Zweremi vəli nəkənmarʋ con
18
1 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 «Zàn n va nəkənmarʋ tə sàń, yá à wá pa n nì à sʋ̀ràn tə lá nə.»3 À zàn à va nəkənmarʋ tə sàń, yá à nɩ wá də ʋ wulə ʋ tʋŋa ʋ tʋ̀tʋ̀nán bwálɩ́ tə wa. 4 Nəkənə tə ʋ yà nə wulə ʋ mɛɛ tə wà jì. Kʋ nətʋ yàá yí máŋá don wa, yá ʋ dàń yàá ja nəkənə təntə daʋ tə, ʋ ma fwa nəkənə don, ka mʋ̀ nə twá ʋ fɩra nə. 5 Yá Ba-Yígúrə́-Jə-Tiu dàń swɩ̀n sʋ̀ràn tə tə à con, ʋ wʋ́: 6 «Yɩzərayɛlə lɩ̀à-ba, à wàrɩ̀ kʋ tə nəkənmarʋ tə nə tʋn, à tʋŋa á yɩra naaa? À mʋ̀ Ba-Yígúrə́-Jə-Tiu nii sʋgʋ nə! Á yɩ á wulə à jɩɩn wa, ndə daʋ nə, nəkənmarʋ tə jɩɩn wa. 7 Máŋá don wa, à yàá swɩ̀n lʋʋ nii, nə à yə̀ə́ payuu yoo, sə ba van kʋ ba mùrí, ba mà kʋ ba lwá duən yuu, ba cʋ̀gʋ̀ kʋ mɩ́ámɩ́án. 8 Yá lʋʋ nii təntə, à nə swɩ̀n kʋ yoo, nə viviri kʋ kwa, kʋ ma sà kʋ lwanɩ tə nə zɩ̀n à lɩŋa, à də wá lwàń pubʋŋa, à kʋ́ʋ̀ bá kə kʋ càn wa, ndə à yà nə bʋŋa nətʋ. 9 Máŋá don wa, à yàá swɩ̀n lʋʋ nii, nə à yə̀ə́ payuu yoo, sə ba pìí ba lwà kʋ, ba zɩgɩ kʋ bwálɩ́ nə, kʋ dəkuu zʋ tɩa. 10 Yá lʋʋ nii təntə nə fwa kʋ tə nə lwara à yáá con, kʋ ga vɩ sə kʋ cʋgʋ à kori, à də wá lwàń pubʋŋa, à kʋ́ʋ̀ bá tʋn zəni kʋ yɩra, ndə à yà nə bʋŋa nətʋ.»
11 Ba-Yígúrə́-Jə-Tiu dàń swɩ̀n Zweremi con, ʋ wʋ́: «Sɩ́ʋ́n nə Zweremi, n dàń swɩ̀n Zwida lʋʋ lɩ̀à tə də Zwerizalɛmə tɩ̀án con, n də ba nəŋə kʋ tə Ba-Yígúrə́-Jə-Tiu nə swɩ̀n: “À bʋŋa sə à pa lɛɛ yí aba. À wulə à tanɩ càn sə à kə á nə. Á yágá á tʋtʋnkʋkwɩnan tə fwaŋʋ nə, sə á lìù mama ga lwàń ʋ yʋa də ʋ tʋtʋnɛɛ, ʋ ga tʋn ndə kʋ nə mɛ nətʋ.”»
12 Yá ba swɩ̀n, ba wʋ́: «Kʋ nətʋ tə wàrɩ̀! Cɩ́gá, nə wá twá nə tətə pubʋŋɩ yìə̀n nə. Nə lìù mama wá twá ʋ zɩbaniu tʋtʋnkʋkwɩnan nə.»
Yɩzərayɛlə lɩ̀à swɛ̀ɛ́ ba Yuu-Tiu tə
13 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu nə swɩ̀n:
«Á vələ lʋʋ níə́ nəkaran tə wa á bwe á jə́n,
wàà nə dí yáá ʋ nì yoo kʋ tə yiri?
Yɩzərayɛlə lɩ̀à yɩ ndə kacɩɩn nə, ʋ tə nə yəri bɛɛ,
ʋ nə tʋn yobalwaran.
