Ba-Yígúrə́-Jə-Tiu də woŋwanan yoo
10
1 Yɩzərayɛlə lɩ̀à-ba, á cʋga kʋ təBa-Yígúrə́-Jə-Tiu nə swɩ̀n á con!
2 Nəŋə kʋ tə ʋ nə swɩ̀n:
«Á dànà ká kwè dwíə́ nəkaran* tə tʋtʋnɛɛ tə.
Á dànà ká pa fən ja aba mɩmɩnan tə yɩrɩ,
tə nə wulə lanworu wa.
Kʋ yɩ dwíə́ nəkaran tə nə dəri tə fən.
3 Cɩ́gá, dwíə́ nəkaran tə yofwamɩnan tə yɩ tʋtʋ, ndə vʋʋ nə.
Dasəru yàá gwəŋə dàʋ̀ gaʋ wa,
ʋ ma sà woŋwanʋ,
4 ba ja wárʋ́ də sɩ́án ba ma mwàlɩ̀ kʋ,
ba ga ja marəto də cɩan ba ma pa kʋ,
ba zɩgɩ yɩɩ nə,
sə kʋ dàn ká vuvugu.
5 Tə woŋwanan təntə yɩ ndə
ba nə púə́ yupuu dakunə yuu nə, kárá wa.
Tə ba swɩ̀n.
Tə yɩ ba zɩŋa, ba zɩga tə,
tə nə wàrɩ̀ tə vəli yɩrɩ.
Á dànà ká dəri tə fən,
tə wàrɩ̀ yolwan mama tə tʋŋa,
ndə tə nə wàrɩ̀ yozəŋu mama tə tʋŋa nətʋ.»
6 N ba kamandon jə, Ba-Yígúrə́-Jə-Tiu!
N yɩ Yɩɩ tə, n nə dwə tə mɛ,
n mʋ̀ yɩrɩ tə nə wulə tə mɛ yuu wa.
7 Wàà nə bá dəri n fən, dwíə́ tə mɛ pɩ̀ʋ́?
N mʋ̀ cɩcɩ nə mɛ sə ba dəri n fən.
Cɩ́gá, n ba kamandon jə,
dwíə́ nəkaran tə wʋbʋnyɩna tə mama wa,
də payun tə mama wa.
8 Ba mama yɩ ləyirən, ba ba pubʋŋa jə.
Ba yɩa tə wàrɩ̀ ba yoo mama tə bɩrɩ,
tə yɩ dàʋ̀.
9 Tə yɩ Tarəsisə tɩ̀án wárʋ́ pɩ́pàrán,
də Ufazə tɩ̀án sɩ́án nə ba ma nàn tə.
Tə yɩ jɩɩn tʋ̀tʋ̀nán yənu tíú,
də cɩnayarʋ nə yàá fwa tə,
ba ja gànʋ̀ nəsɩan də nəlinu, ba ma zʋ tə.
Tə mama yɩ ləzoni nə fwa də ba yənu.
10 Yá cɩ́gá mama, Ba-Yígúrə́-Jə-Tiu nə yɩ Yɩɩ.
Ʋ yɩ Yɩɩ tə ʋ nə wulə,
ʋ ga yɩ pɩ̀ʋ́ máŋá mama wuuu.
Ʋ lɩŋa nə zàn, tɩa yàá sisigi.
Dwíə́ nəkaran tə wàrɩ̀ ʋ lɩŋa tə yáá nə ba zɩga.
11 Nə̀ń kʋ tə, á nə wá swɩ̀n ba con:
Yɩa tə nə wà lanworu tə də tɩa tə fwa,
wá nyʋn tɩa yuu wa, lanworu tə də̀ń nə.
12 Ba-yígúrə́-Jə-Tiu fwa tɩa tə,
ʋ ma bɩrɩ ʋ dɩ̀àn.
Ʋ wʋbʋŋa nə ʋ ma dɩ lʋʋ tə də̀ń,
ʋ ga ja ʋ yənu ʋ ma larɩ lanworu tə.
13 Ʋ nə súrí ʋ nii nə,
nɩ́á tə yàá va duən yáá, lanworu tə wa.
Ʋ yàá pa bakwan nəfaran nan tɩa yígúrə́ con, tə bà.
Ʋ yàá pa dwà pɩpɩlɩ, ka nɩ̀.
Ʋ yàá pa vʋʋ nan kʋ bwálɩ́ wa, kʋ fuli.
