Ba-Yígúrə́-Jə-Tiu pìí ʋ kwɛn Zwerizalɛmə
62
1 À wá taa Siyon* tɩʋ tə yɩrɩ, à ba à nii pwí,à wá taa Zwerizalɛmə yɩrɩ, à ba sənbwen zɩga,
kʋ cɩ́gá cwəŋə tə kori ka pɛ́n ka nan, ndə poni nə,
kʋ jonu tə ga ya ndə málɩ́ mən nə, tə nə kwé.
2 Lʋʋ dwíə́ tə wá na n cɩ́gá cwəŋə tə,
pɛ̀gá tə mama ga wá na n dun tə,
yá ba wá bon mʋ́ də yɩrɩdʋn,
Ba-Yígúrə́-Jə-Tiu nə wá dɩ ʋ pa mʋ́.
3 N wá ya ndə payupuu nə, kʋ nə jə fɩra,
Ba-Yígúrə́-Jə-Tiu jɩɩn wa,
ndə pɩ̀ʋ́ yubarʋ nə, n tíú Yɩɩ jɩpɩrɩ wa.
4 Ba kʋ́ʋ̀ bá bon mʋ́ «Ba vɩga ba dʋgʋ»,
ba kʋ́ʋ̀ bá swɩ̀n də n tɩa tə yɩ «Cʋcʋran» bwálɩ́.
Ba dàń nə wá bon mʋ́ «À fɩra wulə ʋ nə»,
ba ga bon n tɩa tə «Kan tíú!»
Cɩ́gá, n wá ya Ba-Yígúrə́-Jə-Tiu fɩra won,
yá ʋ wá swe n tɩa tə.
5 N bɩ̀á tə wá swe mʋ́,
ndə balandʋrʋ nə swe kacɩɩn nətʋ,
yá n wá poli n tíú Yɩɩ pùə́,
ndə kadʋrʋ nə poli ʋ barɩ pùə́ nətʋ.
6 À zɩgɩ tɩʋ nəcɩra n bírí tə yuu, Zwerizalɛmə.
Yɩcaʋ də tɩtɩn mama, ba bá pú ba níə́.
Á ba sìə́ jə, á mʋ̀ lɩ̀à tə
á nə boŋə á kəni Ba-Yígúrə́-Jə-Tiu nə,
sə ʋ lìí Zwerizalɛmə yoo!
7 Á dànà ká yá á pa ʋ na sìə́,
kʋ va kʋ yí máŋá tə,
ʋ nə wá pìí ʋ kwɛn Zwerizalɛmə,
ʋ pa kʋ jì tɩʋ ba nə bwɩ kʋ nə.
8 Ba-Yígúrə́-Jə-Tiu zɩ̀n ʋ jɩzən yɩɩ nə,
ʋ ma dù, də ʋ wá twá də ʋ vago,
ʋ ma tʋn yoo təntə.
Ʋ swɩ̀n, ʋ wʋ́:
«À kʋ́ʋ̀ bá pa n mɩna n dʋŋa nə, sə ba də́,
yá vərə bɩ̀á kʋ́ʋ̀ ba nyʋn n divɛn nədʋn tə,
n nə dí càn kʋ yɩrɩ.
9 Yá lɩ̀à tə nə wá ca mɩna, nə wá də́ tə,
ba ga bʋ Ba-Yígúrə́-Jə-Tiu nə,
yá ba tə nə wá pʋ̀rɩ́ divɛn tɩ̀án bɩ̀á,
nə wá nyʋn tə divɛn,
à wúlú bwálɩ́ dəwoo tə wa.»
10 Á naŋa, á twá mimien tə á nan!
Á tana cwəŋə á pa lalʋʋ tə nə!
Á cɛŋa, á cɛŋa cwəŋə,
á lɩa kapana tə ka wa!
Á zɩan kʋ̀ʋ̀ mɩmɩnʋ yɩɩ nə,
lʋʋ dwíə́ tə yuu con.
11 Nə̀ń, Ba-Yígúrə́-Jə-Tiu pɩn ba bòrì kʋ,
tɩa nii yígúrə́ mama wa, ʋ wʋ́:
«Á swɩ̀án Siyon bʋ̀áa tə con,
də ʋ jonu tə bɩ̀àn,
yá ʋ ja ʋ ŋwɩ́rán ʋ kə lá ʋ bɩ̀àn,
ʋ ken ʋ tʋtʋŋɩ ŋwɩ́rán ʋ yáá, ʋ ja bɩ̀àn.»
12 Ba wá bon ba «Lalʋʋ tə nə yɩ Yɩɩ nə tɩ,
Lɩ̀à tə Ba-Yígúrə́-Jə-Tiu nə yə̀ ʋ jon!»
Yá ba wá bon n mʋ̀ «Tɩʋ tə ba nə pɩ̀à,
Tɩʋ tə ba nə wà vɩ ba dʋgʋ!»