8
1 Ba-Yígúrə́-Jə-Tiu swɩ̀n ʋ súrí lá, ʋ wʋ́: «Kʋ máŋá təntə wa, ba wá pìí ba lɩ Zwida pɛ̀gá tə kurən, də kʋ tʋ̀tʋ̀nán yun tɩ̀án tə kurən, də Yɩɩ joŋwana tə kurən, də Yɩɩ nii sʋ̀sʋ̀nà tə kurən, də Zwerizalɛmə tɩ̀án kurən libəri wa. À mʋ̀ Ba-Yígúrə́-Jə-Tiu nii sʋgʋ nə! 2 Ba wá larɩ kurən tə yɩcaʋ tə yáá con, də cànà tə yáá con, də kacɩlacɛɛ tə mama yáá con. Lɩ̀à təntə sóní lanworu tə wa wiən təntə. Ba tún ba nii tə con, ba vwa ba tɩ̀àn tə nə, ba tʋn ba pa tə, ba ga tʋ tə yáá con, ba pa tə dun. Ba bá pɛ̀ kurən təntə ba gùrì. Tə wá mɛn tɩa tə yuu wa, tə pʋ, tə jì pùrú. 3 Dwíí kʋkwɩʋn təntə gɩganɩ* tə wá sóní tɩan ba doni mɩɩ, bwálá tə mama wa, à nə wá dɩŋa ba à kə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!»Yɩzərayɛlə lɩ̀à zɩɩn ba nə̀ń cɩ́gá cɩ́gá
4 Ba-Yígúrə́-Jə-Tiu swɩ̀n Zweremi con, ʋ wʋ́: «Swɩ̀n ba con də à mʋ̀ Ba-Yígúrə́-Jə-Tiu bwe ba sə à jə́n,
lìù yàá tʋ, ʋ ga ba pìí ʋ zaŋa naaa?
Lìù yàá dwá cwəŋə, ʋ ga ba pìí ʋ kəni ʋ kwa naaa?
5 Bɛ̀ɛ̀ dàń nə pɩn
Zwerizalɛmə tɩ̀án ba tə mʋ̀ ma vɩ à nii,
ba ga tʋŋa ba pwìí bələ yìə̀n tə wuuu?
Ba tə vwe ba tɩ̀àn kʋ̀nkʋ̀n yɩa nə,
ba vɩ sə ba pìí ba bà à con.
6 À cʋgʋ ba sʋgʋ zəni:
Yìə̀n tə ba nə swɩ̀n ba də̀ń mama jə.
Ba lìù mama pùə́ ba cʋ̀gà,
ʋ wʋlʋŋʋ tʋ̀tʋ̀nán tə yɩrɩ,
ʋ ga ba ʋ tɩ̀àn bwe sə ʋ jə́n, bɛ̀ɛ̀ nə ʋ fwa?
Ba mama yàá pìí ba zʋ ba tʋtʋnkʋkwɩnan tə wa lala,
ndə səsən nə dəri ka vələ kʋ̀ʋ̀.
7 Zənbətwələ də tətə nə wulə lanworu tə wa, yə̀ə́ ka vìrú máŋá,
gunpwənə, də kalɩnlara, də dwanʋ yàá mɩ̀nɩ̀ tə túrí máŋá.
Yá à lɩ̀à tə mʋ̀ yəri yìə̀n tə à nə tún
sə ba twá tə nə máŋá.»
Kʋ̀nkʋ̀n wʋbʋnyɩna sʋ̀ràn ba sáŋʋ́ jə
8 Ba-Yígúrə́-Jə-Tiu swɩ̀n, ʋ wʋ́:
«Á swɩ̀n á wʋ́: “Nə yɩ yənu tɩ̀án,
nə mʋ̀ nə jə Ba-Yígúrə́-Jə-Tiu nii yìə̀n tə yənu.”
Kʋ twá nətə á ma wàá nətʋ á swɩ̀n,
á karnyɩna ba ga lwàń Yɩɩ nii tə, ba pʋ́pʋ́ná tə wa?
9 Cavɩra jə wʋbʋnyɩna tə,
fən zʋa ba, yoo yí ba.
Ba nə vɩga Ba-Yígúrə́-Jə-Tiu sʋgʋ tə,
bɛ̀ɛ̀ wʋbʋŋa nə ba kʋ́ʋ̀ jə?»
Lɩ̀à duən bʋŋa də fən tə̀lə́
10 Ba-Yígúrə́-Jə-Tiu swɩ̀n, ʋ wʋ́:
«Kʋ mʋ̀ nə pɩn,
à wá pa ba kana tə lɩ̀à duən nə,
à ga pa lɩ̀à duən jon ba kárɩ́ tə ba tɩnɩ.
Cɩ́gá, kʋ nə zɩgɩ ba nəmaa nə,
kʋ va kʋ yí ba nəkwɩa,
ba mama yɩ wiən ba pɩ̀à.
Kʋ nə zɩgɩ Yɩɩ nii sʋ̀sʋ̀nʋ̀,
kʋ va kʋ yí Yɩɩ joŋwanʋ,
ba mama yɩ gɩgɩra yìə̀n ba tʋŋa.
11 Ba ba cʋcʋran tə nə wá bà à lɩ̀à tə yuu wa jələ ndə cɩ́gá cɩ́gá yoo nə,
kʋ pa ba swɩ̀n, ba wʋ́:
“Yazurə wulə! Yazurə wulə!”