14 Lɩ̀à tə mama jìgə̀ ləyirən, ba ba yənu jə.
Cɩnayarʋ mama woŋwanʋ tə ʋ nə fwa
cavɩra jə wa,
ʋ woŋwanan tə nə yɩ tʋtʋ yɩrɩ.
Tə ba siŋu jə mɩ́ámɩ́án.
15 Tə yɩ wovɛɛ, tə yɩ mʋmʋn wiən.
Dɩɩn tə Yɩɩ nə wá zɩgɩ tə nə, tə wá nyʋn lá.
16 Yá Zwakɔbə Yɩɩ tə mʋ̀ tà ndə tə nə.
Cɩ́gá, ʋ mʋ̀ nə fwa won mama,
yá Yɩzərayɛlə dwíí tə yɩ ʋ mʋ̀ nə tɩ.
Ʋ yɩrɩ nə yɩ Ba-Yígúrə́-Jə-Tiu, kwatara Yɩɩ*.
Càn tə nə bɩ̀àn yoo
17 Zwerizalɛmə tɩ̀án-ba, á pɛga á zɩla tɩa,
á mʋ̀ lɩ̀à tə ba nə púə́ ba kə sə ba ta.
18 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«Naa ka tə nə, à wá dɩlɩ lʋʋ nii tə lɩ̀à tə yiŋʋnɩ,
ndə kapan nə, ba nə dɩlɩ də kapadɩlʋ,
yá à wá ywàń ba yuu nə zəni,
sə ba dàn ká wànɩ́ ba jɛ́n ba dʋŋa yáá nə.»
19 Zwerizalɛmə tɩ̀án swɩ̀n, ba wʋ́:
«Lɛɛ yí nəba! Nə mama pʋpʋgʋ!
Nə nʋʋ tə wàrɩ̀ kʋ zwɛ̀!
Nə yà swɩ̀n nə waa con də kʋ ba yoo jə,
nə wá pɩ́án nə càn tə.
20 Yá ba cʋ̀gʋ̀ nə gansili tə,
ba karɩ kʋ ŋoni tə mama.
Nə bɩ̀á tə kɛ̀ń ba yá nəba,
ba kʋ́ʋ̀ tə̀lə́!
Lìù kʋ́ʋ̀ tə̀lə́ sə ʋ pìí ʋ zɩ̀n nə gansili tə,
ʋ zɩgɩ yɩɩ nə, ʋ pa nəba.»
21 Cɩ́gá, yáá tɩ̀án tə nə yɩ ndə payɩra nə,
yɩn ləyirən, ba wà Ba-Yígúrə́-Jə-Tiu pɩ̀à.
Kʋ mʋ̀ nə pɩn ba bá wʋbʋŋa jə,
yá lɩ̀à tə mama ba yà nə ywàŋá ba yuu,
ndə pee nə, dàń laga duən yáá nə.
22 Á cʋga zizigu kʋ tə, kʋ nə bɩ̀àn!
Kʋ yɩ zizigu nəfarʋ nə naŋa
jɩzən saparʋ lʋʋ nii tə con kʋ bɩ̀àn,
sə kʋ cʋ̀gʋ̀ Zwida tɩan tə mɩ́ámɩ́án,
kʋ pa tə jì cirəkuri bʋran bwálɩ́.
Zweremi jʋn Yɩɩ, lalʋʋ tə yɩrɩ
23 Ba-Yígúrə́-Jə-Tiu, à yə̀ə́ də
ləzwənə ba yoo tə nə wá yí wá dɩ̀àn jə.
Ləzwənə wàrɩ̀ ʋ tətə napɩrɩ vəli yuu ʋ ywàŋá.
24 Ba-Yígúrə́-Jə-Tiu, pá nə
n kə cwəŋə wa, ndə kʋ nə mɛ nətʋ,
n nə dàn ká tʋn kʋ də lɩŋa,
kʋ nə tà nətʋ, n wá cʋ̀gʋ̀ nə mɩ́ámɩ́án.
25 Pa n lɩŋa tə zàn dwíə́ nəkaran* tə mʋ̀ʋ́ yuu wa,
ba nə yəri mʋ́, də dwíə́ tə yuu wa,
ba nə ba boŋə ba kəni n yɩrɩ tə nə!
Cɩ́gá, ba ta Zwakɔbə dwíí tə ba də́.
Ba ta ba ba də́ mɩ́ámɩ́án,
ba ga cʋ̀gʋ̀ ba lʋʋ nii tə mɩ́ámɩ́án.