Yɩɩ dìə̀ tə lwiu yoo
3
1 Salʋmʋn sinti ʋ lwè Ba-Yígúrə́-Jə-Tiu dìə̀ tə Zwerizalɛmə nə, Moriya paan tə yuu wa, bwálɩ́ tə nə, Ba-Yígúrə́-Jə-Tiu nə twi ʋ nyɩna Davidə con. Davidə yà dí yáá ʋ tanɩ kʋ bwálɩ́ tə, Orənan, ʋ nə yɩ Yebusə tíú tʋa tə wa. 2 Ʋ sinti Yɩɩ dìə̀ tə lwiu, ʋ pàrɩ̀ tə banɩa nii bɩnɩ tə wa, bələ nii cànà tə dɩan bələ dɩɩn nə. 3 Nə̀ń Yɩɩ dìə̀ tə dəkuu nə yɩn nətʋ Salʋmʋn nə tún. Ka danɩ yɩ jɩvaŋɩ yiə sapwɩtwa, ka wanɩ ga yɩ jɩvaŋɩ yiə sapʋa, ndə fuən lɩ̀à nə maŋa won nətʋ. 4 Napakwalʋ tə nə wulə Yɩɩ dìə̀ tə yáá danɩ yà yɩ jɩvaŋɩ yiə sapʋa, ndə Yɩɩ dìə̀ tə wanɩ nə yɩ nətʋ, ka yuu də tɩa ga yɩ jɩvaŋɩ yiə bíí də sapʋa. Salʋmʋn ja sɩ́án tə nə ba durən jə, ʋ ma tùrì ka wa tə mama. 5 Ʋ ja sɩsabaʋ daran ʋ ma pú dibiu nəfarʋ tə bírə́ tə nə, ʋ ja sɩ́án tə nə ba durən jə, ʋ ma tùrì tə, ʋ ga pa ba sà kʋrɩ nyɩnyɩga, də banzala nɩmɩnɩ nyɩnyɩga, ba tún tə yɩra. 6 Ʋ ja kapana tə nə jə funə, də Parəvayimə tɩ̀án sɩ́án ʋ ma nan dìə̀ tə. 7 Ʋ ja sɩ́án ʋ ma tùrì dìə̀ tə, də ka baŋɩ tə, də ka mimii tə yuu con, də ka bírí tə, də ka bwə̀rə̀n tə waa con, ʋ ga pa ba sà Yɩɩ sàń wonəŋə, ba nə boŋə kerubə*, nyɩnyɩga, ba tún ka bírí tə yɩra.8 Ʋ lwà dibiu tə nə yɩ Yɩɩ cɩcɩ nyiən. Kʋ danɩ yà yɩ jɩvaŋɩ yiə sapʋa, ndə dìə̀ tə wanɩ nə yɩ nətʋ, kʋ wanɩ də ga yɩ jɩvaŋɩ yiə sapʋa. Ʋ ja sɩ́án tɔnə sapʋa, tə nə ba duən jə, ʋ ma tùrì kʋ waa tə. 9 Cɩan tə ba nə ma tʋŋa nədʋ mama dun yà yɩ sɩ́án kilo faan. Ʋ tə ja sɩ́án ʋ ma tùrì dəyuu dìì tə də.
10 Ba nyɩan lugu ba ma fwa Yɩɩ sàń wonəŋə nyɩnyɩga bələ, ba tùrì tə də sɩ́án, ba zɩgɩ dibiu tə wa, kʋ nə yɩ Yɩɩ cɩcɩ nyiən. 11 Yɩɩ sàń wonəŋə nyɩnyɩga tə vànà tə danɩ yà yɩ jɩvaŋɩ yiə sapʋa. Təntən nyiən tə vàn danɩ yɩ jɩvaŋɩ yiə bonu, kʋ nii ga dwen dìə̀ tə bírə́ nə. Kʋ vàn tə don də yɩ jɩvaŋɩ yiə bonu, kʋ də ga dwen bələ nii Yɩɩ sàń wonəŋə nyɩnyɩga tə don tə vàn nə. 12 Bələ nii Yɩɩ sàń wonəŋu nyɩnyɩga tə də vàn danɩ yɩ jɩvaŋɩ yiə bonu, kʋ də ga dwen dìə̀ tə bírə́ nə. Kʋ vàn tə don də danɩ yɩ jɩvaŋɩ yiə bonu, kʋ də ga dwen təntən Yɩɩ sàń wonəŋu nyɩnyɩga tə vàn nə. 13 Yɩɩ sàń wonəŋə nyɩnyɩga bələ təntə vànà tə nə wɛ, tə yɩ jɩvaŋɩ yiə sapʋa. Tə yà yɩ tə zɩga yɩɩ nə, tə nɛɛ yuu, tə yɛɛ ga viviri tə te dìə̀ tə mimii con. 14 Huramə fwa dìə̀ tə wa patasɩn tə də ganbʋa nəlinu, də nəsɩan, də sɩ̀sɩ́nʋ́, ʋ ga sʋ Yɩɩ sàń wonəŋə nyɩnyɩga, ʋ tún kʋ yɩra.
Cɩnɩan ywəŋə bələ tə, də Yɩɩ joŋi bwálɩ́ tə ba nə fwa də cɩnɩan fwaŋʋ yoo
15 Ʋ fwa ywəŋə bələ ʋ zɩgɩ Yɩɩ dìə̀ tə yáá, kʋ nədʋ mama danɩ nə yɩ jɩvaŋɩ yiə fɩtwa də bonu. Tə yuu yà jə zɩlan tə danɩ nə yɩ jɩvaŋɩ yiə bonu. 16 Ʋ fwa banzala nəmɩnɩ, ʋ kə ywəŋə tə yuu nə, ʋ ga fwa bùlə̀ bíí, ʋ goli banzala nəmɩnɩ tə nə. 17 Ʋ zɩ̀n ywəŋə tə ʋ zɩgɩ Yɩɩ dìə̀ tə yáá nə. Ʋ zɩgɩ yoŋi tə don jɩzən nə, ʋ ga zɩgɩ kʋ don tə jɩgwiə nə. Ʋ dɩga jɩzən nyiən tə yɩrɩ Yakin, kʋ də̀ń nə yɩ «Yɩɩ pɩn dɩ̀àn,» ʋ ga dɩ jɩgwiə nyiən tə yɩrɩ Boazə, kʋ də̀ń nə yɩ «Yɩɩ jə dɩ̀àn.»