Saba tɩ̀án pakan twi ʋ na Salʋmʋn
10
1 Saba tɩ̀án pakan nì də ba swɩ̀n Salʋmʋn dun tə yoo, tə nə pɩn bwɩ Ba-Yígúrə́-Jə-Tiu nə. Ʋ dàń twi, sə ʋ bwe Salʋmʋn swɩan bwiə, ʋ ma dídə́n wá. 2 Ʋ twi Zwerizalɛmə də ʋ kwa lɩ̀à kapʋpʋ, də nyʋgʋmɛ tə nə zɩŋa wusinə, də sɩ́án tə nə dáá zənzən, də kapana tə nə jə funə. Ʋ twi Salʋmʋn con, ʋ dàń ga bwe wá bwiə tə mama, tə yà nə wulə ʋ bɩcan wa. 3 Salʋmʋn gwìń ʋ bwiə tə mama də̀ń, ʋ bɩrɩ wá. Yoo yà tə̀lə́, kʋ nə səgə Salʋmʋn yáá nə, ʋ nə wàrɩ̀ kʋ də̀ń ʋ gwìń.4 Saba tɩ̀án pakan tə nɩ Salʋmʋn wʋbʋŋa tə mama, də ʋ padiəb tə ʋ nə lwə̀. 5 Ʋ nɩ wodiu tə, ba nə túŋə́ Salʋmʋn yáá nə, də dìə̀ tə ʋ tʋ̀tʋ̀nà tə nə wulə ka wa, də tʋ̀tʋ̀nán tə, ba nə tʋŋa, də ba gànàn tə, ba nə zwɩ ba ma tʋŋa, də ba tə nə túŋə́ pɩ̀ʋ́ tə wodiu də ʋ sana. Ʋ nɩ jwəŋə tə, ba nə sʋ̀rɩ́*, Salʋmʋn nə fwa Ba-Yígúrə́-Jə-Tiu dìə̀ tə wa. Ʋ nə nɩ tə wiən təntə mama, kʋ súə́ wá, ʋ wàrɩ̀ ʋ siŋə. 6 Ʋ dàń swɩ̀n pɩ̀ʋ́ tə con, ʋ wʋ́: «N sʋ̀ràn tə, də n wʋbʋŋa tə yoo, à nə nì à lʋʋ nii tə wa, yɩ cɩ́gá. 7 À yà wà cɩ́gá pɩn tə sʋ̀ràn tə nə, də kʋ nə tà à nə twi, à na tə də à yɩ́á. À na də ba yà wà tə faan tətə man, ba bɩrɩ nə. N wʋbʋŋa tə, də n jɩjə tə dwə kʋ tə mama, à yà nə nì. 8 Pupwən lɩ̀à nə yɩ n lɩ̀à tə, də n tʋ̀tʋ̀nà tə, ba nə wulə n yáá con máŋá mama, ba cʋga n wʋbʋŋa sʋ̀ràn tə. 9 À bwɩ Ba-Yígúrə́-Jə-Tiu nə, ʋ nə yɩ n Yɩɩ. Ʋ mʋ̀ nə pɩn n jə̀ə́ Yɩzərayɛlə padaʋ tə yuu wa. Ba-Yígúrə́-Jə-Tiu swə Yɩzərayɛlə lɩ̀à tə máŋá mama wuuu. Kʋ mʋ̀ nə pɩn, ʋ tún mʋ́ sə n ya pɩ̀ʋ́, n tʋn kʋ tə nə yɩ mənəmənə, də kʋ tə nə yɩ cɩ́gá.»
10 Kʋ kwa nə, pakan tə pɩn sɩ́án tɔnə batwa də faan pɩ̀ʋ́ Salʋmʋn nə, də wusinə kapʋpʋ, də kapana tə nə jə funə. Wusinə təntə yiri kʋ́ʋ̀ wà pìí tə zʋ Yɩzərayɛlə lʋʋ nii tə wa, də kʋ nə tà tə tə Saba pakan tə nə pɩn pɩ̀ʋ́ Salʋmʋn nə.
11 Hiramə nɩ́á yuu bwərə tə, tə nə vəli Ofirə pìí tə zɩn sɩ́án, də pɩ̀nʋ́ daran kapʋpʋ, də kapana tə nə jə funə, tə ja bà. 12 Salʋmʋn ja pɩ̀nʋ́ daran tə, ʋ ma fwa gárɩ́ Ba-Yígúrə́-Jə-Tiu dìə̀ tə yɩra, də pɩ̀ʋ́ dìə̀ tə yɩra. Ʋ tə ja tə ʋ ma fwa banan, də kwanan, ʋ pa gwɛɛ tə nə. Santalə daran təntə yiri kʋ́ʋ̀ wà pìí tə na, də zə̀n mama.
13 Yá pɩ̀ʋ́ Salʋmʋn də pɩn won tə mama Saba tɩ̀án pakan tə nə pɩ̀à, də kʋ tə ʋ nə lòrì. Ʋ tə pɩn wá zìlə́ wiən duən, tə nə mɛ də pɩ̀ʋ́ zìlə́ wiən. Kʋ kwa nə, pakan tə də ʋ tʋ̀tʋ̀nà tə, dàń pìí ba va ba lʋʋ nii wa.
