Bʋra tə nə bɩ̀àn yoo
65
1 À yá à tɩ̀àn à pa lɩ̀à təyà nə ba won lòrì twarɩ nə,
à yá à tɩ̀àn à pa ba tə
yà nə ba nə twarɩ, na nə.
À swɩ̀n dwíí con,
ba yà nə ba boŋə ba kəni à yɩrɩ tə nə,
à wʋ́: «Á nəŋə nə, á nəŋə nə!»
2 À te à jɩ̀àn máŋá mama lalʋʋ con,
ba zɩɩn nə ba nə̀ń,
ba nə wulə cwəkʋkwɩʋn wa,
ba tʋŋa ba pwìí fɩra yìə̀n.
3 Ba yɩ lalʋʋ, ba nə pɩ̀à à nii nə,
nəpon nəpon máŋá mama.
Ba fwa jwəŋə culu tɩ̀án kárɩ́ wa,
ba ga sʋ̀rɩ́ wusinə jwəŋə bwálá yuu wa,
ba nə lwə̀ də wárá.
4 Ba wulə libərə wa,
yá ba jwɩ pɩ̀ràn kwələ wa.
Ba də́ tərən nàŋʋ́,
yá durən wodirən wulə ba zwɩ̀ɩ́n wa.
5 Ba swɩ̀n, ba wʋ́:
«Ya yiŋʋnɩ də nə,
dàn ká yí à yɩra!
Cɩ́gá, n nə yí à yɩra,
n wá twá n jì Yɩɩ nyiən!»
Tə mʋ̀ yìə̀n təntə mama
yɩ ndə ŋwɩn nə, à mɩbʋran wa,
tə yɩ ndə mən nə, tə nə də́ máŋá mama.
6 À wá lìí kʋ yoo máŋá mama,
yá à bá pú à nii,
à wá kə ba càn wa, kʋ yoo tə yɩrɩ.
7 À wá kə ba càn wa, ba tətə yolwana tə
də ba nɩbara-ba yolwana tə yɩrɩ.
À mʋ̀ Ba-Yígúrə́-Jə-Tiu nə swɩ̀n kʋ!
Ba nɩbara-ba sʋ̀rɩ́ wusinə pɛɛn yuu wa,
ba ga pɩ̀à à nii nə dədwələn yuu wa.
Kʋ mʋ̀ yɩrɩ, à wá kə ba càn wa,
à ga ŋwɩ́n ba tʋtʋnɛɛ tə nə lɛ ŋwɩ́rán,
à pa ba.
8 Nəŋə kʋ tə Ba-Yígúrə́-Jə-Tiu nə swɩ̀n:
Lìù nə nɩ divɛn tɩ̀ʋ́ naa
də ka zɩn lənə zənzən,
ʋ yàá swɩ̀n, ʋ wʋ́:
«Dànà ká cʋ̀gʋ̀ ka,
nywarɩ wulə ka nə!»
Mə nətʋ nə à də wá tʋn, à tʋ̀tʋ̀nà tə yɩrɩ,
sə à dàn ká cʋ̀gʋ̀ ba mama.
9 À wá pa dwíí Zwakɔbə lɩ̀à tə nə,
yá à wá pa à pɛɛn tə Zwida dwíí tə nə,
sə tə ya ba tori.
Lɩ̀à tə à nə kúrí wá jon tə ba tɩnɩ,
yá à tʋ̀tʋ̀nà tə wá ya tə wa.
10 Swaronə vara tə wá ya vanmɩnɩ gaʋ bwálɩ́,
yá Akɔrə vara tə wá ya vanfaran yipaa bwálɩ́,
kʋ pa à lɩ̀à tə nə, ba nə twarɩ nə.
11 À vɩga à mʋ̀ Ba-Yígúrə́-Jə-Tiu á dʋgʋ,
yá á swɛ̀ɛ́ à culu paan tə yoo.
Á túŋə́ wodiu á pɩn Gadə nə,
kʋ nə yɩ jɩjə woŋwanʋ,
á ga kəni divɛn á swí wùrú zʋŋa,
á pɩn Meni nə,
kʋ nə yɩ yuywaŋʋ woŋwanʋ.
12 Kʋ mʋ̀ yɩrɩ,
à wá pa yuywaŋʋ kwatara sɩ̀ʋ́ nə,
sə kʋ də́ aba,
yá á mama wá tʋ á nadwana yuu,
sə ba gʋ aba.
Cɩ́gá, à bon aba, yá á wà le,
à swɩ̀n, yá á wà cʋgʋ.
Yá á dàń tʋn kʋ tə nə lwara, à yáá con,
á ga kúrí á tì, sə á tʋn kʋ tə à nə ba swə.
13 Kʋ mʋ̀ yɩrɩ, á nəŋə kʋ tə
à mʋ̀ Yuu-Tiu Ba-Yígúrə́-Jə-Tiu nə swɩ̀n:
À tʋ̀tʋ̀nà tə wá də́,
yá niən wá ja á mʋ̀.
