Lɩ̀à tə nə pɩn dun Yɩɩ nə də pùə́ nədʋ
66
1 Nəŋə kʋ tə Ba-Yígúrə́-Jə-Tiu nə swɩ̀n:lanworu tə yɩ à padaʋ,
yá tɩa tə yɩ à nɛɛ yinɩŋa bwálɩ́.
Bakʋn dìə̀ yiri nə, á wàá á lwè á pɩn nə?
Bwálɩ́ kwà nə wàá à sìə́ bwálɩ́ kʋ yanɩ?
2 Wiən təntə mama yɩ à mʋ̀ jɩɩn nə fwa tə,
yá mə nətʋ nə kʋ twá, tə mama ma wulə.
À mʋ̀ Ba-Yígúrə́-Jə-Tiu nii sʋgʋ nə!
Nəŋə lìù tə yɩra, à nə wá fwa pubwanʋ:
Kʋ yɩ lalaŋʋ tə ʋ nə wulə jɩgwarʋ wa,
ʋ ga dəri à fən, də ʋ nə nì à sʋgʋ tə.
3 Yɩɩ bá sɛ̀ ʋ jon lɩ̀à tə mama joŋi,
ba nə twá ba tətə pùə́ fɩra yìə̀n nə,
yá ba fwa ba fɩra ba yobalwaran tə wa.
Ba gwɩ nɩan ba ma fwa jwəŋə,
yá də kʋ mɛ, ba tə gwɩ ləzoni.
Ba gwɩ pəbii ba ma fwa jwəŋə,
yá də kʋ mɛ, ba tə gwɩ kukuri.
Ba fwa vàrʋ́ càlɩ̀ jwəŋə,
yá də kʋ mɛ, ba tə lwɛ́ tərən jana.
Ba sʋ̀rɩ́ wusinə jwəŋə,
yá də kʋ mɛ, ba tə pɩn dun woŋwanan nə.
4 À də kúrí à tì sə à yá ba,
ba tʋtʋnkʋkwɩnan tə wa,
yá à wá pa yojanan tə
ba nə dəri tə fən zənzən,
tʋ ba yuu wa.
Cɩ́gá, à bon ba,
yá lìù mama wà le,
à swɩ̀n ba con,
yá ba wà cʋgʋ.
Yá ba dàń tʋn kʋ tə nə lwara à yáá con,
ba ga kúrí ba tì,
sə ba tʋn kʋ tə à nə ba swə.
Ba-Yígúrə́-Jə-Tiu talɩkwa tʋtʋŋɩ
5 Á cʋga Ba-Yígúrə́-Jə-Tiu sʋgʋ,
á mʋ̀ lɩ̀à tə á nə dəri ʋ fən,
də á nə nì ʋ sʋgʋ tə.
Á nəŋə kʋ tə á nubɩa tə,
ba nə culi aba,
ba ga mʋ́mʋ́gá aba,
à mʋ̀ Ba-Yígúrə́-Jə-Tiu yɩrɩ, nə swɩ̀n:
«Ba-Yígúrə́-Jə-Tiu bɩrɩ ʋ dun tə,
sə nə na á pupwən nə wá ya nətʋ!»
Yá ba mʋ̀ nə wá də́ cavɩra.
6 Á cʋga! Zəzəgu naŋa tɩʋ tə wa!
Bubwiə naŋa Yɩɩ dìə̀ tə wa!
Kʋ yɩ Ba-Yígúrə́-Jə-Tiu nə wulə ʋ ŋwɩ́n
kʋ tə nə mɛ də ʋ dʋŋa, ʋ pɩn ba.
7 Siyon* tɩʋ tə lɩrɩ bìú, yá kʋ pùə́ wà yɩ̀!
Kʋ lɩrɩ bibɛɛ, yá kʋ yɩra wà cɛn!
