64
1 N nə yə̀ə́ mən nə yàá kwe gaʋ nə nətʋ,n nə yə̀ə́ mən nə pɩn nɩ́á cʋrɩ nətʋ,
mə nətʋ nə n dʋŋa wá lwarɩ n yɩrɩ,
yá lʋʋ dwíə́ wá vɩvaga n yáá con.
2 Máŋá tə wa n nə tʋn yogwaran,
nə yà nə ba tə yala jə,
n cúə́, yá pɛɛn vuvugu n yáá con.
3 Lìù mama wà nì də ba swɩ̀n,
lìù mama ma wà mɩ̀àn ʋ na,
yá lìù mama yii wà dì,
də yɩɩ don tʋn nətʋ lɩ̀à tə yɩra,
ba nə ken ba yala ʋ nə, də kʋ nə tà n mʋ̀.
4 N yàá va n jəri lɩ̀à tə nə swə
sə ba tʋn kʋ tə nə tì cɩ́gá cwəŋə,
də ba tə nə lìí n yoo, n coŋi tə yuu wa.
Yá n lɩŋa zàn nə yuu wa,
nə nə tʋn cʋna yɩrɩ,
yá kʋ tə yɩ n coŋi tə yuu wa nə,
nə yàá na jonu máŋá mama.
5 Nə mama jìgə̀ ndə durən lɩ̀à nə,
yá nə cɩ́gá cwəŋə tʋtʋnɛɛ tə mama
yɩ ndə gandurua nə,
nə mama pɩ̀nɩ̀ ndə tɩ̀ʋ́ vʋran nə,
nə cʋna tə ga jàŋà nəba ndə vʋʋ nə.
6 Lìù tə̀lə́ ʋ nə boŋə ʋ kəni n yɩrɩ tə nə,
ʋ nə jə yawala, sə ʋ vwa ʋ tɩ̀àn n nə.
Cɩ́gá, n viviri n kwa n ma sà nəba,
n ga yá nəba n pa nə də́ càn,
nə cʋna tə yɩrɩ.
7 Yá n mʋ̀ Ba-Yígúrə́-Jə-Tiu nə yɩ nə nyɩna.
Nə mʋ̀ yɩ daʋ,
yá n mʋ̀ nə yɩ nəkənmarʋ tə,
n nə ma nəba.
Nə mama yɩ n jɩɩn tʋtʋŋɩ.
8 Ba-Yígúrə́-Jə-Tiu, nə lòrì mʋ́,
dàn ká pa n lɩŋa zàn nə yuu wa, tə ja lɛ.
Dàn ká lìí nə yolwan tə yoo, máŋá mama.
Nə lòrì mʋ́ sə n ywàń
də nə mama yɩ n mʋ̀ lɩ̀à.
9 Lɩ̀à kʋ́ʋ̀ tə̀lə́ n tɩ̀án tə wa,
tə nə yɩ n mʋ̀ Yɩɩ nə tɩ.
Siyon* tɩʋ tə jìgə̀ kasɔɔ lanworu,
Zwerizalɛmə cʋ̀gʋ̀ mɩ́ámɩ́án.
10 Nə Yɩɩ dìə̀ tə nə yɩ parɩ*, ka ga jə dun,
bwálɩ́ tə nə nɩbara-ba yà nə səni mʋ́,
jìgə̀ mənvwə nii wodiu.
Yá won tə mama nə yà nə jə,
kʋ nə jə funə, cʋ̀gʋ̀ mɩ́ámɩ́án.
11 Yìə̀n təntə mama yáá con, n tə wá pɩ́án,
n ja n tɩ̀àn naaa, Ba-Yígúrə́-Jə-Tiu?
N tə wá cɩ́nɩ́, n ga yá n pa
nə də́ càn zənzən, nə ja lɛ naaa?