Salʋmʋn tʋn cʋna Yɩɩ yáá con
11
1 Pɩ̀ʋ́ Salʋmʋn sóní dwíə́ nəkaran* kana kapʋpʋ. Pɩ̀ʋ́ Salʋmʋn nə swe Ezwipətə pɩ̀ʋ́ Farawon bʋ̀á tə kwa nə, ʋ tə swe Mʋabə tɩ̀án bwɩ̀ɩ́, də Amon dwíí tə bwɩ̀ɩ́, də Edomə tɩ̀án bwɩ̀ɩ́, də Sidon tɩ̀án bwɩ̀ɩ́, də Ɛtə dwíí tə bwɩ̀ɩ́. 2 Yá Ba-Yígúrə́-Jə-Tiu yà dí yáá ʋ swɩ̀n dwíə́ nəkaran təntə yoo Yɩzərayɛlə lɩ̀à tə con, ʋ wʋ́: «Á dànà ká gùlí á tɩ̀àn dwíə́ nəkaran təntə wa, yá á dàn ká yá á pa ba də gùlí ba tɩ̀àn á wa. Cɩ́gá, kʋ nə tà nətʋ, ba wá viviri á bɩcanɩ, ba kə ba woŋwanan tə con. Salʋmʋn nə swə dwíə́ nəkaran təntə kana tə pɩn ʋ vwa ʋ tɩ̀àn dwíə́ nəkaran tə nə. 3 Ʋ swe pabwɩɩ biəyarpɛ, də ba kaceŋə biətwa. Ʋ kana tə dàń viviri ʋ bɩcan. 4 Máŋá tə Salʋmʋn nə jìgə̀ bazʋnʋ, ʋ kana tə viviri ʋ bɩcan, ba kə woŋwanan con. Yá kʋ dàń pɩn ʋ bɩcan mama kʋ́ʋ̀ wà Ba-Yígúrə́-Jə-Tiu con yɩn, ʋ nə yɩ ʋ Yɩɩ, ndə ʋ nyɩna Davidə bɩcan nə yɩn nətʋ. 5 Salʋmʋn pɩn dun Sidon tɩ̀án woŋwanʋ tə nə, ba nə boŋə Asətarətea, də Amon dwíí woŋwanʋ tə nə, ba nə boŋə Molɔkəb. 6 Salʋmʋn tʋn kʋ tə nə lwara Ba-Yígúrə́-Jə-Tiu yáá con. Cɩ́gá, ʋ wà Ba-Yígúrə́-Jə-Tiu nii zìlí də pùə́ nədʋ, ndə ʋ nyɩna Davidə nə. 7 Salʋmʋn dàń lwə̀ jwəŋə dədolu* paan tə yuu wa, ka nə wulə Zwerizalɛmə yáá con, ʋ pa Mʋabə tɩ̀án woŋwanʋ tə nə, ba nə boŋə Kemɔswə, də Amon dwíí woŋwanʋ tə nə, ba nə boŋə Molɔkə. 8 Mə nətʋ nə, ʋ yà fwa, ʋ pɩn ʋ kana tə mama nə, ba nə yɩ dwíə́ nəkaran bwɩ̀ɩ́, ba ga sʋ̀rɩ́ wusinə, də ba fwa jwəŋə ba pɩn ba woŋwanan tə nə.9 Kʋ mʋ̀ nə pɩn, Ba-Yígúrə́-Jə-Tiu lɩŋa zàn Salʋmʋn yuu wa, ʋ nə viviri ʋ bɩcan, ʋ yá ʋ mʋ̀ Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ tə, ʋ nə bɩrɩ ʋ tɩ̀àn wá, nɛɛ bələ mama. 10 Ba-Yígúrə́-Jə-Tiu yà pɩn nii Salʋmʋn nə, tə yìə̀n təntə yuu wa, sə ʋ dàn ká pa dun woŋwanan nə. Yá Salʋmʋn wà Ba-Yígúrə́-Jə-Tiu nii tə nə twá. 11 Ba-Yígúrə́-Jə-Tiu dàń swɩ̀n Salʋmʋn con, ʋ wʋ́: «N vɩga sə n twá kʋ tə nə, à nə bɩrɩ mʋ́. N wà à də mʋ́ nimarʋ tə, də yìə̀n tə à nə pɩn tə pʋ́pʋ́nɩ́, sə tə tʋn nii zìlí. Kʋ mʋ̀ yɩrɩ, à wá jon pàrɩ̀ tə n con, à pa n tʋtʋnʋ nə. 12 Yá n nyɩna Davidə yuu yɩrɩ, à bá tʋn yoo təntə, də n mɩɩ tə wulə lʋʋ. Kʋ yɩ n bìú con nə, à wá ja kʋ à jon. 13 À dàń nə bá jon payuu tə mama, à wá yá Yɩzərayɛlə dwíí nədʋ, à pa n bìú tə nə, à tʋtʋnʋ Davidə yuu yɩrɩ, də Zwerizalɛmə tɩʋ tə yɩrɩ, à nə kúrí.»
