Zweremi wulə ʋ cɩcɩ
16
1 Ba-Yígúrə́-Jə-Tiu swɩ̀n sʋ̀ràn tə tə à con, ʋ wʋ́: 2 «Dàn ká swe kan bwálɩ́ kʋ tə wa, dàn ká lɩra bɩ̀á də bwɩ̀ɩ́ lʋʋ nii kʋ tə wa. 3 Cɩ́gá, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n bɩ̀á tə də bwɩ̀ɩ́ tə, ba nə wá lɩra ba lʋʋ nii kʋ tə wa, də ba ninə, də ba nyɩna-ba yuu wa. 4 Yayɩran wá gʋ ba, yá lìù bá ya lá, ʋ gùrì ba, ʋ ga kwi ba lúə́. Ba wá pʋ, ba jì pùrú tɩa yuu wa. Kwatara sɩ̀ʋ́ də niən nə wá gʋ ba tə zwɛ̀, yá ba tɩga tə wá ya lanworu zuŋi, də tɩa yuu vàná wodiu.»5 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n: «Dàn ká zʋ lúə́ kàrá wa, dàn ká va n kwi lúə́, nə à yə̀ə́ n kə ka pupuə. Cɩ́gá, à jon à sìə́ tə, də à wʋywaŋʋ* tə, də à yinəndəri tə, lalʋʋ kʋ tə con. 6 Ləzwənfaran də ləzwənbii wá tɩ lʋʋ nii kʋ tə wa, yá lìù bá ya lá sə ʋ gùrì ba, sə ʋ kwi ba lúə́, sə ʋ la gwɛ̀ɛ́* ʋ yɩra, ba tɩan tə yɩrɩ, nə à yə̀ə́ sə ʋ pàrɩ́ ʋ yuu, ba tɩan tə yɩrɩ. 7 Lìù mama bá ya lá, ʋ nə wá fʋ wodiu ʋ pa ʋ don nə, ʋ nə wulə lúə́ pucʋnɩ wa, sə ʋ ma kòrì wá. Lìù bá ya lá, ʋ nə wá pa nɩ́á ʋ don nə, ʋ nyʋn, sə ʋ ma kòrì wá ʋ nyɩna, nə à yə̀ə́ ʋ nuu nə tɩga yɩrɩ.
8 Dàn ká zʋ dìə̀ də wa ba nə wulə ba də́ cànà, sə n jə̀ń n də́, n ga nyʋn də ba. 9 Cɩ́gá, nə̀ń kʋ tə à mʋ̀ Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: À wá pa cànà diŋə zizigu tə, də pupwən cə̀rí tə, də kasweri gwaran tə nyʋn bwálɩ́ kʋ tə wa, á yɩ́á yuu, á máŋá kʋ tə wa.
10 Máŋá tə, n nə wá swɩ̀n sʋ̀ràn tə tə mama lalʋʋ tə con, kʋ wàá kʋ pɩn ba bwe mʋ́, ba wʋ́: “Bɛ̀ɛ̀ nə pɩn Ba-Yígúrə́-Jə-Tiu ma pa nii, sə lɛɛ nəfarʋ təntə yí nəba? Bɛ̀ɛ̀ yolwan nə nə tʋn? Bɛ̀ɛ̀ cʋna nə nə tʋn, nə zɩgɩ Ba-Yígúrə́-Jə-Tiu nə, ʋ nə yɩ nə tíú Yɩɩ?” 11 N dàń wá swɩ̀n ba con də, kʋ yɩ ba nɩbara-ba nə vɩga nə ba dʋgʋ, ba ga pìí ba vwa ba tɩ̀àn yɩa duən nə, ba tʋŋa ba pɩn tə, də ba twɩ ba nadwana yuu tə yáá con, ba pɩn tə dun* yɩrɩ. À mʋ̀ Ba-Yígúrə́-Jə-Tiu nii sʋgʋ nə! Ba vɩga à mʋ̀ ba dʋgʋ, ba wà à nii tə zìlí. 12 Yá á də kʋ́ʋ̀ tʋn lwanɩ á doni á nɩbara-ba. Á lìù mama yɩ ʋ twá ʋ zɩbaniu tʋtʋnkʋkwɩnan nə, ʋ ba kʋ tə à nə swɩ̀n cʋga. 13 Kʋ mʋ̀ nə pɩn, à wá lɩ aba lʋʋ nii tə wa, sə á va lʋʋ nii don wa, á nə yəri, á nɩbara-ba də nə wà yəni. Lá nə, á wá tʋn á pa yɩa duən nə, yɩcaʋ də tɩtɩn. Cɩ́gá, à kʋ́ʋ̀ bá tʋn à wʋywaŋʋ tə á yɩra.»
