Kacwarʋ ləyiru yoo
3
1 Ba-Yígúrə́-Jə-Tiu swɩ̀n, ʋ wʋ́:«Bɛɛ nə dʋgʋ ʋ kan,
kan tə nə nan ʋ swe bɛɛ don nə,
təntən bɛɛ tə kʋ́ʋ̀ wàá kan tə con ʋ pìí ʋ vəli naaa?
Kʋ nətʋ bá kə durən lʋʋ nii tə wa naaa?
Yá á mʋ̀ Yɩzərayɛlə lɩ̀à yɩ ndə
kan nə cwàrɩ̀ də bara kapʋpʋ nə,
yá á ga pɩ̀à sə á pìí á bà à con!
À mʋ̀ Ba-Yígúrə́-Jə-Tiu nii sʋgʋ nə!
2 Zɩan á yáá yɩɩ nə, á ywàń pɛɛn tə yuparɩ con,
á jə́n bwálɩ́ kwà wa nə, á wà cwàrɩ̀?
Á yà jəni coŋi nii nə, á ma dànɩ̀ á bwàlá,
ndə lɩ̀à nə, ba nə vɩrɩ cwəvələ, kasɔɔ lanworu wa.
Á ken durən lʋʋ nii tə wa,
kʋ twá á cwàrʋ̀ tə, də á tʋtʋnkʋkwɩnan tə nə.
3 Kʋ mʋ̀ nə pɩn, à vɩ sə dwà nà,
yá bununu dwà wà nɩ̀.
Yá á yuu kʋa ndə kacwarʋ nə,
á yəri cavɩra.
4 Yá sɩ́ʋ́n nə, á dàń boŋə á kəni à nə, á wʋ́:
“Nə nyɩna, n mʋ̀ Yɩɩ nə yɩ nə fàrʋ̀, nə zandʋan mama!
5 N lɩŋa tə wá zàn nə yuu wa, máŋá mama naaa?
N wá bʋlɩ nə nə, máŋá mama wuuu naaa?”
Mə nətʋ nə á yà swɩ̀n,
yá á tʋŋa yolwana tə máŋá mama,
á ga jə tə dɩ̀àn də, á ma tʋŋa tə!»
Yɩzərayɛlə lɩ̀à tʋn cʋna, yá Zwida lʋʋ lɩ̀à nə dwə
6 Ba-Yígúrə́-Jə-Tiu swɩ̀n à con, pɩ̀ʋ́ Zozɩasə máŋá wa, ʋ wʋ́: «N nɩ kʋ tə Yɩzərayɛlə lɩ̀à tə nə ba yoyuu jə ndə kacwarʋ nə, nə tʋn? Ba vəli pɛɛn tə mama yuu wa, də tɩ̀án tə mama nə jə vʋran də̀ń nə, ba cwàrɩ̀ də yɩa duən. 7 À bʋ́n à waa con də, ba nə tʋn tə yìə̀n təntə mama kwa nə, ba wá pìí ba bà à con, yá ba wà pìí ba bà. Ba nubɩa Zwida lʋʋ lɩ̀à tə, ba də nə yɩ pwìí bələ tɩ̀án, nɩ ba tʋtʋnɛɛ tə. 8 À dʋgʋ Yɩzərayɛlə lɩ̀à tə nə ba yoyuu jə ndə kacwarʋ nə, à ga pa ba sagɩ tə à nə ma dʋgʋ ba, ba nə cwàrɩ̀ tə yɩrɩ. Yá də kʋ nətʋ mɛ, ba nubɩa Zwida lʋʋ lɩ̀à tə, ba nə yɩ pwìí bələ tɩ̀án, wà fən dəri, ba də vəli ba cwàrɩ̀ də yɩa duən. 9 Ba cwàrɩ̀ də yɩa tə nə yɩ kapana də dɛɛ, yá ba yobalwaran təntə pɩn ba kə durən lʋʋ nii tə wa. 10 Yá də kʋ nətʋ mɛ, ba nubɩa Zwida lʋʋ lɩ̀à tə, ba nə yɩ pwìí bələ tɩ̀án, wà pìí ba bà à con, də ba bɩcanɩ mama. Ba ka pìí ka bà à con tə yà tà cɩ́gá. À mʋ̀ Ba-Yígúrə́-Jə-Tiu nii sʋgʋ nə!»
