Salʋmʋn tʋ̀tʋ̀nán duən
8
1 Pɩ̀ʋ́ Salʋmʋn lwə̀ Ba-Yígúrə́-Jə-Tiu dìə̀ tə, də ʋ tətə dìə̀ tə bɩna sapʋa nii nə. 2 Ʋ pìí ʋ lwà tɩan tə, Huramə nə pɩn wá, ʋ pa Yɩzərayɛlə lɩ̀à tə va ba wulə tə wa. 3 Kʋ kwa nə, ʋ vəli ʋ ta Hamatə tɩ̀án tə Soba nə, ʋ də́. 4 Ʋ lwə̀ Tadəmorə tɩʋ tə, kasɔɔ lanworu tə wa, də tɩan tə mama ʋ nə lwə̀ Hamatə nagwanaa tə wa, sə ʋ tún ʋ wodirən lá. 5 Ʋ tə lwə̀ baan con Bɛtə-Horon, də tɩa con Bɛtə-Horon, tə nə yɩ dɩ̀àn dəkuu bwálá, ba nə lwə̀ biritaŋʋ ba ma kɩkarɩ tə, tə ga jə mimien bòrə̀n, tə nə swaga. 6 Ʋ tə lwə̀ Balatə, də tɩan tə mama ʋ nə ma túŋə́ wodirən, də tɩan tə mama ʋ nə kəni ʋ səsen kòrə̀n lá, də tɩan tə ʋ səsen nə wulə tə wa. Ʋ tə lwə̀ won tə mama ʋ nə pɩ̀à Zwerizalɛmə tɩʋ tə wa, də Liban lʋʋ nii tə wa, də lʋʋ nii tə mama wa, kʋ nə wulə ʋ payuu tə wa. 7 Ɛtə dwíí tə, də Amɔrə dwíí tə, də Perizi dwíí tə, də Evi dwíí tə, də Yebusə tɩ̀án tə ba yà nə wulə lʋʋ nii tə wa, nii yà twá kʋ tə̀lə́ Yɩzərayɛlə dwíí tə wa. 8 Ba dwíə́ tə yà tə wulə lʋʋ nii tə wa, Yɩzərayɛlə lɩ̀à nə wà ba mama cʋ̀gʋ̀ yɩrɩ. Salʋmʋn ken ba dɩ̀àn tʋ̀tʋ̀nán wa, yá ba yɩn tə wa, kʋ bà kʋ yí zə̀n. 9 Yá Salʋmʋn wà Yɩzərayɛlə lɩ̀à tə mʋ̀ lìù nədʋ tətə ma fwa yoŋu. Cɩ́gá, ba yà yɩ kwatara, ba duən yɩ ʋ tʋ̀tʋ̀nán yun tɩ̀án, ba duən yɩ ʋ səsendɩra, ba duən yɩ ʋ kwatara səsen kòrə̀n yáá tɩ̀án. 10 Yáá tɩ̀án tə nə ywàŋá Salʋmʋn tʋ̀tʋ̀nán tə yuu yà yɩ lɩ̀à 250. Ba mʋ̀ yà nə ywàŋá lalʋʋ tə yuu nə, ba nə tʋŋa tʋ̀tʋ̀nán tə.11 Salʋmʋn pɩn ʋ kan Farawon bʋ̀á tə nan Davidə sadiyuu tə wa, ʋ bà ʋ zʋ ʋ dìə̀ tə wa, ʋ nə lwə̀ ʋ pa wá. Cɩ́gá, Salʋmʋn yà swɩ̀n, ʋ wʋ́: «À kan bá ya Yɩzərayɛlə pɩ̀ʋ́ Davidə dìə̀ tə wa, bwálá təntə Yɩɩ nimarʋ culu daka tə nə zʋa lá, nə yɩ parɩ yɩrɩ.»
12 Salʋmʋn yà fwa jwəŋə tə ba nə sʋ̀rɩ́*, ʋ pɩn Ba-Yígúrə́-Jə-Tiu nə, Yɩɩ joŋi bwálɩ́ tə yuu wa, ʋ nə lwə̀ napakwalʋ tə yáá con. 13 Ʋ yà fwa jwəŋə tə dɩɩn mama, ndə Moyizə nə pɩn nii nətʋ. Ʋ yà fwa sìə́ dɩan* jwəŋə tə, də candʋan* dɩan jwəŋə tə, də jwəŋə tə ba nə yàá fwa bɩnɩ tə wa canfaran batwa tə diŋə máŋá wa. Canfaran batwa təntə nə yɩ dipɛn tə nə ba sabwarɩ kəni cànà tə, də woceri cànà*a tə, də Vunən cànà* tə. 14 Ʋ ken Yɩɩ joŋwana tə ba tʋ̀tʋ̀nán wa, ndə ʋ nyɩna Davidə nə tanɩ ba ʋ tún nətʋ, ʋ ga kə Levi dwíí tə də ba tʋ̀tʋ̀nán wa, sə ba bʋ Ba-Yígúrə́-Jə-Tiu nə dɩɩn mama, sə ba tʋn tʋ̀tʋ̀nán tə Yɩɩ joŋwana tə yáá con. Ʋ ken mimii nəcɩra tə də mimien tə nii nə, kʋ twá ba púlə́ tə nə. Mə nətʋ nə Yɩɩ tʋtʋnʋ Davidə yà pɩn nii, sə kʋ tʋn. 15 Ba wà Davidə nii tə yoo nədʋ tətə dʋgʋ vàn nə, kʋ nə yɩ Yɩɩ joŋwana tə yoo wa, nə à yə̀ə́ Levi dwíí tə yoo wa, nə à yə̀ə́ won don mama wa, kʋ nə yɩ Yɩɩ dìə̀ tə jɩjə won. 16 Mə kʋ zɩgɩ nətʋ Salʋmʋn pubʋŋa tə mama ma sú, kʋ nə zɩgɩ Yɩɩ dìə̀ tə də̀ń túŋú nə, kʋ bà kʋ yí ka nə lwà ka zwɛ̀. Ba-Yígúrə́-Jə-Tiu dìə̀ tə zwɛ̀ zəni.
17 Salʋmʋn dàń vəli Esyon-Gebɛrə, də Elatə tə nə yɩ nɩ́á yuu bwərə yizɩga bwálá, Edomə lʋʋ nii tə wa. 18 Pɩ̀ʋ́ Huramə tʋn ʋ tʋ̀tʋ̀nà ʋ con, ba nə yə̀ə́ mʋʋ yoo, də nɩ́á yuu bwərə. Ba də Salʋmʋn tʋ̀tʋ̀nà tə vəli ba yí Ofirə. Yá ba pìí ba ja sɩ́án tə nə dwə tɔnə fugə də batwa, ba ja bà ba pa pɩ̀ʋ́ Salʋmʋn nə.