Lɩ̀à tə mama jìgə̀ kʋ̀nkʋ̀na
9
1 Aaa! À yà nə jə vələ yipaa bwálɩ́kasɔɔ lanworu tə wa,
à yà wá yá à lʋʋ lɩ̀à tə, à ga va yiŋʋnɩ.
Cɩ́gá, ba mama cwàrɩ̀,
ba ga yɩ pwìí bələ tɩ̀án.
2 Ba nəndəli yɩ ndə twan nə van ka dɩ̀.
Kʋ tà kʋ twá cɩ́gá nə,
ba ma jì lʋʋ nii kʋ tə yáá tɩ̀án,
kʋ yɩ kʋ twá də kʋ̀nkʋ̀n.
Cɩ́gá, kʋ yɩ wʋlʋŋʋ də wʋlʋŋʋ nə ba tʋŋa,
ba pàlɩ́ duən yuu,
yá ba yáá tə̀lə́ də nə.
À mʋ̀ Ba-Yígúrə́-Jə-Tiu nii sʋgʋ nə!
3 Á lìù mama cɩ̀ ʋ tɩ̀àn nə də ʋ dabɛɛ!
Á dànà ká jələ á nubiu mama yuu wa.
Cɩ́gá, nubiu mama yɩ gɩgɩrɩnyiən,
yá dabɛɛ mama yɩ tɩjanyiən.
4 Ba yàá gɩgɩrɩ duən,
ba lìù mama ba cɩ́gá swɩ̀n.
Ba nəndəli mɩ̀n ka kʋna kʋ̀nkʋ̀n.
Ba tʋn yolwana ba mɩ̀n,
kʋ pa ba kʋ́ʋ̀ wàrɩ̀ ba yá.
5 Ba tʋŋa dɩ̀àn lɩ̀à yɩra də ba bwɛ́,
ba gɩgɩrɩ lɩ̀à də ba bwɛ́.
Ba vɩga sə ba yəni nə.
À mʋ̀ Ba-Yígúrə́-Jə-Tiu nii sʋgʋ nə!
6 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu,
ʋ nə yɩ kwatara Yɩɩ nə swɩ̀n:
«À wá kwɛn ba durən à lɩ,
ndə ba nə nyɩan wárʋ́ mən wa,
ba lɩ kʋ durən.
Cɩ́gá, bɛ̀ɛ̀ nə à kʋ́ʋ̀ wá tʋn à lɩ̀à tə yɩra?
7 Ba nəndəli yɩ ndə cɩɩn nə,
kʋ nə gwɩ lɩ̀à!
Ba nii sʋgʋ yɩ gɩgɩra.
Ba yàá swɩ̀n sìə́ yoo ba nii wa, ba jəndon con,
yá ba bɩcan wa, kʋ yɩ nyala ba kəni ʋ nɛɛ də̀ń.»
8 Kʋ wà mɛ sə à zɩgɩ ba nə naaa?
À mʋ̀ Ba-Yígúrə́-Jə-Tiu nii sʋgʋ nə!
Kʋ wà mɛ sə à fwi à lɩŋa dwíí yiri təntə yuu wa naaa?
Kwirə də lúə́ pucʋnɩ gwaran máŋá
9 À wá kwi yinəgə kwirə pɛɛn tə yuu wa.
À wá dɩ lúə́ pucʋnɩ gwaran lʋʋ nii tə vàná gaʋ tə yɩrɩ.
Cɩ́gá, mən dí kʋ mama,
lìù mama kʋ́ʋ̀ ba lá twá.
Ba kʋ́ʋ̀ ba vàná kwirə nə̀ń lá nə.
Zuŋi tə də vàná tə mama dəri,
won mama wà lá gɛ!
10 Ba-Yígúrə́-Jə-Tiu swɩ̀n, ʋ wʋ́:
«À wá pa Zwerizalɛmə jì kapana púlí,
kʋ nə yɩ cirəkuri bʋran bwálɩ́.
À wá pa Zwida tɩan tə cʋ̀gʋ̀ mɩ́ámɩ́án,
tə jì bwálɩ́ lìù mama nə tə̀lə́ lá.»
11 Wàà nə yɩ wʋbʋnyiən,
ʋ nə nə̀ń yìə̀n təntə də̀ń,
sə ʋ gwìń tə ʋ bɩrɩ?
Də Ba-Yígúrə́-Jə-Tiu nə swɩ̀n ʋ con,
sə ʋ pa ba lwarɩ won tə nə pɩn lʋʋ nii tə cʋ̀gʋ̀,
də won tə nə pɩn kʋ jì kasɔɔ lanworu,
lìù mama nə ba lá twá!
