2
1 Salʋmʋn gàlɩ̀ bara 70 000 sə ba zɩn zɩla, də bara 80 000 sə ba sà kapana paan tə wa, də bara 3 600, sə ba ywàń tʋ̀tʋ̀nà tə yuu nə.2 Salʋmʋn tʋn ʋ pa ba swɩ̀n Tirə pɩ̀ʋ́ Huramə con, ʋ wʋ́: «N pɩn sɩsaban daran à nyɩna Davidə nə, ʋ ma lwà ʋ dìə̀ tə. Tʋn kʋ nətʋ tə, n pa à də nə. 3 À ken sírí, sə à lwà dìə̀ à pa Ba-Yígúrə́-Jə-Tiu nə, ʋ nə yɩ à Yɩɩ, sə ka ya ʋ cɩcɩ nyiən. Ba wá sʋ̀rɩ́ wusinə jwəŋə lá, ba pa wá, ba wá tún dipɛn ka wa, ba pa wá máŋá mama. Ba tə wá fwa jɩjʋ jwəŋə, də didəni jwəŋə, də sìə́ dɩɩn jwəŋə, də candʋan dɩan jwəŋə, də Ba-Yígúrə́-Jə-Tiu ʋ nə yɩ nə Yɩɩ, cànà diŋə dɩɩn jwəŋə, dìə̀ təntə wa. Mə kʋ mʋ̀ nə mɛ sə kʋ ya Yɩzərayɛlə lɩ̀à tʋtʋŋɩ, máŋá mama wuuu. 4 Dìə̀ tə à nə wá lwà, mɛ sə ka ya difarʋ. Cɩ́gá, nə Yɩɩ tə dánɩ́ dwə yɩa tə mama. 5 Yá cɩ́gá mama, wàà nə wàá dìə̀ ʋ lwe, ʋ pɩn wá. Lanworu də kʋ dánɩ́ tə mama, ʋ tə wàrɩ̀ kʋ wa. Yá à mʋ̀ nə yɩ wàà, sə à ma lwe dìə̀ à pɩn wá? Kʋ yɩ bwálɩ́ mʋ̀ʋ́ à pɩ̀à à lwà, à sʋ̀rɩ́ jwəŋə kʋ wa, à pa wá. 6 Sɩ́ʋ́n nə, n dàń tʋn bɛɛ à con, ʋ nə jə sɩ́án, də wárʋ́, də cɩnɩan, də lugu tʋ̀tʋ̀nán yənu, ʋ ga yə̀ə́ gantwɛn nəsɩnan, də sɩ̀sɩ́nán, də nəlinən fwaŋʋ. Ʋ tə mɛ sə ʋ yəni nətʋ tə ba nə bɩ̀rɩ̀ wiən nyɩnyɩga, ba túŋə́ wiən yuu wa. Ʋ wá tʋn də tʋ̀tʋ̀nán yənu tɩ̀án tə nə wulə də nə, ba nə yɩ à nyɩna Davidə nə kúrí Zwida lʋʋ nii tə wa də Zwerizalɛmə wa. 7 N tə pa nə Liban sɩsaban daran, də nyənbori daran, də təən daran. Cɩ́gá, à yə̀ə́ də n tʋ̀tʋ̀nà tə yə̀ə́ Liban tɩ̀án tə goŋu. À tʋ̀tʋ̀nà tə wá bà ba tʋn də n tʋ̀tʋ̀nà tə. 8 Yá ba wá san duən nə, ba tanɩ daran zənzən, ba pa nə. Cɩ́gá, dìə̀ tə à nə pɩ̀à sə à lwà, wá ya difarʋ, ka ga wá ja fɩra. 9 À də wá pa mɩna tɔnə 6 000, də dipɛn mɩna tɔnə 6 000, də divɛn litərə 800 000, də nʋga litərə 800 000, n tʋ̀tʋ̀nà tə nə, ba nə wá goŋə daran tə.»
10 Tirə pɩ̀ʋ́ Huramə pʋ́pʋ́nɩ́ sagɩ ʋ ma le Salʋmʋn, ʋ wʋ́: «Kʋ yɩ Ba-Yígúrə́-Jə-Tiu nə swə ʋ lalʋʋ tə nə pɩn, ʋ ma tún mʋ́, sə n ya pɩ̀ʋ́ kʋ yuu wa.» 11 Huramə tə swɩ̀n ʋ súrí lá, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ tə, ʋ nə fwa lanworu də tɩa. Cɩ́gá, ʋ pɩn bìú Davidə nə, ʋ nə yɩ wʋbʋnyiən, ʋ ga jə pubʋnzəŋu, də swɩan, sə ʋ lwà dìə̀, ʋ pa Ba-Yígúrə́-Jə-Tiu nə, də ʋ tətə padiə! 12 Sɩ́ʋ́n nə, à tʋn bɛɛ n con, ʋ nə yɩ tʋ̀tʋ̀nán yənu nəfarʋ tíú. Ʋ yɩrɩ nə yɩ Huramə-Abi. 13 Ʋ nuu yɩ Dan dwíí tə wa bʋ̀á, ʋ nyɩna ga yɩ Tirə tíú. Ʋ yə̀ə́ sɩ́án wiən, də wárʋ́ wiən, də cɩnɩan wiən, də lugu wiən, də kapana wiən, də daran wiən fwaŋʋ. Ʋ yə̀ə́ gantwɛn nəsɩnan, də sɩ̀sɩ́nán, də nəlinən, də ganbʋa fwaŋʋ. Ʋ tə yə̀ə́ ka bɩ̀rɩ̀ wiən nyɩnyɩga ka tún wiən yuu, ʋ ga wá fwa won tə mama, ba nə pɩ̀à. Ʋ wá tʋn də n tətə tʋ̀tʋ̀nán yənu tɩ̀án tə, də ba tə n nyɩna Davidə, ʋ nə yɩ à yuu tíú nə kúrí. 14 N də dàń pa nəba mɩna tə, də dipɛn mɩna tə, də nʋga tə, də divɛn tə, n nə swɩ̀n tə yoo. 15 Nə mʋ̀ dàń wá goŋə daran Liban pún wa, tə yí nətʋ tə n nə pɩ̀à, nə vwa nə kə duən nə, nə pa tə twá mʋʋ, tə bà Zwafa. N də dàń wá pa ba lɩ tə Zwafa nə, ba ja va Zwerizalɛmə.»
16 Salʋmʋn gàlɩ̀ twajənə tə mama, ba nə wulə Yɩzərayɛlə lʋʋ nii tə wa, ba nə yɩ lɩ̀à tə, ʋ nyɩna Davidə nə dí yáá ʋ gala ba. Ba yà yɩ lɩ̀à 153 600. 17 Ʋ lɩ ba lɩ̀à 70 000, sə ba zɩn zɩla, ʋ lɩ ba lɩ̀à 80 000, sə ba sà kapana paan tə wa, ʋ ga lɩ ba lɩ̀à 3 600, sə ba ywàń lalʋʋ tə də tʋ̀tʋ̀nán tə yuu nə.