Salʋmʋn dʋŋa yoo
14 Ba-Yígúrə́-Jə-Tiu dàń yigu dʋŋʋ ʋ kə Salʋmʋn nə. Kʋ mʋ̀ nə yɩ Hadadə, ʋ nə yɩ Edomə tíú, ʋ nə nan Edomə tɩ̀án padwíí tə wa. 15 Máŋá tə wa, Davidə nə ta Edomə tɩ̀án, ʋ kwatara yuu-tiu Zʋabə nə vəli ʋ gùrì Yɩzərayɛlə kwatara tə nə tɩga. Yá ʋ dàń gʋa bisɩmabarɩ tə, də bara tə mama, ba yà nə wulə Edomə wa. 16 Kʋ máŋá tə wa, Zʋabə də ʋ kwatara púlí tə mama fwa cànɩ̀ bardʋ Edomə nə, sə ba ma gʋ bisɩmabarɩ tə, də bara tə mama ba zwɛ̀. 17 Mə kʋ máŋá tə wa nə, Hadadə twá Edomə tɩ̀án nə, ba nə yɩ ʋ nyɩna tʋ̀tʋ̀nà, ʋ dəri ʋ va Ezwipətə, də ʋ yà tə yɩ balandʋrʋ. 18 Ba nan Madɩan lʋʋ nii tə wa, ba va Paran, ba ja bara duən lá, ba súrí ba tɩ̀àn nə, ba ja kɛ̀ń ba va Ezwipətə lʋʋ nii tə wa, Ezwipətə pɩ̀ʋ́ Farawon con. Pɩ̀ʋ́ tə dàń pɩn dìə̀, də nii wodiu, də tɩa Hadadə nə. 19 Hadadə nɩ yuywaŋʋ Farawon yáá con, kʋ pa Farawon tì ʋ kan Tapenɛsə nyánʋ́, ʋ pa Hadadə nə, sə ʋ ma fwa ʋ kan. 20 Tapenɛsə nyánʋ́ tə nə lɩrɩ Hadadə bìú Genubatə. Tapenɛsə kʋnɩ bìú tə, Farawon dìə̀ tə wa, yá Genubatə dàń mɛn Farawon dìə̀ tə wa, ʋ wulə də Farawon bɩ̀á tə. 21 Máŋá tə wa Hadadə nə nì Ezwipətə nə, də Davidə də kwatara yáá tíú Zʋabə mɛ tɩga, ʋ swɩ̀n Farawon con, ʋ wʋ́: «Yá nə, sə à pìí à va à lʋʋ nii tə wa.» 22 Farawon bwe wá, ʋ wʋ́: «Bɛ̀ɛ̀ nə mùrì mʋ́ yəbə à con, n ma pɩ̀à sə n pìí n va n lʋʋ nii tə wa?» Ʋ le, ʋ wʋ́: «Won mama wà nə mùrì, n dàń nə yá nə, sə à vìí.»
