Zwida lʋʋ lɩ̀à tə gɩganɩ tə pɩ̀à Yɩɩ nii sʋgʋ
42
1 Kwatara yáá tɩ̀án tə mama, kʋ nə yɩ Kareya bìú Yohanan, də Hoswaya bìú Yezanɩa, də lalʋʋ tə mama, kʋ nə zɩgɩ ba nəmaa tíú nə, kʋ va kʋ yí ba nəkwɩa, twi ba yí, 2 yá ba swɩ̀n Yɩɩ nii sʋ̀sʋ̀nʋ̀ Zweremi con, ba wʋ́: «Nə lòrì mʋ́ pwəpwə, sə n bon n kə Ba-Yígúrə́-Jə-Tiu nə, ʋ nə yɩ n tíú Yɩɩ, n pa nə mʋ̀ lalʋʋ tə gɩganɩ* tə mama nə. Cɩ́gá, nə yà dáá, yá nə dàń ga mancɩn, ndə n tətə nə na nəba n yɩ́á yuu nətʋ. 3 Lòrì Ba-Yígúrə́-Jə-Tiu, n Yɩɩ tə, sə ʋ bɩrɩ nəba cwəŋə tə, nə nə mɛ sə nə tì, də kʋ tə, nə nə mɛ sə nə fwa.»4 Yɩɩ nii sʋ̀sʋ̀nʋ̀ Zweremi ma swɩ̀n ba con, ʋ wʋ́: «À nì, à wá lòrì Ba-Yígúrə́-Jə-Tiu, á tíú Yɩɩ tə, ndə á nə swɩ̀n nətʋ, yá à wá swɩ̀n kʋ tə mama Ba-Yígúrə́-Jə-Tiu nə wá le aba, à bɩrɩ aba, à bá səgə aba yoo mama.»
5 Ba le Zweremi ba wʋ́: «Ba-Yígúrə́-Jə-Tiu wá ya dansɩa lìù tə nə yɩ cɩ́gá də pùə́ nədʋ tíú, ʋ zɩgɩ nə nə, də nə nə wà sʋgʋ tə mama nii nə twá, Ba-Yígúrə́-Jə-Tiu, n tíú Yɩɩ tə nə wá swɩ̀n n con, sə n swɩ̀n nə con! 6 Kʋ nə ywán də nəba, nə à yə̀ə́ kʋ nə ba ywán də nəba, nə wá zìlí Ba-Yígúrə́-Jə-Tiu, nə tíú Yɩɩ nii. Cɩ́gá, nə mʋ̀ nə tʋn mʋ́, ʋ con! Yá kʋ nətʋ dàń wá pa yoo mama ya zəni kʋ pa nəba, nə nə zìlí Ba-Yígúrə́-Jə-Tiu, nə tíú Yɩɩ nii yɩrɩ.»
7 Dɩan fugə kwa nə, Ba-Yígúrə́-Jə-Tiu swɩ̀n Zweremi con. 8 Yá Zweremi bon Kareya bìú Yohanan, də kwatara yáá tɩ̀án tə mama, ba yà nə wulə də wá, də lalʋʋ tə mama, kʋ nə zɩgɩ ba nəmaa tíú nə, kʋ va kʋ yí ba nəkwɩa. 9 Yá ʋ swɩ̀n ba con, ʋ wʋ́: «Nəŋə kʋ tə Ba-Yígúrə́-Jə-Tiu, Yɩzərayɛlə lɩ̀à Yɩɩ tə á nə tʋn nə, sə à ja á lòrí tə à va ʋ yáá con, nə swɩ̀n:
10 “Á nə sɛ̀ sə á ya Zwida lʋʋ nii tə wa,
à wá pa á dwíí tə pùlì,
yá à kʋ́ʋ̀ bá cʋ̀gʋ̀ aba!
À wá pa á dəkuu zʋ tɩa,
yá à kʋ́ʋ̀ bá mùrí aba!
Cɩ́gá, à pùə́ pìí ka cʋ̀gʋ̀,
yolwan tə yɩrɩ à nə pɩn kʋ yí aba!
11 Sɩ́ʋ́n nə, á kʋ́ʋ̀ dànà ká pa Babɩlɔnə pɩ̀ʋ́ fən ja aba!
Ʋ mʋ̀ lìù tə, ʋ fən nə jə aba,
á kʋ́ʋ̀ dànà ká pa ʋ fən ja aba!