8 Wàà tə nə dí yáá ʋ nì kʋ nətʋ tə yiri?
Wàà tə nə dí yáá ʋ na kʋ nətʋ tə yiri?
Lʋʋ nii wàá kʋ túŋə́ dɩɩn nədʋ naaa?
Dwíí yɩ ba lɩrɩ naa nədʋ naaa?
Siyon pùə́ tàà nə zə́n ka sinti,
sə ka yɩ̀ lɩrʋ yɩŋa,
də kʋ lɩrɩ kʋ bɩ̀á kʋ zwɛ̀!
9 À mʋ̀ Ba-Yígúrə́-Jə-Tiu bwe sə à jə́n,
à wàá kapuə à tanɩ,
à pɩn ʋ pùə́ tə bɩ ka yí lɩrʋ,
à ga cɩ̀ sə ʋ dàn ká lɩra naaa?
À mʋ̀, n tíú Yɩɩ tə bwe sə à jə́n,
à mʋ̀ Yɩɩ tə à nə pɩn lɩra wá cɩ̀,
sə ba dàn ká lɩrɩ naaa?
10 Á fwaga pupwən də Zwerizalɛmə,
á pɩan kʋ jì won á nə jwɛ kʋ yɩrɩ,
á mʋ̀ lɩ̀à tə mama, á nə swə kʋ!
Á twá á ya kʋ pupwən tə wa,
á mʋ̀ lɩ̀à tə mama,
á nə wulə lúə́ pucʋnɩ wa, kʋ yɩrɩ.
11 Á dàń wá nyʋn kʋ yɩla, á sú,
kʋ ga pa á bɩcan zuri,
yá á wá də́ ywánɩ́,
kʋ dun tə wa, tə nə ba zwɛ̀.
12 Cɩ́gá, à mʋ̀ Ba-Yígúrə́-Jə-Tiu nə swɩ̀n:
Nəŋə, à pɩn bɩcan sìə́ bɩ̀àn tɩʋ tə wa,
ndə mʋnaa nə,
à ga pa lʋʋ dwíə́ tə dun tə bɩ̀àn,
ndə nacoru nə, kʋ nɩ́á nə dəri də dɩ̀àn.
À wá kʋna aba də yɩla,
à ga gu aba à tàŋá wa,
nə à yə̀ə́ à kə aba à nɛɛ wa,
à pèrì á yɩra.
13 À wá kòrì aba,
ndə bisɩmaa nə, ʋ nuu nə kòrì.
À wá kòrì aba Zwerizalɛmə wa.
14 Á wá na kʋ nətʋ tə,
yá á pùə́ wá poli,
á kurən ga dàn ndə síí nii gaʋ nə.
Ba-Yígúrə́-Jə-Tiu wá pa ʋ tʋ̀tʋ̀nà tə lwarɩ
ʋ vàn tə nə jə dɩ̀àn nətʋ,
ʋ ga pa ʋ dʋŋa na ʋ lɩŋa tə nə fʋrɩ nətʋ.
15 Cɩ́gá, nəŋə Ba-Yígúrə́-Jə-Tiu wulə mən wa, ʋ bɩ̀àn,
yá ʋ səsen kòrə̀n tə yɩ ndə kùlì nə.
Ʋ fùrì ʋ bɩ̀àn sə ʋ fwi ʋ lɩŋa,
sə ʋ ga baa ʋ dʋŋa nii nə də mənvwə,
ka nə kwé kə̀lə̀kə̀lə̀.
16 Mən nə Ba-Yígúrə́-Jə-Tiu ma bʋ̀rɩ̀ bʋra,
ʋ kwatara sɩ̀ʋ́ nə ʋ ma bʋ̀rɩ̀ ləzwənə mama bʋra.
Lɩ̀à dáá zənzən,
Ba-Yígúrə́-Jə-Tiu bʋra tə nə wá ja.
17 Lɩ̀à kəni ba tɩ̀àn vàn nə,
ba pɩn woŋwanan nə,
ba ga kwɛn ba tɩ̀àn ba lɩ durən wa.
