Zweremi 7

Kʋ̀nkʋ̀n Yɩɩ twagʋ ba də̀ń jə

1 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 Zɩgɩ à mʋ̀ Ba-Yígúrə́-Jə-Tiu dìə̀ tə mimii nə, n ga swɩ̀n sʋgʋ kʋ tə: «Á mʋ̀ Zwida lʋʋ lɩ̀à tə mama á nə twá mimiən tə tə á zwɩ, á twɩ á nadwana yuu Ba-Yígúrə́-Jə-Tiu yáá con, á pɩn wá dun*, á cʋga kʋ tə Ba-Yígúrə́-Jə-Tiu nə swɩ̀n. 3 Nə̀ń kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: Á kwɩan á yʋa tə də á tʋtʋnɛɛ tə, á pa tə ya zəni, yá à wá yá aba, sə á ya bwálɩ́ kʋ tə wa. 4 Dànà ká jələ kʋ̀nkʋ̀n sʋ̀ràn tə yuu wa, á nə swɩ̀n, á wʋ́: “Ba-Yígúrə́-Jə-Tiu dìə̀ tə yɩ yəbə nə ka wulə! Ba-Yígúrə́-Jə-Tiu dìə̀ tə! Ba-Yígúrə́-Jə-Tiu dìə̀ tə!” 5 Á dàń nə kwɩan á yʋa tə də á tʋtʋnɛɛ tə mʋ̀ʋ́ cɩ́gá cɩ́gá, á ga bʋ̀rɩ̀ bʋra kʋ twá cɩ́gá cwəŋə nə, á pwə́rə́ wa. 6 Á nə wà dɩ̀àn tʋn vee, də bitarʋ, də kadənu yɩra, á nə wà lɩ̀à tə nə wà yoo cʋ̀gʋ̀ jana lwɛ́ bwálɩ́ kʋ tə wa, á nə wà yɩa duən con vəli, sə á ma cʋ̀gʋ̀ á tɩ̀àn, 7 à wá yá aba, sə á ya bwálɩ́ kʋ tə wa, lʋʋ nii kʋ tə wa, à nə pɩn á nɩbara-ba nə, sə ba tɩnɩ máŋá də máŋá mama wuuu.

8 Yá nə̀ń kʋ nə, á pìí á jələ kʋkʋn sʋ̀ràn yuu wa, tə nə ba də̀ń mama jə. 9 Á bʋŋa də á wàá á ŋwɩ̀n, á gwɩ lɩ̀à, á cwàrɩ̀, á dwì kʋkʋn duri, á sʋ̀rɩ́ wusinə á pɩn woŋwanʋ Baalə nə, á vwa á tɩ̀àn yɩa duən nə, á nə yəri tə, 10 á ga pìí á bà à yáá con dìə̀ ka tə wa, ba nə boŋə à yɩrɩ lá, á swɩ̀n á wʋ́: “N jon nəba,” yá kʋ kwa nə, sə á tə tʋn tʋtʋnbalwaran təntə mama naaa? 11 Á jələ dìə̀ ka tə ba nə boŋə à yɩrɩ ka wa, ndə ŋwɩna dìə̀ nə naaa? À mʋ̀ na də kʋ yɩ nətʋ. Ba-Yígúrə́-Jə-Tiu nii sʋgʋ nə!

12 Á dàń vələ bwálɩ́ tə wa, kʋ yà nə yɩ à mʋ̀ nyiən Silo nə, à yà nə dí yáá à pa à yɩrɩ tə ya lá. Á ywàŋá kʋ tə à nə ma tʋn kʋ bwálɩ́ təntə, yolwan tə yɩrɩ Yɩzərayɛlə lɩ̀à tə ba nə yɩ à lɩ̀à nə tʋn. 13 Yá sɩ́ʋ́n nə, á də tʋn tə yìə̀n təntə mama. À mʋ̀ Ba-Yígúrə́-Jə-Tiu nii sʋgʋ nə! À swɩ̀n á con də à bwɛ́, yá á wà lá tan, à bon aba, yá à wà sɛ̀. 14 Kʋ mʋ̀ nə pɩn, dìə̀ ka tə, ba nə boŋə à yɩrɩ ka wa, á nə jələ ka yuu wa, bwálɩ́ təntə à nə pɩn á mʋ̀ də á nɩbara-ba nə, à wá tʋn kʋ tə à nə tʋn Silo nə, ka də yɩra. 15 À wá vɩ aba à dʋgʋ yiŋʋnɩ də nə, ndə à nə vɩga á nubɩa Efərayimə dwíí tə mama nətʋ.»

Yɩɩ kʋ́ʋ̀ ba ʋ lɩ̀à tə yɩjʋnɩ cʋga

16 «N mʋ̀ Zweremi, dàn ká lòrì à mʋ̀ Yɩɩ n pa lalʋʋ kʋ tə nə. Dàn ká fwa yɩjʋnɩ, dàn ká bubwi n kə à nə, ba yɩrɩ. Dàn ká ja à nadwan nə, ba yɩrɩ. Cɩ́gá, à bá tan n con. 17 N ba kʋ tə ba nə tʋŋa Zwida tɩan tə wa, də Zwerizalɛmə coŋi tə yuu wa na naaa? 18 Bìsɩ́ná pɛ̀ dɛɛ, nyɩna-ba sʋ̀rɩ́ mən, yá kana bwì gàtó mun, sə ba pʋ̀rɩ̀ gàtó ba pa lanworu pakan^a tə nə, ba ga fwa divɛn jwəŋə ba pa yɩa duən nə, ba ma zɩ̀n à lɩŋa. 19 Kʋ yɩ à mʋ̀ yɩra nə ba tʋŋa lwanɩ naaa? À mʋ̀ Ba-Yígúrə́-Jə-Tiu nii sʋgʋ nə! Kʋ yɩ ba tətə yɩra nə ba tʋŋa lwanɩ, yá kʋ mɛ sə cavɩra ja ba.» 20 Kʋ mʋ̀ nə pɩn, nəŋə kʋ tə Yuu-Tiu Ba-Yígúrə́-Jə-Tiu nə swɩ̀n: «À wá pa à lɩŋa zàn tə pupwin bwálɩ́ kʋ tə yuu wa. Tə wá pupwin lɩ̀à tə də vàná tə yuu wa, də gaʋ tɩ̀án tə də tɩa tə lənə tə yuu wa. À lɩŋa tə wá ya ndə mən nə, tə nə ba dəŋi.»

