Nimarʋ tə nə cʋ̀gʋ̀ yoo
11
1 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 «Cʋgʋ nimarʋ kʋ tə sʋ̀ràn tə, n ga swɩ̀n tə Zwida lʋʋ lɩ̀à tə, də Zwerizalɛmə tɩ̀án con. 3 N wá swɩ̀n ba con də à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ swɩ̀n də lɛɛ wá yí lìù tə mama, ʋ nə bá cʋgʋ nimarʋ kʋ tə sʋ̀ràn tə, 4 à nə pʋ́pʋ́nɩ́ à pa á nɩbara-ba nə, máŋá tə wa à nə lɩ ba Ezwipətə lʋʋ nii tə wa, càn tə wa tə nə yɩ ndə líí mən nə. À swɩ̀n ba con, à wʋ́: “Á cʋga à kori, á ga tʋn kʋ tə mama à nə pɩn aba nii sə á twá kʋ nə, yá á dàń wá ya à mʋ̀ lɩ̀à, à də ga wá ya á Yɩɩ. 5 Mə nətʋ nə à dàń wá pa nikanɩ tə à kàn də á nɩbara-ba, sə à pa ba lʋʋ nii, nayɩla də tʋ̀ràn nə súə́ lá tə pàlɩ̀, nii sú. Mə kʋ bwálɩ́ təntə wa nə, á wulə zə̀n.”» Yá à mʋ̀ Zweremi le, à wʋ́: «Amɩna, Ba-Yígúrə́-Jə-Tiu!» 6 Ba-Yígúrə́-Jə-Tiu swɩ̀n à con, ʋ wʋ́: «Bòrì sʋ̀ràn tə tə mama Zwida tɩan tə wa, də Zwerizalɛmə coŋi tə wa, n swɩ̀n n wʋ́: “Á cʋga nimarʋ kʋ tə sʋ̀ràn tə, á ga zìlí tə nii. 7 Cɩ́gá, à swɩ̀n á nɩbara-ba con nɛɛ kapʋpʋ, kʋ nə zɩgɩ máŋá tə wa, à nə pɩn ba nan Ezwipətə lʋʋ nii tə wa, kʋ bà kʋ yí zə̀n. À swɩ̀n ba con kʋ jɩjʋ mama, sə ba cʋgʋ à kori, 8 yá ba wà à con tan. Ba wà ba zɩɩn guni ba kə à con. Ba lìù mama yɩ ʋ twá ʋ zɩbaniu tʋtʋkʋkwɩnan nə. Kʋ mʋ̀ nə pɩn, à ma tʋn nimarʋ kʋ tə wa yìə̀n tə mama, à zɩgɩ ba nə, à pa tə nii sú. Cɩ́gá, à yà swɩ̀n ba con, sə ba zìlí tə nii, yá ba vɩga sə ba zìlí tə.”»9 Ba-Yígúrə́-Jə-Tiu swɩ̀n à con, ʋ wʋ́: «Pwìí bələ yoo wulə Zwida lʋʋ lɩ̀à də Zwerizalɛmə tɩ̀án wa! 10 Ba pìí ba tʋŋa ba nɩbara-ba cʋna tə, ba nə vɩga sə ba cʋgʋ à sʋ̀ràn tə. Ba pìí ba vwa ba tɩ̀àn yɩa duən nə, ba jʋnɩ tə. Yɩzərayɛlə də Zwida lʋʋ lɩ̀à cʋ̀gʋ̀ à nimarʋ tə, à nə tún də ba nɩbara-ba. 11 Kʋ mʋ̀ yɩrɩ, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: À wá pa lɛɛ yí ba, ba nə bá wànɩ́ ba jɛ́n tə yáá nə. Ba wá bubwi ba kə à nə, yá à bá tan ba con. 12 Zwerizalɛmə tɩ̀án də Zwida tɩan tə duən lɩ̀à dàń wá va ba bubwi ba kə yɩa tə nə, ba nə sʋ̀rɩ́ wusinə ba pa tə, yá yɩa təntə bá wànɩ́ tə jon ba, ba lɛɛ tə máŋá wa. 13 Cɩ́gá, á mʋ̀ Zwida lʋʋ lɩ̀à jə yɩa kapʋpʋ, ndə á tɩan tə nə dáá nətʋ! Á mʋ̀ Zwerizalɛmə tɩ̀án də jə joŋi bwálá kapʋpʋ, ndə á coŋi tə nə dáá nətʋ. Joŋi bwálá təntə yɩ á ma sʋ̀rɩ́ jwəŋə á pɩn woŋwanʋ Baalə nə, kʋ nə yɩ cavɩwon. 14 N mʋ̀ Zweremi, dàn ká ja à nadwan nə, lalʋʋ kʋ tə yɩrɩ. Dàn ká bubwi n kə à nə, dàn ká lòrì nə ba yɩrɩ. Cɩ́gá, à bá tan ba con, máŋá tə wa ba nə wá bon ba kə à nə, ba lɛɛ tə wa.»
