Zweremi 44

Ba-Yígúrə́-Jə-Tiu pɩn kori Zwida lʋʋ lɩ̀à tə nə, ba nə vəli Ezwipətə

1 Ba-Yígúrə́-Jə-Tiu pɩn nii Zweremi nə, sə ʋ swɩ̀n sʋ̀ràn tə tə Zwida lʋʋ lɩ̀à tə mama con, ba nə wulə Ezwipətə lʋʋ nii wa, Migədolə, də Tapanɛsə, də Nofə tɩan tə wa, də Patərɔsə nagwanaa tə wa, ʋ wʋ́: 2 «Nəŋə kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: “Á nɩ lɛɛ tə mama, à nə pɩn tə yí Zwerizalɛmə, də Zwida lʋʋ nii tɩan tə mama: Nəŋə tə nə, tə jìgə̀ dibwərən zə̀n kʋ tə, lìù kʋ́ʋ̀ tə̀lə́ tə wa, 3 yolwan tə yɩrɩ ba nə tʋn, ba ma zɩ̀n à lɩŋa. Cɩ́gá, ba vəli ba sʋ̀rɩ́ wusinə ba ma pa dun yɩa duən nə, ba nə yəri, ba mʋ̀, nə à yə̀ə́ á mʋ̀, nə à yə̀ə́ á nɩbara-ba. 4 À tʋn à tʋ̀tʋ̀nà tə mama, ba nə yɩ à nii sʋ̀sʋ̀nà á con də à bwɛ́, sə ba swɩ̀n á con sə á dàn ká tʋn cavɩyoo təntə à nə culi. 5 Yá ba wà lá tan, ba wà ba zɩɩn guni ba kə à con, ba wà ba kwa viviri ba ma sà lwanɩ tə ba nə tʋn, yá ba wà wusinə tə sʋrʋ nə yá, ba nə sʋ̀rɩ́ ba pɩn yɩa duən nə. 6 Kʋ mʋ̀ yɩrɩ nə, à lɩŋa nəfarʋ tə zàn tə pupwin Zwida tɩan tə də Zwerizalɛmə coŋi tə yuu wa, ndə mən nə, yá tə cʋ̀gʋ̀ mɩ́ámɩ́án, ndə á zə̀n nə na kʋ nətʋ.”

7 Sɩ́ʋ́n nə, Á dàń nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Bɛ̀ɛ̀ nə pɩn á tʋŋa yolwan nəfarʋ nətən, á tətə yɩra? Kʋ yɩ á pɩ̀à sə bara tə də kana tə mama, də bìsɩ́ná tə də bìsɩ̀nɩ́ tə mama Zwida lʋʋ nii tə wa tɩ ba zwɛ̀ mɩ́ámɩ́án, sə á gɩganɩ* kʋ́ʋ̀ dàn ká ya lá, kʋ bon á yɩrɩ naaa? 8 Á tʋtʋnɛɛ tə cʋ̀gà à pùə́ nə: Á sʋ̀rɩ́ wusinə, á ma pɩn dun yɩa duən nə, Ezwipətə lʋʋ nii tə wa, bwálɩ́ tə nə á nə twi á jə̀ə́. Kʋ nətʋ wá pa á mama tɩ á zwɛ̀ mɩ́ámɩ́án, yá á dwíí tə dàń wá jì fʋfʋlʋ də cavɩwon, tɩa yuu dwíə́ tə mama wa. 9 Á swɛ̀ɛ́ á nyɩna-ba cʋna tə yoo, də Zwida pɛ̀gá tə də ba kana cʋna tə yoo, də á tətə də á kana cʋna tə yoo, á nə tʋn Zwida lʋʋ nii tə wa, də Zwerizalɛmə coŋi tə yuu wa naaa? 10 Də zə̀n mama, ba pùə́ tə wà tə yuu wa cʋ̀gʋ̀, tə fən ba ba jə, à nii* yìə̀n tə, də yìə̀n tə à nə pɩn tə pʋ́pʋ́nɩ́ tə tún sə ba twá tə nə, ba wà tə nə twá. Yìə̀n təntə yɩ à ken tə á də á nɩbara-ba yáá con.”

