Cɩ́gá tíú nədʋ tətə tə̀lə́ Zwerizalɛmə wa
5
1 «Á vələ Zwerizalɛmə coŋi tə mama wa,á ywàń, á ga bwe.
Á twara kʋ kanpwərən tə wa á jə́n,
á wá na ladʋa tətə,
ʋ nə vəli mənəmənə,
ʋ ga yɩ təgətəgə naaa?
Á nə nɩ wá,
à wá kwɛn Zwerizalɛmə tɩ̀án cʋna,
à lɩ à də ba pwə́rə́ wa.»
2 Ba nə swə ba dù, ba wʋ́:
«Ba-Yígúrə́-Jə-Tiu wulə!»,
kʋ nətʋ tə yɩ kʋ̀nkʋ̀n durə ba dùə̀.
3 Ba-Yígúrə́-Jə-Tiu, kʋ tà cɩ́gá nə n pɩ̀à sə n na naaa?
N mà ba,
yá kʋ ba yoo mama ba yɩra tʋŋa.
N yà pɩ̀à sə n cʋ̀gʋ̀ ba mɩ́ámɩ́án,
yá də kʋ mɛ, ba tə ba bɩra sɛ̀.
Ba yii kʋa ndə pɩ̀ʋ̀ nə,
ba vɩga sə ba pìí ba bà n con.
4 À yà swɩ̀n à waa con, à wʋ́:
«Ba yɩ ləzwənbii, ba yəri yoo də̀ń,
ba yəri kʋ tə nə yɩ Ba-Yígúrə́-Jə-Tiu fɩra,
nə à yə̀ə́ kʋ tə ba nə mɛ sə ba tʋn ba pa wá.
5 À dàń wá va à swɩ̀n ba ləzwənfaran tə con.
Cɩ́gá, ba mʋ̀ yə̀ə́ Ba-Yígúrə́-Jə-Tiu fɩra tə,
də kʋ tə ba nə mɛ sə ba tʋn,
ba pa ba Yɩɩ tə nə.»
Yá ba də mama vɩga nii,
ba ga pwɛ̀ ba tɩ̀àn də Yɩɩ.
6 Kʋ mʋ̀ nə pɩn gəru nan pún tə wa, kʋ janɩ ba,
gaʋ kukurə ga nan digə tə wa,
kʋ vaŋa ba kʋ vuri.
Gwiə cɩ̀gà ba tɩan tə nii nə,
kʋ janɩ lìù tə mama ʋ nə naŋa tə wa, kʋ cɩrɩ.
Cɩ́gá, ba cʋna tə dáá zənzən,
yá ba pwìí bələ yìə̀n tə yɩ tə súrí wuuu.
7 «Zwerizalɛmə tɩ̀án-ba,
bɛ̀ɛ̀ yɩrɩ nə à mɛ sə à kwɛn á cʋna tə
à lɩ à də aba pwə́rə́ wa?
Á bɩ̀á tə vɩga nə ba dʋgʋ,
ba ga ja wiən tə nə tà Yɩɩ ba ma dwì durə.
À yà pɩn wiən bʋ́rɩ́ ba,
yá ba tə cwàrɩ̀,
ba vəli ba kun duən nə, kacwarʋ dìə̀ wa.
8 Ba yɩ ndə səsen nə, tə nə də́ tə swí,
ba lìù mama yɩ ʋ sɩsɩn ʋ don kan kwa.
9 À wà mɛ sə à zɩgɩ lɩ̀à təntə nə naaa?
À mʋ̀ Ba-Yígúrə́-Jə-Tiu nii sʋgʋ nə!
Kʋ wà mɛ sə à fwi à lɩŋa dwíí yiri təntə yuu wa naaa?
10 Á faŋa ba divɛn tɩ̀án kárɩ́ bírí tə á galɩ,
á zʋ á cʋ̀gʋ̀ ba divɛn tɩ̀án tə,
á dàń nə dànà ká cʋ̀gʋ̀ tə mama mɩ́ámɩ́án.
