4
1 «Yɩzərayɛlə lɩ̀à-ba, á nə pìí á bɩ̀àn,kʋ yɩ à mʋ̀ con nə á mɛ sə á pìí á bà.
À mʋ̀ Ba-Yígúrə́-Jə-Tiu nii sʋgʋ nə!
Á nə lɩ á wolwana tə à yáá con,
á nə kʋ́ʋ̀ bá ywaŋa,
2 á nə dùə̀, á swɩ̀n, á wʋ́: “Ba-Yígúrə́-Jə-Tiu wulə”,
kʋ twá cɩ́gá, də kʋ tə nə yɩ mənəmənə, də cɩ́gá cwəŋə nə,
dwíə́ nəkaran* tə wá twá də à yɩrɩ tə,
ba ma fwa zəni duən yɩra.
Yá ba wá bʋ ba tɩ̀àn nə, à mʋ̀ yɩrɩ.»
3 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n
Zwida bara tə də Zwerizalɛmə tɩ̀án con:
«Á dɩa kárá nədʋn,
á dànà ká dù á kə casʋran wa!
4 Zwida bara-ba, də Zwerizalɛmə tɩ̀án-ba,
á kwɩan á bɩcanɩ durən tə á lɩ,
sə à mʋ̀ Ba-Yígúrə́-Jə-Tiu tɩnɩ aba.
Kʋ nə tà nətʋ, à lɩŋa wá zàn ndə mən nə kwé,
tə də́, lìù mama ga wàrɩ̀ tə ʋ dəŋi,
á wʋlʋŋʋ tə yɩrɩ, á nə tʋŋa.
Ba mà bubwiə Zwida lʋʋ nii wa
5 Á bwə̀rə́ yoo kʋ tə Zwida lʋʋ nii tə wa.
Pɩan ba nì kʋ Zwerizalɛmə wa,
Á wúrə́ nabwanʋ lʋʋ nii tə wa,
á ma swɩ̀n kʋ á bɩrɩ!
Á bwə̀rə́ á kə yɩɩ nə,
á swɩ̀n sə á bà duən yáá nə,
á va á zʋ tɩan tə wa,
ba nə lwə̀ ba kɩkarɩ də biritaŋʋ.
6 Á zɩan kʋ̀ʋ̀ mɩmɩnʋ yɩɩ nə, á te Siyon tɩʋ tə con!
Á dərə, á dànà ká zɩgɩ!
Cɩ́gá, à pɩn lɛɛ nan jɩzən saparʋ con tə bɩ̀àn,
tə yɩ cʋcʋran nəfaran!
7 Cʋcʋnyiən tə nə wá cʋ̀gʋ̀ lʋʋ níə́ tə
zàn ʋ bwálɩ́ nə, ʋ nan,
ndə gəru nə zàn kʋ yipaa bwálɩ́ wa, kʋ nan.
Ʋ wulə cwəŋə wa ʋ bɩ̀àn,
sə ʋ cʋgʋ á lʋʋ nii tə.
Á tɩan tə wá jì dibwərən,
lìù kʋ́ʋ̀ bá ya tə wa.
8 Kʋ mʋ̀ yɩrɩ nə, á zwɩa pucʋnɩ gànàn,
á ga bubwi, á kwi á sisigə!
Cɩ́gá, Ba-Yígúrə́-Jə-Tiu lɩŋa tə nə pupwin nə yuu wa, tə wà twɩ.
9 À mʋ̀ Ba-Yígúrə́-Jə-Tiu nii sʋgʋ nə!
Kʋ máŋá təntə wa,
pɩ̀ʋ́ tə də ʋ tʋ̀tʋ̀nán yun tɩ̀án tə jɩ̀àn wá gwàrɩ̀.
Kʋ wá gən Yɩɩ joŋwana tə,
kʋ ga wá gwárɩ́ Yɩɩ nii sʋ̀sʋ̀nà tə.»
