Ba jɩn Zweremi də dɩ̀àn, ba ja va Ezwipətə
43
1 Máŋá tə wa Zweremi nə swɩ̀n sʋ̀ràn tə mama lalʋʋ tə mama con ʋ zwɛ̀, Ba-Yígúrə́-Jə-Tiu, ba Yɩɩ tə yà nə pɩn wá nii sə ʋ swɩ̀n, 2 Hoswaya bìú Azarɩya də Kareya bìú Yohanan, də bara tə mama nə yɩ yidanyɩna le Zweremi, ba wʋ́: «Kʋ tə n nə swɩ̀n tə yɩ kʋ̀nkʋ̀n, Ba-Yígúrə́-Jə-Tiu, ʋ nə yɩ nə tíú Yɩɩ wà mʋ́ tʋn, sə n swɩ̀n nə con, sə nə dàn ká va nə ya Ezwipətə nə. 3 Kʋ yɩ Neriya bìú Barukə nə sugə mʋ́ ʋ keni, sə n gɩgarɩ nəba n kə Kaləde tɩ̀án tə jɩɩn wa, sə ba gʋ, nə à yə̀ə́ sə ba ja nəba ba va yongaʋ, Babɩlɔnə nə.»4 Kareya bìú Yohanan, də kwatara yáá tɩ̀án tə mama, də lalʋʋ tə mama vɩga sə ba cʋgʋ Ba-Yígúrə́-Jə-Tiu kori tə, kʋ yà nə swɩ̀n ba con, sə ba jə̀ń Zwida lʋʋ nii tə wa. 5 Zwida lalʋʋ tə gɩganɩ* tə mama yà nə dəri ba va ba səgə lʋʋ dwíə́ nəkaran* tə mama wa, pìí ba bà, sə ba jə̀ń Zwida lʋʋ nii tə wa. Yá Kareya bìú Yohanan, də kwatara yáá tɩ̀án tə mama dàń jɩn 6 bara tə, də kana tə, də bìsɩ́ná tə, də pɩ̀ʋ́ bwɩ̀ɩ́ tə, də lɩ̀à tə mama Babɩlɔnə pɩ̀ʋ́ sàń nəcɩra yuu tíú Nebuzaradan yà nə ken Ahikamə bìú Gedalɩa, ʋ nə yɩ Swafan nàʋ́, jɩɩn wa, də Yɩɩ nii sʋ̀sʋ̀nʋ̀ Zweremi tətə, də Neriya bìú Barukə, 7 ba ja va Ezwipətə lʋʋ nii wa. Ba vɩga sə ba cʋgʋ Ba-Yígúrə́-Jə-Tiu kori, yá ba vəli ba yí Tapanɛsə.
Zweremi swɩ̀n Ezwipətə tʋrɩ yoo
8 Ba-Yígúrə́-Jə-Tiu swɩ̀n sʋ̀ràn tə tə Zweremi con Tapanɛsə nə, ʋ wʋ́: 9 «Tì kapana nəfaran, n ja va n səgə tɩbʋa wárá gárɩ́ tə wa, kʋ nə wulə Farawon padiə tə mimii nə, Tapanɛsə nə, Zwida lʋʋ lɩ̀à tə yɩ́á yuu. 10 Yá n wá swɩ̀n ba con də, ba nəŋə kʋ tə Ba-Yígúrə́-Jə-Tiu, Kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: “À tʋn sə ba bon Babɩlɔnə pɩ̀ʋ́ Nebukadənezarə, ʋ nə yɩ à tʋtʋnʋ. À wá tún ʋ padaʋ kapana tə tə yuu wa, à nə səgə, yá ʋ wá larɩ ʋ pàrɩ̀ tapwələ tə yuu wa. 11 Ʋ wá bà ʋ ta Ezwipətə lʋʋ nii tə. Lɩ̀à tə nə yɩ tɩan nə tɩ, ba wá tɩ! Ba tə nə yɩ yongaʋ nə tɩ, ba wá va yongaʋ! Ba tə nə yɩ kwatara sɩ̀ʋ́ nə tɩ, kwatara sɩ̀ʋ́ nə wá də́ ba! 12 À wá dɩ mən Ezwipətə tɩ̀án woŋwanan dìì tə nə. Nebukadənezarə wá sʋ̀rɩ́ tə, ʋ ga pɛ̀ ba woŋwanan tə, ʋ ja vìí. Ʋ wá bɛ̀ɛ́ Ezwipətə lʋʋ nii tə, ndə payɩrʋ nə bɛ̀ɛ́ ʋ gànʋ̀ ywànà nətʋ, yá ʋ wá pìí ʋ vìí də yazurə. 13 Ʋ wá mà Bɛtə-Swemɛswə culu kapana* nəfaran tə, Ezwipətə lʋʋ nii tə wa ʋ lwa, yá ʋ wa sʋ̀rɩ́ Ezwipətə tɩ̀án woŋwanan dìì tə də mən.” »