Zwida lalʋʋ tə yolwan yoo
17
1 «Zwida lɩ̀à tə yolwan tə yɩ ndə pʋ́pʋ́ná nə,ba nə ja mɩ̀ʋ́n ba ma bɩ̀rɩ̀,
ba nə ja kapan cɩ́nʋ́ cɩcɩlʋ don cɩɩn,
ba ma bɩ̀rɩ̀ ba tún ba bɩcanɩ tə yuu wa,
də ba jwəŋə bwálá tə nyʋran tə yuu wa.
2 Mə nətʋ nə ba bɩ̀á wá lìí ba jwəŋə bwálá tə yoo,
də ba Aswera* daceli tə yoo,
tə nə wulə tɩ̀án tə nə jə vʋran də̀ń nə,
də dədwələn nədaran tə yuu wa.
3 Á mʋ̀ Zwida lalʋʋ tə,
á nə fwa jwəŋə paan tə yuu wa, kasɔɔ tə wa,
á pɩn woŋwanan nə,
à wá pa á jɩjə wiən tə,
də á wozəŋə tə mama,
də á jwəŋə dədwələn tə á dʋŋa nə,
á lwanɩ tə yɩrɩ á nə tʋn,
á lʋʋ nii tə bwálɩ́ mama wa.
4 Á tətə wá yá lʋʋ nii tə,
à nə pɩn aba, sə á tɩnɩ kʋ,
yá à wá pa á jì á dʋŋa ywə́ŋə́,
lʋʋ nii wa á nə yəri.
Cɩ́gá, á pɩn à lɩŋa tə kwe ndə mən nə,
yá won mama wàrɩ̀ tə kʋ dəŋi.»
Kʋ̀nkʋ̀n sìə́ bwálɩ́, də cɩ́gá sìə́ bwálɩ́ yoo
5 Nə̀ń kʋ tə Ba-Yígúrə́-Jə-Tiu nə swɩ̀n:
«Lɛɛ wá yí lìù tə nə ken ʋ waa ləzwənə nə,
ʋ nə jələ ləzwənə dɩ̀àn yuu wa,
ʋ ga viviri ʋ bɩcan,
ʋ yá à mʋ̀ Ba-Yígúrə́-Jə-Tiu!
6 Ʋ wá ya ndə tɩ̀ʋ́ nə, kʋ nə wulə digə wa,
kʋ ba nì kʋ ywánɩ́ mama.
Kʋ yɩ kʋ wulə digə tɩkʋrʋ wa,
nəkuə tɩa wa, lɩ̀à nə tə̀lə́ lá.
7 Yá Yɩɩ wá fwa zəni lìù tə yɩra,
ʋ nə ken ʋ waa Ba-Yígúrə́-Jə-Tiu nə,
ʋ ga jələ Ba-Yígúrə́-Jə-Tiu sáŋʋ́ yuu wa.
8 Ʋ yɩ ndə tɩ̀ʋ́ nə ba nə cwɛn nɩ́á nii nə,
kʋ ga kə kʋ ŋʋnan, tə va tə yí nɩ́á tə.
Kʋ yəri lʋan vʋʋ nə yɩ won tə,
yá kʋ vʋran yɩ vʋbwalan máŋá mama.
Dwakʋrɩ bɩnɩ nə twi,
fən ba kʋ jə,
yá kʋ ləni bɩ̀á máŋá mama.
9 Ləzwənə bɩcan yɩ gugolu,
kʋ doni won mama,
yá kʋ wàrɩ̀ kʋ ywarɩ kʋ zuri.
Wàà nə wàá ləzwənə bɩcan ʋ lwarɩ.
10 À mʋ̀, Ba-Yígúrə́-Jə-Tiu nə yàá mɩ̀àn ləzwənə bɩcan,
à na kʋ tə nə wulə ʋ pubʋŋa wa,
sə à ŋwɩ́n kʋ tə nə mɛ də lìù mama yʋa,
à pa wá,
kʋ mɛ də ʋ tʋtʋnɛɛ lənə.
11 N nə yə̀ə́ lúə́ nə vàlɩ̀ càlà tə, ka nə wà dɩ,
mə lìù tə nə wà cɩ́gá cwəŋə tì ʋ ma na jɩjə, yɩ nətʋ.
Ʋ lʋʋ wúlú titəŋi wa,
ʋ jɩjə tə wá zwɛ̀ ka yá wá,
yá ʋ mɩɩ tə yígúrə́ wa, ʋ wá jì ləyiru.»
Ba-Yígúrə́-Jə-Tiu, cɩcɩ nə pɩn mɩɩ
12 Nə Yɩɩ wúlú bwálɩ́ tə yɩ dun padɔɔ,
kʋ nə wulə tə mɛ yuu wa,
kʋ nə zɩgɩ lʋʋ də̀ń laŋʋ mama.
13 Ba-Yígúrə́-Jə-Tiu, n mʋ́ nə yɩ Yɩzərayɛlə lɩ̀à yala!
Cavɩra wá yí lɩ̀à tə mama nə vɩga mʋ́ ba dʋgʋ.
Ba tə mama nə viviri ba kwa ba ma sà mʋ́,
wá ya ndə lɩ̀à nə ba nə pʋ́pʋ́nɩ́ ba yɩra pùrú wa.
Cɩ́gá, ba vɩga n mʋ̀ Ba-Yígúrə́-Jə-Tiu,
n nə yɩ nabuliyii, kʋ nə pɩn mɩɩ, ba dʋgʋ.
