Zweremi
1
1 Sʋ̀ràn tə tə yɩ Hiləkiya bìú Zweremi nə swɩ̀n tə. Hiləkiya yà yɩ Yɩɩ joŋwana tə wa lìù, Anatɔtə nə, Bɛnzwamɛn lʋʋ nii tə wa. 2 Ba-Yígúrə́-Jə-Tiu swɩ̀n sʋ̀ràn təntə Zweremi con, Amon bìú Zozɩasə, ʋ nə yɩn Zwida pɩ̀ʋ́ pàrɩ̀ tə bɩna fugə batwa nii bɩnɩ tə wa. 3 Ba-Yígúrə́-Jə-Tiu tə swɩ̀n ʋ con, Zozɩasə bìú Yehoyakimə, ʋ nə yɩn Zwida pɩ̀ʋ́ pàrɩ̀ tə máŋá wa. Ʋ tə bwɛ́ ʋ swɩ̀n ʋ con, kʋ va kʋ yí Zozɩasə bìú Sedekɩasə pàrɩ̀ tə bɩna fugə nədʋ nii bɩnɩ tə yígúrə́. Mə kʋ bɩnɩ təntə bonu nii cànà tə wa nə, ba jɩn Zwerizalɛmə tɩ̀án, ba va yongaʋ.Yɩɩ bon Zweremi sə ʋ jì ʋ nii sʋ̀sʋ̀nʋ̀
4 Ba-Yígúrə́-Jə-Tiu swɩ̀n sʋ̀ràn tə tə à con, ʋ wʋ́:
5 «À yə̀ə́ mʋ́,
də à tə wà mʋ́ fwa n nuu pùə́ wa,
à kúrí mʋ́, sə n tʋn n pa nə,
də n nuu tə wà mʋ́ lɩrɩ.
À ken mʋ́ vàn nə,
sə n ya à nii sʋ̀sʋ̀nʋ̀, dwíə́ tə yáá con.»
6 À le, à wʋ́: «Aaa! Yuu-Tiu Ba-Yígúrə́-Jə-Tiu, à tə yɩ ləzwəndʋn, à yəri sʋgʋ yáá.»
7 Yá Ba-yígúrə́-Jə-Tiu pìí ʋ le nə, ʋ wʋ́:
«Dàn ká swɩ̀n də n yɩ ləzwəndʋn,
n mɛ sə n va lɩ̀à tə mama con,
à nə wá tʋn mʋ́,
n ga swɩ̀n kʋ tə mama,
à nə wá pa mʋ́ nii sə n swɩ̀n.
8 Dàn ká pa ba fən ja mʋ́!
Cɩ́gá, à wulə də mʋ́, sə à jon mʋ́ ba jɩɩn wa.»
Ba-Yígúrə́-Jə-Tiu nii sʋgʋ nə!
9 Yá Ba-Yígúrə́-Jə-Tiu dàń te ʋ jɩɩn, ʋ dwen à nii nə, ʋ ga swɩ̀n à con, ʋ wʋ́:
«Nə̀ń, à ken à sʋ̀ràn tə n nii wa.
10 Lwarɩ də zə̀n kʋ tə, à tún mʋ́,
sə n ja dɩ̀àn dwíə́ tə yuu wa, də payun tə yuu wa,
sə n van n mùrí, n mà n lwá duən yuu,
sə n cʋ̀gʋ̀, n ga gwɛrɩ,
sə n pìí lwà, n zɩgɩ kʋ bwálɩ́ nə
n ga cwɛn.»
Bɩlalʋrʋ* naa, də nəkənə ka nə cʋrɩ yoo
11 Ba-Yígúrə́-Jə-Tiu swɩ̀n sʋ̀ràn tə tə à con, ʋ wʋ́: «Bɛ̀ɛ̀ nə n na Zweremi?» À le, à wʋ́: «À na bɩlalʋrʋ naa.» 12 Yá Ba-Yígúrə́-Jə-Tiu swɩ̀n à con, ʋ wʋ́: «N cɩ́gá nɩ zəni! À ywàŋáa à sʋgʋ tə yuu nə, sə à pa kʋ nii sú, kʋ máŋá wa.»
13 Nɛɛ bələ nii nə, Ba-Yígúrə́-Jə-Tiu swɩ̀n sʋ̀ràn tə tə à con, ʋ wʋ́: «Bɛ̀ɛ̀ nə n na?» À le, à wʋ́: «À na nəkənə ka nə cʋrɩ, ka ga guni ka nan jɩzən saparʋ con.»
14 Yá Ba-Yígúrə́-Jə-Tiu dàń swɩ̀n à con, ʋ wʋ́:
«Jɩzən saparʋ con nə lɛɛ tə wá pwin tə nan,
tə bà lʋʋ nii tə lɩ̀à tə mama yuu wa.
15 Cɩ́gá, à wá bon jɩzən saparʋ yuu payun tə dwíə́ tə mama.
À mʋ̀ Ba-Yígúrə́-Jə-Tiu nii sʋgʋ nə!
Ba wá bà,
yá dwíí mama wá tún kʋ padaʋ
Zwerizalɛmə mimien tə nə.
Ba wá jə̀ń ba kɩkarɩ tɩʋ tə biritaŋan tə,
ba ga wá ta Zwida tɩan tə mama.
16 À wá bʋ̀rɩ̀ à zɩgɩ Zwida lʋʋ lɩ̀à tə nə,
ba yolwana tə mama yɩrɩ ba nə tʋn:
Cɩ́gá, ba vɩga nə ba dʋgʋ,
ba ga sʋ̀rɩ́ wusinə ba pa yɩa duən nə.
Ba tʋa ba nadwana yuu wiən tə yáá con,
ba jɩɩn nə fwa, ba pa tə dun*.
17 N mʋ̀ Zweremi dàń vwa n tàŋá voru,
n ga zàn n va n swɩ̀n yìə̀n tə mama,
à nə pɩn mʋ́ nii sə n swɩ̀n ba con.
Dàn ká vɩvaga ba yáá con,
kʋ nə tà nətʋ, à tətə nə wá pa
n vɩvaga ba yáá con.
18 Kʋ nə zɩgɩ zə̀n nə,
à pɩn mʋ́ dɩ̀àn lʋʋ nii tə mama yuu wa.
N wá ya ndə tɩʋ nə,
ba nə lwə̀ biritaŋʋ ba kɩkarɩ kʋ.
N wá ya ndə lugu yoŋi nə,
də cɩnɩan bírə́ nə,
Zwida pɛ̀gá tə yáá con,
də tʋ̀tʋ̀nán yun tɩ̀án tə yáá con,
də Yɩɩ joŋwana tə yáá con,
də lʋʋ nii tə lalʋʋ tə yáá con.
19 Ba wá ta mʋ́,
yá ba bá wànɩ́ won mama ba tʋn n yɩra.
Cɩ́gá, à wulə də mʋ́, sə à jon mʋ́.
À mʋ̀ Ba-Yígúrə́-Jə-Tiu nii sʋgʋ nə!»