Dwakʋrɩ yoo
14
1 Sʋ̀ràn tə Ba-Yígúrə́-Jə-Tiu nə swɩ̀n yoo Zweremi con, dwakʋrɩ tə yuu wa. Ʋ swɩ̀n, ʋ wʋ́:2 «Zwida lalʋʋ tə wulə lúə́ pucʋnɩ wa,
kʋ tɩfaran tə dɩ̀àn zwɛ̀,
lɩ̀à tə jɩ̀àn gwàrɩ̀, ba jə̀ə́ tɩa,
yá Zwerizalɛmə tɩ̀án bubwiə dɩ̀ yɩɩ.
3 Ləzwənfaran tʋn ba tʋ̀tʋ̀nà, sə ba pɩ̀à nɩ́á.
Tʋ̀tʋ̀nà tə vəli nɩ́á gwàlán* nəfaran tə wa,
tə də̀ń nə lu,
yá ba wà nɩ́á nɩ.
Ba pìí ba vìí də ba kwàrɩ́ wee.
Cavɩra zʋa ba, ba ywan,
kʋ pa ba ziri ba yun tɩa.
4 Cɩ́gá, tɩa tə kʋa, ka lwa,
dwà nə kʋ́ʋ̀ ba lʋʋ nii tə wa nɩ̀ yɩrɩ.
Yá cavɩra dàń zʋa vala,
ba ziri ba yun tɩa.
5 Naŋa də tətə nə wulə gaʋ wa,
vɩga ka bìú tə ka nə lɩrɩ ka dʋgʋ,
galɩʋ nə tə̀lə́ yɩrɩ.
6 Gaʋ bɩnɛ də zɩga pɛɛn tə yuparɩ wa,
tə fuŋə vʋʋ ndə cirəkuri nə.
Tə yɩ́á lee, gaʋ nə kʋ́ʋ̀ tə̀lə́, sə tə də́ yɩrɩ.»
7 «Ba-Yígúrə́-Jə-Tiu, də nə yolwana tə
nə swɩ̀n tə zɩga nə nə,
sə n taa n tətə yɩrɩ, n tʋn yoo:
Cɩ́gá, nə pwìí bələ yìə̀n tə dáá zənzən,
nə tʋn cʋna nə zɩgɩ n nə.
8 N mʋ̀ nə yɩ Yɩzərayɛlə lɩ̀à yala,
n ga yɩ ba jonu ba jɩgwarʋ máŋá wa!
Bɛ̀ɛ̀ dàń nə pɩn n ma fwa ndə vee nə,
ʋ nə twá lʋʋ nii tə wa ʋ lɛ,
nə à yə̀ə́ ndə cwəvəlu nə lòrì yipaa bwálɩ́,
sə ʋ pə̀ń də tɩa pʋrɩ?
9 Bɛ̀ɛ̀ nə pɩn n ma fwa ndə lìù nə,
ʋ nə bá dɩ̀àn jə,
nə à yə̀ə́ ndə babɩʋ nə,
ʋ nə wàrɩ̀ ʋ duən ʋ joŋə?
Yá n wulə nə titəŋi wa, Ba-Yígúrə́-Jə-Tiu,
nə ga boŋə nə kəni n yɩrɩ tə nə.
Dàn ká vɩ nəba n dʋgʋ.»
10 Nə̀ń kʋ tə Ba-Yígúrə́-Jə-Tiu nə swɩ̀n lalʋʋ kʋ tə con: «Cɩ́gá, ba swə ka twá lá ka ywan, ba ba bwálɩ́ nədʋ nə jəni.» Ba-Yígúrə́-Jə-Tiu ba ba nə bwɩ kʋ yɩrɩ. Sɩ́ʋ́n nə, ʋ dàń bʋ́n ba yolwana tə yoo, yá ʋ van ba zɩɩn nə, ba cʋna tə yɩrɩ.
11 Ba-Yígúrə́-Jə-Tiu swɩ̀n à con, ʋ wʋ́: «Dàn ká lòrì nə, sə à tʋn zəni lalʋʋ kʋ tə yuu yɩrɩ. 12 Ba nə swə ba vwa ba nii də, à bá cʋgʋ ba lòrí tə. Ba nə swə ba fwa jwəŋə ba nə sʋ̀rɩ́*, də zìlə́ wiən, à tə bá jələ tə. Cɩ́gá, à wá pa kʋ̀ʋ̀, də niən, də tɩan yayɩpwarʋ gʋ ba.»