10 Yá à swɩ̀n, à wʋ́:
«Aaa! Yuu-Tiu Ba-Yígúrə́-Jə-Tiu,
kʋ nə yɩ nətʋ, cɩ́gá mama,
n gɩgarɩ lalʋʋ kʋ tə də Zwerizalɛmə tɩ̀án.
N swɩ̀n ba con də ba wá ya sìə́ wa,
yá kwatara sɩ̀ʋ́ ga zìə̀ sə kʋ gʋ nəba.»
Dʋŋa nan bwálɩ́ mama ba bɩ̀àn
11 Kʋ máŋá təntə wa, ba wá swɩ̀n lalʋʋ kʋ tə,
də Zwerizalɛmə tɩ̀án con ba wʋ́:
«Vʋʋ kʋ nə lɩŋa nan kasɔɔ lanworu pɛɛn tə yuparɩ wa,
kʋ bɩ̀àn à lɩ̀à tə con.
Kʋ tà vʋʋ ba nə ma cə̀rì,
nə à yə̀ə́ ba nə ma kwɛn wobɩa.
12 Kʋ yɩ vʋʋ kʋ nə jə dɩ̀àn zənzən,
à nə pɩn nii, sə kʋ nan lá kʋ bà.
Sɩ́ʋ́n nə, à də dàń wá bɩrɩ ba yìə̀n tə,
à nə wá bʋ̀rɩ̀ ba bʋra tə yɩrɩ.»
13 «Nə̀ń dʋŋa tə nə ba bɩ̀àn ndə bakwan nə,
ba səsen kòrə̀n tə vəli lala ndə dwavʋʋ nə,
ba səsen tə dəri lala, tə doni zənpuu.
Lɛɛ yí nəba! Ba cʋ̀gʋ̀ nəba ba zwɛ̀.»
14 «Zwerizalɛmə tɩ̀án-ba, á sɩan á yolwana tə á lɩ á bɩcanɩ wa,
də á nə pɩ̀à sə Yɩɩ jon aba!
Pubʋnkʋkwɩnan wá ya á waa,
kʋ dán kʋ mɛ nətə?
15 Cɩ́gá, kori nan Dan tɩʋ tə con,
kʋ swɩ̀n càn tə yoo.
Tə ŋwɛn yɩ tə nan Efərayimə paan tə con.
16 Á swɩan dwíə́ tə mama con,
á ga pa Zwerizalɛmə tɩ̀án lwarɩ,
də dʋŋa nan yiŋʋnɩ ba bɩ̀àn.
Ba mà kʋ̀ʋ̀ cə̀rə́, ba zɩgɩ Zwida lʋʋ nii tɩan tə nə.
17 Ba wá kɩkarɩ Zwerizalɛmə,
ndə lɩ̀à nə cɩ̀ kárá nə nətʋ,
ba nə vɩga à mʋ̀ Ba-Yígúrə́-Jə-Tiu yɩrɩ.
À mʋ̀ Ba-Yígúrə́-Jə-Tiu nii sʋgʋ nə!
18 Mə á yʋa tə də á tʋtʋnɛɛ tə ŋwɩ́rán nə nətʋ,
mə á wʋlʋŋʋ tə nywarɩ nə nətʋ.
Nə̀ń kʋ càn nyɩɛn!
Cɩ́gá, kʋ yɩ̀ aba zənzən,
kʋ zwɩ kʋ janɩ á bɩcasii nə!»
Zweremi tʋa yayɩgʋ càn tə yɩrɩ
19 Wii, à pùə́, à pùə́ yɩ̀!
À bɩcan yɩ̀ kʋ pɩ̀à kʋ karɩ!
À yɩra wiri,
à wàrɩ̀ à nii à pwi!
Cɩ́gá, à nì kʋ̀ʋ̀ nabwanʋ kori,
də kʋ̀ʋ̀ cə̀rí.
20 Ba swɩ̀n də kʋ yɩ cʋcʋran də cʋcʋran!
Cɩ́gá, lʋʋ nii tə mama cʋ̀gʋ̀.
