Saba tɩ̀án pakan twi ʋ na Salʋmʋn
9
1 Saba tɩ̀án pakan nì də ba swɩ̀n Salʋmʋn dun tə yoo, ʋ ma bà Salʋmʋn con, Zwerizalɛmə nə, sə ʋ bwe wá swɩan bwiə, ʋ ma ja ʋ də̀ń nə. Ʋ twi də ʋ kwa lɩ̀à kapʋpʋ, də nyʋgʋmɛ tə nə zɩŋa wusinə, də sɩ́án tə nə dáá zənzən, də kapana tə nə jə funə. Ʋ twi Salʋmʋn con, ʋ bwe wá bwiə tə mama, tə yà nə wulə ʋ bɩcan wa. 2 Yá Salʋmʋn gwìń ʋ bwiə tə mama də̀ń, ʋ bɩrɩ wá. Yoo yà tə̀lə́, kʋ nə səgə Salʋmʋn yáá nə, ʋ nə wàrɩ̀ kʋ də̀ń ʋ gwìń.3 Saba tɩ̀án pakan tə nɩ Salʋmʋn yənu tə, də padìə̀ tə ʋ nə lwə̀. 4 Ʋ nɩ wodiu tə, ba nə túŋə́ Salʋmʋn yáá nə, də dìə̀ tə ʋ tʋ̀tʋ̀nà nə wulə ka wa, də ba tʋ̀tʋ̀nán tə, də ba tʋtʋnganan tə. Ʋ tə nɩ tʋ̀tʋ̀nà tə nə pɩn pɩ̀ʋ́ tə wodiu də ʋ sana, ʋ nɩ ba gànàn, ʋ ga na joŋə tə ba nə sʋ̀rɩ́* nə mɛ nətʋ, Salʋmʋn nə yàá sʋ̀rɩ́ ʋ pa Yɩɩ nə, Ba-Yígúrə́-Jə-Tiu dìə̀ tə wa. Ʋ nə nɩ tə wiən təntə mama, kʋ gwárɩ́ wá, ʋ wàrɩ̀ ʋ siŋə. 5 Ʋ dàń swɩ̀n pɩ̀ʋ́ tə con, ʋ wʋ́: «N sʋ̀ràn tə də n wʋbʋŋa tə yoo à nə nì à lʋʋ nii tə wa yɩ cɩ́gá. 6 À yà wà cɩ́gá pɩn tə sʋ̀ràn tə nə, də kʋ nə tà à nə twi à na tə də à yɩ́á. À na də ba yà wà n wʋbʋŋa tə faan tətə man ba bɩrɩ nə. N dun tə dwə kʋ tə mama à yà nə nì. 7 Pupwən tɩ̀án nə yɩ n lɩ̀à tə, də n tʋ̀tʋ̀nà tə, ba nə wulə n yáá con máŋá mama, ba cʋga n wʋbʋŋa sʋ̀ràn tə. 8 À bwɩ Ba-Yígúrə́-Jə-Tiu nə, ʋ nə yɩ n Yɩɩ. Ʋ mʋ̀ nə pɩn n jə̀ə́ Yɩzərayɛlə padaʋ tə yuu wa, ʋ yuu yɩrɩ nə. Ba-Yígúrə́-Jə-Tiu swə Yɩzərayɛlə lɩ̀à tə, ʋ ga pɩ̀à sə ba ya lá máŋá mama wuuu. Kʋ mʋ̀ nə pɩn ʋ ma tún mʋ́, sə n ya ba pɩ̀ʋ́, n tʋn kʋ tə nə yɩ mənəmənə, də kʋ tə nə yɩ cɩ́gá.» 9 Kʋ kwa nə, pakan tə pɩn sɩ́án tə nə yí tɔnə batwa də faan pɩ̀ʋ́ Salʋmʋn nə, də wusinə kapʋpʋ, də kapana tə nə jə funə. Lìù kʋ́ʋ̀ wà pìí ʋ na wusinə təntə yiri, də kʋ nə tà tə tə, Saba tɩ̀án pakan tə nə pɩn pɩ̀ʋ́ Salʋmʋn nə.
