Cʋcʋran nəfaran bɩ̀àn Zwerizalɛmə wa
6
1 Bɛnzwamɛn dwíí lɩ̀à-ba, á naŋa Zwerizalɛmə tɩʋ tə wa,á dəri á səgə.
Á wúrə́ nabwanʋ Tekʋa tɩʋ tə wa,
á zɩan kʋ̀ʋ̀ mɩmɩnʋ yɩɩ nə, Bɛtə-Kerɛmə tɩʋ tə wa!
Cɩ́gá, lɛɛ nan jɩzən saparʋ con tə bɩ̀àn,
tə yɩ cʋcʋran nəfaran.
2 À wá pa ba cʋ̀gʋ̀ Siyon tɩʋ tə,
kʋ nə ziən ndə kabwaŋʋ nə,
à pa kʋ jì sííí!
3 Payɩraa vələ Siyon tɩʋ tə con də ba pee.
Ba ken ba gansilə, ba ja kɩkarɩ kʋ.
Ba lìù mama nɩ ʋ tori tɩʋ tə wa,
ʋ pɩn ʋ pee də́ lá.
4 Ba baa ba wʋ́:
«Á tana á tɩ̀àn sə nə ta tɩʋ tə,
kʋ yɩ Yɩɩ kʋ̀ʋ̀!
Á zaŋa sə nə ta kʋ, yɩcakʋrʋ wa!
Nə̀ń kʋ lɛɛ nyɩɛn nʋ̀ʋ̀!
Yɩɩ manwarɩ kʋ wulə kʋ twɩ,
didəni nii ywárá jìgə̀ nədaran.
5 Á zaŋa nə ta kʋ̀ʋ̀ tə tɩtɩkwɩʋn nə,
nə cʋ̀gʋ̀ ba dizəŋə tə!»
6 Cɩ́gá, nə̀ń kʋ tə Ba-Yígúrə́-Jə-Tiu,
ʋ nə yɩ kwatara Yɩɩ nə swɩ̀n:
«Á gwəŋə tɩ̀án, á ma fwa kukurə nacanɩ,
á zɩgɩ Zwerizalɛmə tɩʋ tə nə.»
Kʋ yɩ tɩʋ tə kʋ nə mɛ sə kʋ də́ càn.
Fɩfɩan cɩcɩ nə wulə kʋ wa.
7 Ba tʋŋa ba wʋlʋŋʋ tə máŋá mama,
ndə vɩlɩ nə bùlì kʋ nɩ́á máŋá mama nətʋ.
Ka tʋn dɩ̀àn duən yɩra,
də ka cʋ̀gʋ̀ duən zizigu nə wulə tɩʋ tə wa.
Máŋá mama, ba caŋɩ duən,
ba də́ càn à yɩ́á yuu.
8 «Zwerizalɛmə tɩ̀án-ba, á cɩa á tɩ̀àn nə,
kʋ nə tà nətʋ, à wá pwɛ̀ à tɩ̀àn də aba,
à ga pa á tɩʋ tə cʋ̀gʋ̀ mɩ́ámɩ́án,
kʋ jì bwálɩ́ lìù nə tə̀lə́ kʋ wa!»
Càn tə nə wá yí lalʋʋ tə nə vɩ̀ sə kʋ sɛ̀ nii
9 Nə̀ń kʋ tə Ba-Yígúrə́-Jə-Tiu, ʋ nə yɩ
kwatara Yɩɩ nə swɩ̀n:
«Á pʋ̀rá Yɩzərayɛlə lɩ̀à tə gɩganɩ tə,
ndə ba nə pʋ̀rɩ́ divɛn tɩ̀án talɩkwa lənə nətʋ.
Á pɩan á jɩ̀àn pìí tə bà ba yuu də á bwɛ́,
ndə divɛn tɩ̀án tíú nə pʋ̀rɩ́ tə lənə, tə nɛɛ yuu wa nətʋ!»
10 Wàà con nə à wá swɩ̀n?
Wàà nə à wá ma fwa dansɩa lìù,
sə ba nì à sʋgʋ də̀ń?