Yɩzərayɛlə lɩ̀à tə nə pìí ba bà yoo
14 «Kʋ mʋ̀ nə pɩn, máŋá don bɩ̀àn, ba nə kʋ́ʋ̀ bá dù durə, ba swɩ̀n, ba wʋ́: “Ba-Yígúrə́-Jə-Tiu wulə! Ʋ mʋ̀ nə lɩ Yɩzərayɛlə lɩ̀à Ezwipətə lʋʋ nii tə wa!” À mʋ̀ Ba-Yígúrə́-Jə-Tiu nii sʋgʋ nə! 15 Yá ba dàń nə wá dù, ba wʋ́: “Ba-Yígúrə́-Jə-Tiu wulə! Ʋ mʋ̀ nə lɩ Yɩzərayɛlə lɩ̀à jɩzən saparʋ con lʋʋ nii tə wa, də lʋʋ níə́ tə mama wa, ʋ yà nə dɩŋɩ ba ʋ kə lá.” Cɩ́gá, à wá pìí à ja ba à bà ba tɩa tə yuu wa, à nə pɩn ba nɩbara-ba nə.»
Yɩɩ wá ja cʋna lɩ̀à tə mama
16 «À wá tʋn fili jana kapʋpʋ, sə ba ja ba ndə filə nə. Kʋ kwa nə, à wá tʋn twanbara, sə ba dɩŋa ba ba ja pɛɛn tə mama yuu wa, də dədwələn tə mama yuu wa, ba va ba yí pɩ̀ràn kwələn wa. À mʋ̀ Ba-Yígúrə́-Jə-Tiu nii sʋgʋ nə! 17 Cɩ́gá, à yɩ́á cəə ba tʋtʋnɛɛ tə mama yuu wa, tə wà à yáá nə səgə. À na ba yolwan tə. 18 À wá ŋwɩ́n ba cʋna tə, də ba yolwana tə ŋwɩ́rán ba yɩra, nɛɛ bələ, ba nə ken durən à lʋʋ nii tə wa yɩrɩ. Ba pɩn à bwálɩ́ tə sú də wiən tə, ba nə pɩn ba wolwana tə nə, tɩga tə.»
Lɩ̀à mama wá lwarɩ Yɩɩ tə nə yɩ cɩ́gá
19 Ba-Yígúrə́-Jə-Tiu, n mʋ̀ nə yɩ à dɩ̀àn,
n ga yɩ à dɩ̀àn dəkuu bwálɩ́!
N yɩ à yisəgə bwálɩ́,
à nə kwálɩ́ à yuu lá, pucʋnɩ dɩɩn nə!
N mʋ̀ con nə dwíə́ nəkaran* tə wá nan
tɩa yígúrə́ wa, ba bà,
ba swɩ̀n, ba wʋ́:
«Nə nɩbara-ba yɩ kʋ̀nkʋ̀n wiən ba nɩ,
tə nə yɩ ba tori.
Tə yɩ tʋtʋ, tə ba sáŋʋ́ mama jə.
20 Ləzwənə wàá yɩa ʋ fwa,
ʋ pɩn ʋ tɩ̀àn nə naaa?
Wiən tə ʋ nə fwa tà yɩa.»
21 «Kʋ mʋ̀ nə pɩn, naa kʋ tə nə,
à wá pa ba lwarɩ,
à wá pa ba lwarɩ à jɩɩn dɩ̀àn tə,
yá ba wá yəni də à yɩrɩ nə yɩ Ba-Yígúrə́-Jə-Tiu.»