Jwəŋə tə ba nə fwa ba pa Ba-Yígúrə́-Jə-Tiu nə
7
1 Máŋá tə Salʋmʋn nə jʋn Yɩɩ ʋ zwɛ̀, mən nan yɩɩ tə cú tə də́ jwəŋə tə ba nə sʋ̀rɩ́*, də nimarʋ jwəŋə* tə, yá Ba-Yígúrə́-Jə-Tiu dun tə dàń súə́ dìə̀ tə. 2 Yɩɩ joŋwana tə yà kʋ́ʋ̀ wàrɩ̀ Ba-Yígúrə́-Jə-Tiu dìə̀ tə wa ba zwɩ. Cɩ́gá, Ba-Yígúrə́-Jə-Tiu dun tə yà súə́ dìə̀ tə. 3 Yɩzərayɛlə lɩ̀à tə mama yà na mən tə, də Ba-Yígúrə́-Jə-Tiu dun tə, tə cwí dìə̀ tə yuu wa. Ba tʋa ba pú ba yáá tɩa, bwálɩ́ tə wa ba nə pɩ̀rɩ̀, ba ga bʋ Ba-Yígúrə́-Jə-Tiu nə, ba wʋ́: «Cɩ́gá, Ba-Yígúrə́-Jə-Tiu yɩ sonu tíú, ʋ wʋywaŋʋ* tə wulə wuuu, kʋ bà zwɛ̀!»4 Pɩ̀ʋ́ tə də lalʋʋ tə mama fwa jwəŋə Ba-Yígúrə́-Jə-Tiu yáá con. 5 Pɩ̀ʋ́ Salʋmʋn fwa vanfaran 22 000 jwəŋə, də vanmɩnɩ 120 000 jwəŋə. Mə kʋ zɩgɩ nətʋ pɩ̀ʋ́ tə də lalʋʋ tə mama ma də́ Yɩɩ dìə̀ tə nii súrú cànà. 6 Yɩɩ joŋwana tə yà zɩga ba bwálá nə. Levi dwíí tə yà dwí Yɩɩ gwaran zɩla tə Davidə nə fwa, ba ma bwɩ Ba-Yígúrə́-Jə-Tiu nə, ndə ʋ nə bɩrɩ ba nətʋ, ba wʋ́: «Cɩ́gá, Ba-Yígúrə́-Jə-Tiu wʋywaŋʋ tə wulə máŋá mama wuuu!» Yɩɩ joŋwana tə wúrí nabwanan ba yáá con, Yɩzərayɛlə lɩ̀à tə mama ga zàn ba zɩga yɩɩ nə.
7 Salʋmʋn pɩn dəwoo tə titəŋi tə, kʋ nə wulə Ba-Yígúrə́-Jə-Tiu dìə̀ tə yáá con jì Yɩɩ nyiən. Cɩ́gá, joŋi bwálɩ́ tə Salʋmʋn nə fwa də cɩnɩan tə yà mun, jwəŋə tə mama yà wàrɩ̀ kʋ yuu wa. Kʋ mʋ̀ nə pɩn, ʋ ma sʋ̀rɩ́ jwəŋə tə ba nə sʋ̀rɩ́, də vàrʋ́ calɩ jwəŋə* tə, də nimarʋ jwəŋə nanwɩɩ tə, dəwoo tə wa.
8 Kʋ máŋá təntə wa, Salʋmʋn də Yɩzərayɛlə lɩ̀à tə mama dí cànà tə, dɩan barpɛ. Ba yɩn púlí nəfarʋ, ba nə nan Lebo-Hamatə lʋʋ nii tə wa, kʋ va kʋ yí Ezwipətə nacoru tə. 9 Nana nii dɩɩn tə nə, ba kun duən nə, sə ba pa dun Yɩɩ nə. Cɩ́gá, mə kʋ dɩɩn tə nə nə, ba pɩn Yɩɩ joŋi bwálɩ́ tə Yɩɩ nə, ba ga də́ cànà dɩan barpɛ. Ba tə dí cànà tə dɩan barpɛ, ba súrí lá. 10 Barpɛ nii cànà tə, dɩan sapʋa də batwa nii dɩɩn tə nə, Salʋmʋn pɩn lalʋʋ tə pìí ba va ba gansilə wa. Ba yà wulə pupwən wa, ba bɩcanɩ ga ywán zəni tə mama yɩrɩ, Ba-Yígúrə́-Jə-Tiu nə fwa Davidə, də Salʋmʋn, də Yɩzərayɛlə lɩ̀à tə yɩra, ba nə yɩ ʋ mʋ̀ lɩ̀à.