11 Ba-Yígúrə́-Jə-Tiu swɩ̀n à con, ʋ wʋ́:
«Də Yɩzərayɛlə lɩ̀à tə ba yoyuu jə ndə kacwarʋ nə tə mɛ,
ba yɩ cɩ́gá tɩ̀án ba doni Zwida lʋʋ lɩ̀à tə, ba nə yɩ pwìí bələ tɩ̀án.
12 Kʋ mʋ̀ yɩrɩ, n dàń vəli n bòrì sʋ̀ràn tə tə,
n kə jɩzən saparʋ con, n swɩ̀n, n wʋ́:
“Á pìré á bà, Yɩzərayɛlə lɩ̀à ba,
á nə ba yoyuu jə ndə kacwarʋ nə!
À mʋ̀ Ba-Yígúrə́-Jə-Tiu nii sʋgʋ nə!
À kʋ́ʋ̀ bá sɩ̀nɩ̀ à yɩ́á á yuu wa.
Cɩ́gá, à tʋŋa wʋywaŋʋ.
À bá bʋlɩ á nə, máŋá mama wuuu.
À mʋ̀ Ba-Yígúrə́-Jə-Tiu nii sʋgʋ nə!
13 Á dàń nə sɛga də á tʋn cʋna.
Cɩ́gá, kʋ yɩ à mʋ̀ Ba-Yígúrə́-Jə-Tiu,
à nə yɩ á tíú Yɩɩ nə nə á zɩga.
Á bɩbarɩ á twá dwíə́ nəkaran* yɩa tə nə,
tɩ̀ʋ́ mama də̀ń, kʋ nə jə vʋran,
á ga wà à sʋgʋ cʋgʋ.
À mʋ̀ Ba-Yígúrə́-Jə-Tiu nii sʋgʋ nə!»
Yɩzərayɛlə lɩ̀à tə mama wá pìí ba bà Ba-Yígúrə́-Jə-Tiu con
14 «Á pìrə́ á bà, á mʋ̀ bɩ̀á tə, á nə vɩ nii.
À mʋ̀ Ba-Yígúrə́-Jə-Tiu nii sʋgʋ nə!
Cɩ́gá, à mʋ̀ nə yɩ á Yuu-tiu!
À wá lɩ á lìù nədʋ tɩʋ don wa,
də á lɩ̀à bələ dwíí don wa,
à ja bà Siyon tɩʋ tə wa.
15 À wá pa aba yáá tɩ̀án,
ba nə yɩ ndə payɩra nə,
ba nə twá à waa nə,
sə ba kə aba cwəŋə wa, ndə pee nə,
də yənu də wʋbʋŋa.»
16 Kʋ máŋá təntə wa, á wá pùlì zənzən,
á ga wá ya dánɩ́ lʋʋ nii tə wa.
À mʋ̀ Ba-Yígúrə́-Jə-Tiu nii sʋgʋ nə!
Ba kʋ́ʋ̀ bá swɩ̀n Ba-Yígúrə́-Jə-Tiu nimarʋ culu daka* tə yoo.
Ba kʋ́ʋ̀ bá bʋ́n ka yoo,
ba kʋ́ʋ̀ bá pìí ba za ka yɩrɩ,
ka yoo kʋ́ʋ̀ bá yɩ̀ ba,
yá ba bá pìí ba fwa ka don də.
17 Kʋ máŋá təntə wa,
ba wá bon Zwerizalɛmə tɩʋ tə,
«Ba-Yígúrə́-Jə-Tiu padaʋ tɩʋ.»