11 Kʋ mʋ̀ nə pɩn, nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “À kúrí à tì sə à tʋn yolwan á yɩra, yá à wá pa Zwida lʋʋ lɩ̀à tə mama tɩ ba zwɛ̀ mɩ́ámɩ́án. 12 Zwida lʋʋ lɩ̀à tə gɩganɩ tə nə kúrí ba tì, sə ba va ba kwálɩ́ ba yuu Ezwipətə lʋʋ nii tə wa, à wá lɩ ba mama mɩɩ lá nə. Kwatara sɩ̀ʋ́ də niən nə wá gʋ ba. Ba mama wá tɩ, kʋ nə zɩgɩ ba nəmaa nə, kʋ va kʋ yí ba nəkwɩa. Kwatara sɩ̀ʋ́ də niən nə wá lɩ ba mɩɩ, yá ba wá jì zɩra mɩmɩnʋ won, ba nə tì ba ma zɩrɩ zɩra, ndə ləzwənlwana nə, ba nə fʋfʋlɩ, ba kəni cavɩra. 13 À wá zɩgɩ ba tə nə, ba nə wulə Ezwipətə lʋʋ nii wa, ndə kʋ nə twá də kwatara sɩ̀ʋ́, də niən, də tɩan yayɩpwarʋ, à ma zɩgɩ Zwerizalɛmə tɩ̀án nə nətʋ. 14 Lìù mama bá wànɩ́ ʋ dəri ʋ jɛ́n, nə à yə̀ə́ ʋ jon ʋ tɩ̀àn tɩan jɩɩn wa, Zwida lʋʋ lɩ̀à tə gɩganɩ* tə wa, ba nə vəli ba kwálɩ́ ba yuu Ezwipətə nə. Ba yà jələ sə ba pìí ba va Zwida lʋʋ nii wa, bwálɩ́ tə nə ba pubʋŋa nə yigə ba, sə ba pìí ba va ba jə̀ń. Cɩ́gá, ba bá pìí ba va lá, də kʋ nə tà ba lɩ̀à bagalɩ cɩcɩ, ba nə wá tɩ ba ga.” »

Jwəŋə tə ba nə fwa ba pa lanworu pakan tə nə

15 Bara tə mama ba yà nə yə̀ə́ də ba kana sʋ̀rɩ́ wusinə ba pɩn yɩa duən nə, də kana tə mama ba yà nə naŋa ba zɩga kunə nəfarʋ tə wa, də lalʋʋ tə mama ba yà nə wulə Ezwipətə lʋʋ nii wa, Patərɔsə nə, le Zweremi, ba wʋ́: 16 «Nə ba pɩ̀à sə nə cʋgʋ sʋgʋ tə, n nə swɩ̀n nə con, Ba-Yígúrə́-Jə-Tiu yuu yɩrɩ. 17 Yá nə wá tʋn kʋ tə mama, nə tətə nə kúrí nə tì sə nə tʋn: Nə wá sʋ̀rɩ́ wusinə nə pa lanworu pakan tə nə, nə ga fwa divɛn jwəŋə nə pa kʋ, ndə nə nə tʋn kʋ nətʋ, nə mʋ̀ də nə nyɩna-ba, də nə pɛ̀gá də nə tʋ̀tʋ̀nán yun tɩ̀án, Zwida tɩan tə wa, də Zwerizalɛmə coŋi tə yuu. Yá nə yà jə wodiu kʋ yí nəba, nə yà jə pupwən, yá lɛɛ yà ba nəba yí. 18 Yá kʋ nə zɩgɩ máŋá tə wa, nə nə kʋ́ʋ̀ ba wusinə sʋ̀rɩ́, də nə fwa divɛn jwəŋə nə pɩn lanworu pakan tə nə, nə kwɩ̀n wiən tə mɛ nə, yá kwatara sɩ̀ʋ́ də niən dàń nə gwɩ nəba.»

19 Kana tə swɩ̀n, ba wʋ́: «Máŋá tə nə nə sʋ̀rɩ́ wusinə, nə ga fwa divɛn jwəŋə nə pɩn lanworu pakan tə nə, nə bana tə nə wà cwəŋə pɩn, nə wàá kʋ nyɩnyɩga gàtó, də divɛn jwəŋə nə fwa nə pɩn kʋ naaa?»

20 Zweremi dàń swɩ̀n lalʋʋ tə mama con, bara tə də kana tə, lalʋʋ tə mama con ba nə le wá nətʋ, ʋ wʋ́: 21 «Cɩ́gá mama, wusinə tə á nə sʋ̀rɩ́ Zwida tɩan tə wa, də Zwerizalɛmə coŋi tə yuu wa, á mʋ̀ də á nyɩna-ba, də á pɛ̀gá də á tʋ̀tʋ̀nán yun tɩ̀án, də lʋʋ nii tə lalʋʋ tə, Ba-Yígúrə́-Jə-Tiu wà tə yoo swɛ̀ɛ́, ʋ bʋŋa tə yoo! 22 Ba-Yígúrə́-Jə-Tiu kʋ́ʋ̀ wàrɩ̀ á wʋlʋŋʋ tʋtʋnɛɛ tə, də cavɩyiən tə á nə tʋŋa ʋ pɩ́nɩ́, kʋ mʋ̀ nə pɩn á lʋʋ nii tə ma cʋ̀gʋ̀ mɩ́ámɩ́án, kʋ jì dibwərən laŋa, zɩra nə wulə kʋ yuu wa, lìù mama nə tə̀lə́ kʋ wa, ndə kʋ nə yɩ nətʋ zə̀n kʋ tə. 23 À sʋ̀rɩ́ wusinə, á ga tʋn cʋna á zɩgɩ Ba-Yígúrə́-Jə-Tiu nə. Á wà Ba-Yígúrə́-Jə-Tiu kori cʋgʋ. Ʋ nii yìə̀n* tə, də ʋ yìə̀n tə ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə tún sə ba twá tə nə, á wà tə nə twá. Kʋ mʋ̀ nə pɩn lɛɛ tə tə ma yí aba, ndə kʋ nə yɩ nətʋ zə̀n kʋ tə.»

