Yɩzərayɛlə lɩ̀à vɩga Ba-Yígúrə́-Jə-Tiu nii
2
1 Ba-Yígúrə́-Jə-Tiu swɩ̀n sʋ̀ràn tə tə à con, ʋ wʋ́: 2 «Vəli n bòrì sʋgʋ kʋ tə, n kə Zwerizalɛmə tɩ̀án zɩan wa, n swɩ̀n də à mʋ̀ Ba-Yígúrə́-Jə-Tiu nə swɩ̀n, à wʋ́:À yə̀ə́ nətʋ tə, n nə vwə n tɩ̀àn à nə, n zandʋan tə wa,
də nətʋ tə n nə sóní nə ndə kadʋrʋ nə,
máŋá tə n nə púə́ à kwa kasɔɔ lanworu tə wa,
kʋ mʋ̀ tɩtɩgʋ tə wa, won mama nə ba lá pɛ́n.
3 Yɩzərayɛlə, n yà yɩ à mʋ̀ Ba-Yígúrə́-Jə-Tiu cɩcɩ nə tɩ,
ndə à kárá wiən təntən bɩ̀á nə.
Lìù tə mama ʋ nə dí tə, kʋ tíú tʋn cʋ̀nà,
yá lɛɛ yàá yí wá.
À mʋ̀ Ba-Yígúrə́-Jə-Tiu nii sʋgʋ nə!
4 Á cʋga Ba-Yígúrə́-Jə-Tiu sʋgʋ kʋ tə,
á mʋ̀ Zwakɔbə* dìə̀ lɩ̀à tə,
də á mʋ̀ Yɩzərayɛlə dwíə́ tə mama!
5 Nəŋə kʋ tə à mʋ̀ Ba-Yígúrə́-Jə-Tiu nə swɩ̀n:
Bɛ̀ɛ̀ yolwan nə á nɩbara-ba nɩ à yɩra,
kʋ ma pa ba pwɛ̀ ba tɩ̀àn də nə?
Ba pìí ba pú yɩa kwa, tə nə yɩ tʋtʋ,
yá kʋ dàń pɩn ba tətə jì tʋtʋ.
6 Ba wà bwe, sə ba jə́n:
“Ba-Yígúrə́-Jə-Tiu wulə yə̀n?
Ʋ mʋ̀ Ba-Yígúrə́-Jə-Tiu, ʋ nə pɩn nə nan Ezwipətə lʋʋ nii tə wa,
ʋ nə bɩrɩ nəba cwəŋə kasɔɔ lanworu tə wa,
ka mʋ̀ tɩa təntə wa, ka nə yɩ digə də gwàlán,
ka ga yɩ tɩkʋrʋ də yikunu bərən!
Ka yɩ tɩa, lìù mama nə ba lá twá,
lìù mama ga tə̀lə́ ka wa!”
7 Yá à pɩn á bà pún lʋʋ nii wa,
sə á də́ kʋ tɩ̀án lənə, tə nə ywán.
Yá á twi á kə durən à lʋʋ nii tə wa,
á pa kʋ jì yobalwaran bwálɩ́.
8 Yɩɩ joŋwana tə wà bwe, sə ba jə́n:
“Ba-Yígúrə́-Jə-Tiu wulə yə̀n?”
Yɩɩ nii yənu tɩ̀án tə yáá yà tə̀lə́ də nə,
yáá tɩ̀án tə nə yɩ ndə payɩra nə,
zàn ba zɩgɩ à nə,
Yɩɩ nii sʋ̀sʋ̀nà tə yɩ woŋwanʋ Baalə* nə ba ma swɩ̀n,
yá ba vwə ba tɩ̀àn wiən yɩra, tə nə ba sáŋʋ́ mama jə.
9 Kʋ mʋ̀ nə pɩn, à ma kʋ́ʋ̀ swɩ̀n à zɩga á nə.
À mʋ̀ Ba-Yígúrə́-Jə-Tiu nii sʋgʋ nə!
Yá à tə wá swɩ̀n à zɩgɩ á nɩ̀án də nə.
10 Á dàń vələ Kitimə mʋʋ titəŋi wa tɩa tə wa, á ywàń!
Á tʋŋa lɩ̀à Kedarə nə, á bwe zəni,
á jə́n kʋ tə nyandon tʋn lá naaa!
11 Dwíí wulə kʋ nə lwànɩ́ kʋ yɩa,
də tə nə swə tə tà cɩ́gá yɩa naaa?
À lalʋʋ tə mʋ̀ ja ba dun
ba ma lárɩ́ won tə nə bá sáŋʋ́ mama jə.
12 Lanworu wiən ba, á pɩan yoo təntə kələ aba.
Á pɩan fən zʋ aba zənzən, á ga didigi.
À mʋ̀ Ba-Yígúrə́-Jə-Tiu nii sʋgʋ nə!