Á pɩra tə nɛɛ tə,
tə nə tà à mʋ̀ Ba-Yígúrə́-Jə-Tiu nyiən yɩrɩ!
11 Cɩ́gá mama, Yɩzərayɛlə də Zwida lʋʋ lɩ̀à tə
tʋn pwìí bələ yoo à yɩra.»
Ba-Yígúrə́-Jə-Tiu nii sʋgʋ nə!
Càn tə nə wá yí lalʋʋ tə
12 Ba tɛ́n Ba-Yígúrə́-Jə-Tiu,
ba swɩ̀n, ba wʋ́: «Ʋ tə̀lə́!
Lɛɛ wàrɩ̀ nəba tə yí.
Dʋŋa bá ta nəba,
niən də ma bá ja nəba!
13 Yɩɩ nii sʋ̀sʋ̀nà tə yɩ tʋtʋ!
Kʋ tà Yɩɩ nə swɩ̀n ba con.
Yɩɩ wá pa yìə̀n tə ba nə swɩ̀n tə yoo wá
pìí tə yí ba tətə!»
14 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu,
ʋ nə yɩ kwatara Yɩɩ nə swɩ̀n:
«Á nə swɩ̀n sʋ̀ràn təntə yɩrɩ,
à wá pa à sʋ̀ràn tə jì ndə mən nə, n nii wa,
à ga pa lalʋʋ təntə jì ndə dɛɛ nə,
sə mən tə də́ ba.
15 À wá pa dwíí nəkɔɔ nan yiŋʋnɩ,
kʋ bà á mʋ̀ Yɩzərayɛlə lɩ̀à nə.
À mʋ̀ Ba-Yígúrə́-Jə-Tiu nii sʋgʋ nə!
Kʋ yɩ dwíí tə kʋ nə jə dɩ̀àn,
kʋ ga yɩ dwíí tə kʋ nə yɩn lá fuən mama.
Kʋ yɩ dwíí tə á nə ba ba nəndəli sʋgʋ nə̀ń,
kʋ pa á ba sʋ̀ràn tə nə̀ń, ba nə swɩ̀n.
16 Ba cɩan gwɩ lɩ̀à zənzən.
Ba mama yɩ kwatara babɩran.
17 Ba wá də́ á mɩna də á wodirən,
ba wá gʋ á bɩ̀á də á bwɩ̀ɩ́,
ba wá də́ á vanfaran də á vanmɩnɩ,
ba wá də́ á divɛn tɩ̀án bɩ̀á də á kapɩran bɩ̀á,
ba wá cʋ̀gʋ̀ á tɩan tə,
á nə lwə̀ á kɩkarɩ də biritaŋʋ,
á ga jələ tə yuu wa.
18 Yá də kʋ nətʋ mɛ, kʋ máŋá təntə wa, à bá cʋ̀gʋ̀ aba mɩ́ámɩ́án. À mʋ̀ Ba-Yígúrə́-Jə-Tiu nii sʋgʋ nə!» 19 Yá máŋá tə ba nə bwe, ba wʋ́: «Bɛ̀ɛ̀ nə pɩn Ba-yígúrə́-Jə-Tiu ʋ nə yɩ nə Yɩɩ, ma tʋn yoo kʋ tə mama nə yɩra?» N mʋ̀ Zweremi wá le ba, n wʋ́: «Kʋ yɩ á nə vɩga à mʋ̀ Ba-yígúrə́-Jə-Tiu á dʋgʋ, á ga tʋn á pa dwíə́ nəkaran* yɩa nə, á lʋʋ nii tə wa nə pɩn. Kʋ mʋ̀ nə pɩn, á wá tʋn á pa vərə nə, lʋʋ nii don wa, kʋ nə tà á mʋ̀ nyiən!»
