12
1 N mʋ̀ Ba-Yígúrə́-Jə-Tiu yɩ cɩ́gá tíú zənzən,
à wàrɩ̀ yoo mama à swɩ̀n à zɩga n nə.
Yá à dàń nə pɩ̀à sə à bwe mʋ́ bwiə,
n bʋra tə yuu wa.
Bɛ̀ɛ̀ nə pɩn wʋlʋnyɩna yìə̀n jì tə pɩn ba?
Bɛ̀ɛ̀ nə pɩn pwìí bələ tɩ̀án tə mama wulə sìə́ wa?
2 N cwɛn ba ndə tɩ̀án nə,
n pa ba ŋʋnan zʋ tɩa,
ba bori ba zɩn lənə.
Ba swɩ̀n n yoo ba nii wa wuuu,
yá ba bɩcanɩ ga ŋʋ́ná də mʋ́.
3 Yá n mʋ́ Ba-Yígúrə́-Jə-Tiu yə̀ə́ nə,
n na nə, n zəŋə à bɩcan tə,
yá n na də à wulə də mʋ̀.
Lɩ wʋlʋnyɩna n kə ba cɩcɩ ndə pee nə,
ba nə ja vələ nangʋra dìə̀ wa.
Kə ba vàn nə sə ba gʋ, lagʋrɩ dɩɩn nə.
4 Lʋʋ nii tə wá yà pucʋnɩ wa, kʋ dán kʋ mɛn nətə? Yá kasɔɔ tə gaʋ tə mama wá kʋ̀, kʋ dán kʋ mɛn nətə? Lʋʋ nii tə lɩ̀à tə wʋlʋŋʋ tə pɩn vàná tə də zuŋi tə tɩ. Ba swɩ̀n, ba wʋ́: «Zweremi bá ya lá, sə ʋ na yoo tə nə wá yí nəba.»
«N nə dəri də nɛɛ tɩ̀án,
ba ga pa n gwàrɩ̀,
nətə nə n wá fwa n ma mà caca də səsen?
Kʋ nə yɩ lʋʋ nii tə nə wulə sìə́ wa cɩcɩ wa nə n jə sìə́,
nətə nə n wá fwa Zʋrədɛn mʋnaa tə nii tuni tə wa?
6 N nubɩa tə də tətə, də n dìə̀ lɩ̀à tə tʋŋa pwìí bələ yoo n yɩra. Cɩ́gá, ba də tətə yàá bon lɩ̀à ba kun duən nə, ba də ba vʋrɩ ba zɩga n nə, yá n yəri. Dàn ká jələ ba yuu wa, máŋá tə wa ba nə swɩ̀n sʋzəŋə n con.»
Yɩɩ vɩga ʋ dìə̀ tə də ʋ lɩ̀à tə ʋ dʋgʋ
7 «À vɩga à dìə̀ tə,
à vɩga à lɩ̀à tə à dʋgʋ.
À yà swə ba də à waa mama,
yá sɩ́ʋ́n nə, à dàń ken ba ba dʋŋa jɩɩn wa.
8 Lɩ̀à tə à nə tɩ jìgə̀ ndə gəru nə pún wa, ba pa nə.
Ba baa ba zɩga à nə,
kʋ mʋ̀ nə pɩn à də ma culi ba.
9 Lɩ̀à tə à nə tɩ dàń yɩ ndə zuŋə nəzəŋu nə,
kayɩlan nə kɩkarɩ ka tɩa mama, sə tə ja naaa?
Á vələ á kə ganaŋa tə mama duən yáá nə!
Á pɩan tə bà tə də́ cànà!
10 Payɩraa kapʋpʋ cʋ̀gʋ̀ à divɛn tɩ̀án tə.
Ba nɩŋɩ à kárá tə wa,
ba lwàń à bwálɩ́ tə nə jə fɩra,
ba pa kʋ cʋ̀gʋ̀ mɩ́ámɩ́án, kʋ jì digə.
11 Cɩ́gá, ba pɩn kʋ cʋ̀gʋ̀ mɩ́ámɩ́án,
kʋ wulə lúə́ pucʋnɩ wa, à yáá con,
lʋʋ nii tə mama wulə pucʋnɩ wa,
yá kʋ yoo ga ba lìù mama wʋwalɩ.»
12 Cʋcʋnyɩna twi ba zɩga pɛɛn tə mama yuparɩ wa,
kasɔɔ lanworu tə wa.
Cɩ́gá, Ba-Yígúrə́-Jə-Tiu pɩn kwatara sɩ̀ʋ́ cʋ̀gà lʋʋ nii tə mama,
kʋ nə zɩgɩ lʋʋ nii tə vàn don nə,
kʋ va kʋ yí kʋ vàn tə don.
Lìù mama ba sìə́ jə.
13 Ba dùə̀ mɩna,
yá ba ce casʋran.
Ba dí càn tʋtʋ.
Ba-Yígúrə́-Jə-Tiu lɩŋa tə nə pupwin tə pɩn,
ba kárɩ́ wiən tə cavɩra jə ba.
Ba-Yígúrə́-Jə-Tiu də Yɩzərayɛlə jənduən tə
14 Nə̀ń kʋ tə Ba-Yígúrə́-Jə-Tiu nə swɩ̀n ʋ zɩga à lʋʋ lɩ̀à tə jənduən kʋkwɩnan tə nə: «Ba dwen kʋ tə yɩra, kʋ nə yɩ à mʋ̀ nə tɩ. Ba dwen lʋʋ nii tə yɩra, à nə pɩn Yɩzərayɛlə lɩ̀à nə, ba nə yɩ à mʋ̀ lɩ̀à. À wá jon ba tɩa tə à yá ba, yá à wá lɩ Zwida dwíí tə də, ba titəŋi wa. 15 Yá kʋ kwa nə, à kʋ́ʋ̀ wá pìí à dəri ba yinəgə, à ga ja ba lìù mama à pìí à bà ʋ tɩa wa, à nə pɩn wá, ʋ lʋʋ nii wa. 16 À lɩ̀à tə jənduən tə yà kwè à lɩ̀à tə, ba pɩn ba dwì durə də woŋwanʋ Baalə yɩrɩ tə. Yá ba dàń nə sɛ̀, ba pìí ba zuri ba yɩra, ba kwè à lɩ̀à tə tʋtʋnɛɛ tə zəni, ba nə sɛ̀ ba dwì durə, kʋ twá də à yɩrɩ tə, ba swɩ̀n, ba wʋ́: “À dùə̀, Ba-Yígúrə́-Jə-Tiu wulə...” Cɩ́gá, ba wá pìí ba na ba bwálɩ́, à lɩ̀à tə titəŋi wa. 17 Yá ba dàń nə vɩga sə ba cʋgʋ, à wá lɩ dwíí təntə, à cʋ̀gʋ̀ mɩ́ámɩ́án.» Ba-Yígúrə́-Jə-Tiu nii sʋgʋ nə!