Ba-Yígúrə́-Jə-Tiu wá fwi ʋ lɩŋa, ʋ lɩ̀à tə yɩrɩ
63
1 Wàà nə nan Edɔmə lʋʋ nii con ʋ bɩ̀àn?Wàà nə nan Bɔsəra tɩʋ tə con
ʋ bɩ̀àn də gansɩan mwin də ganmʋla,
ʋ ga kwɩ̀án yɩɩ nə, ʋ zɩga də dɩ̀àn,
ʋ ga swə ʋ tɩ̀àn?
À mʋ̀ Ba-Yígúrə́-Jə-Tiu nə swɩ̀n,
kʋ twá cɩ́gá cwəŋə nə,
à mʋ̀ ga nə jə dɩ̀àn, sə à jon lɩ̀à.
2 Bɛ̀ɛ̀ nə pɩn n gànàn ma sɩ̀àn,
ndə lìù tə nə nɩŋɩ divɛn tɩ̀án bɩ̀á
gwàlʋ́ wa, gànàn nə?
3 À cɩcɩ nə nɩŋɩ divɛn tɩ̀án bɩ̀á gwàlʋ́ wa,
lalʋʋ tə wa lìù mama wà twá ʋ ya lá.
À nɩŋɩ lalʋʋ tə də lɩŋa,
à tɩtaga ba də lɩŋa tə nə fʋrɩ.
Ba jana fan tə tʋ à gànàn nə,
à ja tə à tà à gànàn mama.
4 Cɩ́gá, à yà tanɩ máŋá, sə à fwi à lɩŋa,
yá bɩnɩ tə à nə wá pìí
à yə̀ à lɩ̀à tə mama à jon yí.
5 À ywàŋá, à pɩ̀à lìù sə ʋ san nə,
yá à wà lìù mama nɩ.
Kʋ gwárɩ́ nə,
à nə wà lìù mama nɩ
sə ʋ dàn à jɩɩn yɩrɩ.
Yá à vàn dàń nə pɩn à də́ dɩ̀àn,
à lɩŋa tə nə fʋrɩ nə yɩn à sáŋʋ́.
6 À nɩŋɩ lalʋʋ à tɩtaga də lɩŋa,
à pɩn ba nyʋn à lɩŋa tə nə fʋrɩ,
ba sú ba bʋbʋnɩ ndə sana nə,
yá à lwá ba jana tɩa yuu wa.
Ba-Yígúrə́-Jə-Tiu wʋywaŋʋ tə yoo
7 À wá lìí Ba-Yígúrə́-Jə-Tiu
wʋywaŋʋ* tʋ̀tʋ̀nán tə yoo,
də won tə nə pɩn nə bwɩ ʋ nə.
Kʋ yɩ Ba-Yígúrə́-Jə-Tiu
tʋtʋnzəŋə tə mama yɩrɩ,
də ʋ pubwanʋ nəfarʋ tə,
ʋ nə tʋn Yɩzərayɛlə lɩ̀à yɩra,
də zəni tə ʋ nə tʋn ba yɩra,
kʋ twá ʋ nə dəri ba yinəgə,
ʋ ga yɩ wʋywaŋʋ tíú yɩrɩ.
8 Ʋ yà swɩ̀n, ʋ wʋ́:
«Ba cɩ́gá yɩ à mʋ̀ lɩ̀à,
bìsɩ́ná, ba nə ba kʋ̀nkʋ̀n kʋ̀nɩ̀!»
Yá ʋ yɩn ba jonu.
9 Ba jɩgwarʋ tə mama wa,
kʋ yɩn jɩgwarʋ kʋ pa ʋ də nə,
yá tʋntʋnʋ tə nə wulə ʋ yáá nə,
ʋ tʋn, ʋ pa ʋ jon ba.
Ʋ sonu tə də ʋ yinəndəri tə wa,
ʋ tətə nə yə̀ ba ʋ jon,
yá ʋ san ba, ʋ ga zɩn ba,
máŋá tə mama wa, ka nə kɛ̀ń.
10 Yá ba vɩga nii,
ba ga zàn ba zɩgɩ ʋ nə.
