41
1 Yá kʋ bɩnɩ təntə barpɛ nii cànà tə wa, Netanɩa bìú Yɩsəmayɛlə, ʋ nə yɩ Eliswama nàʋ́, ʋ nə yɩ pɛ̀gá dwíí tə wa lìù, ʋ ga yɩ pɩ̀ʋ́ tʋ̀tʋ̀nán yun tɩ̀án tə wa lìù, twi də bara fugə, Ahikamə bìú Gedalɩa con, Misəpa nə. Ba dí wodiu də duən lá nə, Misəpa nə. 2 Netanɩa bìú Yɩsəmayɛlə, də bara fugə tə nyɩ́n ba zàn, ba za Ahikamə bìú Gedalɩa, ʋ nə yɩ Swafan nàʋ́, də lagʋrɩ sɩ̀án ba gʋ. Mə nətʋ nə kʋ twá, ba ma gʋ lìù tə Babɩlɔnə pɩ̀ʋ́ yà nə tún, sə ʋ ywàń lʋʋ nii tə yuu nə. 3 Yɩsəmayɛlə tə gʋa Zwida lʋʋ lɩ̀à tə mama, ba yà nə wulə də Gedalɩa, Misəpa nə, də Kaləde tɩ̀án tə, ba yà nə yɩ kwatara, ba wulə lá.Yɩsəmayɛlə gʋa lɩ̀à sapwɩnɩa
4 Ba gʋa Gedalɩa kʋ yí dɩan bələ, də lìù mama tə yəri kʋ yoo. 5 Kʋ kwa nə, bara sapwɩnɩa nan Siswɛmə, də Silo, də Samari ba bà. Ba yà fɩnɩ ba twaŋa, ba gànàn cɩrɩ, ba ga bɩ̀rɩ̀ ba yɩra. Ba yà jə zìlə́ wiən, də wusinə ba jɩ̀àn wa, sə ba ma fwa joŋi Ba-Yígúrə́-Jə-Tiu dìə̀ tə wa. 6 Netanɩa bìú Yɩsəmayɛlə nan Misəpa, ʋ jəri ba, ʋ vəli də ʋ kwi. Máŋá tə wa ʋ nə yí ba, ʋ swɩ̀n ba con, ʋ wʋ́: «Á bɩ̀àn Ahikamə bìú Gedalɩa sàń nə.»
7 Yá máŋá tə wa ba nə yí tɩʋ tə titəŋi wa, Netanɩa bìú Yɩsəmayɛlə də ʋ kwa lɩ̀à tə ken sɩ̀ʋ́ ba bɩan nə, yá ba pɛ̀ ba tɩga tə, ba dɩ nɩ́á gwàlʋ́ nəfarʋ* wa. 8 Bara fugə yà wulə ba wa, ba nə swɩ̀n Yɩsəmayɛlə con, ba wʋ́: «Dàn ká gʋ nəba, cɩ́gá, nə jə jɩjə wiən, tə nə səgə nə kárɩ́ wa: Tə yɩ dipɛn mɩna, də dipɛn mɩna yiri don, də nʋga, də tʋ̀ràn.» Yá ʋ dàń yá ba mʋ̀, ʋ wà sɛ̀ ʋ súrí ba ba nubɩa tə nə, ʋ gʋ. 9 Nɩ́á gwàlʋ́ nəfarʋ tə, Yɩsəmayɛlə nə gʋa Gedalɩa də bara tə mama, ʋ dɩ kʋ wa tə, yà yɩ pɩ̀ʋ́ Asa nə pɩn ba kʋ̀ kʋ, máŋá tə wa ʋ yà nə tɛ kʋ̀ʋ̀ də Yɩzərayɛlə pɩ̀ʋ́ Baswa. Mə kʋ nə, Netanɩa bìú Yɩsəmayɛlə gʋa lɩ̀à, ʋ sú kʋ nii.
10 Yɩsəmayɛlə jɩn lalʋʋ tə gɩganɩ* tə mama yà nə ga Misəpa nə, ʋ ma fwa bandiə lɩ̀à: Kʋ yɩ pɩ̀ʋ́ bwɩ̀ɩ́ tə, də lalʋʋ tə wa lɩ̀à tə mama yà nə ga Misəpa nə, pɩ̀ʋ́ sàń nəcɩra yuu tíú Nebuzaradan yà nə ken Ahikamə bìú Gedalɩa jɩɩn wa. Netanɩa bìú Yɩsəmayɛlə jɩn ba ʋ ma fwa bandiə lɩ̀à, ʋ ja va yongaʋ Amon dwíí lʋʋ nii wa.
Ba jon Yɩsəmayɛlə bandiə lɩ̀à tə ba dʋgʋ
11 Kareya bìú Yohanan də Kwatara yáá tɩ̀án tə mama ba yà nə wulə də wá, nì yolwan tə mama Netanɩa bìú Yɩsəmayɛlə nə tʋn. 12 Yohanan dàń jɩn bara tə mama, ʋ ja va ʋ ma ta Netanɩa bìú Yɩsəmayɛlə. Ba yí wá Gabawon nɩ́á càrʋ́ nəfarʋ tə nii nə. 13 Máŋá tə wa lalʋʋ tə mama yà nə wulə də Yɩsəmayɛlə nə nɩ Kareya bìú Yohanan, də kwatara yáá tɩ̀án tə mama, ba fwa pupwən. 14 Lalʋʋ tə mama Yɩsəmayɛlə yà nə jɩn ndə bandiə lɩ̀à nə, ʋ ja nan Misəpa, dàń pìí ba va Kareya bìú Yohanan con. 15 Yá Netanɩa bìú Yɩsəmayɛlə dəri də bara nana, ʋ jɛ́n Yohanan yáá nə, ʋ va Amon dwíí tə con.
16 Kareya bìú Yohanan, də kwatara yáá tɩ̀án tə mama ba yà nə kwé wá, jon lalʋʋ tə gɩganɩ tə mama, Netanɩa bìú Yɩsəmayɛlə nə ja nan Misəpa, Ahikamə bìú Gedalɩa gʋrɩ kwa nə. Ba jon bara tə nə wàá kʋ̀ʋ̀ ba tɛ, də kana, də bìsɩ́ná, də pɩ̀ʋ́ sàń tʋ̀tʋ̀nà, ba ja pìí ba nan Gabawon ba vìí. 17 Ba vəli, yá ba zɩgɩ ba sìí bwálɩ́ tə nə, vərə nə yàá zʋrɩ, Kiməhamə nə, kʋ nə bwə́lə́ Bɛtəleyɛmə, kʋ kwa nə, sə ba dàń kɛ̀ń ba va Ezwipətə, 18 sə ba ya ŋʋ́nɩ́ də Kaləde tɩ̀án tə. Cɩ́gá, ba yà dəri Kaləde tɩ̀án tə fən, Netanɩa bìú Yɩsəmayɛlə nə gʋa Ahikamə bìú Gedalɩa yɩrɩ, Babɩlɔnə pɩ̀ʋ́ yà nə tún lʋʋ nii tə yuu wa.