Ba zɩan bwɩn, ba wàrɩ̀ yoo də̀ń ba nì.
Ba jələ Ba-Yígúrə́-Jə-Tiu sʋgʋ tə ndə mʋmʋn yoo nə,
ba ba pɩ̀à sə ba cʋgʋ kʋ.
11 À súə́ də Ba-Yígúrə́-Jə-Tiu lɩŋa tə à ja lɛ,
à kʋ́ʋ̀ wàrɩ̀ tə à pɩ́nɩ́.
Yá Ba-Yígúrə́-Jə-Tiu dàń swɩ̀n à con, ʋ wʋ́:
«Fwi tə bìsɩ́ná tə yuu wa, cwəŋə tə yuu,
də ləzwəndʋn púlí tə yuu wa.
Cɩ́gá, ba wá ja bara tə də kana tə,
də bazʋnan tə də bazʋnkwaran tə,
ba ja va yongaʋ.
12 Ba dìì tə wá jì lɩ̀à duən nyiən,
lɩ̀à duən nə wá tɩnɩ ba kárɩ́ tə də ba kana tə,
máŋá tə wa, à nə wá zɩ̀n à jɩɩn,
à mà lʋʋ nii kʋ tə tɩ̀án.
À mʋ̀ Ba-Yígúrə́-Jə-Tiu nii sʋgʋ nə!
13 Cɩ́gá, kʋ nə zɩgɩ ba wa nəmaa nə,
kʋ va kʋ yí ba nəkwɩa,
ba mama yɩ ba fɩra wiən ba pɩ̀à.
Yɩɩ nii sʋ̀sʋ̀nà tə də Yɩɩ joŋwana tə mɛ yɩ kʋ̀nkʋ̀n yìə̀n ba tʋŋa.
14 Ba ba cʋcʋran tə nə wá bà à lɩ̀à tə yuu wa
jələ ndə cɩ́gá cɩ́gá yoo nə,
kʋ pa ba swɩ̀n, ba wʋ́:
“Yazurə wulə! Yazurə wulə!”
Yá yazurə tə̀lə́ mɩ́ámɩ́án!
15 Cavɩra yà mɛ sə tə ja ba,
yobalwaran tə yɩrɩ ba nə tʋn,
yá cavɩra ba ba jə,
ba nə kʋ́ʋ̀ yəri cavɩra yɩrɩ.
Kʋ mʋ̀ nə pɩn,
ba də wá twá ba ya lɩ̀à tə wa ba nə wá tɩ.
Ba wá tʋ tɩa, máŋá tə wa à nə wá zɩgɩ ba nə.
À mʋ̀ Ba-Yígúrə́-Jə-Tiu nii sʋgʋ nə!
16 Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n:
Á zɩga coŋi tə yuu, á zəən,
á bʋ́n fuən coŋi tə yoo!
Cwəŋə nəzəŋu tə wulə yə̀n?
Á tíə́ ka, yá á wá na bɩcan sìə́.
Yá ba le, ba wʋ́: “Nə bá tì ka!”
17 À tún lɩ̀à sə ba ywàń á yuu nə.
Á cɩa á tɩ̀àn nə, də á nə nì nabwanʋ tə kori!
Yá ba swɩ̀n, ba wʋ́:
“Nə bá cɩ̀ nə tɩ̀àn nə!”
18 Kʋ mʋ̀ yɩrɩ, á mʋ̀ dwíə́ nəkaran* tə dàń cʋga zəni!
Á mʋ̀ púlí tə mama lwara yoo tə nə wá yí lɩ̀à təntə!
19 Á mʋ̀ tɩa yuu ləzoni tə mama cʋga zəni!
À wá pa lɛɛ yí lɩ̀à təntə,
tə yɩ ba pubʋnkʋkwɩnan tə ŋwɩ́rán.
Cɩ́gá, ba wà ba tɩ̀àn nə cɩ̀ də kʋ tə, à nə swɩ̀n ba con.
Ba vɩga à nii yìə̀n tə ba dʋgʋ.
20 À pɩ̀à Saba tɩ̀án wusinə sə à fwa tə bɛ̀ɛ̀?
