pɩ̀ʋ́ Salʋmʋn nə pɩn Huramə-Abi fwa Ba-Yígúrə́-Jə-Tiu dìə̀ tə yɩrɩ, yɩ ʋ fwa də cɩnɩan kʋ nə yɩ parɩ. 17 Pɩ̀ʋ́ tə pɩn ba nyɩan cɩnɩan ba ma lwá tə, Zʋrədɛn vara tə wa, Sukotə tɩʋ tə də Sereda tɩʋ tə pwə́rə́ wa. 18 Salʋmʋn pɩn ba fwa tʋtʋnzɩla təntə mama, ba ga wà zɩgɩ sə ba kəri cɩnɩan tə, ba nə ma fwa tə, ba lwarɩ kʋ dun nə mɛ nətʋ, tə nə dáá zənzən yɩrɩ.
19 Salʋmʋn tə fwa wiən tə duən tə mama, Yɩɩ dìə̀ tə yɩrɩ. Tə mʋ̀ nə yɩ Yɩɩ joŋi bwálɩ́ tə, ba nə fwa də sɩ́án, də tabɩlan tə, ba nə tuŋə dipɛn* tə yuu ba pɩn Yɩɩ nə, 20 də canzɩlan tə, də tə cànán tə ba nə fwa də sɩ́án tə nə parɩ, ba nə mɛ sə ba sʋ̀rɩ́, dibiu tə yáá con, kʋ nə yɩ Yɩɩ cɩcɩ nyiən. 21 Kʋ súrí wiən tə nə nyən ndə tɩ̀án pùnə́ nə, də cànán tə, də tə pɩ́nán nəmənbii tə, ba nə fwa də sɩ́án tə nə ba durən jə, 22 də wiən tə ba nə ma də̀ŋì cànán tə, də wùrú zwɩɩn tə, də zʋbii tə, də sɩ́án wiən tə ba nə ma tùŋə̀ mən, də sɩ́án bòrù tə ba nə wá kə dibiu tə nə yɩ Yɩɩ cɩcɩ nyiən mimii tə nə, də kʋ tə ba nə wá kə kwa con dibiu tə mimii nə.