Zweremi ja ganbʋa voru ʋ ma bɩrɩ yongaʋ vəlu mɩmɩnʋ
13
1 Ba-Yígúrə́-Jə-Tiu swɩ̀n yoo kʋ tə à con, ʋ wʋ́: «Vəli n yə̀ ganbʋa voru, n vwa n tàŋá nə, yá n nə dàn ká pa nɩ́á kə kʋ nə.» 2 À yə̀ voru tə, à vwa à tàŋá nə, ndə Ba-Yígúrə́-Jə-Tiu nə swɩ̀n à con nətʋ. 3 Yá Ba-Yígúrə́-Jə-Tiu kʋ́ʋ̀ swɩ̀n sʋ̀ràn tətə à con, nɛɛ bələ nii nə, ʋ wʋ́: 4 «Tì voru tə n nə yə̀ n vwa n tàŋá nə, n ja va Pəratə nacoru tə con, n səgə pɩ̀ʋ̀ bʋʋ wa.» 5 À vəli à səgə kʋ Pəratə nacoru tə con, ndə Ba-Yígúrə́-Jə-Tiu yà nə pɩn nə nii, sə à tʋn nətʋ. 6 Dɩan kapʋpʋ kwa nə, Ba-Yígúrə́-Jə-Tiu kʋ́ʋ̀ swɩ̀n à con, ʋ wʋ́: «Zàn n va Pəratə nacoru tə con, n tì voru tə, à yà nə pɩn mʋ̀ nii, sə n səgə là.» 7 À pìí à va Pəratə nacoru tə con, à gwìń à tì voru tə bwálɩ́ tə nə, à yà nə səgə kʋ. Yá à nɩ də voru tə pʋa mɩ́ámɩ́án, kʋ kʋ́ʋ̀ ba funə mama jə.8 Yá Ba-Yígúrə́-Jə-Tiu dàń swɩ̀n sʋ̀ràn tətə à con, ʋ wʋ́: 9 «Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Mə nətʋ nə à wá cʋ̀gʋ̀ Zwida lʋʋ lɩ̀à tə fwìə́ won tə, kʋ nə yɩ Zwerizalɛmə tɩ̀án fwìə́ won nəfarʋ. 10 Kʋ mʋ̀ dwíí kʋkwɩʋn təntə, ba nə vɩ sə ba cʋgʋ à sʋ̀ràn tə, ba ga pìí ba twá ba zɩbaniu tʋtʋnkʋkwɩnan nə. Ba vwə ba tɩ̀àn yɩa duən nə, ba tʋŋa ba pɩn tə, ba ga twɩ tə yáá con, ba pɩn tə dun. Ba wá jì ndə voru kʋ tə nə, kʋ nə kʋ́ʋ̀ ba funə mama jə. 11 À yà vwə Yɩzərayɛlə lɩ̀à tə də Zwida lɩ̀à tə mama à yɩra, ndə bɛɛ nə yàá vwa voru ʋ tàŋá nə nətʋ. À mʋ̀ Ba-Yígúrə́-Jə-Tiu nii sʋgʋ nə! À yà sóní sə ba ya à lɩ̀à, ba bon à yɩrɩ, ba ya à dun won, ba ya ndə bwanzɩlɩ nə, ba pa nə. Yá ba wà à sʋgʋ cʋgʋ.»
Divɛn də Yɩɩ lɩŋa tə yoo
12 Ba-Yígúrə́-Jə-Tiu swɩ̀n à con, ʋ wʋ́: «Swɩ̀n sʋgʋ kʋ tə ba con, də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n, ʋ wʋ́: “Divɛn kwàrɩ́ yɩ ba fwa, sə ba ma kə divɛn.” Yá ba wá le mʋ́, ba wʋ́: “Nə yə̀ə́ də divɛn kwàrá mama yɩ ba fwa, sə ba ma kə divɛn.” 13 N dàń wá swɩ̀n ba con, n wʋ́: “Nə̀ń kʋ tə Ba-Yígúrə́-Jə-Tiu nə swɩ̀n: À wá pa lʋʋ nii kʋ tə lɩ̀à tə mama, də ba pɛ̀gá tə mama nə jə̀ə́ Davidə padaʋ tə yuu wa, də Yɩɩ joŋwana, də Yɩɩ nii sʋ̀sʋ̀nà, də Zwerizalɛmə tɩ̀án mama sú ndə lìù nə, sana nə jə wá. 14 À wá mà ba duən nə, à pʋpʋgʋ. À wá mà nyɩna-ba də bɩ̀á duən nə. À mʋ̀ Ba-Yígúrə́-Jə-Tiu nii sʋgʋ nə! À ba fwa pubwanʋ lìù yɩra, à ba dəri lìù mama yinəgə, à ga ba kwi à pa lìù nə. Won mama ba cɩ̀ à yáá nə, sə à dàn ká cʋ̀gʋ̀ ba.»