Salʋmʋn jɩjə tə yoo
14 Bɩnɩ mama wa, Salʋmʋn yàá na sɩ́án tɔnə sapʋa. 15 Sɩ́án təntə dàń súrí sɩ́án tə nə, baywələ nə pɩn, də sɩ́án tə pɛ̀gá nəkaran nə ma ŋwɩ́n lanpoo, də tə tə lʋʋ níə́ tə duən yáá tɩ̀án nə pɩn Salʋmʋn nə.
16 Pɩ̀ʋ́ Salʋmʋn lùə̀ sɩ́án nàtànɩ̀ nəfaran biələ, kʋ nədʋ mama dun nə yí sɩ́án kilo bardʋ. 17 Ʋ lùə̀ sɩ́án nàtànɩ̀ nəmənbii biətwa, kʋ nədʋ mama dun nə yí sɩ́án kilo də faan. Ʋ tún tə, dìə̀ tə wa, ba nə boŋə Liban pun dìə̀. 18 Ʋ tə ja won, kʋ nə yɩ ndə tuu yelə yɩra nə, ʋ ma fwa padaʋ nəfarʋ, ʋ ja sɩ́án tə nə ba durən jə, ʋ ma mwàlɩ̀ kʋ. 19 Kʋ padaʋ tə yà yɩ kʋ wulə yɩɩ nə, kukurə nacanɩ nàgwàlá bardʋ nii nə. Kʋ dəkoru tə yà yɩ kəkəlu, kʋ yà jə vànà kʋ jɩzən, də jɩgwiə mama. Ba sə̀ gərən bələ nyɩnyɩga, ba zɩgɩ kʋ vànà tə səpuni nə. 20 Ba tə sə̀ gərən fugə bələ nyɩnyɩga, ba tɩɩn tə bardʋ nàgwàlá tə jɩgwiə nə, ba ga tɩɩn tə bardʋ tə duən tə jɩzən nə. Kʋ nətʋ yiri wà payuu don mama wa tʋn. 21 Pɩ̀ʋ́ Salʋmʋn wùrú zwɩɩn tə mama, ʋ nə ma nywɩn yà yɩ sɩ́án wùrú zwɩɩn. Zwɩɩn tə mama, tə nə wulə dìə̀ tə wa, ba nə boŋə Liban pun dìə̀, yà yɩ sɩ́án cɩcɩ zwɩɩn. Won mama yà tə̀lə́ tə wa, ba nə fwa də wárʋ́. Cɩ́gá, Salʋmʋn máŋá tə wa, ba yà ba wárʋ́ won jələ zənzən. 22 Pɩ̀ʋ́ tə yà jə nɩ́á yuu bwərə nəfaran, tə nə vəli yiŋʋnɩ, tə də Hiramə nɩ́á yuu bwərə tə. Bɩna batwa mama, nɩ́á yuu bwərə təntə yàá pìí tə zɩn sɩ́án, də wárʋ́, də tuu yelə, də kəlee, də kʋŋwɛn, tə ja bà.
23 Pɩ̀ʋ́ Salʋmʋn nə doni pɛ̀gá tə duən tə mama tɩa yuu wa, kʋ nə yɩ jɩjə, də wʋbʋŋa yoo wa. 24 Tɩa yuu lɩ̀à tə mama yà pɩ̀à, sə ba na Salʋmʋn, sə ba cʋgʋ wʋbʋŋʋ sʋ̀ràn tə, Yɩɩ nə ken ʋ bɩcan wa. 25 Bɩnɩ mama wa, lìù mama yàá ja ʋ zìlə́ wiən ʋ ja twi, tə nə yɩ wárʋ́ wiən, də sɩ́án wiən, də gànàn, də kwatarɩ zɩla, də wusinə, də səsen, də bɩnasəsen.
26 Salʋmʋn ken ʋ səsen kòrə̀n, də səsen tə duən nə. Ʋ yà jə kwatara səsen kòrə̀n 1 400, də səsen 12 000. Ʋ lɩ tə duən ʋ yá ʋ con Zwerizalɛmə wa, ʋ ga kə tə duən tə, tɩan tə wa, ʋ nə tanɩ, sə tə ya là. 27 Pɩ̀ʋ́ Salʋmʋn pɩn səbiu zʋ Zwerizalɛmə, ndə kapana nə, ʋ ga pa Sɛdərə dɛɛ də wulə tɩa mama, ndə kapɩrɩtoo nə pɛ́n Swefela* nagwanaa tə wa nətʋ. 28 Salʋmʋn səsen tə yà yɩ tə naŋa Ezwipətə, də Silisi lʋʋ nii wa. Pɩ̀ʋ́ tə baywələ nə yàá va ba yə̀ tə, ba kə duən nə, ba ja bà, ba pa wá. 29 Səsən kòrù nə nan Ezwipətə, kʋ səbiu yɩ səbilurən biəyardʋ, yá səsən yɩ səbilurən bíí də finu. Baywələ təntə nə yàá ja tə ba twi, ba pɩn Ɛtə dwíí pɛ̀gá tə, də Siiri tɩ̀án pɛ̀gá tə də nə.