6
1 Salʋmʋn dàń swɩ̀n, ʋ wʋ́:«Ba-Yígúrə́-Jə-Tiu, n yà swɩ̀n də n wá ya yikunu wa!
2 Yá mʋ̀ lwə̀ dìə̀ nəzəŋu sə n ya lá.
N wá ya kʋ bwálɩ́ təntə wa, máŋá mama wuuu!»
Salʋmʋn pɩn dìə̀ tə Yɩɩ nə
3 Pɩ̀ʋ́ Salʋmʋn dàń viviri ʋ yáá ʋ kə Yɩzərayɛlə lalʋʋ tə mama con, ʋ ga lòrì, sə Yɩɩ fwa zəni ba mama yɩra. Yɩzərayɛlə lalʋʋ tə mama yà zɩga yɩɩ nə. 4 Ʋ swɩ̀n, ʋ wʋ́:
«À bwɩ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. Ʋ tətə nə swɩ̀n à nyɩna Davidə con, də ʋ nii, ʋ tətə ga nə tʋn kʋ tə ʋ nə swɩ̀n tə, ʋ pa kʋ nii sú.» Ʋ yà swɩ̀n, ʋ wʋ́: 5 «Kʋ nə zɩgɩ dɩɩn tə nə, à nə pɩn à lɩ̀à tə nan Ezwipətə lʋʋ nii tə wa, à wà tɩʋ kúrí Yɩzərayɛlə dwíə́ tə mama wa, sə ba lwà dìə̀ lá, ba pa nə. Yá à wà bɛɛ də kúrí, sə ʋ ya Yɩzərayɛlə lalʋʋ tə, kʋ nə yɩ à mʋ̀ lɩ̀à yáá tíú. 6 Yá à kúrí Zwerizalɛmə tɩʋ tə, sə à bɩrɩ à tɩ̀àn kʋ wa, à ga kúrí Davidə, sə ʋ ywàń à lalʋʋ tə yuu nə.» 7 Salʋmʋn swɩ̀n ʋ súrí lá, ʋ wʋ́: «À nyɩna Davidə yà bʋ́n ʋ bɩcan wa, sə ʋ lwà dìə̀ ʋ pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 8 Yá Ba-Yígúrə́-Jə-Tiu swɩ̀n ʋ con, ʋ wʋ́: “N fwa zəni, də n nə bʋ́n n bɩcan wa, sə n lwà dìə̀ n pa nə. 9 Kʋ dàń nə bá ya n mʋ̀ nə wá lwà dìə̀ n pa nə, kʋ wá ya n bìú tə, ʋ nə wá nan n kwíə́ də̀ń, nə wá lwà dìə̀ ʋ pa nə.” 10 Ba-Yígúrə́-Jə-Tiu twá ʋ sʋgʋ tə nii nə, ʋ nə swɩ̀n. À zàn à jon à nyɩna Davidə yuu nə, à jə̀ə́ Yɩzərayɛlə lɩ̀à padaʋ tə yuu, ndə Ba-Yígúrə́-Jə-Tiu yà nə swɩ̀n nətʋ. Yá à dàń lwà dìə̀ à pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 11 À tún Yɩɩ nimarʋ culu daka tə, Ba-Yígúrə́-Jə-Tiu nimarʋ tə nə wulə ka wa, dìə̀ tə wa. Mə nimarʋ təntə nə ʋ tún də Yɩzərayɛlə lɩ̀à tə.»