Á cʋga də kʋ tə yɩ fuən
15 Á súrə́ á zɩan á cʋgʋ,
á kʋ́ʋ̀ dànà ká fwa yɩrʋ!
Cɩ́gá, Ba-Yígúrə́-Jə-Tiu nə swɩ̀n á con.
16 Á pɩan dun Ba-Yígúrə́-Jə-Tiu nə,
ʋ nə yɩ á tíú Yɩɩ,
də ʋ tə wá pɩn yikunu bà á titəŋi wa,
sə á mà á nɛɛ pɛɛn nə, didənbibirə nə.
Á dànɩ̀ poni,
yá ʋ wá lwàń kʋ, ʋ pa kʋ jì tɩan yɩywara.
Ʋ wá pa kʋ jì bakwan nəzonu bìrə̀n.
17 Də á nə wá sʋgʋ təntə cʋgʋ,
à wá səgə à kwi, á fwìə́ tə yɩrɩ.
À wá lwá yɩnɩa,
à yɩ́á wá sú də yɩnɩa,
Ba nə wá ja Ba-Yígúrə́-Jə-Tiu lɩ̀à tə ba va yongaʋ yɩrɩ.
Ba-Yígúrə́-Jə-Tiu sʋgʋ, pɩ̀ʋ́ dìə̀ lɩ̀à con
18 Swɩ̀n pɩ̀ʋ́ tə də ʋ nuu con, n wʋ́:
«Á jə̀nə́ tɩpɩrɩ wa,
Cɩ́gá, á payupu nəzəŋu tə
nə yɩ á bwanzɩlɩ tə tʋa tɩa.
19 Negɛbə* nagwanaa tɩan tə mimiən sun,
yá lìù tə̀lə́ sə ʋ súrí tə.
Ba jɩn Zwida lalʋʋ tə, ba va yongaʋ.
Ba jɩn ba mama mɩ́ámɩ́án ba ja vìí.»
Zwerizalɛmə kwɩn kʋ dun nə
20 Zwerizalɛmə, zɩ̀n n yɩ́á n ywàń:
N dʋŋa naŋa jɩzən saparʋ con ba bɩ̀àn!
Vàná tə ba nə pɩn mʋ́, sə n ywàń tə yuu,
vanmɩnɩ tə nə yɩ n bwanzɩlɩ, tə pɩn mʋ́ dun wa yə̀n nə?
21 Bɛ̀ɛ̀ nə n wá swɩ̀n,
máŋá tə ba nə wá zɩgɩ n nə?
N mʋ̀ tətə nə kwè ba,
sə ba zɩgɩ n nə, ndə n yun tɩ̀án nə.
Kʋ bá yɩ̀ mʋ́,
ndə kan pùə́ nə yɩ̀ sə ʋ lɩra naaa?
22 N nə swɩ̀n n waa con, n wʋ́:
«Bɛ̀ɛ̀ nə pɩn yoo kʋ tə ma yí nə?»
Kʋ yɩ n cʋna kapʋpʋ tə nə pɩn.
N gànʋ̀ níə́ pipini tə dɩ̀ yɩɩ nə,
ba ga tʋn dɩ̀àn n yɩra.
23 Kuswə tíúa wàá ʋ yatana ʋ lwànɩ́ naaa?
Gwiə wàá kʋ pʋpʋnan kʋ lwànɩ́ naaa?
Sə á mʋ̀ lɩ̀à tə, á nə tʋn yolwana á mɩ̀n,
á wàá zəni á tʋŋa naaa?
24 À wá laga ba duən yáá nə,
ndə ywərən nə, kasɔɔ lanworu vʋʋ nə jànɩ̀.
25 Nə̀ń yoo tə nə wá yí mʋ́,
tori tə à nə tanɩ à tún n nə.
Ba-Yígúrə́-Jə-Tiu nii sʋgʋ nə!
Cɩ́gá, n swɛ̀ɛ́ à yoo,
n ga pìí n kə n waa kʋkʋn yìə̀n nə.
26 À də wá kʋ̀rɩ́ n ganzwɩdarʋ tə,
à pú n yuu nə,
sə ba na n cavɩra.
27 À nɩ n cwàrʋ̀ tə, də n sɩsɩan tə,
à nɩ n cavɩyiən tə,
n nə tʋŋa dudwələn tə yuu, kadwi tə wa,
à nɩ n tʋtʋnbalwaran tə.
Lɛɛ wá yí mʋ́, Zwerizalɛmə,
n nə ba n tɩ̀àn kwɛn n lɩ cʋna wa yɩrɩ!
N wá tʋn kʋ nətʋ tə, kʋ dán kʋ mɛ nətə?