Zweremi vəli ʋ jə̀ə́ Misəpa nə
40
1 Ba-Yígúrə́-Jə-Tiu swɩ̀n sʋ̀ràn tə tə Zweremi con, máŋá tə wa pɩ̀ʋ́ sàń nəcɩra yuu tíú Nebuzaradan nə lɩ wá Rama nə, ʋ pa ʋ tɩ ʋ tɩ̀àn kwa nə. Kʋ máŋá tə wa, Zweremi də yà yɩ ba vwə də banzala, ba kə lɩ̀à tə mama wa, ba nə ja nan Zwerizalɛmə də Zwida, ba vələ yongaʋ, Babɩlɔnə nə. 2 Pɩ̀ʋ́ sàń nəcɩra yuu tíú tə lɩ Zweremi ʋ kə vàn nə, yá ʋ swɩ̀n ʋ con, ʋ wʋ́: «Ba-Yígúrə́-Jə-Tiu, n tíú Yɩɩ tə nə pɩn nii, sə lɛɛ tə tə tʋ bwálɩ́ kʋ tə yuu wa. 3 Ba-Yígúrə́-Jə-Tiu pɩn tə bà, yá ʋ tʋn kʋ tə ʋ yà nə swɩ̀n də ʋ wá tʋn tə, ʋ pa kʋ nii sú. Cɩ́gá, á tʋn lwanɩ á zɩgɩ Ba-Yígúrə́-Jə-Tiu nə, á wà ʋ nii zìlí. Kʋ mʋ̀ nə pɩn, kʋ tə ʋ nə swɩ̀n tə ma yí aba. 4 Sɩ́ʋ́n nə, ywàń, à kʋ̀rɩ̀ banzala tə n jɩ̀àn nə, zə̀n kʋ tə. Bàá n twá à nə, n va Babɩlɔnə, də n nə swə, yá à wá ywàń n yuu. N kʋ́ʋ̀ nə ba swə sə n twá à nə n va Babɩlɔnə, sə n yá. Ywàń, lʋʋ nii tə mama nə kʋ wulə n yáá con, vəli n ya bwálɩ́ tə mama n nə swə, kʋ ga twá n fɩra nə.»5 Yá də Zweremi tə wà le, pɩ̀ʋ́ sàń nəcɩra yuu tíú tə swɩ̀n, ʋ súrí lá, ʋ wʋ́: «Babɩlɔnə pɩ̀ʋ́ tún Gedalɩa, ʋ nə yɩ Ahikamə bìú, ʋ ga yɩ Swafan nàʋ́, sə ʋ ywàń Zwida tɩan tə yuu nə. Pìí n va n ya ʋ con, lalʋʋ tə titəŋi wa. Kʋ kʋ́ʋ̀ nə tà nətʋ, sə n va bwálɩ́ tə mama n nə swə.» Pɩ̀ʋ́ sàń nəcɩra yuu tíú tə pɩn wá wodirən də zìlə́ wiən duən, ʋ ga yá wá, ʋ pa ʋ vìí. 6 Zweremi vəli Ahikamə bìú Gedalɩa con, Misəpa nə, yá ʋ də wá dàń yɩn lá nə, lalʋʋ tə titəŋi wa, kʋ yà nə ga lʋʋ nii tə wa.