13 Cɩ́gá, à lɩ̀à tə tʋn cʋna dəkurən bələ:
Ba vɩga nə ba dʋgʋ,
à mʋ̀, nabuliyii tə nə pɩn mɩɩ,
yá ba kʋa nɩ́á gwàlán* tə də̀ń nə lu,
nɩ́á ga ba tə wa pə̀ní.»
Lìù nə vɩga Ba-Yígúrə́-Jə-Tiu, kʋ yɩ yobalwarʋ
14 «Yɩzərayɛlə lɩ̀à tə yɩ ywə́ŋə́,
nə à yə̀ə́ kʋ yɩ ba lɩrɩ ba ywə́ŋə́ dwíí wa naaa?
Bɛ̀ɛ̀ dàń nə pɩn dwíə́ tə duən ma ja ba ba jì ndə wiən nə,
ba nə ta ba jon kʋ̀ʋ̀ wa?
15 Dwíə́ duən baa ba zɩga Yɩzərayɛlə nə, ndə gərən nə,
ba kori dɩ̀ yɩɩ nə.
Ba cʋ̀gʋ̀ Yɩzərayɛlə lʋʋ nii tə mɩ́ámɩ́án,
ba sʋ̀rɩ́ kʋ tɩan tə,
lìù kʋ́ʋ̀ tə̀lə́ tə wa.
16 Nofə də Tapanɛsəa tɩ̀án də tətə dí kʋ,
ba ga yukolu.
17 Kʋ tà á nə vɩga à mʋ̀ Ba-Yígúrə́-Jə-Tiu, à nə yɩ á tíú Yɩɩ,
máŋá tə wa à nə kəni aba cwəŋə wa,
nə pɩn kʋ yoo təntə yí aba naaa?
18 Yá sɩ́ʋ́n nə, bɛ̀ɛ̀ nə pɩn á ma vələ Ezwipətə,
sə á nyʋn Nilə mʋnaa tə nɩ́á naaa?
Bɛ̀ɛ̀ nə pɩn á vələ Asiri,
sə á nyʋn Əfəratə mʋnaa tə nɩ́á naaa?
19 Á cʋna tə wá kə aba càn wa!
Á pwìí bələ yìə̀n tə wá kə aba càn wa!
Kʋ nətʋ wá pa á lwarɩ də,
á nə vɩga à mʋ̀ Ba-Yígúrə́-Jə-Tiu, à nə yɩ á tíú Yɩɩ,
á kʋ́ʋ̀ ba à fən dəri tə,
yɩ yoo kʋ nə lwara, kʋ ga cà də.
À mʋ̀ Yuu-Tiu Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!»
Yɩzərayɛlə yɩ ndə kan nə cwàrɩ̀
20 Ba-Yígúrə́-Jə-Tiu swɩ̀n, ʋ wʋ́:
«Yɩzərayɛlə lɩ̀à-ba, á nə jon á tɩ̀àn à jɩɩn wa,
kʋ máŋá ba yigə.
Á cʋ̀gʋ̀ à də aba fààn tə,
á ga swɩ̀n á wʋ́:
“Nə kʋ́ʋ̀ ba pɩ̀à sə nə ya ywə́ŋə́!”
Yá á yɩ ndə kacwaran nə,
á pə̀ní paan mama yuu,
də tɩ̀ʋ́ mama də̀ń nə, kʋ nə jə vʋran.
21 À mʋ̀ yà cwɛn aba
ndə divɛn tɩ̀ʋ́ nə, kʋ nə jə fɩra,
ndə tɩ̀ʋ́ nə, kʋ dwíí nə ziən zənzən.
Kʋ twá nətə á ma lwàń à yáá con,
á jì ndə divɛn tɩ̀ʋ́ nəkaʋ nə.
22 Á nə swə á swɛ á yɩra də sɩpwalʋ,
á ga kə canfɩnɩ zənzən,
á cʋna tə tə bá nan à yáá con.
À mʋ̀ Yuu-Tiu Ba-Yígúrə́-Jə-Tiu nii sʋgʋ nə!
23 Nətə nə á wàá á swɩ̀n, á wʋ́:
“Nə wà durən yìə̀n tʋn,
nə wà woŋwanan Baalə tə jʋn?”
Ywàŋá á tʋtʋnɛɛ varab tə wa.
Á sɛga də kʋ tə á nə tʋn tə lwara.
Á yɩ ndə nyʋgʋmakan nə dəri vɛɛ,
kʋ pɩ̀à nyʋgʋmabɛɛ!
24 Á yɩ ndə gaʋ bɩnakan nə,
ka nə mɩ̀n kasɔɔ lanworu.
Ka dɩʋ máŋá nə yí, ka yàá fùń vʋʋ tə.
Bɩnabɩa fɩra nə zʋa ka,
bɛ̀ɛ̀ nə wàá ka nə kʋ cɩ̀?
Bɩnabɩa mama nə pɩ̀à ka,
ka ba ka tɩ̀àn gwàrɩ̀,
ka yàá na ka, ka dɩʋ máŋá wa.