Ba cʋ̀gʋ̀ nə gansilə tə naa nədʋ.
Nə sìlə́ tə nyʋan lá ndə yii nə púə́ kʋ súrí nə.
21 À wá na kʋ̀ʋ̀ mɩmɩnʋ tə yɩɩ nə, kʋ dán kʋ mɛn nətə?
À wá nì kʋ̀ʋ̀ nabwanʋ tə kori, kʋ dán kʋ mɛn nətə?
22 «Cɩ́gá mama, à lɩ̀à tə yɩ ləyirən,
ba yəri nə.
Ba yɩ bɩ̀á tə ba nə ba pubʋŋa jə,
ba ba yənu jə.
Ba jə wʋbʋŋa sə ba ma tʋn lwanɩ cɩcɩ,
yá ba ga yəri yozəŋu mʋ̀ fwaŋʋ.»
23 À ywàń tɩa tə,
yá à nɩ də ka yɩ won,
kʋ máŋá nə wàrɩ̀ kʋ maŋa,
ka ga yɩ woru.
À ywàń lanworu tə,
yá à nɩ də poni kʋ́ʋ̀ tə̀lə́ lá.
24 À ywàń pɛɛn tə,
yá à nɩ də tə wulə tə sisigə.
Dədwələn tə mama wulə tə vuvugu.
25 À ywàń,
yá à nɩ də ləzwənə kʋ́ʋ̀ tə̀lə́.
Lanworu zuŋi tə mama piri tə vìí.
26 À ywàń,
yá à nɩ də pún lʋʋ nii tə jìgə̀ kasɔɔ lanworu,
kʋ tɩan tə mama ga cʋ̀gʋ̀ Ba-Yígúrə́-Jə-Tiu yáá con,
ʋ lɩŋa tə nə zàn ndə mənvwə nə yɩrɩ.
27 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«Lʋʋ nii tə wá cʋ̀gʋ̀,
yá à dàń nə bá cʋ̀gʋ̀ kʋ mama mɩ́ámɩ́án.
28 Kʋ mʋ̀ nə pɩn, tɩa tə wulə lúə́ pucʋnɩ wa,
yá lanworu tə yɩɩ nə, wá jì yikunu!
Cɩ́gá, à swɩ̀n kʋ, yá à ken sírí, sə à tʋn kʋ.
À bá lwàń à nii,
à ma bá pìí à kə à kwa.»
Lagʋra jɩɩn zʋa Zwerizalɛmə tɩ̀án
29 Səsədɩra tə də catara tə zizigu pɩn
tɩʋ tə wa lɩ̀à tə mama dəri.
Ba duən dəri ba zʋ tunə wa,
ba duən dəri ba dɩ̀ pɩ̀ràn yuu,
ba ga yá tɩʋ tə mɩ́ámɩ́án,
lìù kʋ́ʋ̀ tə̀lə́ kʋ wa.
30 Yá á mʋ̀ Zwerizalɛmə tɩ̀án-ba,
á tɩʋ tə nə cʋ̀gʋ̀,
bɛ̀ɛ̀ nə á dàń wá fwa?
Á wá zʋ ganmʋla,
á nàn á tɩ̀àn də sɩ́án,
á kə kalɩ á yɩ́á nə naaa?
Á nə swə á kwɛn á tɩ̀àn nətʋ tə mama, kʋ yɩ tʋtʋ.
Á bwàlá tə waa nan aba,
ba pɩ̀à ba lɩ á mɩɩ.
31 Cɩ́gá, à nə̀ń bubwiə,
ndə kan nə bubwi sə ʋ lɩra.
Kʋ yɩ ndə kacaga nə bubwi,
ʋ bɩbɩlɩ sə ʋ lɩra ʋ cárɩ́ bìú.
Kʋ yɩ Siyon bʋ̀áa tə nə bubwi,
ba kwi ba sisigə,
ba zalɩ ba jɩ̀àn, ba wʋ́:
«Lɛɛ yí nəba!
Lagʋra tə gʋa nəba ba zwɛ̀!»