À tʋ̀tʋ̀nà tə wá nyʋn,
yá nanyʋnɩ wá ja á mʋ̀.
À tʋ̀tʋ̀nà tə wá jwɛ,
yá á mʋ̀ wá də́ cavɩra.
14 À tʋ̀tʋ̀nà tə wá mà pupwən cə̀rí,
ba pùə́ nə poli yɩrɩ,
yá á mʋ̀ wá kwi,
á pùə́ nə cʋ̀gʋ̀ yɩrɩ,
á wá mà bubwiə,
jɩgwarʋ nə zʋa aba yɩrɩ.
15 Á tɩan kwa nə, á yɩrɩ wá jì won,
lɩ̀à tə à nə kúrí ma zɩrɩ zɩra, ba wʋ́:
«Yuu-Tiu Ba-Yígúrə́-Jə-Tiu wá gʋ mʋ́,
ndə ayaŋwɩn nə!»
Yá ʋ wá ja yɩrɩ don,
ʋ ma bon ʋ tʋ̀tʋ̀nà tə mʋ̀.
16 Lìù tə mama ʋ nə pɩ̀à
sə Yɩɩ fwa zəni ʋ yɩra, lʋʋ nii tə wa,
ʋ wá lòrì
sə Cɩ́gá Yɩɩ tə nə fwa zəni ʋ yɩra.
Yá lìù tə mama ʋ nə pɩ̀à
sə ʋ dù durə, lʋʋ nii tə wa,
ʋ wá dù də Cɩ́gá Yɩɩ tə yɩrɩ tə.»
Cɩ́gá, à wá swɛ̀ɛ́ yojanan tə nə kɛ̀ń yoo,
yá tə wá jɛ́n à yáá nə.
Lanworu nədʋn də tɩa nədʋn
17 Nə̀ń, à wá dɩ lanworu nədʋn
də tɩa nədʋn,
yá ba kʋ́ʋ̀ bá lìí yìə̀n tə nə kɛ̀ń yoo,
tə yoo kʋ́ʋ̀ bá pìí kʋ bà ba pubʋŋa wa.
18 Á dàń fwaga pupwən,
á ga jwɛ máŋá mama,
kʋ tə yɩrɩ à nə wulə à fwa.
Cɩ́gá, à wulə à fwa Zwerizalɛmə
sə à kə lʋʋ wa, pupwən yɩrɩ,
yá à fwa lɩ̀à à kə kʋ wa, sə ba jwɛ.
19 À wá jwɛ Zwerizalɛmə yɩrɩ,
yá à wá fwa pupwən à lɩ̀à tə yɩrɩ.
Kwirə, nə à yə̀ə́ bubwiə kʋ́ʋ̀ bá nì lá.
20 Bisɩmaa kʋ́ʋ̀ bá tɩ lá,
də ʋ jɩɩn mun zənzən,
bazʋnʋ də ma bá tɩ lá,
də ʋ tɩan máŋá wà yí.
Cɩ́gá, ba wa bisɩmaa wá tɩ
də ʋ jə bɩna bíí,
yá ba wá jələ yolwafwanʋ tə də tətə,
ʋ nə wá tɩ də ʋ jə bɩna bíí,
ndə lìù nə, zɩra nə wulə ʋ yuu wa.
21 Ba wá lwà dìì, ba ya tə wa,
ba ga wá cwɛn tɩ̀án kárɩ́, ba də́ tə lənə.
22 Ba bá lwà dìì,
sə lìù don nə zʋ tə wa,
ba ma bá cwɛn tɩ̀án kárɩ́,
sə lìù don nə də́ tə lənə.
Cɩ́gá, à lɩ̀à tə bɩna wá ya dánɩ́ lʋʋ wa,
ndə tɩ̀ʋ́ bɩna nə,
yá ba tə à nə kúrí
wá də́ ba jɩɩn tʋtʋŋɩ nywarɩ.
23 Ba bá na càn tʋtʋ,
yá ba bá lɩra bɩ̀á,
ba nə wá kə bɩcapuri ba nə.
Cɩ́gá, ba wá jì dwíí,
Ba-Yígúrə́-Jə-Tiu nə fwa zəni ba yɩra,
ba mʋ̀ də ba bɩ̀á mɛ,
ba nə wá kə lʋʋ wa.
24 À wá sɛ̀ ba boŋə,
də ba tə wá bon ba kə à nə.
À wá le ba,
də ba tə wá swɩ̀n ba zwɛ̀.
25 Cirəkurə də pəbiə wá də́ bwálɩ́ nədʋ nə,
yá gəru wá də́ gaʋ ndə naʋ nə,
pùrú ga nə wá ya dən wodiu.
Tə bá tʋn yolwan mama duən yɩra,
yá tə bá cʋ̀gʋ̀ cʋcʋran də mama,
à culu paan tə yuu wa.
À mʋ̀ Ba-Yígúrə́-Jə-Tiu nə swɩ̀n kʋ!