5
1 Mə kʋ zɩgɩ nətʋ, Salʋmʋn ma tʋn Ba-Yígúrə́-Jə-Tiu dìə̀ tə tʋ̀tʋ̀nán tə mama, ʋ zwɛ̀. Kʋ kwa nə, ʋ pɩn ba ja wiən tə mama, ʋ nyɩna Davidə nə tún ʋ pa Yɩɩ nə, ba ja bà. Tə mʋ̀ nə yɩ wárʋ́, də sɩ́án, də wiən duən kapʋpʋ. Ʋ jon tə mama, ʋ kə Yɩɩ dìə̀ tə jɩjə wiən tə wa.Ba ken Yɩɩ nimarʋ culu daka tə Yɩɩ dìə̀ tə wa.
2 Salʋmʋn dàń ken Yɩzərayɛlə lɩ̀à nəkwɩna tə, də ba dwíə́ tə yáá tɩ̀án tə, də dìì tɩ̀án tə duən yáá nə, sə ʋ pa ba ja Ba-Yígúrə́-Jə-Tiu nimarʋ culu daka tə, ba nan Davidə sadiyuu tə wa, ba nə boŋə Siyon, ba ja va Yɩɩ dìə̀ tə wa. 3 Yɩzərayɛlə lɩ̀à tə mama dàń twi duən yáá, pɩ̀ʋ́ Salʋmʋn con, sə ba də́ bɩnɩ tə cànɩ̀ barpɛ nii cànà tə. 4 Yɩzərayɛlə lɩ̀à nəkwɩna tə mama twi, yá Levi dwíí tə dàń zɩn Yɩɩ nimarʋ culu daka tə. 5 Ba lɩ Yɩɩ nimarʋ culu daka tə, də Yɩɩ wúlú gansili tə, də wiən tə mama, tə nə yɩ Yɩɩ nyiən, tə nə wulə kʋ wa. Kʋ yɩn Levi dwíí Yɩɩ joŋwana tə nə zɩn tə. 6 Pɩ̀ʋ́ Salʋmʋn də Yɩzərayɛlə lɩ̀à tə mama, ʋ nə bon, yà zɩga Yɩɩ nimarʋ culu daka tə yáá con. Ba gʋa vanmɩnɩ də vanfaran, tə nə dáá ba nə wàrɩ̀ tə ba gàlɩ̀, ba ga wàrɩ̀ tə ba kəri, ba ma fwa jwəŋə. 7 Yɩɩ joŋwana tə ja Ba-Yígúrə́-Jə-Tiu nimarʋ culu daka tə, ba va ba tún Yɩɩ dìə̀ tə bwálɩ́ tə wa, kʋ nə yɩ Yɩɩ cɩcɩ nyiən, Yɩɩ sàń wonəŋə ba nə boŋə kerubə*, nyɩnyɩga vànà də̀ń nə. 8 Yɩɩ sàń wonəŋə nyɩnyɩga tə vànà yà tɩɩn yɩɩ nə, bwálɩ́ tə yuu con, ba nə mɛ sə ba tún Yɩɩ nimarʋ culu daka tə, sə tə pú ka də ka dɛɛ nədaran tə nə. 9 Dɛɛ tə yà dara, kʋ pa lìù wàá tə ʋ nɩ, də ʋ nə wulə Yɩɩ nimarʋ culu daka tə, də Yɩɩ wúlú bwálɩ́ tə pwə́rə́ wa. Yá tə nə wàrɩ̀ tə nɩ, də lìù nə wulə kàrá con. Yɩɩ nimarʋ culu daka tə tə wulə kʋ bwálɩ́ tə wa, də zə̀n mama. 10 Won don yà tə̀lə́ Yɩɩ nimarʋ culu daka tə wa, də kʋ nə tà kapana pɩpɛɛ bələ tə, Moyizə nə ken ka wa Ɔrɛbə nə, máŋá tə wa Ba-Yígúrə́-Jə-Tiu nə tún nimarʋ də Yɩzərayɛlə lɩ̀à tə, ba nə nan Ezwipətə kwa nə.
11 Yɩɩ joŋwana tə pìí ba nan Yɩɩ wúlú bwálɩ́ tə wa. Yɩɩ joŋwana tə mama yà kwɛn ba tɩ̀àn, ba lɩ durən yìə̀n wa, ba ga wà ba púlə́ tə nii swɩ́án nə twá. 12 Levi dwíí tə mama, ba nə yɩ gwàgá, Asafə, də Eman, də Yedutunə dwíə́ tə wa, də ba bɩ̀á də ba nubɩa yà zʋa ganbʋa, ba ja zɩga Yɩɩ joŋi bwálɩ́ tə yɩɩ yipɩan con, də zɩnzɩran, də nabwanan, də banan. Yɩɩ joŋwana bíí də sapʋa yà zɩga ba səpuni nə, ba nə wúrí nabwanan. 13 Nabwanwurə tə, də gwàgá tə mɛ twá duən ba səri, sə ba ma bʋ Ba-Yígúrə́-Jə-Tiu nə, ba pa wá dun. Ba dwan nabwanan tə, də zɩnzɩran tə, də banan tə nii nə, ba ma bʋ Ba-Yígúrə́-Jə-Tiu nə, ba wʋ́: «Á bwɩa Ba-Yígúrə́-Jə-Tiu nə, ʋ nə yɩ sonu tíú yɩrɩ. Cɩ́gá, ʋ wʋywaŋʋ* tə wulə wuuu, kʋ bà zwɛ̀!» Kʋ máŋá təntə wa, də Ba-Yígúrə́-Jə-Tiu dìə̀ tə nii súə́ də bakwan. 14 Yá Yɩɩ joŋwana tə kʋ́ʋ̀ wà wànɩ́ ba zɩgɩ ba tʋn lá, Ba-Yígúrə́-Jə-Tiu dun tə nə súə́ ʋ dìə̀ tə yɩrɩ.