25 Á cɩa á tɩ̀àn nə Yɩzərayɛlə lɩ̀à-ba,
kʋ nə tà nətʋ, á wá va napɩrɩ swəli,
á kələru ga kʋ̀!
Yá á swɩ̀n, á wʋ́: “Kʋ ba yoo jə!
Nə mʋ̀ swə dwíə́ nəkaran* tə,
yá nə wá vwa nə tɩ̀àn ba nə!”
26 Cavɩra wá yí á mʋ̀ Yɩzərayɛlə lɩ̀à tə,
də á pɛ̀gá tə, də á tʋ̀tʋ̀nán yun tɩ̀án tə,
də á Yɩɩ joŋwana tə, də á Yɩɩ nii sʋ̀sʋ̀nà tə,
ndə ba nə jɩn ŋwɩ̀àn, cavɩra ga zʋ wá nətʋ.
27 Ba mʋ̀ lɩ̀à tə, ba nə yàá swɩ̀n dàʋ̀ con, ba wʋ́:
“N mʋ̀ nə yɩ nə nyɩna!”
Ba ga swɩ̀n kapan con, ba wʋ́:
“N mʋ̀ nə lɩrɩ nəba!”
Cɩ́gá, ba viviri ba kwa ba ma sà nə,
ba wà ba yáá à con te.
Yá máŋá tə lɛɛ nə yí ba,
ba dàń yàá bon ba kə à nə, ba wʋ́:
“Zàn jon nəba!”
28 Á yɩa tə á nə fwa wulə yə̀n nə?
Tə nə wàá aba tə joŋə,
sə tə zàn tə jon aba,
máŋá tə wa lɛɛ nə yí aba!
Cɩ́gá, á mʋ̀ Zwida lʋʋ lɩ̀à jə yɩa kapʋpʋ,
ndə á tɩan tə nə dáá nətʋ.
29 Bɛ̀ɛ̀ nə pɩn á swɩ̀n á zɩga à nə?
Á mama vɩga à nii, á ga zàn á zɩga à nə.
À mʋ̀ Ba-Yígúrə́-Jə-Tiu nii sʋgʋ nə!
30 À mà á bɩ̀á tə, yá kʋ yɩ tʋtʋ,
ba wà bɩ́rá sɛ̀.
Á gʋa á Yɩɩ nii sʋ̀sʋ̀nà tə,
ndə gəru nə cʋ̀gʋ̀ ba.
31 Á mʋ̀ zə̀n lɩ̀à ba,
á jələ Ba-Yígúrə́-Jə-Tiu sʋgʋ tə zəni!
À jìgə̀ ndə kasɔɔ lanworu nə,
nə à yə̀ə́ ndə yikunu lʋʋ nii nə,
à pa aba naaa?
Bɛ̀ɛ̀ nə pɩn à lɩ̀à tə ma swɩ̀n, ba wʋ́:
“Nə tɩ nə tɩ̀àn,
nə kʋ́ʋ̀ ba pɩ̀à sə nə pìí nə bà n con?”
32 Kacɩɩn yàá swɛ̀ɛ́ ʋ bwanzɩla nə naaa?
Kadʋrʋ yàá swɛ̀ɛ́ ʋ tàŋá damara nə naaa?
Yá à lɩ̀à tə mʋ̀ swɛ̀ɛ́ à yoo,
kʋ dɩan nə ba yigə.
33 Á yə̀ə́ coŋi tə á nə wá tì,
á ma pɩ̀à á fɩra yìə̀n!
Á tʋn kʋ nətʋ tə,
kʋ pa á mɩ̀n lagʋrɩ də tətə.
34 Yinənyɩna jana tà á gànàn níə́ zwala,
yá ba yɩ lɩ̀à tə ba nə wà yoo cʋ̀gʋ̀.
Á wà ba jɩn də ba wulə ba kɛ́n á boru.
Yá də kʋ nətʋ mɛ,
35 á tə swɩ̀n, á wʋ́:
“Nə wà yoo cʋ̀gʋ̀!
Yɩɩ lɩŋa wà mɛ sə tə zàn nə yuu wa!”
Yá à wá bʋ̀rɩ̀ á bʋra,
á nə swɩ̀n də á wà lwanɩ tʋn tə yɩrɩ.
36 Bɛ̀ɛ̀ nə pɩn á ba bʋŋa zəni,
á ma lwànɩ́ á cwəŋə?
Á kʋ́ʋ̀ wá də́ cavɩra Ezwipətə tɩ̀án də con,
ndə á nə dí cavɩra Asiiri tɩ̀án con nətʋ.
37 Á wá zɩn á jɩ̀àn á yuu wa,
á ja nan tɩa lá də.
Cɩ́gá, à mʋ̀ Ba-Yígúrə́-Jə-Tiu vɩga lɩ̀à təntə,
á nə jələ ba yuu wa, á dʋgʋ.
Kʋ tà ba mʋ̀ nə wá pa á yoo jì.»