Salʋmʋn yɩjʋnɩ
12 Kʋ kwa nə, Salʋmʋn zàn ʋ zɩga Ba-Yígúrə́-Jə-Tiu joŋi bwálɩ́ tə yáá con, Yɩzərayɛlə lalʋʋ tə mama yáá con. Ʋ zɩ̀n ʋ jɩ̀àn yɩɩ nə, sə ʋ jon Yɩɩ. 13 Cɩ́gá, Salʋmʋn yà fwa gárɩ́ də cɩnɩan, ʋ tún Yɩɩ wúlú gansili tə dəwoo tə titəŋi wa. Kʋ danɩ yà yɩ jɩvaŋɩ yiə bonu, kʋ wanɩ yɩ jɩvaŋɩ yiə bonu, kʋ yuu də tɩa ga yɩ jɩvaŋɩ yiə batwa. Salʋmʋn dɩ̀gà kʋ yuu wa, ʋ tʋ ʋ nadwana yuu Yɩzərayɛlə lalʋʋ tə mama yáá con, ʋ zɩ̀n ʋ jɩ̀àn yɩɩ nə, ʋ ga swɩ̀n, ʋ wʋ́: 14 «Ba-Yígúrə́-Jə-Tiu, n nə yɩ Yɩzərayɛlə lɩ̀à Yɩɩ, Yɩɩ don tə̀lə́ ʋ nə nyən də mʋ́ lanworu wa, də tɩa yuu wa. N mʋ̀ nə ywàŋá n də n tʋ̀tʋ̀nà tə nimarʋ tə yuu nə, n ga tʋŋa wʋywaŋʋ* ba yɩra, də ba nə twá n nə, də ba bɩcanɩ mama. 15 N twá n sʋgʋ tə nii nə, n nə swɩ̀n à nyɩna David con, ʋ nə yɩ n tʋtʋnʋ. Cɩ́gá, kʋ tə n nə swɩ̀n ʋ con, n tətə nə tʋn kʋ, n pa kʋ nii sú, ndə ba nə na kʋ zə̀n. 16 Sɩ́ʋ́n nə, Ba-Yígúrə́-Jə-Tiu, n nə yɩ Yɩzərayɛlə lɩ̀à Yɩɩ, n dàń tʋn kʋ tə də, n nə swɩ̀n à nyɩna Davidə con. N swɩ̀n ʋ con, n wʋ́: “N bɩ̀á tə nə cɩ̀gà ba tɩ̀àn nə, ba tʋtʋnɛɛ wa, ba nə zìlí à nii tə, ndə n tətə nə tʋn nətʋ, n bá pɩ̀à lìù n ga n dwíí tə wa, sə ʋ jə̀ń Yɩzərayɛlə padaʋ tə yuu wa.” 17 Sɩ́ʋ́n nə, Ba-Yígúrə́-Jə-Tiu, n nə yɩ Yɩzərayɛlə lɩ̀à Yɩɩ, n dàń tʋn kʋ tə, n nə swɩ̀n n tʋtʋnʋ Davidə con, n pa kʋ nii sú.
18 «Yá Yɩɩ cɩ́gá wàá ləzoni titəŋi wa ʋ yanɩ, tɩa yuu wa naaa? Lanworu tə də kʋ dánɩ́ tə mama, n tə wàrɩ̀ kʋ də wa. Kʋ nə dwə mama, dìə̀ ka tə à nə lwà mun zənzən, də n yɩn ka wa! 19 Də kʋ mɛ, Ba-Yígúrə́-Jə-Tiu n nə ya à Yɩɩ, cʋgʋ à mʋ̀ n tʋtʋnʋ tə yɩjʋnɩ, də à lòrì zəni. Cʋgʋ bubwiə tə, də yɩjʋnɩ tə, à mʋ̀ n tʋtʋnʋ tə nə ma boŋə, à kəni n nə. 20 Súrú n yɩ́á dìə̀ ka tə yuu wa, tɩtɩn də yɩcaʋ. N swɩ̀n də n wá bɩrɩ n tɩ̀àn bwálɩ́ təntə wa. N dàń cʋgʋ à mʋ̀ n tʋtʋnʋ tə yɩjʋnɩ tə, à nə ma boŋə à kəni n nə, kʋ bwálɩ́ tə wa. 21 À lòrì sə n cʋgʋ à mʋ̀ n tʋtʋnʋ tə, də Yɩzərayɛlə lɩ̀à tə, ba nə yɩ n lɩ̀à tə lòrì, də nə nə bon nə kə n nə, bwálɩ́ kʋ tə wa. Zɩgɩ lanworu tə wa, bwálɩ́ tə wa n nə wulə, n cʋgʋ nə kori, n ga kwɛn nə cʋna n lɩ, nə də mʋ́ pwə́rə́ wa!
22 Lìù nə tʋn yolwan ʋ don yɩra, kʋ wàá kʋ pɩn ba kalɩ wá, ba pɩn ʋ dwì durə, ka nə wá cʋ̀gʋ̀ wá. Ʋ nə twi ʋ du durə joŋi bwálɩ́ tə yáá con, n dìə̀ ka tə wa, 23 sə n zɩgɩ lanworu tə wa, bwálɩ́ tə wa n nə wulə, n cʋgʋ ʋ kori, n ga bʋ̀rɩ̀ n tʋ̀tʋ̀nà tə bʋra, sə kʋ̀nkʋ̀nʋ tə də́ càn, sə ʋ cʋna tə pìí tə tʋ ʋ yuu wa, cɩ́gá tíú tə ga na cɩ́gá.