Cɩnba dabii tə nə nan yiŋʋnɩ nywarɩ nə yɩ bɛ̀ɛ̀ tə pa nə?
À ba á jwəŋə tə á nə sʋ̀rɩ́* á pɩn nə swə,
á jwəŋə tə ba fɩra jə tə pa nə.
21 Kʋ mʋ̀ yɩrɩ, nə̀ń kʋ tə
à mʋ̀ Ba-Yígúrə́-Jə-Tiu nə swɩ̀n:
À wá kə wiən lɩ̀à təntə yáá con,
sə ba mà ba nɛɛ tə nə, ba tʋ.
Nyɩna də bìú, jəndon də ʋ dabɛɛ,
ba mama wá twá duən ba tɩ.»
Dʋŋʋ nan jɩzən saparʋ yuu ʋ bɩ̀àn
22 Nə̀ń kʋ tə Ba-Yígúrə́-Jə-Tiu nə swɩ̀n:
«Lalʋʋ don nan jɩzən saparʋ con lʋʋ nii tə wa kʋ bɩ̀àn,
kʋ yɩ dwíí nəfarʋ nə naŋa tɩa yígúrə́
con, kʋ bɩ̀àn.
23 Ba zɩ̀n ba twɛn də cwiən yɩɩ nə.
Ba waa lɩŋa, ba ba lìù yinəgə dəri.
Ba zizigu yɩ ndə mʋʋ nə fʋ̀rɩ̀.
Ba dɩ̀gà səsen,
ba tɩɩn duən nə ndə ləzwəndʋa nə,
sə ba ta n mʋ̀, Siyon bʋ̀áb!»
24 Zwerizalɛmə tɩ̀án swɩ̀n, ba wʋ́:
«Nə nì ŋwɛn təntə,
yá nə jɩ̀àn gwàrɩ̀.
Pucʋnɩ zʋa nəba,
kʋ ga yɩ̀ nəba zənzən,
ndə kan pùə́ nə yɩ̀ sə ʋ lɩra.
25 Á dànà ká va kasɔɔ con,
á dànà ká nan coŋi yuu.
Cɩ́gá, dʋŋʋ tə wulə lá, də ʋ kwatara sɩ̀ʋ́ tə.
Fən wulə tɩa mama!»
26 Ba-Yígúrə́-Jə-Tiu swɩ̀n, ʋ wʋ́:
«À lɩ̀à-ba, á zwɩa pucʋnɩ gànàn,
á pə̀nə́ pùrú wa, á bəbəli!
Á kwiə yinəgə kwirə,
ndə á bidʋa nə tɩga.
Á dɩa lúə́ yuu gwaran!
Cɩ́gá, dʋŋʋ tə nə yɩ cʋcʋnyiən tə
bɩ̀àn sə ʋ dɩ̀ á yuu.»
Yɩzərayɛlə lɩ̀à yɩ ndə lugu nə, kʋ nə wàrɩ̀ kʋ nyɩnɩ
27 Ba-Yígúrə́-Jə-Tiu swɩ̀n à con, ʋ wʋ́:
«Zweremi, à tún mʋ́ ndə cɩnɩan yàrʋ́ nə,
sə n dídə́n à lɩ̀à tə,
n lwarɩ ba tʋtʋnɛɛ nə yɩ nətʋ.»
28 Ba mama yɩ zɩbanənyɩna cɩ́gá cɩ́gá,
ba yɩ tɩjanyɩna,
ba yoo ga dà ndə cɩnɩan də lugu nə.
Ba mama yɩ cʋcʋnyɩna.
29 Yàrʋ́ yàá cè cəpurə, mən lɩŋɩ,
ʋ ma nyɩan wárʋ́, ʋ lɩ kʋ durən.
Yá yàrʋ́ yɩ ʋ tʋŋa tʋtʋ,
də wárʋ́ durən nə ba naŋa tə yá kʋ.
30 Ba boŋə lɩ̀à təntə «wárʋ́ tə nə ba funə jə.»
Cɩ́gá, Ba-Yígúrə́-Jə-Tiu vɩga ba ʋ dʋgʋ.