Zwida lʋʋ lɩ̀à tə twi ba kun duən nə, Gedalɩa con
7 Kwatara yun tɩ̀án tə mama də ba kwatara, ba yà nə wulə gaʋ wa, nì də Babɩlɔnə pɩ̀ʋ́ tún Ahikamə bìú Gedalɩa lʋʋ nii tə yuu wa. Yá ʋ dàń ken bara, də kana, də bìsɩ́ná, də lʋʋ nii tə lalaŋa tə, ba nə wà ja va yongaʋ, Babɩlɔnə nə, Gedalɩa jɩɩn wa, sə ʋ ywàń ba yuu. 8 Kwatara yun tɩ̀án təntə vəli Gedalɩa con, Misəpa nə. Kʋ yɩn Netanɩa bìú Yɩsəmayɛlə, də Kareya bɩ̀á Yohanan də Zonatan, də Tanhumɛtə bìú Seraya, də Efayi, ʋ nə yɩ Netofa tíú bɩ̀á tə, də Yezanɩawu, ʋ nə yɩ Maaka tíú bìú, kʋ dàń súrí ba kwatara tə nə. 9 Gedalɩa, ʋ nə yɩ Ahikamə bìú, ʋ ga yɩ Swafan nàʋ́, kàn nii ʋ pa kwatara yáá tɩ̀án təntə də ba kwatara tə nə, ʋ wʋ́: «Á dànà ká pa fən ja aba, sə á tʋn á pa Kaləde tɩ̀án tə nə. Á yana lʋʋ nii tə wa, á tʋn á pa Babɩlɔnə pɩ̀ʋ́ nə, yá kʋ wá kwɛn aba. 10 Nə̀ń à nə, à wulə Misəpa nə, sə à tʋn à pa Kaləde tɩ̀án tə nə, ba nə wá bà nə con. Yá á mʋ̀, á kàŋà divɛn, á pʋ̀rá tɩ̀án lənə, á lɩa olivə nʋga. Á kənə tə wiən wa á tún, á ga jə̀ń tɩan tə wa, á nə wulə tə wa.»
11 Zwida lʋʋ lɩ̀à tə mɛ ba yà nə wulə Mʋabə lʋʋ nii wa, də Amon dwíí lʋʋ nii wa, də Edomə lʋʋ nii wa, də lʋʋ níə́ tə duən mama wa, nì də Babɩlɔnə pɩ̀ʋ́ yá lalʋʋ tə gɩganɩ* Zwida lʋʋ nii wa, yá ʋ tún Gedalɩa, ʋ nə yɩ Ahikamə bìú, ʋ ga yɩ Swafan nàʋ́, ba yuu wa, sə ʋ ywàń ba nə. 12 Zwida lʋʋ lɩ̀à tə mama dàń pìí ba nan bwálá tə mama wa, ba yà nə laga ba va, ba bà. Ba vəli Zwida lʋʋ nii tə wa, Gedalɩa con, Misəpa nə, yá ba kàŋɩ̀ divɛn zənzən, ba ga pʋ̀rɩ́ tɩ̀án lənə kapʋpʋ.
Gedalɩa gʋrɩ yoo
13 Dɩɩn don nə, Kareya bìú Yohanan, də kwatara yun tɩ̀án tə duən tə mama ba yà nə wulə gaʋ tə wa, twi Gedalɩa con, Misəpa nə. 14 Ba swɩ̀n ʋ con, ba wʋ́: «N yəri də Balisə, ʋ nə yɩ Amon dwíí tə pɩ̀ʋ́ tʋn Netanɩa bìú Yɩsəmayɛlə, sə ʋ bà ʋ mà mʋ́ ʋ gʋ naaa?» Yá Ahikamə bìú Gedalɩa wà cɩ́gá ba sʋgʋ tə nə pɩn. 15 Yá Kareya bìú Yahanan dàń səgə ʋ swɩ̀n Gedalɩa con, Misəpa nə, ʋ wʋ́: «Pa nə cwəŋə, sə à va à gʋ Netanɩa bìú Yɩsəmayɛlə. Lìù mama bá lwarɩ kʋ. Nə wàrɩ̀ nə yá nə pɩn ʋ twi ʋ gwɩ mʋ́! Ʋ nə gʋa mʋ́, Zwida lʋʋ lɩ̀à tə mama nə kun duən nə, n bɩan nə, kʋ́ʋ̀ wá laga duən yáá nə, yá Zwida payuu tə gɩganɩ* tə wá jɛ́n.»
16 Ahikamə bìú Gedalɩa le Kareya bìú Yohanan, ʋ wʋ́: «Dàn ká tʋn kʋ! Cɩ́gá, kʋ tə n nə swɩ̀n Yɩsəmayɛlə yuu wa, yɩ kʋ̀nkʋ̀n.»