Wùrú tə nə lwə yoo
19
1 Nə̀ń kʋ tə Ba-Yígúrə́-Jə-Tiu nə swɩ̀n Zweremi con: «Vəli nəkənmarʋ con, n yə̀ daʋ wùrú. Kʋ kwa nə, n wá ja lalʋʋ tə yáá tɩ̀án tə, də Yɩɩ joŋwana nəkwɩna* tə, n kə kwa, 2 n ja nan n va Bɛn-Hinomə* vara tə con, ka nə wulə nəkənmara mimii tə yáá con, n bòrì sʋ̀ràn tə, à nə wá swɩ̀n n con, n bɩrɩ lá. 3 N wá swɩ̀n, n wʋ́: “Zwida pɛ̀gá-ba, də á mʋ̀ Zwerizalɛmə tɩ̀án-ba, á cʋga Ba-Yígúrə́-Jə-Tiu sʋgʋ! Nəŋə kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: À wá pa lɛɛ bà bwálɩ́ kʋ tə wa, yá lìù tə mama, ʋ nə wá nì kʋ, ʋ zɩan wá cʋrɩ. 4 Cɩ́gá, Zwida lɩ̀à tə vɩga nə ba dʋgʋ, ba ga pa bwálɩ́ kʋ tə jì wolwarɩgɩʋ. Ba sʋ̀rɩ́ wusinə lá nə, ba pa yɩa duən nə, ba tətə, nə à yə̀ə́ ba nyɩna-ba, nə à yə̀ə́ Zwida pɛ̀gá tə nə yəri tə. Yá ba súə́ bwálɩ́ kʋ tə də lɩ̀à tə nə wà yoo cʋ̀gʋ̀ jana. 5 Ba lwə̀ jwəŋə bwálá ba pa woŋwanʋ Baalə* nə, sə ba ma sʋ̀rɩ́ ba bɩ̀á mən wa, ndə jwəŋə nə ba nə sʋ̀rɩ́ ba pa kʋ. Kʋ yɩ yoo tə, à yà nə wà nii pɩn, sə kʋ tʋn, à yà nə wà kʋ yoo swɩ̀n, kʋ yoo ga wà à pubʋŋa wa twi də tətə.6 Kʋ mʋ̀ nə pɩn, nəŋə máŋá bɩ̀àn, ba nə kʋ́ʋ̀ ba bon bwálɩ́ kʋ tə “Tofɛtə*”, nə à yə̀ə́ “Bɛn-Hinomə vara”, yá ba dàń wá bon kʋ “Lagʋrɩ vara”. À mʋ̀ Ba-Yígúrə́-Jə-Tiu nii sʋgʋ nə! 7 Bwálɩ́ kʋ tə wa nə, à wá cʋ̀gʋ̀ Zwida lʋʋ lɩ̀à də Zwerizalɛmə tɩ̀án táná tə. À wá pa kwatara sɩ̀ʋ́ dɩ̀ ba tɩa, ba dʋŋa yáá con, kʋ twá də lɩ̀à tə nə pɩ̀à ba gʋrɩ jɩɩn. À wá pa ba tɩga jì lanworu zuŋi, də tɩa yuu vàná wodiu. 8 À wá pa tɩʋ kʋ tə jì yokəlu də mʋmʋn won. Lìù mama nə twá kʋ nii nə ʋ kɛ̀ń, kʋ wá gwárɩ́ wá, ʋ ga mʋn kʋ, cʋcʋran tə mama yɩrɩ ba nə cʋ̀gʋ̀ kʋ. 9 À wá pa ba də́ ba bɩ̀á də ba bwɩ̀ɩ́. À wá pa ba də́ duən nətʋ, máŋá tə wa, ba dʋŋa də lɩ̀à tə nə pɩ̀à ba gʋrɩ nə wá kə ba twárá də jɩgwarʋ wa.”
10 Yá kʋ kwa nə, n dàń wá farɩ wùrú tə tɩa n lwa, bara tə nə wulə də mʋ́ yɩ́á wa, n ga swɩ̀n ba con, n wʋ́: 11 “Nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: Mə nətʋ nə à wá lwa lalʋʋ kʋ tə, də tɩʋ kʋ tə, ndə ba nə lwə daʋ wùrú nətʋ, yá kʋ kʋ́ʋ̀ wàrɩ̀ kʋ kwɛn.
Yá ba wá gùrì tɩga Tofɛtə nə, bwálɩ́ don nə tə̀lə́, sə ba gùrì ba lá yɩrɩ. 12 Mə nətʋ nə à wá fwa bwálɩ́ kʋ tə də kʋ lɩ̀à tə yɩra, yá à wá pa tɩʋ kʋ tə jì ndə Tofɛtə nə. À mʋ̀ Ba-Yígúrə́-Jə-Tiu nii sʋgʋ nə! 13 Zwerizalɛmə dìì tə, də Zwida pɛ̀gá dìì tə wá ya durən bwálá, ndə Tofɛtə bwálɩ́ tə nə. Dìì tə də mama ba nə sʋ̀rɩ́ wusinə tə yuu wa, ba pa lanworu kacɩlacɛɛ nə, ba ga fwa divɛn jwəŋə lá, ba pa yɩa duən nə, wá ya durən bwálá.”»
14 Zweremi pìí ʋ nan Tofɛtə, bwálɩ́ tə nə Ba-Yígúrə́-Jə-Tiu yà nə tʋn wá, ʋ pa ʋ va ʋ swɩ̀n Yɩɩ nii sʋ̀ràn tə, ʋ bà. Yá ʋ vəli ʋ zɩgɩ Ba-Yígúrə́-Jə-Tiu dìə̀ tə dəwoo tə wa, ʋ swɩ̀n lalʋʋ tə mama con, ʋ wʋ́: 15 «Nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “À wá pa lɛɛ tə mama, à nə swɩ̀n tə yoo, tʋ tɩʋ kʋ tə tɩ̀án, də kʋ nii tɩbii tə mama tɩ̀án yuu wa, ba nə tʋn zɩbaniu, ba vɩ sə ba cʋgʋ à sʋ̀ràn tə yɩrɩ.”»