24 Dʋŋa nə ta Yɩzərayɛlə lɩ̀à tə, ba nə yɩ n lɩ̀à ba də́, n lɩ̀à tə nə tʋn cʋna n yáá con yɩrɩ, ba nə pìí ba bà n con, ba bʋ n yɩrɩ tə nə, ba nə jʋn mʋ́, ba ga lòrì mʋ́ dìə̀ ka tə wa, 25 sə n zɩgɩ lanworu tə wa, n cʋgʋ ba kori. Kwɛn Yɩzərayɛlə lɩ̀à tə, ba nə yɩ n mʋ̀ lɩ̀à tə cʋna n lɩ, n mʋ̀ də ba pwə́rə́ wa, yá n pa ba pìí ba bà lʋʋ nii tə wa, n nə pɩn ba də ba nyɩna-ba nə.
26 Máŋá tə lanworu nə sun, dwà wàrɩ̀ ka nɩ̀, ba nə tʋn cʋna ba zɩgɩ n nə yɩrɩ, ba nə jʋn mʋ́ bwálɩ́ kʋ tə wa, ba pa n yɩrɩ tə na dun, ba ga yá ba cʋna tə, n nə mun ba tə yɩrɩ, 27 sə n zɩgɩ lanworu tə wa, n cʋgʋ ba. Kwɛn n tʋ̀tʋ̀nà tə cʋna tə n lɩ n mʋ̀ də ba pwə́rə́ wa, ba nə yɩ n mʋ̀ lɩ̀à, ba ga yɩ n tʋ̀tʋ̀nà yɩrɩ. Bɩrɩ ba cwəŋə nəzəŋu tə, ba nə mɛ sə ba twá, yá n pa dwà nà tɩa tə yuu wa, n nə pɩn n lalʋʋ tə nə, ndə bìú tori nə, nyɩna jɩjə wa.
28 Máŋá tə wa, nɩan nə twi tə zʋ lʋʋ nii tə wa, nə à yə̀ə́ yayɩpwarʋ, nə à yə̀ə́ kárɩ́ wiən nə kʋa, nə à yə̀ə́ tə nə pʋa kárɩ́ tə wa, də jə̀rə̀n də kayɩra nə twá duən tə bà zənzən, dʋŋa nə twi ba pú Yɩzərayɛlə lɩ̀à tə, ba kə ba tɩan tə wa, ba nə lwə̀ ba kɩkarɩ də bə́rí, yolwan yiri mama nə twi, nə à yə̀ə́ yayɩgʋ yiri mama nə twi, 29 yɩjʋnɩ tə mama, də lòrì yiri tə mama Yɩzərayɛlə lɩ̀à tə, nə à yə̀ə́ ba lìù mama nə wá lòrì n con, ba nə lwarɩ ba càn tə, də ba wʋwalʋ tə, ba ga te ba jɩ̀àn dìə̀ ka tə con, 30 sə n zɩgɩ lanworu tə wa, bwálɩ́ tə wa n nə wulə, n cʋgʋ ba kori. Kwɛn ba cʋna tə n lɩ n mʋ̀ də ba pwə́rə́ wa. Bà n pa ba lìù mama na kʋ tə nə mɛ də wá, ndə ʋ tʋtʋnɛɛ tə nə yɩ nətʋ, n nə yə̀ə́ ʋ bɩcan nə yɩ nətʋ yɩrɩ. Cɩ́gá, n mʋ̀ cɩcɩ nə yə̀ə́ ləzoni tə mama bɩcanɩ nə yɩ nətʋ. 31 Kʋ nətʋ wá pa ba dəri n fən, ba ga twá n coŋi tə nə, máŋá tə mama wa, ba nə wá ya lʋʋ nii kʋ tə wa, n nə pɩn nə nyɩna-ba nə.