Ba cʋ̀gʋ̀ ʋ Siŋu tə nə yɩ parɩ* pùə́ nə,
kʋ pa ʋ lwàń ʋ jì ba dʋŋʋ,
yá ʋ tətə dàń pìí ʋ ta ba.
11 Ʋ lɩ̀à tə pìí ba lìí máŋá tə nə kɛ̀ń yoo,
ba pìí ba lìí Moyizə máŋá yoo,
ba ga swɩ̀n, ba wʋ́::
«Lìù tə nə lɩ ba mʋʋ tə wa, wulə yə̀n nə,
ʋ mʋ̀ lìù tə nə lɩ ʋ pee tə də ʋ payɩra tə?
Lìù tə yà nə kəni ʋ Siŋu tə nə yɩ parɩ
ba yuu wa, wulə yə̀n nə?
12 Ʋ mʋ̀ vago yà nə wulə Moyizə jɩzən vàn nə,
kʋ saŋa wá, kʋ pɩn ʋ də́ dɩ̀àn.
Ʋ mʋ̀ yà nə pwɛ̀ nɩ́á tə ba yáá con,
sə ʋ ma pa ʋ yɩrɩ na dun máŋá mama wuuu.
13 Ʋ mʋ̀ yà nə pɩn ba twá mʋʋ də̀ń ba nan,
ndə səsən nə, kasɔɔ lanworu wa,
ba ga wà ba naa mà.
14 Ba-Yígúrə́-Jə-Tiu siŋu tə jɩn ba,
kʋ va sìə́ bwálɩ́ nə,
ndə vàná nə, tə nə cwí vara wa.»
Mə nətʋ nə n mʋ̀ Ba-Yígúrə́-Jə-Tiu ken n lɩ̀à tə cwəŋə nə,
n ma pa dun nəfarʋ n yɩrɩ tə nə.
Lòrí yɩjʋnɩ
15 Zɩgɩ lanworu tə wa n ywàń,
zɩgɩ n wúlú bwálɩ́ tə nə yɩ parɩ,
kʋ ga jə dun tə wa, n ywàń n jə́n,
n sonu nəfarʋ tə də n babarɩ tə wa yə̀n?
Nə yoo kʋ́ʋ̀ ba n bɩcan nə dɩŋɩ,
yá n kʋ́ʋ̀ ba nə yinəgə dəri.
16 Yá n mʋ́ nə yɩ nə nyɩna,
nə nɩbɛɛ Abərahamə wà nəba yəni,
yá Yɩzərayɛləa də yəri nəba.
N mʋ́ Ba-Yígúrə́-Jə-Tiu nə yɩ nə nyɩna,
n yɩrɩ nə yɩ «Jonu tə n nə yə̀ nəba n joŋə»,
kʋ máŋá nə ba yigə.
17 Ba-Yígúrə́-Jə-Tiu, bɛ̀ɛ̀ nə pɩn n ma pa
nə ywan nə va yiŋʋnɩ, nə yá n coŋi tə?
Bɛ̀ɛ̀ nə pɩn n yá n pa nə yii kʋ̀,
kʋ pa nə kʋ́ʋ̀ ba n fən dəri?
Taa nə mʋ̀ n tʋ̀tʋ̀nà tə,
də dwíə́ tə nə yɩ n mʋ̀ nyiən yɩrɩ,
n pìí n bà nə con.
18 Lalʋʋ tə nə yɩ n mʋ̀ Yɩɩ nə tɩ,
jon lʋʋ nii tə
ba tɩnɩ máŋá mancɩn cɩcɩ wa.
Nə dʋŋa nɩŋɩ ba nɛɛ n wúlú bwálɩ́ tə wa.
19 Nə jìgə̀ ndə lɩ̀à nə,
n nə ba pàrɩ̀ nə yuu wa də́,
kʋ máŋá nə ba yigə.
Nə jìgə̀ ndə lɩ̀à nə,
ba nə ba n yɩrɩ tə ma boŋə ba.
Aaa! N yà nə sɛ̀ n kàrɩ́ lanworu tə, n cú,
pɛɛn ya wá vuvugu n yáá con!