10 Huramə tʋ̀tʋ̀nà tə, də Salʋmʋn tʋ̀tʋ̀nà tə nə vəli Ofirə, ba pìí ba zɩn sɩ́án, də pɩ̀nʋ́ daran, də kapana tə nə jə funə, ba ja bà. 11 Salʋmʋn ja pɩ̀nʋ́ daran tə, ʋ ma fwa gárɩ́ Ba-Yígúrə́-Jə-Tiu dìə̀ tə yɩra, də pɩ̀ʋ́ dìə̀ tə yɩra. Ʋ tə ja tə, ʋ ma fwa banan də kwànán, ʋ pa gwàgá tə nə. Lìù yà tə wà dí yáá ʋ na Santalə daran təntə yiri, Zwida lʋʋ nii tə wa.
12 Pɩ̀ʋ́ Salʋmʋn pɩn won tə mama, Saba tɩ̀án pakan tə nə pɩ̀à, də kʋ tə ʋ nə lòrì, tə nə dwə wiən tə, ʋ nə ja bà ʋ pa pɩ̀ʋ́ tə nə. Kʋ kwa nə, pakan tə də ʋ tʋ̀tʋ̀nà tə pìí ba va ba lʋʋ nii wa.
Salʋmʋn jɩjə tə yoo
13 Bɩnɩ mama wa, Salʋmʋn yàá na sɩ́án tɔnə sapʋa. 14 Kʋ dàń súrí səbiu tə nə, ba nə joŋə zɩla tə nə nan lʋʋ nii don wa yuu nə, də kʋ tə lʋʋ nii tə wa baywələ tə nə ŋwɩ́n. Kʋ tə súrí sɩ́án tə, də wárʋ́ tə nə, Arabi pɛ̀gá tə mama də lʋʋ nii tə yáá tɩ̀án tə nə pɩn Salʋmʋn nə.
15 Pɩ̀ʋ́ Salʋmʋn fwa sɩ́án natanan nəfaran biələ. Kʋ nədʋ mama yɩ sɩ́án kilo bardʋ nə ba ma lù kʋ. 16 Ʋ fwa sɩ́án natanan nəmənbii biətwa, kʋ nədʋ mama nə yɩ sɩ́án kilo batwa nə ba ma lù kʋ. Pɩ̀ʋ́ tə tún tə dìə̀ tə wa, ba nə boŋə Liban pún dìə̀. 17 Pɩ̀ʋ́ tə ja won, kʋ nə yɩ ndə tuu yelə yɩra nə, ʋ ma fwa padaʋ nəfarʋ, ʋ ja sɩ́án tə nə ba durən jə, ʋ ma mwàlɩ̀ kʋ. 18 Kʋ padaʋ təntə yà yɩ kʋ wulə yɩɩ nə, nàgwàlá bardʋ nii nə, kʋ ga jə sɩ́án nacanɩ. Kʋ yà jə vànà kʋ jɩzən, də jɩgwiə mama nə. Ba sə̀ gərən bələ nyɩnyɩga, ba zɩgɩ kʋ vànà tə səpuni nə. 19 Ba tə zɩgɩ gərən nyɩnyɩga fugə də bələ duən, nàgwàlá bardʋ tə yuu wa. Tə bardʋ yà wulə vàn don nə, bardʋ tə don də ga wulə vàn don nə. Kʋ nətʋ tə yiri wà payuu don mama wa tʋn. 20 Pɩ̀ʋ́ Salʋmʋn wùrú zwɩɩn mama, ʋ nə ma nywɩn yà yɩ sɩ́án wùrú zwɩɩn. Zwɩɩn tə mama, tə nə wulə dìə̀ tə wa, ba nə boŋə Liban pún dìə̀ tə, yà yɩ sɩ́án cɩcɩ zwɩɩn. Won mama yà tə̀lə́ tə wa, ba nə fwa də wárʋ́. Cɩ́gá, Salʋmʋn máŋá tə wa, ba yà ba wárʋ́ won jələ zənzən. 21 Pɩ̀ʋ́ tə yà jə nɩ́á yuu bwərə nəfaran, tə nə vəli yiŋʋnɩ. Ʋ yàá pa Huramə tʋ̀tʋ̀nà tə ja tə ba vəli Tarəsisə. Bɩna batwa mama, nɩ́á yuu bwərə təntə yàá pìí tə zɩn sɩ́án, də wárʋ́, də tuu yelə, də kəlee, də kʋŋwɛn, tə ja bà.