Dwíí tə kʋ nə ba Yɩɩ nii zìlí

21 Nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: «Á kənə á jwəŋə tə ba nə sʋ̀rɩ́*, á jwəŋə tə duən tə con, sə á tətə də́ tə nàŋʋ́ tə. 22 Máŋá tə à nə lɩ á nɩbara-ba Ezwipətə lʋʋ nii tə wa, à wà yoo mama ba con swɩ̀n, à wà ba nii mama pɩn jwəŋə tə ba nə sʋrɩ*, də jwəŋə tə duən yuu wa. 23 Nii kʋ tə cɩcɩ nə à pɩn ba: “Á cʋga à kori, yá à wá ya á Yɩɩ, á də ga wá ya à lɩ̀à. Á tíə́ cwəŋə tə à nə bɩrɩ aba zəni, yá á wá ya pupwən lɩ̀à.” 24 Yá ba wà à sʋgʋ tə cʋgʋ, ba wà ba zɩɩn guni ba kə à con. Ba pìí ba twá ba zɩbaniu tʋtʋnkʋkwɩnan nə. Ba vɩga sə ba viviri ba yáá ba kə à con, ba ga viviri ba kwa ba ma sà nə. 25 Kʋ nə zɩgɩ dɩɩn tə nə, á nɩbara-ba nə nan Ezwipətə lʋʋ nii tə wa, kʋ bà kʋ yí zə̀n, à tʋn à tʋ̀tʋ̀nà tə mama, ba nə yɩ à nii sʋ̀sʋ̀nà á con dɩɩn mama, də à bwɛ́. 26 Yá á wà à sʋgʋ cʋgʋ, á wà á zɩɩn guni á kə à con. Á tʋn yɩdɩʋ, á ga tʋn lwanɩ á doni á nɩbara-ba.» 27 Ba-Yígúrə́-Jə-Tiu swɩ̀n Zweremi con, ʋ wʋ́: «N mʋ̀ Zweremi wá swɩ̀n sʋ̀ràn təntə mama ba con, yá ba bá tan n con, n wá bon ba, yá ba bá le mʋ́. 28 N dàń swɩ̀n ba con, də ba yɩ dwíí tə ba nə ba Ba-Yígúrə́-Jə-Tiu, ʋ nə yɩ ba Yɩɩ sʋgʋ cʋga, ba ga ba bɩra sɛ̀. Ka twá cɩ́gá ndə kʋ nə mɛ nətʋ kʋ́ʋ̀ tə̀lə́, ka yoo tə̀lə́ ba pubʋŋa wa.»

Lagʋrɩ vara tə yoo

29 «Zwerizalɛmə tɩ̀án-ba,

á gana á yukʋran nədaran tə

nə bɩrɩ də á yɩ Yɩɩ cɩcɩ nə tɩ^b tə, á dʋgʋ!

Á dɩa lúə́ pucʋnɩ gwaran pɛɛn tə yuparɩ wa!

Cɩ́gá, Ba-Yígúrə́-Jə-Tiu vɩga dwíí tə nə

pɩn ʋ lɩŋa tə pupwin, ʋ dʋgʋ.

30 Cɩ́gá, Zwida lʋʋ lɩ̀à tə tʋn kʋ tə nə lwara à yáá con. À mʋ̀ Ba-Yígúrə́-Jə-Tiu nii sʋgʋ nə! Ba ken ba wolwana tə dìə̀ tə wa, ba nə boŋə à yɩrɩ ka wa, ba pa ka jì durən won. 31 Ba lwə̀ jwəŋə dədwələn, ba nə boŋə Tofɛtə, Bɛn-Hinomə vara tə wa, sə ba ma sʋ̀rɩ́ ba bɩ̀á də ba bwɩ̀ɩ́ mən wa, ba ma fwa jwəŋə. Kʋ yɩ yoo tə, à yà nə wà nii pɩn, sə kʋ tʋn, kʋ yoo ga wà à pubʋŋa wa twi də tətə.

32 Kʋ mʋ̀ nə pɩn, máŋá bɩ̀àn, ba nə bá swɩ̀n Tofɛtə yoo, nə à yə̀ə́ Bɛn-Hinomə vara tə yoo, yá kʋ dàń nə yɩ lagʋrɩ vara yoo nə ba wá swɩ̀n. Ba wá gùrì tɩga Tofɛtə wa, bwálɩ́ nə tə̀lə́ yɩrɩ. 33 Dwíí kʋ tə tɩga tə wá ya lanworu zuŋi, də tɩa yuu vàná wodiu, yá lìù mama bá ya lá sə ʋ dɩŋa tə. 34 À wá pa cànà diŋə zizigu tə, də pupwən cə̀rí tə, də kasweri gwaran tə nyʋn Zwida tɩan tə də Zwerizalɛmə coŋi tə wa. Cɩ́gá, lʋʋ nii tə wá jì dibwərən cɩcɩ.»