23 Yɩɩ kʋ́ʋ̀ yigu dʋŋʋ don, ʋ kə Salʋmʋn nə. Kʋ mʋ̀ nə yɩ Eliyada bìú Rezon, ʋ yà nə nan ʋ yuu-tiu Soba pɩ̀ʋ́ Hadadezɛrə con ʋ dəri. 24 Máŋá tə wa, Davidə nə ta Hadadezɛrə kwatara tə ʋ də́, Rezon yà ken bara duən yáá nə, ʋ ma fwa kwatara púlí, ʋ tətə nə yɩ ba yáá tíú. Ba vəli ba wulə Damasə nə, ba jon Damasə pàrɩ̀ tə ba də́. 25 Rezon yɩn Yɩzərayɛlə lɩ̀à dʋŋʋ, máŋá tə mama wa, Salʋmʋn nə yɩn lʋʋ wa. Kʋ máŋá təntə tətə wa, Hadadə də zɩgɩ Yɩzərayɛlə lɩ̀à tə nə, ʋ tʋn lwanɩ ba yɩra, máŋá tə mama wa, Rezon nə yɩn Siiri pɩ̀ʋ́.
Zwerobʋamə zàn ʋ zɩga Salʋmʋn nə
26 Nebatə bìú Zwerobʋamə, yɩ Efərayimə dwíí, Sereda nagwanaa tə wa. Ʋ nuu yà yɩ kadənu, ʋ yɩrɩ nə yɩ Seruwa. Zwerobʋamə yà yɩ Salʋmʋn tʋtʋnʋ, ʋ nə zàn ʋ zɩga Salʋmʋn nə. 27 Nə̀ń nətʋ tə kʋ nə twá, ʋ ma zàn ʋ zɩga pɩ̀ʋ́ tə nə. Salʋmʋn yà wulə ʋ lwe gárɩ́ tə, ba nə boŋə Milo, ʋ ga suŋə ʋ nyɩna Davidə sadiyuu tə bírə́ tə yɩra luloo don. 28 Zwerobʋamə yà jə dɩ̀àn də wʋdɩʋ. Yá Salʋmʋn nə nɩ nətʋ tə, ʋ mʋ̀ balandʋrʋ tə nə tʋŋa zəni, ʋ dàń pɩn wá nii, sə ʋ ywàń Efərayimə, də Manase dwíí tə tʋ̀tʋ̀nà tə yuu nə. 29 Dɩɩn don nə, Zwerobʋamə nan Zwerizalɛmə ʋ va kasɔɔ con, yá Yɩɩ nii sʋ̀sʋ̀nʋ̀ Ahɩya, ʋ nə yɩ Silo tíú, nan ʋ jəri wá cwəŋə yuu wa. Ahɩya yà zʋa ganzwɩdarʋ nədʋn. Ba bələ tə cɩcɩ yà nə wulə kasɔɔ tə wa. 30 Ahɩya lɩ ganzwɩdarʋ nədʋn tə ʋ yà nə zʋa, ʋ cɩrʋ kɩkaran fugə də bələ. 31 Kʋ kwa nə, ʋ swɩ̀n Zwerobʋamə con, ʋ wʋ́: «Lɩ kɩkaran fugə. Cɩ́gá, Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə swɩ̀n yoo kʋ tə, ʋ wʋ́: “À wá jon payuu tə Salʋmʋn con, à ga wá pa mʋ́ Yɩzərayɛlə dwíə́ fugə. 32 Yá à wá yá dwíí nədʋc, à pa wá, à tʋtʋnʋ Davidə yuu yɩrɩ, də Zwerizalɛmə tɩʋ tə yɩrɩ à nə kúrí, Yɩzərayɛlə dwíə́ tə mama wa. 33 À wá tʋn kʋ nətʋ tə, Yɩzərayɛlə lɩ̀à tə nə vɩga nə ba dʋgʋ yɩrɩ. Cɩ́gá, ba vəli ba tʋ ba nadwana yuu, Sidon tɩ̀án woŋwanʋ tə yáá con, ba nə boŋə Asətarəte, də Mʋabə tɩ̀án