Yá yazurə tə̀lə́ mɩ́ámɩ́án!
12 Cavɩra yà mɛ sə tə ja ba,
yobalwaran tə yɩrɩ ba nə tʋn,
yá cavɩra ba ba jə,
ba nə kʋ́ʋ̀ yəri cavɩra yɩrɩ.
Kʋ mʋ̀ nə pɩn,
ba də wá twá ba ya lɩ̀à tə wa ba nə wá tɩ.
Ba wá tʋ tɩa, máŋá tə wa à nə wá zɩgɩ ba nə.
À mʋ̀ Ba-Yígúrə́-Jə-Tiu nii sʋgʋ nə!»
Yɩɩ pucʋnɩ də lalʋʋ tə pucʋnɩ yoo
13 Ba-Yígúrə́-Jə-Tiu swɩ̀n ʋ wʋ́:
«À wá zwɛ̀ ba mɩ́ámɩ́án.
À mʋ̀ Ba-Yígúrə́-Jə-Tiu nii sʋgʋ nə!
Divɛn tɩ̀án bɩ̀á kʋ́ʋ̀ tə̀lə́ divɛn tɩ̀ʋ́ yuu wa,
kapɩra də kʋ́ʋ̀ tə̀lə́ kapɩrʋ yuu wa.
Tə vʋran də tətə pɩ̀nɩ̀.
À dàń yá tə à pa lɩ̀à tə nə, ba nə kɛ̀ń.
14 Bɛ̀ɛ̀ nə pɩn nə jə̀ə́?
Á bɩ̀àn duən yáá,
sə nə va nə tɩ tɩan tə wa,
ba nə lwə̀ ba kɩkarɩ də biritaŋʋ!
Cɩ́gá, Ba-Yígúrə́-Jə-Tiu,
nə tíú Yɩɩ pɩn nə nyʋn lá.
Ʋ pɩn nə nyʋn nɩ́á,
ba nə ken fwanan tə wa,
nə nə tʋn cʋna nə zɩgɩ ʋ nə yɩrɩ.
15 Nə yà jə sìə́ yala,
yá nə wà yozəŋu mama nɩ.
Nə yà dànɩ̀ sə na yazurə,
yá fən nə pìí tə jə nəba.
16 Nə manwarɩ nə nə̀ń dʋŋa tə səsen fʋ̀rà,
Dan tɩʋ tə vàn con.
Ba səsen tə sɩsɩan pɩn tɩa tə mama vuvugə.
Ba bɩ̀àn sə ba cʋ̀gʋ̀ lʋʋ nii tə,
ba ga pɛ̀ kʋ wa wiən tə mama,
sə ba ga cʋ̀gʋ̀ tɩʋ tə, də kʋ wa ləzwənbɩa tə mama.»
17 «Cɩ́gá, à tʋn dəŋa á nə,
tə yɩ dəkwɛɛ tə cwan nə dà,
yá á wàrɩ̀ tə á gɩgarɩ, sə tə dàn ká dɩŋa aba.»
Ba-Yígúrə́-Jə-Tiu nii sʋgʋ nə!
Zweremi pùə́ cʋ̀gʋ̀
18 À pucʋnɩ tə ba tɩ̀ʋ́ jə,
à bɩcan yɩ̀ nə à waa con.
19 Á cʋga! À lɩ̀à tə bubwi
lʋʋ nii wa, kʋ nə ŋʋ́ná,
ba pɩ̀à sáŋʋ́, ba swɩ̀n, ba wʋ́:
«Ba-Yígúrə́-Jə-Tiu kʋ́ʋ̀ tə̀lə́ Siyon wa naaa?
Siyon* tɩʋ tə kʋ́ʋ̀ ba pɩ̀ʋ́ jə naaa?»
«Bɛ̀ɛ̀ nə pɩn ba ja ba woŋwanan tə,
tə mʋ̀ dwíə́ nəkaran* tə woywanan tə
ba ma zɩ̀n à lɩŋa?»
20 Ba tʋn fɔɔ ba zwɛ̀, tɩpuri yí kʋ yígúrə́,
yá nə mʋ̀ ga tə dànɩ̀ sə Yɩɩ jon nəba.
21 Cʋcʋran tə nə yí à lɩ̀à tə pɩn à nyʋnyʋgʋ mɩ́ámɩ́án.
Pucʋnɩ zʋa nə zənzən,
kʋ pa à jɩ̀àn gwàrɩ̀ mɩ́ámɩ́án.
22 Tɩ̀ʋ́ kʋ́ʋ̀ tə̀lə́ Galadəa nə, kʋ ywarɩ lìù naaa?
Dɩmʋtʋrʋ də kʋ́ʋ̀ tə̀lə́ lá naaa?
Bɛ̀ɛ̀ dàń nə pɩn à lɩ̀à tə yayɩgʋ tə wàrɩ̀ kʋ zwɛ̀?
23 À yà swə sə à yuu jì ndə vɩlɩ nə,
kʋ nɩ́á nə ba zwɛ̀,
sə à yɩ́á ga jì ndə nabuliyɩa nə,
sə à ma kwi à lɩ̀à tə tɩga tə nə, yɩcaʋ də tɩtɩn!