Dwíə́ tə mama wá kun duən nə lá,
sə ba jəri à mʋ̀ Ba-Yígúrə́-Jə-Tiu Zwerizalɛmə wa,
yá ba kʋ́ʋ̀ bá twá ba zɩbaniu tʋtʋnkʋkwɩnan nə.
18 Kʋ máŋá təntə wa,
Zwida lʋʋ lɩ̀à tə də Yɩzərayɛlə lɩ̀à tə
wá kə duən ba nan jɩzən saparʋ lʋʋ nii tə wa,
ba bà lʋʋ nii tə wa, à nə pɩn ba nɩbara-ba nə, sə kʋ ya ba tori.»
Yɩzərayɛlə dwíí tə wá pìí ba bà Yɩɩ con
19 «À mʋ̀ yà swɩ̀n à waa con də,
à yà swə sə á ya à bɩ̀á,
sə à pa aba lʋʋ nii tə nə jə fɩra,
kʋ doni lʋʋ níə́ tə mama tɩa yuu wa.
À yà bʋ́n də á wá bon nə á nyɩna,
yá á kʋ́ʋ̀ bá viviri á kwa á ma sà nə.
20 Yá á mʋ̀ Yɩzərayɛlə lɩ̀à yɩn pwìí bələ tɩ̀án də nə,
ndə kan nə yɩn pwìí bələ tíú də ʋ barɩ nətʋ.
À mʋ̀ Ba-Yígúrə́-Jə-Tiu nii sʋgʋ nə!
21 Ba mà bubwiə pɛɛn tə yuparɩ wa:
Kʋ yɩ Yɩzərayɛlə lɩ̀à tə nə kwi də ba lòrì.
Cɩ́gá, ba cʋgʋ ba cwəŋə,
ba swɛ̀ɛ́ à mʋ̀ Ba-Yígúrə́-Jə-Tiu yoo,
à nə yɩ ba Yɩɩ.
22 Á pìrə́ á bà, á mʋ̀ bɩ̀á tə á nə vɩ nii!
À wá pa á pwìí bələ yìə̀n tə zwɛ̀ mɩ́ámɩ́án.»
«Nə̀ń nəba, nə bɩ̀àn n con.
Cɩ́gá, n mʋ̀ Ba-Yígúrə́-Jə-Tiu nə yɩ nə Yɩɩ!
23 Cɩ́gá mama, kʋ yɩ kʋ̀nkʋ̀n yìə̀n nə tʋŋa dədwələn tə yuu.
Kʋ yɩ zizigu cɩcɩ nə yàá fwa pɛɛn tə yuu wa.
Cɩ́gá mama, nə mʋ̀ Yɩzərayɛlə lɩ̀à sáŋʋ́ yɩ
kʋ naŋa n mʋ̀ Ba-Yígúrə́-Jə-Tiu con,
n nə yɩ nə Yɩɩ.
24 Kʋ nə zɩgɩ nə zandʋan mama,
woŋwanʋ Baalə* nə də́ nə nɩbara-ba wiən:
Tə mʋ̀ nə yɩ ba vanmɩnɩ də ba vanfaran,
də ba bɩ̀á də ba bwɩ̀ɩ́.
Nə̀ń kʋ cavɩra nyɩɛn!
25 Nə pə̀nə́ nə cavɩra tə wa,
sə fʋfʋlʋ ga ya nə gansara!
Cɩ́gá, nə də nə nɩbara-ba tʋn cʋna,
nə zɩgɩ Ba-yígúrə́-Jə-Tiu nə, nə tíú Yɩɩ,
kʋ nə zɩgɩ nə zandʋan mama,
kʋ bà kʋ yí zə̀n.
Yá nə wà Ba-yígúrə́-Jə-Tiu,
ʋ nə yɩ nə tíú Yɩɩ sʋgʋ cʋgʋ.»