Lalʋʋ tə kʋ́ʋ̀ ba Yɩɩ nii zìlí
20 Ba-yígúrə́-Jə-Tiu swɩ̀n, ʋ wʋ́:
«Á swɩan yoo kʋ tə á bɩrɩ Zwakɔbə dwíí tə nə,
á pɩan Zwida lʋʋ lɩ̀à tə nì kʋ:
21 Á cʋga yoo kʋ tə,
á mʋ̀ lalʋʋ tə á nə yɩ ləyirən,
á nə ba pubʋŋa jə!
Á jə yɩ́á, yá á ba lá na,
á jə zɩan, yá á ba yoo nə̀ń.
22 Á bá dəri à fən naaa?
À mʋ̀ Ba-Yígúrə́-Jə-Tiu nii sʋgʋ nə!
Á bá vɩvaga à yáá con naaa?
À mʋ̀ nə tún kasɩlʋ, sə kʋ ya mʋʋ tə nii máŋá,
kʋ ya sɩswɩan máŋá mama wuuu,
mʋʋ tə nə wà mɛ sə kʋ pàlɩ̀ kʋ lɛ tə.
Kʋ nakulə tə yàá zàn yɩɩ nə, yá tə ba dɩ̀àn jə.
Tə yàá pupwin, yá tə ba pàlɩ̀ tə lɛ sɩswɩan tə.
23 Yá lalʋʋ kʋ tə mʋ̀ yɩ zɩbanənyɩna,
ba ga vɩ nii.
Ba pìí ba yá nə.
24 Ba wà ba tɩ̀àn con swɩ̀n, ba wʋ́:
“Nə dərə Ba-Yígúrə́-Jə-Tiu fən, ʋ nə yɩ nə tíú Yɩɩ,
ʋ nə pɩn dwà nɩ̀ ka máŋá wa.
Ʋ pɩn təntən dwà nɩ̀ síí nii nə,
ʋ ma pɩn talɩkwa dwà nɩ̀ fɔɔ nii nə,
ʋ ga tún máŋá, sə nə ma tʋn fɔɔ.”
25 Á yolwana tə nə gugurə yìə̀n təntə mama.
Á cʋna tə nə pɩn á kwɩ̀n zəni təntə nə.
26 Cɩ́gá, yolwafwana wulə à lɩ̀à tə wa.
Ba pàlɩ̀ ndə lɩ̀à nə, ba nə janɩ zuŋi,
ba kəni ŋoni ba ma janɩ ləzoni.
27 Ba dìì súə́ də ŋwɩ̀rɩ̀ zɩla,
ndə zunjanʋ nə súə́ də zuŋi nətʋ.
Kʋ mʋ̀ nə pɩn ba jì ləzwənfaran, ba ga yɩ jɩjə tɩ̀án.
28 Ba nùə̀ ba tún nʋga, ba pɩpɩlɩ.
Ba tʋn yolwana ba ja lɛ tɩa nə.
Ba ba cɩ́gá swɩ̀n bʋra bwálɩ́ nə,
ba ba bʋ̀rɩ̀ ba pɩn bɩtarʋ nə,
yá də kʋ mɛ, ba yìə̀n tə kwɛn.
Ba ba cɩ́gá zʋrʋ nə pɩn.
29 À wà mɛ sə à zɩgɩ ləzwənyirə təntə nə naaa?
À mʋ̀ Ba-Yígúrə́-Jə-Tiu nii sʋgʋ nə!
À wà mɛ sə à fwi à lɩŋa dwíí təntə yiri yuu wa naaa?
30 Cʋcʋran tə nə lwara,
tə ga zɩ̀n lɩŋa wulə lʋʋ nii tə wa.
31 Yɩɩ nii sʋ̀sʋ̀nà tə yɩ kʋkʋn ba kʋ̀nɩ̀,
Yɩɩ joŋwana tə də ga yɩ wiən nə ba pɩ̀à,
yá à lalʋʋ tə swə kʋ nətʋ tə.
Yá bɛ̀ɛ̀ nə á wá fwa yìə̀n təntə kwa nə?»