24 Zweremi tə swɩ̀n lalʋʋ tə mama con, də kana tə mama con, ʋ súrí lá, ʋ wʋ́: «Á cʋga Ba-Yígúrə́-Jə-Tiu nii sʋgʋ, á mʋ̀ Zwida lʋʋ lɩ̀à tə mama, á nə wulə Ezwipətə lʋʋ nii tə wa! 25 Nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: Á mʋ̀ də á kana, yìə̀n tə á nə swɩ̀n də á nii, á ja á jɩ̀àn á tʋn tə, á pa tə nii sú. Á swɩ̀n á wʋ́: “Yìə̀n tə nə nə pòlì nii də nə wá tʋn, nə wá tʋn tə, nə pa tə nii sú: Nə wá sʋ̀rɩ́ wusinə nə pa lanworu pakan tə nə, nə ga fwa divɛn jwəŋə nə pa kʋ!” Á dàń kənə dɩ̀àn, á tʋn á nipwələ tə, á pa tə nii sú zəni! 26 Kʋ mʋ̀ yɩrɩ, á cʋga Ba-Yígúrə́-Jə-Tiu nii sʋgʋ, á mʋ̀ Zwida lʋʋ lɩ̀à tə mama, á nə wulə Ezwipətə lʋʋ nii wa: À dùə̀ də à yɩrɩ nəfarʋ tə, à mʋ̀ Ba-Yígúrə́-Jə-Tiu nə swɩ̀n kʋ, Zwida lʋʋ lìù mama ʋ nə wulə Ezwipətə lʋʋ nii tə wa, kʋ́ʋ̀ ba pìí ʋ bon à yɩrɩ Ezwipətə lʋʋ nii tə mama wa, ʋ swɩ̀n ʋ wʋ́: “À dùə̀, Yuu-Tiu Ba-Yígúrə́-Jə-Tiu wulə!” 27 Nəŋə, à wá kə dɩ̀àn à pa ba də́ lɛɛ, ba bá də́ ywánɩ́. Kʋ wá twá də kwatara sɩ̀ʋ́ də niən, Zwida bara tə mama nə wulə Ezwipətə lʋʋ nii tə wa ma tɩ ba zwɛ̀ mɩ́ámɩ́án. 28 Ba lɩ̀à mancɩn cɩcɩ nə wá jɛ́n kwatara sɩ̀ʋ́ yáá nə, yá ba wá pìí ba nan Ezwipətə lʋʋ nii wa, ba bà Zwida lʋʋ nii wa. Yá Zwida lʋʋ lɩ̀à tə gɩganɩ* tə mʋ̀, ba nə twi sə ba kwálɩ́ ba yuu Ezwipətə lʋʋ nii wa, wá lwarɩ nə lìù tə ʋ sʋgʋ nii nə wá sú: Də kʋ nə yɩ à mʋ̀ sʋgʋ nii nə wá sú, nə à yə̀ə́ kʋ nə yɩ ba mʋ̀ nyiən nii nə wá sú. 29 Yá á dàń cʋga Ba-Yígúrə́-Jə-Tiu nii sʋgʋ! Á nəŋə mɩmɩnʋ tə, kʋ nə wá bɩrɩ aba, də à wá zɩgɩ á nə, bwálɩ́ kʋ tə wa, sə kʋ pa á lwarɩ də à sʋ̀ràn tə nii cɩ́gá wá sú, máŋá tə wa, à nə wá pa lɛɛ yí aba. 30 Nəŋə kʋ tə à mʋ̀ Ba-Yígúrə́-Jə-Tiu nə swɩ̀n: À wá pa Ezwipətə pɩ̀ʋ́ Farawon Hofəra dʋŋa jɩɩn zʋ wá. À wá pa lɩ̀à tə nə pɩ̀à sə ba lɩ ʋ mɩɩ jɩɩn zʋ wá, ndə à nə pɩn Babɩlɔnə pɩ̀ʋ́ Nebukadənezarə jɩɩn zʋ Zwida pɩ̀ʋ́ Sedekɩasə nətʋ. Nebukadənezarə yà yɩ Sedekɩasə dʋŋʋ, yá ʋ yà pɩ̀à Sedekɩasə, sə ʋ lɩ ʋ mɩɩ.»