22 Pɩ̀ʋ́ Salʋmʋn nə doni pɛ̀gá tə duən tə mama tɩa yuu wa, kʋ nə yɩ jɩjə, də wʋbʋŋa yoo wa. 23 Pɛ̀gá tə mama tɩa yuu wa yà pɩ̀à, sə ba na Salʋmʋn, ba cʋgʋ ʋ wʋbʋŋa sʋ̀ràn tə, Yɩɩ nə ken ʋ bɩcan wa. 24 Bɩnɩ mama, pɩ̀ʋ́ mama yàá ja ʋ zìlə́ wiən ʋ ja bà, tə nə yɩ wárʋ́ wiən, də sɩ́án wiən, də gànàn, də kwatarɩ zɩla, də wusinə, də səsen, də bɩnasəsen.
25 Salʋmʋn yà jə dìì 4 000 ʋ səsen tə, də ʋ səsen kòrə̀n tə nə wulə tə wa. Ʋ yà jə səsədɩra 12 000, ʋ nə ken tə duən kwatara sànɩ́ tə wa, tɩan tə wa ʋ nə tanɩ kʋ yɩrɩ, ʋ ga lɩ tə duən ʋ yá ʋ con, Zwerizalɛmə wa. 26 Salʋmʋn yà wulə pɛ̀gá tə mama yuu wa, kʋ nə zɩgɩ Əfəratə mʋnaa tə nə, kʋ va kʋ yí Filisi tɩ̀án lʋʋ nii tə, də Ezwipətə lʋʋ nii sɩswɩan tə. 27 Pɩ̀ʋ́ Salʋmʋn pɩn wárʋ́ sú tɩa mama, Zwerizalɛmə wa, ndə kafɩna nə, ʋ ga pa sɩsaban daran sú tɩa mama, ndə kapɩrɩtərən tə nə, Swefela nagwanaa tə wa. 28 Salʋmʋn səsen yà yɩ ba ja naŋa Ezwipətə, də lʋʋ níə́ tə duən mama wa.
Salʋmʋn tɩan yoo
29 Ba pʋ́pʋ́nɩ́ Salʋmʋn tʋ̀tʋ̀nán tə gɩganɩ, tə nə sinti nətʋ, kʋ va kʋ yí tə yígúrə́, ba tún Yɩɩ nii sʋ̀sʋ̀nʋ̀ Natan tʋ̀tʋ̀nán sagɩ tə wa, də Ahɩya ʋ nə yɩ Silo tíú Yɩɩ nii sʋ̀ràn sagɩ tə wa, də Yɩɩ yinarʋ Yedo nɩʋn sagɩ tə wa, kʋ nə swɩ̀n Nebatə bìú Zwerobʋamə yoo. 30 Salʋmʋn dí Yɩzərayɛlə pàrɩ̀ tə bɩna sapwɩlə, Zwerizalɛmə nə. 31 Salʋmʋn tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá ʋ nyɩna Davidə sadiyuu tə wa. Ʋ bìú Robʋamə nə dí pàrɩ̀ tə, ʋ yuu nə.