Ba-Yígúrə́-Jə-Tiu kʋ́ʋ̀ bwɛ́ ʋ bɩrɩ ʋ tɩ̀àn Salʋmʋn nə
11 Máŋá tə Salʋmʋn nə lwə̀ Ba-Yígúrə́-Jə-Tiu dìə̀ tə ʋ zwɛ̀, ʋ lwə̀ pɩ̀ʋ́ dìə̀ tə, də kʋ tə mama ʋ yà nə sóní sə kʋ tʋn dìì bələ təntə wa. 12 Ba-Yígúrə́-Jə-Tiu kʋ́ʋ̀ twi Salʋmʋn con tɩtɩn nə, ʋ swɩ̀n ʋ con, ʋ wʋ́: «À nì n yɩjʋnɩ tə, yá à kúrí bwálɩ́ kʋ tə, sə kʋ ya jwəŋə fwaŋʋ dìə̀. 13 Dɩɩn don, kʋ wàá kʋ pɩn à suŋə lanworu tə, dwà ba nɩ̀, nə à yə̀ə́ à wàá à pɩn jə̀rə̀n twi tə də́ lʋʋ nii tə wiən, nə à yə̀ə́ à wàá à pɩn yayɩpwarʋ twɩ à lalʋʋ tə wa. 14 Yá à lalʋʋ tə à nə pɩn ba à yɩrɩ tə nə mun ba tɩ̀àn, ba lòrì nə, Yɩzərayɛlə dwíí tə nə viviri ba kwa, ba ma sà ba cʋna tə, ba ga pɩ̀à nə, à wá zɩgɩ lanworu tə wa à cʋgʋ ba kori, à kwɛn ba cʋna tə à lɩ à də ba pwə́rə́ wa, à ga pa ba lʋʋ nii tə na yazurə. 15 Kʋ nə zɩgɩ sɩ́ʋ́n nə, à wá súrí à yɩ́á, à ga cʋgʋ yɩjʋnɩ tə nə fwa bwálɩ́ kʋ tə wa. 16 Sɩ́ʋ́n nə, à kúrí dìə̀ ka tə, sə ka ya à nyiən, ba bon à yɩrɩ ka wa máŋá mama. À wá ywàń ka yuu máŋá mama, də wʋywaŋʋ. 17 N mʋ̀ con nə, də n nə twá à nə də pùə́ nədʋ, ndə n nyɩna Davidə nə twá à nə nətʋ, ʋ ma tʋn kʋ tə mama, à nə pɩn nii sə ʋ tʋn, n nə zìlí yìə̀n tə, à nə pɩn ba pʋ́pʋ́nɩ́ sə tə tʋn, də tə tə à nə pɩn nii sə tə tʋn, 18 à wá pa n pàrɩ̀ tə ya Yɩzərayɛlə wa, máŋá mama. Mə kʋ nə à swɩ̀n n nyɩna Davidə con, à wʋ́: “Máŋá mama, lìù wá ya n dwíí tə wa, n nə wá kə lʋʋ wa, ʋ jə̀ń Yɩzərayɛlə lɩ̀à padaʋ tə yuu wa.” 19 Yá á dàń nə pìí á viviri á kwa, á ma sà nə, á nə wà à yìə̀n tə nə twá, yìə̀n tə à nə pɩn nii tə yuu wa, də tə tə à nə pɩn tə pʋ́pʋ́nɩ́, sə ba twá tə nə, á nə tʋŋa á pɩn woŋwanan nə, á twɩ á nadwana yuu tə yáá con, 20 à wá lɩ aba lʋʋ nii tə wa, à nə pɩn aba. À wá vɩ dìə̀ tə, à nə sɛ̀ sə à yɩrɩ bon ka wa, à dʋgʋ yiŋʋnɩ də nə. Yá à dàń wá pa á jì mʋnmʋn də cavɩra lɩ̀à, dwíə́ nəkaran* tə mama wa. 21 Yá dìə̀ ka tə yuu danɩ də tɩa nə mɛ nətʋ mama, kʋ wá gwárɩ́ lìù tə mama, ʋ nə wá twá ka vàn nə ʋ kɛ̀ń, ʋ ga wá swɩ̀n, ʋ wʋ́: “Bɛ̀ɛ̀ nə pɩn Ba-Yígúrə́-Jə-Tiu ma fwa lʋʋ nii kʋ tə, də dìə̀ ka tə nətən?” 22 Yá ba wá le ba, ba wʋ́: “Kʋ yɩ ba nə vɩga Ba-Yígúrə́-Jə-Tiu, ʋ nə yɩ ba nyɩna-ba Yɩɩ tə, ʋ nə lɩ ba Ezwipətə lʋʋ nii tə wa yɩrɩ. Ba pìí ba vwa ba tɩ̀àn woŋwanan nə, ba tʋ ba nadwana yuu tə yáá con, ba pa tə dun. Kʋ mʋ̀ nə pɩn, Ba-Yígúrə́-Jə-Tiu ma pa yolwan kʋ tə mama yí ba.” »