Càn wá yí Yɩɩ lalʋʋ tə
15
1 Ba-Yígúrə́-Jə-Tiu swɩ̀n à con, ʋ wʋ́: «Moyizə də Samiyɛlə nə swə ba bà à yáá con, ba lòrì nə lalʋʋ kʋ tə yɩrɩ, à bɩcan tə ba ya də lalʋʋ kʋ tə. Dɩŋa ba n kə yiŋʋnɩ à yáá con, ba jana kʋ ba va lá con! 2 Yá ba dàń nə bwe mʋ́, ba wʋ́: “Yə̀n nə nə wá va?” N wá le ba, n wʋ́: “Nə̀ń kʋ tə Ba-Yígúrə́-Jə-Tiu nə swɩ̀n:Lìù mama də ʋ yojanʋ:
Lìù tə tɩan yayɩgʋ nə jɩn wá,
sə kʋ gʋ wá!
Lìù tə kwatara sɩ̀ʋ́ nə jɩn wá,
sə kʋ gʋ wá!
Lìù tə niən nə jɩn wá,
sə tə gʋ wá!
Lìù tə ba nə jɩn wá yoŋu,
sə ʋ va yongaʋ!”
3 À wá twá càn yirə yirə banɩa nə, à ma zɩgɩ ba nə. À mʋ̀ Ba-Yígúrə́-Jə-Tiu nii sʋgʋ nə! Kwatara sɩ̀ʋ́ wá gʋ ba, kukuri tùrì ba tɩga, lanworu zuŋi, də tɩa yuu vàná ga də́ ba mɩ́ámɩ́án. 4 À wá pa kʋ nətʋ tə kə fən nəfarʋ, tɩa yuu payun tə mama wa, Ezekɩasə bìú Manase yɩrɩ, ʋ nə yɩ Zwida pɩ̀ʋ́, kʋ tə mama yɩrɩ ʋ nə tʋn Zwerizalɛmə wa.
Ba-Yígúrə́-Jə-Tiu yɩra ga də Zwerizalɛmə tɩ̀án
5 Cɩ́gá, wàà nə wá dəri n yinəgə, Zwerizalɛmə?
Wàà nə wá swɩ̀n ʋ zʋ n kwa?
Wàà nə wá viviri ʋ bwe n yazurə yoo?
6 N vɩga nə n dʋgʋ!
À mʋ̀ Ba-Yígúrə́-Jə-Tiu nii sʋgʋ nə!
N pìí n viviri n kwa n ma sà nə.
À dàń te à jɩɩn n yuu wa,
yá à wá cʋ̀gʋ̀ mʋ́.
Cɩ́gá, à dəri n yinəgə wuuu, à yɩra ga.
7 À wá cə̀rì ba, lʋʋ nii tə tɩan tə mimiən nə,
à pa ba laga duən yáá nə.
À pɩn ba kwɩn bɩ̀á nə,
à pɩn à lalʋʋ tə cʋ̀gʋ̀,
ba nə wà pìí ba yá ba tʋtʋnkʋkwɩnan tə nə yɩrɩ.
8 À pɩn ba kadənə pùlì,
ba doni mʋʋ nii kasɩlʋ.
À pɩn dʋŋʋ tə nə cʋ̀gà won mama
bà ba nə,
à pɩn ʋ bà kwatarʋ balandʋrʋ tə nuu nə, yɩcakʋrʋ wa,
kʋ pa càn də fən zʋ wá, naa nədʋ.
9 Kan tə ʋ yà nə lɩrɩ bɩ̀á barpɛ,
gwarɩ, ʋ tɩ.
Ʋ yɩcaʋ jìgə̀ yikunu,
cavɩra zʋa wá, ʋ fùrí.
Yá à wá kə ba tə nə ga tə ba dʋŋa jɩɩn wa,
sə ba gʋ ba də kwatara sɩ̀ʋ́.
À mʋ̀ Ba-Yígúrə́-Jə-Tiu nii sʋgʋ nə!»
Zweremi caga, yá Yɩɩ tə kwɛn ʋ tʋŋa wá
10 Nə̀ń à lɛɛ nyɩɛn nʋ̀ʋ̀, à nuu!
Cɩ́gá, n mʋ̀ nə lɩrɩ nə, n kə lʋʋ wa!