13 Yá à le, à wʋ́: «Aaa! Yuu-Tiu, Ba-Yígúrə́-Jə-Tiu! Nə̀ń, n nii sʋ̀sʋ̀nà tə swɩ̀n lalʋʋ tə con, də kʋ̀ʋ̀ də niən bá ya lʋʋ nii tə wa. Yá ba swɩ̀n də n kàn nii, də n wá pa ba cɩ́gá cɩ́gá sìə́, bwálɩ́ kʋ tə tətə wa.»
14 Ba-Yígúrə́-Jə-Tiu swɩ̀n à con, ʋ wʋ́: «Kʋ yɩ kʋkʋn nə, à nii sʋ̀sʋ̀nà tə ja à yɩrɩ, ba ma swɩ̀n. À wà ba tʋn, à wà ba nii pɩn, à wà yoo mama ba con swɩ̀n. Tə yɩ kʋ̀nkʋ̀n nɩʋn, də vʋa, də woŋwanan yìə̀n. Tə yɩ ba tətə pubʋŋa sʋywanan ba swɩ̀n, ba ma gɩgarɩ aba. 15 Kʋ mʋ̀ yɩrɩ, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n Yɩɩ nii sʋ̀sʋ̀nà tə con, ba nə ja à yɩrɩ ba ma swɩ̀n, də kʋ̀ʋ̀, nə à yə̀ə́ niən ba ya lʋʋ nii kʋ tə wa, yá à wà ba tʋn. Ba mʋ̀ Yɩɩ nii sʋ̀sʋ̀nà təntə yɩ kʋ̀ʋ̀, də niən nə wá gʋ ba. 16 Yá niən də kʋ̀ʋ̀ nə wá gʋ lalʋʋ tə wa lɩ̀à tə, ba nə swɩ̀n Yɩɩ nii sʋ̀ràn tə ba con, yá ba wá dɩlɩ ba tɩga tə Zwerizalɛmə coŋi tə yuu wa. Lìù bá ya lá, sə ʋ gùrì ba tətə, də ba kana, də ba bɩ̀á, də ba bwɩ̀ɩ́. À wá pa ba wʋlʋŋʋ tə pìí kʋ nyʋn ba tətə yuu wa.»
17 «N wá swɩ̀n sʋgʋ kʋ tə ba con:
À yɩ́á pàlɩ̀ yɩnɩa tɩtɩn də yɩcaʋ, tə ba zɩga.
Cɩ́gá, lɛɛ yí à lalʋʋ tə bʋ̀á kacɩɩn tə,
ʋ tə nə yəri bɛɛ.
Kʋ yɩ ndə nʋʋ nə, kʋ nə wàrɩ̀ kʋ zuri.
18 À nə vəli kasɔɔ con,
nə̀ń lɩ̀à kwatara sɩ̀ʋ́ nə gʋa!
À nə kʋ́ʋ̀ zʋa tɩʋ tə wa,
nə̀ń lɩ̀à niən nə pɩn ba yɩ̀!
Yɩɩ nii sʋ̀sʋ̀nà də Yɩɩ joŋwana də tətə jírí lʋʋ nii tə wa,
yá ba ba yoo tə də̀ń nə̀ń.
19 Kʋ yɩ n vɩga Zwida lʋʋ nii tə
n dʋgʋ mɩ́ámɩ́án naaa?
N waa yɩ kʋ nan Siyon* tɩʋ tə naaa?
Bɛ̀ɛ̀ nə pɩn n mà nəba,
nə ywarɩ, kʋ ba zuri?
Nə ken yala sìə́ nə,
yá yozəŋu mama ba nəba yí.
Nə yà jə yala də nə wá na yazurə,
yá kʋ yɩ bɩcapuri!
20 Ba-Yígúrə́-Jə-Tiu, nə lwarɩ də nə tʋn lwanɩ,
nə yə̀ə́ də nyɩna-ba tʋn cʋna.
Cɩ́gá, nə tʋn cʋna nə zɩgɩ n nə.
21 Taa n tətə yɩrɩ,
dàn ká mun n yijaa bwálɩ́ tə,
dàn ká fʋfʋlɩ n dun padaʋ tə!
Bʋ́n n nimarʋ tə yoo, n nə tún də nəba,
dàn ká cʋ̀gʋ̀ kʋ!
22 Woŋwanʋ wulə dwíə́ nəkaran* tə woŋwanan tə wa,
kʋ nə wàá kʋ pɩn dwà nɩ̀ naaa?
Nə à yə̀ə́ kʋ yɩ lanworu tə nə pɩn dwà nɩ̀?
Kʋ tà n mʋ́ Ba-Yígúrə́-Jə-Tiu,
n nə yɩ nə Yɩɩ naaa?
Nə ken nə waa n nə,
cɩ́gá, n mʋ́ nə tʋŋa yìə̀n təntə mama.»