14 Waran yàá kwɛ̀ Liban paan tə yuu wa naaa?
Nazunə tə nə pàlɩ̀ tə naŋa Liban paan tə yuu wa,
tə dəri nacorən tə wa, yàá zwɛ̀ naaa?
15 Yá à mʋ̀ lɩ̀à tə swɛ̀ɛ́ à yoo.
Ba sʋ̀rɩ́ wusinə ba pɩn woŋwanan nə,
tə nə pɩn ba mà ba nɛɛ ba twɩ cwəŋə wa,
tə pɩn ba dʋga coŋi tə ba yà nə wulə tə wa,
yá ba pìí ba tì cwəmɩnɩ,
coŋi tə ba nə wà cɛn.
16 Ba pɩn ba lʋʋ nii tə jì fən də mʋmʋn won, máŋá mama wuuu.
Lìù mama nə twá lá ʋ kɛ̀ń,
kʋ yàá gwárɩ́ wá,
ʋ ga zwɩn ʋ yuu wa.
17 À wá laga ba duən yáá nə, dʋŋa yáá con,
ndə yɩɩ yipɩan con vʋʋa nə yàá laga ywərən nətʋ.
Dɩɩn tə dʋŋa nə wá cʋ̀gʋ̀ ba,
à wá viviri à kwa à ma sà ba,
à bá te à yáá ba con.»
Lɩ̀à vʋrɩ ba zɩga Zweremi nə
18 Ba swɩ̀n, ba wʋ́: «Á bɩ̀àn, nə pɩ̀à cwəŋə tə nə nə wá tì, nə ma zɩgɩ Zweremi nə! Cɩ́gá, nə bá ga Yɩɩ joŋwana nə, sə ba kàrɩ̀ nəba Yɩɩ nii yìə̀n tə, nə à yə̀ə́ wʋbʋnyɩna nə, sə ba pa nəba kwìə̀, nə à yə̀ə́ Yɩɩ nii sʋ̀sʋ̀nà nə, sə ba swɩ̀n Yɩɩ nii sʋ̀ràn ba pa nəba. Á bɩ̀àn nə swɩ̀n nə zɩgɩ ʋ nə, nə dànà ká cʋgʋ ʋ sʋ̀ràn tə mɩ́ámɩ́án!»
19 Guni n zɩɩn n kə à con,
n cʋgʋ nə, Ba-Yígúrə́-Jə-Tiu!
Cʋgʋ ba tə nə swɩ̀n ba zɩga à nə, nii sʋ̀ràn!
20 Ba yàá ja lwanɩ ba ma ŋwɩ́n zəni naaa?
Yá ba kʋa zanba gwàlʋ́, sə ba ma lɩ à mɩɩ.
Yəni də à zɩgɩ n yáá con,
à swɩ̀n ba yuu yɩrɩ,
sə n lɩŋa tə dàn ká zàn ba yuu wa.
21 Kʋ mʋ̀ yɩrɩ, pa niən gʋ ba bɩ̀á,
pa kwatara sɩ̀ʋ́ gʋ ba tətə,
pa ba kana kwɩ̀n ba bɩ̀á nə,
sə tɩan yayɩpwarʋ ga gʋ ba bana,
sə ba ləzwəndʋn tɩ kʋ̀ʋ̀ wa!
22 Pa bubwiə nan ba dìì wa,
máŋá tə wa, n nə wá pa kwatara púlə́ bà,
ba dɩ̀ ba yuu!
Cɩ́gá, ba kʋa zanba gwàlʋ́,
sə ba ma ja nə,
ba səgə ba kə gəgəlu à nɛɛ də̀ń.
23 Yá n mʋ̀ Ba-Yígúrə́-Jə-Tiu yə̀ə́ ba táná tə mama ba nə tanɩ,
sə ba ma gʋ nə.
Dàn ká kwɛn ba cʋna tə n lɩ,
dàn ká sɩ̀n ba lwanɩ tə n lɩ n yáá con.
Pa ba tʋ n yáá con,
zɩgɩ ba nə n lɩŋa tə máŋá wa!