À mʋ̀ Ba-Yígúrə́-Jə-Tiu nii sʋgʋ nə!
Cɩ́gá, à wulə də aba,
sə à jon aba, à ga lɩ aba ʋ jɩɩn wa!
12 À wá tʋn pubwanʋ á yɩra,
yá ʋ wá dəri á yinəgə,
ʋ ga yá ʋ pa á pìí á bà á lʋʋ nii tə wa.” »
13 Zweremi swɩ̀n, ʋ súrí lá, ʋ wʋ́: «Yá á dàń nə vɩga, sə á cʋgʋ Ba-Yígúrə́-Jə-Tiu, á tíú Yɩɩ kori, á nə swɩ̀n á wʋ́: “Nə ba ya lʋʋ nii kʋ tə wa! 14 Nə wá va Ezwipətə lʋʋ nii wa, tɩa lá, nə kʋ́ʋ̀ ba na kʋ̀ʋ̀, nə kʋ́ʋ̀ ba nì kʋ̀ʋ̀ nabwana kori, yá nə bá pɩ̀à nə nii wodiu nə ga, yá mə lá nə, nə wá va nə ya!” 15 Zwida dwíí gɩganɩ-ba, á dàń cʋga Ba-Yígúrə́-Jə-Tiu nii sʋgʋ! Nəŋə kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n:
“Á cɩ́gá nə kúrí á tì sə á va Ezwipətə,
á nə vəli á kwálɩ́ á yuu lá,
16 kwatara sɩ̀ʋ́ tə á nə dəri kʋ fən,
wá yí aba lá nə, Ezwipətə lʋʋ nii wa!
Niən tə, tə yoo nə kəni aba twárá wa,
wá ja aba lá nə, Ezwipətə nə,
yá mə lá nə á wá tɩ!
17 Lɩ̀à tə mama nə wá kúrí ba tì,
sə ba va ba kwálɩ́ ba yuu Ezwipətə nə,
yɩ kwatara sɩ̀ʋ́, nə à yə̀ə́ niən,
nə à yə̀ə́ tɩan yayɩpwarʋ nə wá gʋ.
Yá ba lìù mama ba jɛ́n lɛɛ tə yáá nə,
à nə wá pa tə tʋ ba yuu wa.” »
18 Zweremi tə swɩ̀n, ʋ súrí lá, ʋ wʋ́: «Cɩ́gá, nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Ndə à lɩŋa nəfarʋ tə nə pupwin Zwerizalɛmə tɩ̀án yuu wa nətʋ, mə nətʋ nə tə wá pupwin á də yuu wa, də á nə vəli Ezwipətə. Á wá jì zɩra mɩmɩnʋ won, ba nə tì ba ma zɩrɩ zɩra, ndə ləzwənlwana nə, ba nə fʋfʋlɩ, ba kəni cavɩra, yá á kʋ́ʋ̀ bá pìí á na bwálɩ́ kʋ tə.”
19 Zwida dwíí gɩganɩ-ba, Ba-Yígúrə́-Jə-Tiu nə swɩ̀n á con, sə á dàn ká va Ezwipətə! Á nìə̀ kʋ yoo təntə də̀ń zəni: Cɩ́gá, à pɩn á lwarɩ kʋ zə̀n kʋ tə! 20 Á yɩ á gɩgarɩ á tɩ̀àn: Cɩ́gá, á tʋn nə Ba-Yígúrə́-Jə-Tiu, á tíú Yɩɩ con, á wʋ́: “Lòrì Ba-Yígúrə́-Jə-Tiu, nə tíú Yɩɩ n pa nəba, yá kʋ tə mama ʋ nə wá swɩ̀n, sə n pa nə lwarɩ kʋ, yá nə wá twá kʋ nə.” 21 À zə̀n swɩ̀n kʋ à bɩrɩ aba, yá á vɩga sə á zìlí Ba-Yígúrə́-Jə-Tiu, á tíú Yɩɩ nii, də kʋ tə mama ʋ nə pɩn nə nii, sə à swɩ̀n á con. 22 Sɩ́ʋ́n nə, á nìə̀ kʋ də̀ń zəni: Kwatara sɩ̀ʋ́, nə à yə̀ə́ niən, nə à yə̀ə́ tɩan yayɩpwarʋ nə wá gʋ aba bwálɩ́ tə wa, á nə pɩ̀à sə á va, á ya lá.