woŋwanʋ tə yáá con, ba nə boŋə Kemɔswə, də Amon dwíí woŋwanʋ tə yáá con, ba nə boŋə Molɔkə, ba pa tə dun. Ba wà à coŋi tə nə twá, sə ba tʋn kʋ tə nə yɩ mənəmənə à yáá con, sə ba twá yìə̀n tə nə, à nə pɩn tə pʋ́pʋ́nɩ́, sə tə tʋn, də yìə̀n tə, à nə bɩrɩ, sə tə tʋn, ndə Salʋmʋn nyɩna Davidə nə twá tə nə nətʋ. 34 À bá jon payuu tə mama Salʋmʋn jɩɩn wa. À wá yá wá, ʋ yà pɩ̀ʋ́ ʋ lʋʋ wumama wa, à tʋtʋnʋ Davidə yuu yɩrɩ, à nə kúrí, ʋ ga twá yìə̀n tə nə, à nə pɩn nii tə yuu wa, də yìə̀n tə nə, à nə pɩn tə pʋ́pʋ́nɩ́ sə tə tʋn. 35 Yá à wá jon payuu tə, ʋ bìú jɩɩn wa, à ga pa Yɩzərayɛlə dwíə́ fugə, n mʋ̀ Zwerobʋamə nə. 36 À wá yá Yɩzərayɛlə dwíí nədʋ, à pa ʋ bìú tə nə, sə kʋ pa à tʋtʋnʋ Davidə ja dwíí padwíí tə wa, à yáá con, Zwerizalɛmə tɩʋ tə wa, à nə kúrí, sə à yɩrɩ ya kʋ wa. 37 À wá pa n mʋ̀ Zwerobʋamə də́ pàrɩ̀ won mama yuu wa, ndə n nə pɩ̀à nətʋ. N wá ya Yɩzərayɛlə dwíə́ fugə tə pɩ̀ʋ́. 38 N nə cʋgʋ kʋ tə mama, à nə pɩn bɩrɩ mʋ́ sə tʋn, n nə twá à coŋi tə nə, n nə tʋn kʋ tə nə yɩ mənəmənə, à yáá con, n nə twá yìə̀n tə nə, à nə pɩn tə pʋ́pʋ́nɩ́ sə tə tʋn, də tə tə nə, à nə pɩn nii tə yuu wa, ndə à tʋtʋnʋ Davidə nə fwa nətʋ, à wá ya də mʋ́. À wá lwà dìə̀ ka nə jə dɩ̀àn, à pa mʋ́, ndə à nə lwə̀ ka don, à pa Davidə nə nətʋ. À wá pa n tɩnɩ Yɩzərayɛlə dwíə́ fugə tə. 39 À wá twá kʋ nətʋ nə, à ma mun Davidə dwíí tə, yá kʋ dàń nə bá yà nətʋ máŋá mama wuuu.»
40 Salʋmʋn zàn ʋ pɩ̀à cwəŋə, sə ʋ ma gʋ Zwerobʋamə. Zwerobʋamə dàń zàn, ʋ dəri ʋ va Ezwipətə pɩ̀ʋ́ Swiswakə con. Ʋ yɩn Ezwipətə nə wuuu, kʋ va kʋ yí Salʋmʋn tɩan.
41 Ba pʋ́pʋ́nɩ́ Salʋmʋn tʋ̀tʋ̀nán tə gɩganɩ, də kʋ tə mama ʋ nə tʋn, də ʋ wʋbʋŋa tə yoo, ba tún Salʋmʋn tʋ̀tʋ̀nán sagɩ tə wa. 42 Salʋmʋn dí pàrɩ̀ Yɩzərayɛlə lɩ̀à tə mama yuu wa, Zwerizalɛmə nə, bɩna sapwɩlə. 43 Salʋmʋn tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá ʋ nyɩna Davidə sadiyuu tə wa. Ʋ bìú Robʋamə nə dí pàrɩ̀ tə, ʋ yuu nə.