32 Kʋ wá ya nətʋ, kʋ pa vee tə nə, ʋ nə tà Yɩzərayɛlə lɩ̀à tə, ba nə yɩ n mʋ̀ lɩ̀à tə wa lìù, ʋ nə wá nan lʋʋ nii kʋ nə ŋʋna ʋ bà, n yɩrɩ tə nə dáá yɩrɩ, n jɩɩn tə nə dà yɩrɩ, n vàn tə nə jə dɩ̀àn yɩrɩ. Ʋ nə jʋn mʋ́ dìə̀ ka tə wa, 33 sə n zɩgɩ lanworu tə wa, bwálɩ́ tə wa n nə wulə, n cʋgʋ ʋ kori, n ga pa wá kʋ tə ʋ nə lòrì. Yá tɩa yuu ləzoni tə mama dàń wá lwarɩ mʋ̀, ba ga dəri n fən, ndə Yɩzərayɛlə lɩ̀à tə nə, ba nə yɩ n mʋ̀ lɩ̀à, ba ga wá lwarɩ də dìə̀ ka tə à nə lwə̀, yɩ n mʋ̀ dìə̀.
34 Máŋá tə n lalʋʋ tə nə nan sə ba ta kʋ̀ʋ̀ də ba dʋŋa, ba nə tì cwəŋə tə n nə bɩrɩ ba, ba nə viviri ba yáá ba te tɩʋ tə con n nə kúrí, də dìə̀ tə con à nə lwə̀ à pa mʋ́, ba ga lòrì mʋ́, 35 sə n zɩgɩ lanworu tə wa, n cʋgʋ ba yɩjʋnɩ tə, də ba lòrì tə, n ga pa ba də́ dɩ̀àn. 36 Máŋá don wa, Yɩzərayɛlə lɩ̀à tə wàá cʋna ba tʋŋa, ba zɩga n nə. Cɩ́gá, ləzwənə tə̀lə́ ʋ nə ba cʋna tʋŋa. N lɩŋa nə zàn ba yuu wa, kʋ pa n kə ba dʋŋa jɩɩn wa, dʋŋa tə nə jɩn ba, ba ja va yongaʋ, lʋʋ nii don wa, kʋ nə ŋʋna, nə à yə̀ə́ kʋ nə bwələ, 37 ba nə bʋn, ba ga viviri ba kwa ba ma sà ba cʋna tə, ba nə lòrì mʋ́ lʋʋ nii təntə wa, ba nə jìgə̀ ywə́ŋə́, ba nə swɩ̀n, ba wʋ́: “Nə tʋn cʋna, nə tʋn yolwana, nə tʋn kʋ tə nə ba ziən,” 38 ba nə pìí ba bà n con, ba dʋŋa tə lʋʋ nii tə wa, ba nə yɩ ywə́ŋə́, də ba bɩcanɩ mama, də ba jə̀rə́ mama, ba nə zɩgɩ lá nə, ba te ba yáá lʋʋ nii tə con, n nə pɩn ba nyɩna-ba tə nə, də tɩʋ tə con n nə kúrí tə, də dìə̀ tə con à nə lwə̀ à pa mʋ́, 39 sə n zɩgɩ yɩɩ nə, bwálɩ́ tə wa n nə wulə, n cʋgʋ ba yɩjʋnɩ tə, də ba lòrì tə, n ga pa ba na cɩ́gá. Kwɛn n lɩ̀à tə cʋna, ba nə tʋn ba zɩgɩ n nə, n lɩ n də ba pwə́rə́ wa! 40 Sɩ́ʋ́n nə, à tíú Yɩɩ, súrú n yɩ́á, n ga cʋgʋ à yɩjʋnɩ tə, bwálɩ́ kʋ tə wa!
41 Sɩ́ʋ́n nə, Ba-Yígúrə́-Jə-Tiu n nə yɩ Yɩɩ,
zàn n bà n sìə́ bwálɩ́ tə wa,
n mʋ̀ də n nimarʋ culu daka tə nə jə n dɩ̀àn tə.
Ba-Yígúrə́-Jə-Tiu Yɩɩ, ja sáŋʋ́
n ma piri n joŋwana tə, ndə ba nə zʋa gànʋ̀.
Pa n lɩ̀à tə nə zìlí n nii tə ya pupwən də ywánɩ́ wa! 42 Ba-Yígúrə́-Jə-Tiu n nə yɩ Yɩɩ, dàn ká vɩ pɩ̀ʋ́ tə n nə tún, n dʋgʋ.
Lìí n zəni tə yoo n nə tʋn n tʋtʋnʋ Davidə yɩra.»