Zweremi yɩjʋnɩ yoo
14 Pa nə yazurə, Ba-Yígúrə́-Jə-Tiu,
yá à wá na yazurə.
Jon nə, yá à wá tɩnɩ à tɩ̀àn.
Cɩ́gá, n mʋ́ nə nə à bwɩ̀.
15 Nə̀ń ba swɩ̀n à con, ba wʋ́:
«Ba-Yígúrə́-Jə-Tiu sʋgʋ tə wulə yə̀n nə?
Ʋ pa kʋ nii sú!»
16 À mʋ̀ wà mʋ́ kalɩ, sə n pa càn yí ba,
à ma ba ba cʋna də pɩ̀à,
n yə̀ə́ kʋ nətʋ tə.
N yə̀ə́ yìə̀n tə mama, à nə swɩ̀n.
17 Dàn ká pa n fən ja nə,
n mʋ̀ nə yɩ à yisəgə bwálɩ́, lɛɛ dɩɩn nə!
18 Pa cavɩra ja lɩ̀à tə nə fɩfɩn nə,
yá cavɩra dàn ká ja à mʋ̀!
Pa ba vɩvaga,
yá à mʋ̀ dàn ká vɩvaga!
Pa lɛɛ yí ba,
pa cʋcʋran nəfaran tʋ ba yuu wa!
Sìə́ dɩɩn tə nii zìlú yoo
19 Nə̀ń kʋ tə Ba-Yígúrə́-Jə-Tiu nə swɩ̀n: «Vəli n zɩgɩ lalʋʋ tə bɩ̀á mimii nə, kʋ tə nə, Zwida pɛ̀gá tə nə twá ba zwɩ də ba naŋa, də Zwerizalɛmə mimiən tə mama nə. 20 N wá swɩ̀n ba con, n wʋ́: “Á cʋga Ba-Yígúrə́-Jə-Tiu sʋgʋ, Zwida pɛ̀gá-ba, də Zwida lʋʋ lɩ̀à tə mama, də á mʋ̀ Zwerizalɛmə tɩ̀án mama, á nə twá kʋ mimiən tə á zwɩ. 21 Nə̀ń kʋ tə Ba-Yígúrə́-Jə-Tiu nə swɩ̀n: Á cɩ̀á á tɩ̀àn nə, á dàn ká zɩn zɩla sìə́ dɩɩn tə nə, á dànà ká ja tə á zʋ Zwerizalɛmə mimiən tə wa. 22 Á dànà ká lɩ zɩlɩ á dìì wa, sìə́ dɩɩn tə nə, á dànà ká tʋn tʋtʋŋɩ mama, yá á dàń nə mɛ sə pa sìə́ dɩɩn tə ya à cɩcɩ nyiən, á ma pa nə dun, ndə à nə pɩn nii á nɩbara-ba nə nətʋ. 23 Yá ba wà cʋgʋ, ba wà ba zɩɩn guni ba kə à con, ba ga tʋn zɩbaniu, ba vɩ sə ba cʋgʋ, sə kʋ pa ba sɛ̀ kàrà tə.
24 Yá á mʋ̀ dàń cʋga à sʋgʋ zəni. À mʋ̀ Ba-Yígúrə́-Jə-Tiu nii sʋgʋ nə! Á dànà ká zɩn zɩla, á ja zʋ tɩʋ kʋ tə mimiən tə wa, sìə́ dɩɩn tə nə. Á pɩan sìə́ dɩɩn tə ya à cɩcɩ nyiən, á ma pa nə dun, á dànà ká tʋn tʋtʋŋɩ mama kʋ dɩɩn təntə nə. 25 Kʋ nə yɩn nətʋ, pɛ̀gá tə nə jə̀ə́ Davidə padaʋ tə yuu wa, ba nə dɩ̀ səsen, nə à yə̀ə́ ba nə jəni səsen kòrə̀n wa, ba ja jírí, də ba tʋ̀tʋ̀nán yun tɩ̀án, də Zwida lʋʋ lɩ̀à tə, də Zwerizalɛmə tɩ̀án mama dàń wá zwɩ tɩʋ kʋ tə mimiən tə wa, də ba naŋa máŋá mama, yá lɩ̀à wá ya kʋ wa máŋá mama wuuu. 26 Lɩ̀à wá nan Zwida tɩan tə wa, də Zwerizalɛmə nii tɩbii tə wa, də Bɛnzwamɛn lʋʋ nii tə wa, də Swefela* nagwanaa tə wa, də pɛɛn nagwanaa tə wa, də Negɛbə* nagwanaa tə wa, ba bà, ba fwa jwəŋə yirə yirə, ba pa Ba-Yígúrə́-Jə-Tiu nə, ʋ dìə̀ tə wa. Tə mʋ̀ nə yɩ jwəŋə tə ba nə sʋ̀rɩ́*, də jwəŋə duən, də jwii kənu jwəŋə*, də zìlə́ wiən, də wusinə. 27 Yá á nə ba à sʋgʋ cʋga, sə á pa sìə́ dɩɩn tə ya à cɩcɩ nyiən, á ma pa nə dun, sə á dàn ká zɩn zɩla, á ja zʋ Zwerizalɛmə mimiən tə wa, sìə́ dɩɩn tə nə, à wá kə mən tɩʋ tə mimiən tə nə. Tə wá də́ Zwerizalɛmə dizəŋə tə, tə cʋ̀gʋ̀, yá tə kʋ́ʋ̀ bá də̀ŋə̀.”»