12 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Ba vɩga à nii yìə̀n tə à nə pɩn ba, ba vɩga sə ba zìlí à nii, sə ba twá yìə̀n tə nə, à nə bɩrɩ ba, 13 ba ga pìí ba twá ba zɩbaniu tʋtʋkʋkwɩnan nə, ba ga vwa ba tɩ̀àn woŋwanan Baalə tə nə, ba nɩbara-ba nə pɩn ba mɩ̀n tə. 14 Kʋ mʋ̀ yɩrɩ, nə̀ń kʋ tə à mʋ̀ Ba-Yígúrə́-Jə-Tiu, kwatara Yɩɩ tə, à nə yɩ Yɩzərayɛlə lɩ̀à Yɩɩ nə swɩ̀n: à wá pa ba dɩŋa kala, à ga pa ba nyʋn nɩ́á, ba nə ken fwanan tə wa. 15 À wá laga ba duən yáá nə, à kə dwíə́ nəkaran* wa, ba nə yəri tə, ba nɩbara-ba də ga wà tə yəni. Yá à tə wá pa dʋŋa pú ba kwa də kwatara sɩ̀ʋ́ wuuu, kʋ va kʋ yí à nə wá cʋ̀gʋ̀ ba à zwɛ̀ mɩ́ámɩ́án.» 16 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n:
«Á bʋŋa zəni!
Á boŋə kana tə nə kwi zənzən, sə ba bà!
Á boŋə ba tə nə yə̀ə́ lúə́ kwirə zəni, sə ba bà!
17 Ba bɩ̀án lala,
ba dɩ lúə́ pucʋnɩ gwaran ba pa nəba,
sə nə yɩ́á sú də yɩnɩa,
tə pàlɩ̀ nə yáá wa!»
18 Cɩ́gá, lúə́ pucʋnɩ gwaran naŋa Siyon vàn con:
«Aaa! Ba cʋ̀gʋ̀ nəba mɩ́ámɩ́án,
ba ken cavɩra nə nə zənzən!
Nə mɛ sə nə nan nə yá lʋʋ nii tə,
Ba nə gwɛrɩ nə dìì tə yɩrɩ!»
19 Kana-ba, á cʋga Ba-Yígúrə́-Jə-Tiu sʋgʋ!
Á súrə́ á zɩan, á cʋgʋ kʋ tə, ʋ nə swɩ̀n!
Á kwìə̀ á bwɩ̀ɩ́ tə yinənkwirə,
sə á bɩrɩ lúə́ pucʋnɩ gwaran duən nə.
20 Cɩ́gá, tɩan twá nə təkurə,
tə zʋ nə dizəŋə tə wa,
tə janɩ bɩ̀sɩ̀ná coŋi yuu wa,
tə ga janɩ ləzwəndʋn tə kanpwərən wa.
21 Ba-Yígúrə́-Jə-Tiu Zweremi con swɩ̀n, ʋ wʋ́:
«N mʋ̀ Zweremi,
nə̀ń à mʋ̀ Ba-Yígúrə́-Jə-Tiu nii sʋgʋ nə,
swɩ̀n kʋ n bɩrɩ:
“Ləzoni tə tɩga wá larɩ tɩa mama,
ba pʋ, ba jì ndə pùrú nə,
ba nə ken kárá wa.
Ba wá ya ndə mɩyun nə,
lìù mama nə ba tə con taŋa,
lɩ̀à tə kwa, ba nə dəri mɩna!”»
Cɩ́gá cɩ́gá wʋbʋŋa yoo
22 Nə̀ń kʋ tə Ba-Yígúrə́-Jə-Tiu nə swɩ̀n:
«Wʋbʋnyiən dàn ká fwa fwiə, ʋ wʋbʋŋa tə yɩrɩ!
Dɩ̀àn tíú dàn ká fwa fwiə, ʋ dɩ̀àn tə yɩrɩ!
Jɩjə tíú dàn ká fwa fwiə, ʋ jɩjə tə yɩrɩ!
23 Lìù nə pɩ̀à sə ʋ fwa fwiə,
sə kʋ ya ʋ nə jə pubʋŋa,
ʋ ga yə̀ə́ nə yɩrɩ.
Ʋ yə̀ə́ də à yɩ Ba-Yígúrə́-Jə-Tiu,
à nə tʋŋa wʋywaŋʋ*,
də kʋ tə nə yɩ mənəmənə*,
də kʋ tə nə tì cɩ́gá cwəŋə tɩa yuu wa.
Cɩ́gá, mə yìə̀n təntə nə twá à fɩra nə.»
Ba-Yígúrə́-Jə-Tiu nii sʋgʋ nə!
Goŋu ba càn yáá nə cɩ̀
24 Ba-Yígúrə́-Jə-Tiu swɩ̀n, ʋ wʋ́: «Máŋá bɩ̀àn, à nə wá zɩgɩ lɩ̀à tə mama nə, ba nə goŋi ba, kʋ nə yɩ yofwamɩʋn yɩrɩ. À mʋ̀ Ba-Yígúrə́-Jə-Tiu nii sʋgʋ nə! 25 Ba mʋ̀ nə yɩ Ezwipətə tɩ̀án, də Zwida lʋʋ lɩ̀à tə, də Edomə tɩ̀án, də Amon dwíí tə, də Mʋabə tɩ̀án, də dwíə́ tə mama nə fɩnɩ ba twanjərən, ba nə wulə kasɔɔ lanworu tə wa. Cɩ́gá, dwíə́ təntə mama wà goŋi, yá Yɩzərayɛlə lɩ̀à tə də mama bɩcanɩ yɩ ndə ba nə wà ba goŋi.»