Ba pwí duən kwa,
ba vəli ba culu tɩ̀án kárɩ́ wa,
ba jəni ba kɩkarɩ,
ba də́ tərən nàŋá, də tatwaran,
də wokʋkwɩnan duən.
Ba mʋ̀ lɩ̀à təntə mama wá twá duən,
ba tɩ ba zwɛ̀.
Ba-Yígúrə́-Jə-Tiu nii sʋgʋ nə!
Yɩɩ wá kə lʋʋ dwíə́ tə mama duən yáá
18 À mʋ̀ yə̀ə́ ba tʋtʋnɛɛ də ba pubʋŋɩ. Máŋá yí sə à kə lʋʋ dwíə́ tə mama, də nəndəli sʋ̀ràn yiri mama lɩ̀à duən yáá nə, à pa ba bà, ba na à dun tə. 19 À wá kə mɩmɩnʋ ba wa, yá à wá tʋn ba lɩ̀à tə nə tɩga ba ga tə duən, dwíə́ nəkaran* tə con, sə ba swɩ̀n à dun tə yoo, ba bɩrɩ dwíə́ nəkaran tə wa, Tarəsisə nə, də Pulə nə, də Ludə nə, – twan tárá tə con – də Tubalə nə, də Yavan nə, də mʋʋ titəŋi wa lʋʋ níə́ tə wa tə nə ŋʋ́ná, bwálá tə mama nə, tə lɩ̀à nə wà dí yáá ba nì də ba swɩ̀n à yoo mɩ́ámɩ́án, yá ba ga wà à dun tə nɩ. 20 Yá ba dàń wá kə á nubɩa tə mama, ba yà nə wulə dwíə́ nəkaran tə wa, səsen yuu, də səsen kòrə̀n wa, də tɩrakwərən wa tə yuu nə piri, də bɩnasəsen yuu, də nyʋgʋmɛ yuu, ba ja bà ba pa à mʋ̀ Ba-Yígúrə́-Jə-Tiu nə, ndə zìlə́ won joŋi nə, à culu paan tə yuu wa, Zwerizalɛmə nə. À mʋ̀ Ba-Yígúrə́-Jə-Tiu nə swɩ̀n kʋ! Kʋ wá ya ndə Yɩzərayɛlə lɩ̀à tə nə yàá kə ba vàrʋ́ càlɩ̀ joŋi kəpurə wa, ka nə ba durən jə, ba ja bà ba pa nə, à mʋ̀ Ba-Yígúrə́-Jə-Tiu dìə̀ tə wa. 21 Yá à wá kúrí Yɩɩ joŋwana də Levi dwíí ba də wa. À mʋ̀ Ba-Yígúrə́-Jə-Tiu nə swɩ̀n kʋ!
22 Cɩ́gá, máŋá tə mama lanworu nədʋn tə də tɩa nədʋn tə à nə fwa, nə wá ya à yáá con, ndə à nə pɩ̀à nətʋ, mə nətʋ nə á dwíí tə də á yɩrɩ wá ya lʋʋ wa, máŋá mama wuuu. À mʋ̀ Ba-Yígúrə́-Jə-Tiu nii sʋgʋ nə!
23 Candʋan mama, də sìə́ dɩɩn mama,
lʋʋ ləzoni mama wá bà,
ba tʋ ba nadwana yuu à yáá con,
ba pa nə dun.
À mʋ̀ Ba-Yígúrə́-Jə-Tiu nə swɩ̀n kʋ!
24 Yá ba nə nan,
ba wá na lɩ̀à tə nə zàn ba zɩgɩ à nə tɩga.
Cɩ́gá, zʋnzʋran tə nə də́ ba, bá tɩ,
yá mən tə nə də́ ba, bá də̀ŋə̀.
Yá ba wá jì wolwan,
ba pa ləzwənə mama nə.