Tʋntʋnʋ tə nə swɩ̀n sʋywáŋʋ́
61
1 Yuu-Tiu Ba-Yígúrə́-Jə-Tiu Siŋu* tə wulə à yuu wa.Cɩ́gá, ʋ twɛ́n dun nʋga* à yuu wa,
ʋ ga tʋn nə, sə à swɩ̀n ʋ sʋywáŋʋ́ tə
à bɩrɩ lalaŋa nə,
sə à zuri lɩ̀à tə bɩcanɩ, pucʋnɩ nə yí ba,
sə à bòrì à pa ywə́ŋə́ lwarɩ də ba wá tɩnɩ ba tɩ̀àn,
sə bàń dìə̀ lɩ̀à ga yəni də ba wá dʋgʋ ba.
2 Ʋ tʋn nə, sə à bòrì à pa ŋwɛn,
də kʋ yɩ bɩnɩ, Ba-Yígúrə́-Jə-Tiu
nə wá fwa pubwanʋ ʋ lɩ̀à tə yɩra,
yá kʋ yɩ máŋá, nə tíú Yɩɩ
nə wá fwi ʋ lɩŋa ʋ dʋŋa yuu wa.
Ʋ tʋn nə, sə à kòrì lɩ̀à tə mama,
ba nə wulə lúə́ pucʋnɩ wa,
3 sə à lɩ Siyon tɩ̀án lúə́ pucʋnɩ wa,
sə à pe tʋnan tə à lɩ ba yuu wa,
à ga ba dun yubarʋ ba yuu nə,
sə à lɩ ba lúə́ pucʋnɩ wa,
à ga pa ba tùrì pupwən nʋga,
sə à lɩ ba jɩgwarʋ wa,
à ga pa ba dɩ pupwən gwaran,
yá ba dàń wá bon ba «Cɩ́gá cwəŋə tɩ̀án!»
«Ba-Yígúrə́-Jə-Tiu tɩ̀án kárá,
ka nə bɩrɩ ʋ dun tə!»
4 Ba wá pìí ba lwà dibwərən nədwara tə,
ba wá pìí ba zɩ̀n bwálá tə dʋŋa nə cʋ̀gʋ̀,
máŋá wa ka nə kɛ̀ń,
ba ga pìí ba kwɛn tɩan tə dʋŋa nə cʋ̀gʋ̀,
kʋ máŋá nə ba yigə.
5 Vərə wá ya lá, ba yɩ̀rɩ̀ á vanmɩnɩ,
yá vərə bɩ̀á nə wá vàrà á kárɩ́,
də á divɛn tɩ̀án kárɩ́, ba pa aba.
6 Yá á mʋ̀, ba wá bon aba
«Ba-Yígúrə́-Jə-Tiu joŋwana!»
Ba wá swɩ̀n də «á yɩ á tʋŋa
á pɩn nə tíú Yɩɩ nə!»
Á wá də́ lʋʋ dwíə́ tə jɩjə wiən,
yá á wá ja ba dun á ma bʋ á tɩ̀àn nə.
7 Á kʋ́ʋ̀ bá də́ cavɩra,
yá á dàń wá na tori dəkurən bələ.
Ba kʋ́ʋ̀ bá fʋfʋlɩ aba,
yá á dàń wá mà pupwən cə̀rí,
tori tə yɩrɩ á nə wá na.
Cɩ́gá, á wá na tori dəkurən bələ, á lʋʋ nii tə wa,
yá á wá ya pupwən wa, máŋá mama wuuu.
8 Cɩ́gá, à mʋ̀ Ba-Yígúrə́-Jə-Tiu swə
yoo tə nə twá cɩ́gá nə,
ndə kʋ nə mɛ nətʋ,
yá à culi ŋwɩ̀rɩ̀ də cavɩyiən.
À wá ŋwɩ́n á ŋwɩ́rán à pa aba,
ndə kʋ nə mɛ nətʋ,
à ga tún nimarʋ də aba,
kʋ nə wá ya lá máŋá mama wuuu.
9 Ba wá lwarɩ ba dwíí tə swɩ́án,
lʋʋ dwíə́ tə mama wa,
yá ba wá lwarɩ ba bɩ̀á tə swɩ́án,
lʋʋ ləzoni tə mama wa.
Lɩ̀à tə mama ba nə wá na ba,
wá lwarɩ də ba yɩ dwíí,
Ba-Yígúrə́-Jə-Tiu nə fwa zəni ba yɩra.
Lɛ̀ɛ̀ kənu gwaran
10 À wá jwɛ də à waa mama,
Ba-Yígúrə́-Jə-Tiu yɩrɩ,
à wá sú də pupwən à tíú Yɩɩ yɩrɩ.
Cɩ́gá, ʋ jon nə, yá kʋ yɩ ndə gànʋ̀ nə,
ʋ nə ma zʋ nə.
Ʋ ja cɩ́gá cwəŋə ʋ piri nə, ndə gansara nə,
ndə kadʋrʋ barɩ, nə à yə̀ə́ Yɩɩ joŋwanʋ
nə yàá ba nanʋn yubarʋ ʋ yuu nə,
nə à yə̀ə́ ndə kadʋrʋ nə yàá ja bwanzɩla,
ʋ ma kwɛn ʋ tɩ̀àn.
11 Cɩ́gá, ndə tɩa nə yàá pa
wobiu pɛ́n kʋ nan nətʋ,
nə à yə̀ə́ ndə dəŋə kəduə nə yàá pa
wodwii pɛ́n kʋ nan nətʋ,
mə nətʋ nə Yuu-Tiu Ba-Yígúrə́-Jə-Tiu
wá pa cɩ́gá cwəŋə də pupwən gwaran pɛ́n tə nan,
lʋʋ dwíə́ tə mama yáá con.