ZWIDA DWII PƐGA TƏ YOO
Púlí tə nə kun Siswɛnə nə yoo
10
1 Robʋamə vəli Siswɛmə. Cɩ́gá, Yɩzərayɛlə lɩ̀à tə mama twi Siswɛmə, sə ba tún wá, sə ʋ ya pɩ̀ʋ́. 2 Nebatə bìú Zwerobʋamə nì kʋ, də ʋ tə wulə Ezwipətə nə, bwálɩ́ tə nə, ʋ nə dəri Salʋmʋn yáá nə, ʋ va ʋ wulə. Zwerobʋamə dàń pìí ʋ nan Ezwipətə ʋ bà. 3 Ba tʋn ba bon Zwerobʋamə. Ʋ də Yɩzərayɛlə lalʋʋ tə mama dàń twi Robʋamə con, ba swɩ̀n, ba wʋ́: 4 «N nyɩna ken nəba càn zənzən wa. Sɩ́ʋ́n nə, n mʋ̀ dàń fʋ càn tə n nyɩna yà nə kəni nə nə n ga, yá nə dàń wá tʋn nə pa mʋ́.» 5 Robʋamə swɩ̀n ba con, ʋ wʋ́: «Á vələ, sə á pìí á bà à con, dɩan batwa nii nə.» Lalʋʋ tə ma pìí ba vìí.6 Pɩ̀ʋ́ Robʋamə pɩ̀à kwìə̀ nəkwɩna tə con, ba nə yɩn də ʋ nyɩna Salʋmʋn, máŋá tə wa ʋ nə yɩn lʋʋ wa. Ʋ bwe ba, ʋ wʋ́: «Bɛ̀ɛ̀ kwìə̀ nə á wá pa nə, sə à pa lalʋʋ kʋ tə nə?» 7 Ba swɩ̀n ʋ con, ba wʋ́: «N nə sɛ̀ n tʋn wʋywaŋʋ lalʋʋ kʋ tə yɩra, n nə tʋn kʋ tə ba nə lòrì, n nə le ba də bɩcabwanʋ, ba wá yà n tʋ̀tʋ̀nà máŋá mama wuuu.» 8 Yá Robʋamə wà kwìə̀ tə nəkwɩna tə nə pɩn wá jələ. Ʋ pìí ʋ bwe ba tə, ʋ də ba nə yɩn bìsɩ́ná, ba ga bori də duən. 9 Ʋ swɩ̀n ba con, ʋ wʋ́: «Bɛ̀ɛ̀ kwìə̀ nə á wá pa nə, sə à pa lalʋʋ kʋ tə nə, ba nə swɩ̀n sə à fʋ càn tə à nyɩna nə kəni ba nə, à ga?» 10 Ʋ duən tɩ̀án tə, ʋ də ba nə bori də duən tə ma swɩ̀n ʋ con, ba wʋ́: «Nə̀ń kʋ tə n nə wá swɩ̀n lalʋʋ təntə con, ba nə swɩ̀n sə n fʋ càn tə, n nyɩna yà nə kəni ba nə, n ga. N wá swɩ̀n ba con, n wʋ́: “À jɩfʋnbiə cuni dwə à nyɩna vàn. 11 À nyɩna ken aba càn zənzən wa, yá à mʋ̀ wá kə aba càn wa, à doni nətʋ. À nyɩna yɩ fɩfɩran nə ʋ ma kə aba cwəŋə nə, yá à mʋ̀ yɩ nɩŋaa nə à wá ma kə aba cwəŋə nə.” »
12 Zwerobʋamə də lalʋʋ tə mama pìí ba bà Robʋamə con, dɩan batwa tə nii nə, ndə pɩ̀ʋ́ tə yà nə swɩ̀n, sə ba pìí ba bà dɩan batwa nii nə nətʋ. 13 Pɩ̀ʋ́ tə le lalʋʋ tə də nicɔɔ, ʋ wà nəkwɩna tə kwìə̀ tə, ba nə pɩn wá jələ. 14 Ʋ twá ləzwəndʋn tə kwìə̀ tə nə, ʋ ma swɩ̀n ba con, ʋ wʋ́: «À nyɩna ken aba càn zənzən wa, yá à mʋ̀ wá kə aba càn wa, à doni nətʋ. À nyɩna yɩ fɩfɩran nə ʋ ma kə aba cwəŋə nə, yá à mʋ̀ yɩ nɩŋa nə à wá ma kə aba cwəŋə nə.» 15 Mə kʋ twá nətʋ, pɩ̀ʋ́ tə ma vɩ̀ sə ʋ cʋgʋ lalʋʋ tə sʋgʋ. Cɩ́gá, Ba-Yígúrə́-Jə-Tiu yà pɩn kʋ nətʋ tʋn, sə kʋ pa sʋgʋ tə, ʋ nə twá də Nebatə bìú Ahɩya, ʋ nə yɩ Silo tíú, ʋ swɩ̀n Zwerobʋamə con, nii sú.
Yɩzərayɛlə payuu tə pwɛ̀ payun bələ
16 Máŋá tə Yɩzərayɛlə lɩ̀à tə mama nə lwarɩ də pɩ̀ʋ́ tə ba pɩ̀à sə ʋ cʋgʋ ba kori tə, lalʋʋ tə le pɩ̀ʋ́ tə, ba wʋ́: «Nə də Davidə ba yoo jə də duən, nə də Yɩzayi bìú tə ba tori jə də duən. Yɩzərayɛlə lɩ̀à-ba, á lìù mama pìí n va n sàń. Davidə dwíí tíú, sɩ́ʋ́n nə, n dàń tɩnɩ n payuu tə.» Yá Yɩzərayɛlə lɩ̀à tə mama dàń pìí ba va ba sànɩ́.
17 Robʋamə dàń dí pàrɩ̀ tə Yɩzərayɛlə lɩ̀à tə cɩcɩ yuu wa, ba nə wulə Zwida nagwanaa tə wa. 18 Pɩ̀ʋ́ Robʋamə dàń tʋn Hadoramə, sə ʋ va ʋ ywàń dɩ̀àn tʋ̀tʋ̀nán tə yuu nə. Yá Yɩzərayɛlə lɩ̀à tə mama dɩlʋ wá də kapana ba gʋ. Pɩ̀ʋ́ Robʋamə yɩ ʋ ken dɩ̀àn, ʋ ma wànɩ́ ʋ zʋ ʋ səsən kòrù wa, ʋ dəri ʋ va Zwerizalɛmə. 19 Mə kʋ zɩgɩ nətʋ, Yɩzərayɛlə lɩ̀à tə ma vɩ̀ Davidə dìə̀ tə nii, kʋ bà kʋ yí də zə̀n mama.