Ba-Yígúrə́-Jə-Tiu caga ʋ lɩ̀à tə nii nə
15 Ba-Yígúrə́-Jə-Tiu swɩ̀n, ʋ wʋ́:
«Bɛ̀ɛ̀ nə lalʋʋ tə à nə swə,
kʋ́ʋ̀ bɩ̀àn sə ba fwa à dìə̀ tə wa?
Ba cʋ̀gà culən nəfaran kapʋpʋ!
Á nikana tə də á jwəŋə nàŋá tə wàá tə pɩn
càn ba aba yí naaa?
Mə nətʋ nə á wá twá á ma jɛ́n càn tə yáá nə naaa?
16 À mʋ̀ Ba-Yígúrə́-Jə-Tiu yà dɩga n yɩrɩ,
“Olivə tɩ̀ʋ́, kʋ nə twə̀ vʋbwalan,
kʋ bɩ̀á nə ziən, tə ga jə fɩra,”
yá zizigu nəfarʋ wa,
à dɩga mən kʋ vʋran tə nə,
yá kʋ naywalan tə cʋ̀gʋ̀.»
17 Ba-Yígúrə́-Jə-Tiu, ʋ nə yɩ kwatara Yɩɩ nə cwɛn mʋ́, yá sɩ́ʋ́n nə, ʋ swɩ̀n də lɛɛ wá yí mʋ̀ cʋna tə yɩrɩ, Yɩzərayɛlə də Zwida lʋʋ lɩ̀à nə tʋn ba zɩgɩ ba tɩ̀án nə. Cɩ́gá, ba sʋ̀rɩ́ jwəŋə ba pa woŋwanʋ Baalə nə, ba ma zɩ̀n ʋ lɩŋa.
Zweremi dìə̀ lɩ̀à zàn ba zɩga ʋ nə
18 Ba-Yígúrə́-Jə-Tiu pɩn à lwarɩ à dʋŋa tə pubʋŋa tə, yá à dàń yə̀ə́ kʋ tə ba nə tanɩ. Ʋ pɩn à na ba tʋtʋnɛɛ tə. 19 À mʋ̀ yà yɩ ndə pabiə nə, à nə yá à tɩ̀àn, à pa ba ja vələ nangʋra dìə̀ wa. À yà yəri kʋ tə ba nə tanɩ ba ja zɩga à nə. Ba yà swɩ̀n ba wʋ́: «Nə cʋ̀gà tɩ̀ʋ́ tə də kʋ tə jə dɩ̀àn! Nə lɩa kʋ tɩa yuu wonəŋə wa, sə ba dàn ká pìí ba lìí kʋ yoo!»
20 Yá n mʋ̀ Ba-Yígúrə́-Jə-Tiu, n nə yɩ kwatara Yɩɩ,
n bʋ̀rɩ̀ bʋra, kʋ twá cɩ́gá nə.
N yə̀ə́ ləzoni pubʋŋɩ də ba bɩcanɩ yìə̀n.
À wá na n nə wá fwi n lɩŋa ba yuu wa nətʋ.
Cɩ́gá, à yá à tɩ̀àn n jɩɩn wa, sə n jon nə.
21 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu nə swɩ̀n ʋ zɩga Anatɔtə tɩ̀án nə, ba nə pɩ̀à sə ba lɩ à mɩɩ, ba ga swɩ̀n, ba wʋ́: «Dàn ká twá də Ba-Yígúrə́-Jə-Tiu yɩrɩ tə, n ma swɩ̀n Yɩɩ nii sʋ̀ràn, kʋ nə tà nətʋ, nə wá gʋ mʋ́.» 22 Á dàń nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: «À wá zɩgɩ ba nə. Ba ləzwəndʋn wá tɩ kʋ̀ʋ̀ wa, niən ga gʋ ba bɩ̀á də ba bwɩ̀ɩ́. 23 Bɩnɩ tə à nə wá zàn à zɩgɩ Anatɔtə tɩ̀án nə, à pa lɛɛ yí ba, ba ladʋa tətə ba ga lʋʋ wa.»