À yɩ lìù tə à nə kəni jara də tʋ́tʋ̀ná lʋʋ nii tə mama wa!
À ba jɩŋɩ də́, à ma ba à won də ma jɩŋɩ lìù,
yá lɩ̀à tə mama zɩrɩ ba kəni à nə.
11 Yá Ba-Yígúrə́-Jə-Tiu swɩ̀n à con, ʋ wʋ́:
«À yà wà mʋ́ jon, sə n də́ ywanɩ naaa?
À yà wà n dʋŋʋ mà n yɩrɩ,
lɛɛ də jɩgwarʋ máŋá wa naaa?
12 Lugu tʋtʋ wàá jɩzən saparʋ con səpirinkəa,
nə à yə̀ə́ cɩnɩan kʋ kɛ́n naaa?»
13 Ba-Yígúrə́-Jə-Tiu swɩ̀n Zwida lʋʋ lɩ̀à tə con, ʋ wʋ́:
«À wá pa á jɩjə wiən tə,
də á wozəŋə tə dʋŋa nə, tʋtʋ,
á cʋna tə mama yɩrɩ á nə tʋn, á lʋʋ nii tə mama wa.
14 À wá pa á jì á dʋŋa ywə́ŋə́,
lʋʋ nii wa á nə yəri.
Cɩ́gá, à lɩŋa tə kwe ndə mən nə,
sə tə də́ aba.»
15 N mʋ́ Ba-Yígúrə́-Jə-Tiu yə̀ə́ yoo mama!
Bʋ́n à yoo, n ga san nə.
Fwi n lɩŋa lɩ̀à tə yuu wa, ba nə fɩfɩn nə!
Dàn ká ja pɩ́nʋ́ də ba,
sə kʋ pa à də́ càn!
Lwarɩ də n mʋ́ yɩrɩ nə à sɛ̀, à də́ cavɩra.
16 À nə zə́n à nì n sʋ̀ràn tə, à yàá sɛ̀ tə.
N sʋ̀ràn tə pɩn nə pupwən,
tə pɩn à waa ywán.
Cɩ́gá, n mʋ̀ Ba-Yígúrə́-Jə-Tiu,
n nə yɩ kwatara Yɩɩ nə tɩ nə!
17 À wà twá à jə̀ń bɩyɩrɩ də́rə́ púlí wa, à bwan.
Yá n kalɩ nə, n pa à zɩgɩ vàn nə,
n nə pɩn à sú də n lɩŋa nəfarʋ tə yɩrɩ.
18 Bɛ̀ɛ̀ nə pɩn à càn tə ma ba zwɛ̀?
Bɛ̀ɛ̀ nə pɩn à nʋʋ tə ywarɩ kʋ ba zwɛ̀,
yá kʋ vɩ sə kʋ zuri?
Cɩ́gá mama, n jìgə̀ ndə nacwəŋə nə,
à nə wàrɩ̀ ka nɩ́á yuu wa à jələ!
19 Kʋ mʋ̀ yɩrɩ,
nə̀ń kʋ tə Ba-Yígúrə́-Jə-Tiu nə swɩ̀n:
«N nə pìí n bà à con,
à tə wá sɛ̀ sə n ya à tʋtʋnʋ.
N nə yá sʋywanan, n ga swɩ̀n cɩ́gá sʋ̀ràn,
n wá pìí ya à nii sʋ̀sʋ̀nʋ̀.
Zwida lʋʋ lɩ̀à tə dàń nə wá pìí ba bà n con,
yá kʋ tà n mʋ́ nə wá pìí n va ba con.
20 À wá pa n ja dɩ̀àn lalʋʋ kʋ tə yáá con,
ndə cɩnɩan bírə́ nə, ka nə wàrɩ̀ ka twɩ.
Ba wá ta mʋ́,
yá ba ba wànɩ́ mʋ́.
Cɩ́gá, à wulə də mʋ́, sə à jon mʋ́,
à ga lɩ mʋ́ yojanʋ wa.
À mʋ̀ Ba-Yígúrə́-Jə-Tiu nii sʋgʋ nə!
21 À wá jon mʋ́ ləzwənlwana jɩɩn wa,
à wá lɩ mʋ́ ba mʋ̀ wʋlʋnyɩna tə jɩɩn wa.»